Nekis Step blong Yu
I kam long Elda Randol K. Benet
Blong Olgeta Seventi
Papa blong yu long Heven we i gat lav long yu, mo Pikinini blong Hem, Jisas Kraes, Tufala i stap invaetem yu, wetem lav, blong yu tekem nekis step blong yu. Yu no wet. Tekem step naoia.
Hat blong mi i stap daon long wan miting wetem ol naes Lata-dei Sent. Kwestin i kam i se: “?Huia i wantem laef bakegen wetem Papa long Heven?” Evri han i go antap. Nekis kwestin i: “?Huia i gat tras se bae i save mekem?” Sore tumas mo sapraes se plante han i kam daon.
Taem yumi luksave hol we i stap bitwin huia yumi naoia mo huia yumi wantem kam, plante long yumi oli gat temtesen blong jusum blong lusum fet mo hop.1
From se “i no gat wan samting we i no klin we i save stap wetem God,”2 blong save laef wetem Hem bakegen, yumi nid blong kam klin long sin3, mo kam tabu.4 Sapos yumi mas mekem hemia yumiwan, bae yumi no save mekem. Be yumi no stap yumiwan. Yumi neva stap yumiwan.
Yumi gat help blong heven from Jisas Kraes mo Atonmen blong Hem.5 Sevya i se: “Sapos bae yufala i gat fet long mi, bae yufala i gat paoa blong mekem eni samting we i nid blong mekem long plan blong mi.”6 Taem yumi praktisim fet, fet i kam antap.
Bae yumi lukluk tri prinsipol we bae i helpem yumi long rod i gobak long Papa long Heven.
Blong Kam Olsem Wan Pikinini
Smol apu boe blong mitufala i soem fas prinsipol ia. Afta we hem i lan blong wokbaot fo leg, mo afta stanap, hem i rere blong traem wokbaot tu leg. Long fas traem, hem i foldaon, i krae, mo i luk olsem i talem: “!Bae mi neva, neva traem bakegen!”
Taem hem i foldaon, papa mo mama wetem lav i no filim se boe ia i no gat hop, o bae i neva wokbaot. Be, tufala i stretem han blong tufala, mo singaotem hem, mo wetem ae i lukluk tufala, boe i traem blong muv fored long tufala.
Papa mo mama wetem lav, oltaem tufala i rere wetem han i open blong welkamem eni smol step long raet daereksen. Tufala i save se yumi wantem traem mo traem bakegen, mo bae i lidim yumi blong progres mo gat sakses.
Sevya i tijim se blong kasem kingdom blong God, yumi mas kam olsem wan smol pikinini.7 Long saed blong spirit, fas prinsipol i we yumi nidim blong mekem wanem yumi bin mekem taem yumi bin smol pikinini.8
Wetem tingting i stap daon olsem pikinini mo wetem tingting blong lukluk nomo long Papa long Heven mo Sevya blong yumi, yumi wokbaot fored, neva givap long hop, iven sapos yumi foldaon. Papa blong yumi long Heven i glad long evri step wetem fet, mo sapos yumi foldaon, Hem i glad long evri hadwok blong girap mo traem bakegen.
Mekem Samting Wetem Fet
Seken prinsipol i kamaot long eksampol blong tufala fetful Sent, we tufala i wantem tumas faenem kompanion we i no save finis. Tufala i prea mo praktisim fet.
Yuri, wan Lata-dei Sent blong Rasia, i mekem sakrifaes mo sef from wan longfala trip i go long tempol. Long tren, hem i luk wan naesfala woman we fes blong hem i saen, mo i filim blong serem gospel long hem. No save wanem moa blong mekem, hem i stat blong ridim Buk blong Momon, i hop se woman ia bae i luk hem.
Yuri i no luksave se woman ia, Mariya, i wan Lata-dei Sent. Mariya i no save tu se Yuri i wan memba, mo wetem filing blong spirit, hem i mas serem gospel long hem, nao i stat blong ridim Buk blong Momon tu, mo hop se Yuri bae i luksave.
Yes, taem tufala i lukluk tufala, Yuri mo Mariya i sek long Buk blong Momon long han blong tufala—mo yes, tufala i lavlavem tufala, tufala i sil long tempol. Tedei, Yuri mo Moriya Kutepov blong Rona Rasia i kompanion we i no save finis mo stap mekem bigfala wok blong mekem Jos long Rasia i gro.
Poen long ples ia i no jes tingting blong kapol ia blong praktisim fet nomo. Hem i abaot wan seken prinsipol—Lod i joenem moa long tingting blong yumi blong praktisim fet. Fasin blong yumi blong wiling blong tekem nekis step i no stop hafwei—hem i bitim—tru long ol promes blesing blong Hem.
Papa long Heven mo Sevya blong yumi oli wantem tumas blong blesem yumi. Yes, Tufala i askem nomo wan aot long ten long wanem Tufala i blesem yumi wetem, mo afta, !Tufala i promes se ol windo blong heven bae oli open!9
Taem yumi traem blong tekem aksen wetem fet long Jisas Kraes, mo tekem wan nara step, speseli wan step we i nidim yumi jenis o sakem sin, yumi gat blesing blong gat paoa.10
Mi testifae se Lod bae i lidim yumi i go long— mo i go— tru long ol nekis step blong yumi. Bae Hem i mekem moa bitim blong joenem hadwok blong yumi wetem paoa blong Hem sapos yumi wantem blong gohed blong traem, sakem sin, mo muv fored wetem fet long Papa long Heven mo Pikinini blong Hem Jisas Kraes.
Ol presen blong Spirit, God i promesem, i no long olgeta we oli lavem God mo kipim evri komanmen blong Hem, be tu, wetem gladhat, i givim long yumi we i wantem tumas blong mekem ol samting ia.11 Paoa, Hem i givim long olgeta we oli gohed blong lukaotem mo traehad.
Tufala rod saen we i makem rod blong yumi i gobak long Papa long Heven, oli kavenan blong odinens blong sakramen mo wei we yumi kipim Sabat dei. Presiden Rasel M. Nelson i tijim long las jeneral konfrens se Sabat i presen we Lod i givim long yumi. Strong tingting blong yumi blong kipim Sabat evri wik i saen we yumi givim long Lod se yumi lavem Hem.12
Evri Sabat dei yumi witnes se yumi “wantem tekem [long yumi nem blong Hem] , blong oltaem tingbaot Hem, mo blong kipim ol komanmen blong Hem.”13 Taem yumi gat hat we i wantem sakem sin, mo komitim yumi, Lod i riniu promes ia blong kam klin aot long sin, mo i mekem se yumi “save gat Spirit blong Hem i stap wetem yumi oltaem.”14 Paoa blong Tabu Spirit i mekem yumi kam gud moa, i givim paoa, i tijim mo lidim yumi.
Sapos we, taem yumi tingbaot Hem evri Sabat dei, yumi tanem hat blong yumi i go long Sevya tru long tufala impoten rod saen ia, hadwok blong yumi, bakegen, Hem i joenem i go moa tru long ol blesing we Lod i promesem. Yumi gat promes se, sapos yumi kipim Sabat dei, bae wol we i fulwan bae i blong yumi.15
Rod we i gobak long Papa long Heven i lidim yumi long haos blong Lod, ples we yumi kasem blesing blong ol odinens blong sevem man, blong yumiwan mo olgeta we oli ded finis. Presiden Boed K. Peka i tijim se ol odinens mo ol kavenan oli kam ol paspot blong yumi save go stap wetem Hem.16 Mi prea se yumi wanwan bae i oltaem stap klin inaf blong kasem, mo blong yusum tempol rekomen blong yumi blong givim seves oltaem.
Winim Fasin blong Man Ia we I Folem Fasin blong Wol
Wan nambatri prinsipol i we: Yumi mas stopem fasin blong man blong wantem pusumbak o givap.17
Yumi progres folem rod blong kavenan, bae yumi mekem ol mistek, plante taem. Sam long yumi i traehad wetem ol fasin, ol adiksen we yumi filim se yumi no naf blong winim. Be fet long Papa long Heven mo Jisas Kraes i wan prinsipol blong aksen mo paoa.18 Sapos yumi wantem tekem aksen, bae Hem i givim paoa blong sakem sin mo jenis.
Yumi mestem sapos nomo yumi mestem blong tekem wan nara step fored wetem fet. Bae yumi no save mestem sapos yumi gat fet mo joen long Sevya—!Hem we i neva mestem samting bae i no save lego yumi!
Ol Blesing we Hem I Promesem
Mi promes se wanwan step we yumi tekem wetem fet, bae help we i kam long heven bae i joen long hem. Rod bae i kam klia taem yumi prea long Papa long Heven mo dipen long Sevya blong yumi mo folem Hem, mo stap lisin long Tabu Spirit. Paoa bae i kam from sakrifaes blong Jisas Kraes we i pem praes.19 Hiling mo fogivnes bae i kam from gladhat blong God.20 Waes tingting mo fasin blong wet longtaem bae i kam taem yumi trastem taem blong Lod. Proteksen bae i kam taem yumi folem profet blong God we i stap laef, Presiden Tomas{nb S. Monson.
Hem i krietem “yu blong yu save gat glad;” 21 wan glad we bae yu filim taem yu klin inaf blong gobak long Papa blong yu long Heven mo Sevya, mo wokbaot i go long han blong Tufala we i open.
Mi testifae se ol samting oli tru evriwan. Papa blong yu long Heven we i gat lav, mo Pikinini blong Hem, Jisas Kraes, tufala i stap laef. Tufala i save yu. Tufala i lavem yu. Tufala i stap invaetem yu, wetem lav, blong yu tekem nekis step blong yu. Yu no wet. Tekem step naoia. Long tabu nem blong Jisas Kraes, amen.