“We Mi Jusum blong Testifae Abaot Nem blong Mi”

I Kam long Elda Deved A. Bedna

Blong Kworom blong Olgeta Twelef Aposol

I gud tumas blong gat ol olfala man we oli raep gud long spirit we oli stap long senia lidasip posisen blong Jos we i kambak blong Jisas Kraes

Long 1996, Presiden Godon B. Hinkli i kamaot long televisen nius program, 60 minit.. Maek Wales, wan eksperiens mo strong junalis, i intaviu long Presiden Hinkli long saed blong plante impoten poen.

Kolosap long en blong storian blong tufala, Mista Wales i se: “I gat sam i talem se ‘Hemia wan Jos blong ol olfala. Ol olfala nomo oli lidim jos ia.’”

Presiden Hinkli i smael gud, mo i ansa kwiktaem: “?Yu no ting se i gud tumas blong wan man we i raep gud long tingting i stap long hed, wan man we i gat gud jajmen, we i no go lef o raet folem win blong eni kaen doktrin?” (brodkas long 7 Epril 1996).

Gol blong mi i blong eksplenem from wanem, i tru we i gud tumas blong gat ol olfala man we oli raep gud long spirit we oli stap long senia lidasip posisen blong Jos we i kambak blong Jisas Kraes— mo from wanem yumi mas “harem” mo “mekem folem” (Mosaea 2:9) ol tijing blong olgeta man ia we Lod i bin jusum blong talem testemoni abaot nem blong mi long medel blong evri nesen, famle, lanwis mo pipol” (D&C 112:1).

Mi prea se, oltaem, bae Tabu Spirit i tijim yumi taem yumi tingting tugeta long impoten topik ia.

Wan Lesen blong Laeftaem

Mi tokbaot topik ia long wan defren lukluk. Long ol las leven yia, mi nao mi memba we i moa yang long Kworom blong Olgeta Twelef Aposol, long saed blong yia we yumi bon long wol. Long taem blong seves blong mi, ol man we oli givim seves long Fas Presidensi mo Kworom blong Olgeta Twelef Aposol i samples 77 yia—mo hemia i wan medel yia blong ol Aposol long ol las 11 yia blong dispensesen ia.

Mi bin gat blesing wetem eksperiens blong ol aposol, ol lida blong jos, blong miwan mo long wok, mo tu ol tingting blong ol memba blong kworom we mi wok wetem. Wan eksampol blong frensip blong mi wetem Elda Robet D. Hels i haelaetem ol gudfala janis we mi bin gat blong lanem samting mo wok wetem olgeta lida ia.

Sam yia i pas, mi spendem wan Sandei aftenun wetem Elda Hels long haos blong hem taem hem i stap kam gud long wan bigfala sik. Mifala i tokbaot famle blong mifala, kworom responsabiliti blong mifala mo ol impoten eksperiens.

Nao mi askem Elda Hels: “Yu yu gat sakses olsem wan hasban, papa, spotman, bisnis wokman, mo Jos lida. ?Wanem lesen nao yu bin lanem taem yu kam olfala mo paoa blong bodi blong yu i stopem yu long sam samting?”

Elda Hels i stop smol taem, mo ansa: “Taem yu no save mekem wanem yu bin stap mekem oltaem, nao yu mekem nomo wanem i impoten moa.”

Mi sek long simpol mo andastaning we i kamaot long tingting mo ansa blong hem. Aposol fren we mi lavem, i serem wetem mi, wan lesen blong laeftaem—wan lesen we hem i lanem tru long harem nogud blong sobodi, mo fasin blong lukaotem Spirit. Wei blong tingting we Elda Hels i serem wetem mi, i kam long heven mo givim insperesen long mi.

Taem Bodi i Nomo Strong mo Tingting i Nomo Strong

Taem bodi i blokem yu blong mekem samting from se yu kam olfala, i save kam olsem wan ples blong lanem samting long saed blong spirit mo gat niu lukluk. Ol samting ia, we plante oli biliv se i stap stopem ol wokman ia blong wok gud, oli stap olsem bigfala paoa long olgeta. Taem bodi i no save mekem tumas, nao visen i kam bigwan. Taem wan i no gat tumas paoa long bodi i mekem ol fas wok oli kam klia. Taem wan i no save mekem samting, i save pusum hem blong luk long samfala samting we oli moa impoten.

Sam oli talem se i nidim sam moa yang mo moa strong lida insaed long Jos blong lukluk gud long ol bigfala jalenj blong wol blong tedei. Be Lod i no yusum ol lidasip tingting mo praktis blong tedei blong mekem stamba tingting blong God i kamtru (luk long Aesea 55:8–9). 55:8–9).. I gud yumi save se Presiden mo ol nara senia lida blong Jos, oltaem bae oli ol man we oli olfala mo oli gat eksperiens.

Rod we Lod i soemaot blong lidim Jos i blong gat kaonsel mo hemia i daonem rong desisen blong man. I gud blong luk se ol samting we i blokem bodi blong ol man ia, i konfemem tabu ples ia we ol revelesen oli kamaot long hem, mo tru long olgeta. I tru, God i singaotem ol man ia tru long profesi (luk long Ol Toktok blong Bilif 1:5).

Wan Rod we I Stap blong Stap Rere

Tru long olgeta Brata blong mi, mi bin luksave stamba tingting blong gat ol olfala man we oli gat raep tingting mo jajmen oli stap long ol senia lidasip posisen blong Jos. Ol man ia, Lod i tijim olgeta blong wan longfala taem, mo oli ripresentem, givim seves mo lavem Hem. Oli lan blong andastanem tabu lanwis blong Tabu Spirit mo ol rod we Lod i putum i stap blong kasem revelesen. Ol man ia, Lod i developem olgeta bigwan mekem visen blong olgeta i stretgud, i lidim niu tingting, i givim lav long ol pipol blong evri nesen, situesen, mo oli konfemem se Kambak blong Jos i tru.

Mi witnesem plante taem mo plante taem we ol Brata lida blong mi oli traehad wetem strong tingting blong mekem mo wok strong long ol responsabiliti blong olgeta, mo semtaem, traehad wetem ol bigfala problem blong helt. Ol man ia, oli stap kasem hadtaem tu. Be, oli gat blesing mo oli kam strong blong gohed wetem strong tingting, mo semtaem, oli gotru long mo wetem ol hadtaem.

Taem mi stap givim seves wetem ol ripresentativ blong Lod, mi kam blong save se wanem we oli wantem bigwan i blong faenemaot mo mekem tingting blong Papa long Heven mo Pikinini we Hem i Lavem. Taem mifala i kaonsel tugeta, insperesen i kam mo mifala i mekem desisen we i folem mak blong laet mo trutok ia we i bitim save blong man, fasin blong tingting blong man, mo eksperiens blong man. Taem mifala i wok wan long yuniti long ol bigfala problem, waes mo save blong mifala evriwan long saed blong wan topik i kam bigwan moa long sam wei we mifala i no ting tru long paoa blong Tabu Spirit.

Mi gat blesing blong lukluk evri dei, ol fasin, ol paoa, mo hae fasin blong wanwan blong ol lida blong Jos ia. Taem ol Brata lida oli mekem sam mistek olsem evri nara man, sam pipol oli tekem hemia se i trabolem olgeta mo fet i go daon. Long mi, olgeta samting we oli no strong long olgeta i leftemap tingting mo i leftemap fet.

Wan Moa Samting we Mi Luk

Naoia i stap, mi bin luk sikis long ol Brata lida blong mi oli finisim seves blong olgeta long wol, mo tru long ded blong bodi, oli go kasem samfala niu responsabiliti long spirit wol: Presiden Jemes E. Faost, Presiden Godon B. Hinkli, Elda Josef B. Witlin, Elda L. Tom Peri mo Presiden Boed K. Peka, mo Elda Rijad G. Skot.

Ol strong Brata Lida ia oli givim “ful sol blong olgeta” (Omni 1:26) blong testifae abaot nem blong Jisas Kraes long ful wol. Ful tijing blong olgeta i no gat praes long hem.

Olgeta wokman ia, oli bin serem wetem yumi long ol las yia blong seves blong olgeta long wol ia, ol lesen we i gat paoa we oli bin lanem tru long plante yia blong seves wetem konsekresen. Ol lida ia, oli bin serem ol trutok we oli bigwan tumas, mo semtaem, sam oli ting se oli no givim fulap.

Tingting long ol las tijing blong ol hae profet long ol skripja: Eksampol, Nifae i talem long en blong histri blong hem se: “from olsem ia nao Lod i bin givim oda long mi, mo mi mas obei.” (2 Nifae 33:15).

Kolosap long en blong laef blong hem, Jekob i talem strong:

“Yufala i sakem sin, mo kam insaed long get we i no bigwan, mo gohed long rod ia we i smol, kasem taem we bae yufala i kasem laef we i no save finis.

“O stap waes, ?bae mi save talem wanem moa?” (Jekob 6:11–12).

Mo Moronae i finisim wok blong hem blong mekem rere ol buk wetem hop long Laef Bakegen long Ded: “I no longtaem bae mi go spel long paradaes blong God, kasem taem we spirit blong mi mo bodi bae i kam tugeta bakegen, mo hae Jehova i tekem mi tru long skae, blong mitim yufala long fored blong gudfala kot blong hae Jehova, Jaj we i No Save Finis blong olgeta we oli stap laef tugeta wetem olgeta we oli ded” (Moronae 10:34).

Yu mo mi, i gat blesing blong lanem samting aot long ol las tijing mo testemoni blong ol lata-dei profet mo aposol. Ol nem tedei, oli no Nifae, Jekob, mo Moronae—be Presiden Jemes E. Faost, Presiden Godon B. Hinkli, Elda Josef B. Witlin, Elda L. Tom Peri, Presiden Boed K. Peka mo Elda Rijad G. Skot.

Mi no stap talem se ol las mesej blong ol gudfala man ia oli moa gud o moa impoten long seves blong olgeta. Be, ful samting we oli lanem mo eksperiens blong laef blong olgeta i mekem se ol lida ia oli save tokbaot moa ol trutok we oli no save finis we oli tru evriwan mo oli gat bigfala paoa we i save go insaed long hat blong man.

Long las toktok blong hem long jeneral konfrens long Epril 2007, Presiden Faost i bin talem:

Sevya i bin givim yumi evriwan wan pis we i bigwan tumas tru long Atonmen blong Hem, be hemia i save kam nomo sapos yumi glad blong sakemaot ol nogud filing blong kros, fasin nogud, o fasin blong givimbak.

“Bae yumi tingbaot se yumi nid blong fogivim olgeta blong Lod i fogivim yumi. … Wetem evri hat mo sol blong mi, mi bilivim hiling paoa we i save kam long yumi taem yumi folem kaonsel blong Sevya blong fogivim evri man.” [luk long D&C 64:10 ]” (“The Healing Power of Forgiveness,” Liahona, May 2007, 69).

Mesej blong Presiden Faost i wan strong lesen blong laeftaem we i kam long wan man we mi lavem hem mo wan long ol man we i save fogiv evriwan we mi bin save.

Presiden Hinkli i bin testifae long las jeneral konfrens blong hem long Oktoba 2007: “Mi konfemem witnes blong mi long saed blong koling blong Profet Josef, abaot wok blong hem, mo siling blong testemoni blong hem wetem blad blong hem from wan trutok we i no save finis. Wanwan long yufala i save testifae abaot semfala samting. … Yu mo mi i fesem kwestin blong akseptem trutok abaot Fas Visen, mo wanem we i bin kam afta. Long kwestin ia se Jos ia i tru i dipen nao se Fas Visen i tru o no. Sapos hem i tru, mo mi testifae se i tru, nao wok we yumi joenem ia i wok we i moa impoten long wol ia. (“The Stone Cut Out of the Mountain,” Liahona, Nov. 2007, 86).

Testemoni blong Presiden Hinkli i konfemem wan strong lesen blong laeftaem we i kam long wan man we mi lavem mo mi save se i bin wan profet blong God.

Elda Witlin i talem long las jeneral konfrens toktok blong hem long Oktoba 2008.

“Mi tingbaot yet waes toktok blong mama blong mi we hem i talem long mi longtaem i pas taem tim blong mi i lusum wan futbol gem: ‘Letem eni samting i hapen, mo lavem.’”

“Fasin blong go agens, sapos yumi tekem gud, i save kam wan blesing long laef blong yumi. …

“Taem yumi luk long fani saed, luk long lukluk we i no save finis, andastanem prinsipol we God i putumbak samting, mo taem yumi stap go kolosap moa long Papa long Heven, bae yumi save gotru long hadtaem mo ol tes. Yumi save talem, olsem mama blong mi, ‘Letem eni samting i hapen, mo lavem.’” (“Come What May, and Love It,” Liahona, Nov. 2008, 28).

Mesej blong Elda Witlin i wan strong mesej blong wan laeftaem we i kam long wan man we mi lavem mo i soem wanem hem i tijim long saed blong winim ol hadtaem tru long fet long Sevya.

Elda Peri i stanap long pulpit ia sikis manis i pas. Long tetaem ia, yumi no ting nating se testemoni blong hem bae i laswan long jeneral konfrens ia.

“Bae mi endem toktok blong mi wetem testemoni blong mi (mo ol naenti yia blong mi long wol ia i mekem mi kwalifae blong talem hemia), se moa mi kam olfala, moa mi luksave se famle i stap long medel blong laef, mo i ki blong hapines we i no save finis.

“Mi talem tangkyu long waef blong mi, ol pikinini blong mi, ol apupikinini mo ol smol apupikinini blong mi, mo long evri kasen mo evri famli blong waef, mo ol nara famli we oli mekem laef blong mi i rif tumas, mo, yes, i no save finis. Long trutok ia we i no save finis, mi talem strong mo tabu testemoni blong mi abaot hemia.” (“Why Marriage and Family Matter—Everywhere in the World,” Liahona, Mei 2015, 42).

Mesej blong Elda Peri i wan strong lesen blong wan laeftaem, we i kam long wan man we mi lavem mo i andastanem tru long plante bigfala eksperiens se i gat wan rilesensip bitwin famli mo hapines we i no save finis.

Presiden Peka i tokbaot bigwan long jeneral konfrens sikis manis i pas, plan ia blong glad blong Papa, Atonmen blong Sevya, mo ol famli we oli no save finis. Mo, wetem kaen fasin, i talem bigfala lav we hem i gat long waef blong hem, Dona.

“Mi testifae se Jisas, Hem i Kraes, mo i Pikinini blong God we i stap laef. Hem i stanap long hed blong Jos. Tru long Atonmen blong Hem mo paoa blong prishud, ol famli we oli stat long wol ia, oli save stap tugeta tru long ol taem we oli no save finis. Atonmen, we i save pemaot wanwan long yumi, i no livim mak i stap.

“Mi talem tangkyu tumas from ol blesing blong Lod Jisas Kraes, from paoa blong krietem laef, from paoa blong pemaot man, from Atonmen … we i save wasemaot evri mak nomata se mak ia i strong, i longfala, o hamas taem oli ripitim. Atonmen i save mekem yu fri bakegen blong muv fored, we yu klin mo klin inaf.” (“The Plan of Happiness,” Liahona, Mei 2015, 28).

Las mesej blong Presiden Peka i wan lesen blong laeftaem, we i kam long wan man we i talem bigwan mo stap ripitim se stamba tingting blong evri aktiviti long Jos, i blong luk se wan man mo wan woman, wetem ol pikinini blong olgeta, oli hapi long hom, oli sil tugeta blong taem naoia mo taem we i no save finis.” ( Liahona, Mei 2015, 26).

Elda Skot i talemaot long las jeneral konfrens toktok blong hem long Oktoba 2014: “Yumi kam long wol ia, stret ia nao blong gro tru long ol hadtaem mo tes. Ol jalenj oli helpem yumi blong kam moa olsem Papa long Heven, mo Atonmen blong Jisas Kraes i mekem i posibol blong yumi stap strong tru long ol jalenj ia. Mi testifae se taem yumi wok strong blong kam long Hem, yumi save stap strong long evri temtesen, evri hat i so, mo evri jalenj we yumi fesem.” (“Make the Exercise of Faith Your First Priority,” Liahona, Nov. 2014, 94).

Mesej blong Elda Skot i wan lesen we i gat paoa mo i blong laeftaem we i kam long wan man we mi lavem mo i wan spesel witnes blong nem ia blong Kraes long ful wol (luk long D&C 107:23).

Promes mo Testemoni

“Mo nomata oli kamaot tru long voes blong miwan o tru long voes blong ol wokman blong mi, i semmak” (luk long D&K 1:38). Bae yumi harem mo mekem folem ol trutok ia we oli no save finis we ol ripresentativ blong Lod, we oli gat raet, oli stap tijim. Taem yumi mekem olsem, mi promes se fet blong yumi long Papa long Heven mo Jisas Kraes bae i kam strong moa, mo bae Hem i lidim mo protektem yumi.

Mi witnes, se Kraes we i stap laef i lidim ol wok blong Jos blong Hem we i kambak mo i stap laef tru long ol wokman blong Hem, we Hem i bin jusum blong testifae abaot nem blong Hem. Mi testifae olsem long tabu nem blong Jisas Kraes, amen.