Tabu Spirit Olsem Kompanion blong Yu
I Kam long Presiden Henri B. Aering
Fas Kaonsela long Fas Presidensi
Sapos yumi laef klin inaf long hem, bae yumi save gat blesing ia blong gat Spirit i stap wetem yumi, i no naoia nomo mo afta, be blong oltaem.
Ol dia brata mo sista. Mi glad tumas blong stap wetem yufala long Sabat dei ia long jeneral konfrens ia blong Jos blong Lod. Mi filim, olsem yufala, Spirit, Tabu Spirit i testifae abaot trutok blong ol toktok we yumi bin harem.
Stamba toktok blong mi tedei, i blong mekem yufala i wantem mo gat strong tingting moa blong kasem presen we God i promesem long wanwan long yumi afta we yumi kasem baptaes. Long taem blong konfemesen blong yumi, yumi bin harem ol toktok ia: “Kasem Tabu Spirit.”1 Stat long tetaem ia i go, laef blong yumi i jenis blong oltaem.
Sapos yumi laef klin inaf long hem, bae yumi save gat blesing ia blong gat Spirit i stap wetem yumi, i no naoia nomo mo afta, olsem long gudfala eksperiens we yumi stap gat naoia, be blong oltaem. Yufala i save aot long ol toktok blong sakramen prea olsem wanem promes ia i kamtru: “O God, yu yu Papa we I No Save Finis, mifala i askem yu long nem blong Pikinini blong yu, Jisas Kraes, blong blesem mo mekem tabu hemia bred, long ol sol blong olgeta evriwan we oli kakae long hem; blong oli kakae blong tingbaot bodi blong Pikinini blong yu, mo witnes long yu, O God, yu yu Papa we I No Save Finis, se oli rere blong tekem long olgeta, nem blong Pikinini blong yu, mo oltaem tingbaot hem, mo stap obei long ol komanmen blong hem we hem i bin givim long olgeta.”
Mo afta, strong promes ia i kam: “mekem se oltaem, oli gat Spirit blong hem i stap wetem olgeta.” (D&K 20:77; oli ademap italik.)
Blong oltaem gat Spirit i stap wetem yumi, i blong Tabu Spirit i lidim mo soem rod long evri dei laef blong yumi. Eksampol, Spirit i save wonem yumi blong stanap agensem temtesen blong mekem nogud samting.
From risen ia nomo, hem i isi blong luk from wanem ol wokman blong Lod oli bin traem blong mekem se yumi wantem moa blong wosipim God long ol sakramen miting blong yumi. Sapos yumi tekem sakramen wetem fet, Tabu Spirit bae i save protektem yumi mo olgeta we yumi lavem long ol temtesen we oli kam strong moa mo plante moa.
Blong stap olsem kompanion blong Tabu Spirit, i mekem wanem we i gud i swit moa, mo temtesen i stap longwe. Hemia nomo i inaf blong mekem yumi gat strong tingting blong kwalifae blong gat Spirit ia i stap wetem yumi oltaem.
Semmak olsem we Tabu Spirit i mekem yumi kam strong moa agensem ivel, Hem i givim tu, paoa blong luksave wanem i tru mo wanem i giaman. Trutok we i impoten moa, revelesen nomo we i kam long God i save konfemem. Fasin blong man blong tingting mo ol samting we bodi blong yumi i save filim i no inaf. Yumi laef long wan taem we iven man we i waes gud, bae i gat hadtaem blong luksave wanem i tru mo wanem i wan giaman we i waes.
Lod i tijim Aposol Tomas, we i wantem luk long ae blong hem se Sevya i laef bakegen long ded mo tajem ol soa blong Sevya, se revelesen i wan pruf we i moa sef: “Nao Jisas i talem long hem se: ‘yu yu biliv long mi from we yu luk mi. Be olgeta oli no luk mi, be oli biliv long mi, bambae oli save harem gud” (Jon 20:29).
Ol trutok we oli makemaot rod i go hom long God, Tabu Spirit i konfemem long yu. Yumi no save go long bus mo luk Papa mo Pikinini we Tufala i toktok long yangfala Josef Smit. I no gat pruf long wol o eni toktok we i save talem stret se Elaeja i bin kam, olsem promes i talem, mo givim ol prishud ki we naoia, wan profet we i stap laef i holem mo stap yusum, we hem i Tomas S. Monson.
Konfemesen blong trutok i kam long wan boe o gel blong God we i kasem raet blong kasem Tabu Spirit. From se ol samting we oli no tru mo ol giaman samting oli save kamaot long yumi long eni taem, yumi nidim oltaem blong gat paoa blong Spirit blong Trutok blong i sevem yumi long ol taem we yumi gat tu tingting.
Wan memba blong Kworom blong Olgeta Twelef Aposol, Joj K. Kanon i askem strong long yumi blong yumi lukaotem oltaem blong Spirit i stap wetem yumi. Hem i promesem, mo mi promesem tu, se sapos yumi gohed long rod ia, bae yumi neva sot long save blong trutok, neva gat tu tingting o stap long tudak, mo fet blong yumi bae i strong, mo glad blong yumi i fulwan. 2
Yumi nidim oltaem help blong kompanion ia we i Tabu Spirit from wan nara risen. Ded blong wan we yumi lavem i save kam taem yumi no tingting long hem. Witnes blong Tabu Spirit nao we i talem se i tru, we i gat wan Papa long Heven we i gat lav, mo i gat wan Sevya we i laef bakegen long ded we i givim hop mo kamfot long yumi taem yumi lusum wan famli. Testemoni ia, i mas laef taem ded i hapen.
Blong plante moa risen, yumi nidim blong gat oltaem Tabu Spirit olsem kompanion. Yumi wantem, be yet, yumi save aot long eksperiens se i no isi blong holemtaet. Wanwan i tingting, i talem, mo i mekem ol samting long evri dei long laef we i save mekem Spirit i harem nogud. Lod i tijim yumi se Tabu Spirit bae i kompanion blong yumi oltaem, taem hat blong yumi i fulap long jareti mo taem klin fasin i flasem ol tingting blong yumi oltaem (luk long D&C 121:45)..
Long olgeta we oli stap traehad wetem hae standet we yumi nidim blong kwalifae from presen blong gat Spirit olsem kompanion, mi wantem talem gud toktok ia. Yu bin gat ol taem we yu bin filim paoa blong Tabu Spirit. Maet i bin hapen long yu tedei.
Yu save tritim ol taem ia blong insperesen olsem sid blong fet we Alma i tokbaot (luk long Alma 32:28). Planem wanwan long olgeta. Yu save mekem hemia taem yu tekem aksen folem kwaet toktok we yu filim. Insperesen we i moa impoten bae i blong yu save wanem God i wantem yu blong mekem. Sapos hem i blong pem taeting, o visitim wan fren we i stap krae sore, yu mekem. Wanem yu sapos blong mekem, mekem. Taem yu soem se yu wantem blong obei, Spirit bae i sendem moa kwaet toktok long wanem God i wantem yu blong mekem.
Taem yu obei, ol filing we oli kam long Spirit bae oli kam moa long yu, i kam kolosap moa blong stap wetem yu oltaem. Paoa blong yu blong jusum raet bae i kam antap.
Yu save kam blong save se, ol filing ia, blong tekem aksen long bihaf blong Hem, oli kam long Spirit be i no kam long ol filing blong yuwan. Taem ol filing ia oli stret semmak wetem wanem Sevya mo ol profet mo aposol blong Hem we oli laef oli talem, yu save jusum blong obei wetem tras. Nao bae Lod i sendem Spirit blong Hem blong stap wetem yu.
Eksampol. Sapos yu kasem filing long spirit blong ona long Sabat dei, speseli taem we i had blong mekem, God bae i sendem Spirit blong Hem blong helpem yu.
Help ia i kam taem papa blong mi, sam yia i pas, taem wok blong hem i tekem hem i go long Ostrelia. Hem i stap hemwan long wan Sandei, mo hem i wantem tekem sakramen. Hem i no save faenem toksave abaot ol miting blong ol Lata-dei Sent. Mekem se hem i stat blong wokbaot. Hem i prea long evri krosrod blong save wanem saed blong folem. Afta we hem i wokbaot mo wokbaot blong wan aoa, hem i stop mo prea bakegen. Hem i filim blong tanem raon long wan smol rod. I no longtaem afta, hem i stat blong harem singsing we i kam long wan bilding we i stap kolosap. Hem i luk tru long windo mo luk sam pipol oli sidaon kolosap long wan tebol we oli kavremap long wan waet klos mo ol sakramen trei.
Nao, ating i no minim wan bigfala samting long yu, be i wan samting we i gud tumas long hem. Hem i bin save se prea blong sakramen i kamtru: “oltaem tingbaot hem mo holem ol loa blong Hem we Hem i givim long olgeta, blong oli save gat Spirit blong Hem i stap wetem olgeta oltaem” (D&C 20:77).
Hemia wan eksampol blong taem we hem i bin prea, mo afta, i mekem wanem we Spirit i talem hem wanem God i wantem hem blong mekem. Hem i mekem olsem blong plante yia, semmak olsem yu mo mi bae i mekem. Hem i neva tokbaot fasin blong spirit blong hem. Hem i jes gohed blong mekem ol smol samting long bihaf blong Lod, we Spirit i talem long hem blong mekem.
Taem ol grup blong ol Lata-dei Sent oli askem hem blong toktok long olgeta, hem i mekem. I nomata se i gat 10 man o 50 man o sapos hem i taed o no. Hem i talem testemoni blong hem abaot Papa, Pikinini mo Tabu Spirit, mo abaot ol profet taem Spirit i talem hem blong mekem.
Hae koling insaed long Jos we hem i kasem, i taem hem i stap long Bonvil Stek Hae Kaonsel, mo hem i stap pulumaot rabis gras long fam, mo taem hem i tijim Sandei Skul klas. Blong plante yia, long taem we hem i nidim, Tabu Spirit i bin stap olsem kompanion blong hem.
Mi bin stanap long saed blong papa blong mi long wan hospital rum. Mama blong mi, waef blong hem we i gat 41 yia, i slip long bed. Mifala i lukaot long hem blong plante aoa. Mifala i luk ol laen blong harem nogud oli stat blong lus long fes blong hem. Ol fingga blong han blong hem, we hem i sarem, oli kam slak. Ol han blong hem oli kam daon long saed blong hem.
Ol soa blong plante yia blong kansa oli stap finis. Mi luk, long fes blong hem, wan luk long pis. Hem i pulum win sloslo, afta wan moa taem, mo afta hemi slip kwaet. Mifala i stanap ia, mo wet blong luk se bae i pulum win bakegen.
Nao Papa i talem kwaet: “Wan smol gel i gobak hom.”
Hem i no krae. Hemia from Tabu Spirit, longtaem finis i kam, i bin givim hem klia pikja se huia hem, se hem i kam wea, mo huia hem i kam, mo weaples hem i stap go. Spirit i bin testifae long hem plante taem abaot wan Papa long Heven we i lavem hem, abaot wan Sevya we i brekem paoa blong ded, mo tempol siling we hem i serem wetem waef mo famli blong hem i tru.
Spirit i bin talem long hem longtaem finis se, gud fasin mo fet blong waef blong hem i mekem hem i kwalifae blong gobak long hom long heven, mo bae oli tingbaot hem olsem wan gudfala pikinini blong promes mo bae oli welkamem hem wetem ona.
Long papa blong mi, hemia i moa bitim wan hop. Tabu Spirit i mekem hemia i ril long hem.
Sam bae oli save talem se ol toktok mo pikja blong maen blong hem abaot wan hom long heven i wan swit filing nomo, we i olsem klaod long jajmen blong wan hasban we i lusum waef blong hem. Be hem i bin save trutok we i no save finis long wan wei ia nomo we yu save kam blong save long hem.
Hem i wan man blong saens we i lukaotem trutok long saed blong wol ia long ful laef blong hem. Hem i bin yusum gud, ol tul blong saens, mekem se ol fren blong hem raon long wol oli respektem hem. Plante long wanem hem i mekem long kemistri i kam ae blong maen blong hem we i luk ol smolsmol samting oli muvmuv olbaot, mo afta, konfemem visen blong hem tru long ol tes long laborotri.
Be hem i bin folem wan defren rod blong faenemaot ol trutok we oli moa impoten long hem mo long wanwan long yumi. Tru long Tabu Spirit nomo yumi save luk ol pipol mo ol samting olsem we God i stap luk olgeta.
Presen ia i gohed long hospital afta we waef blong hem i ded. Mifala i tekem ol samting blong mama blong karem i gobak long haos. Papa i tekem sam taem blong talem tangkyu long evri nes mo dokta we mifala i mitim long wokbaot blong mifala i go long trak. Mi tingbaot se, mi filim, mo mi no glad tumas long hemia, se mifala i mas aot blong stap mifalawan wetem harem nogud blong mifala.
Mi luksave naoia se hem i luk ol samting we Tabu Spirit i save soemaot long hem. Hem i luk ol pipol olsem ol enjel we God i sendem blong lukaotgud long swithat blong hem. Ating olgeta ia oli luk olgeta olsem ol wokman blong hospital, be Papa i stap talem tangkyu long olgeta long bihaf blong Sevya from seves blong olgeta.
Paoa blong Tabu Spirit i gohed blong stap wetem hem taem mifala i kasem haos blong papa mo mama blong mifala. Mifala i storian smol taem long living rum. Papa i talem sore se bae hem i go long bedrum blong hem we i stap kolosap.
Smol taem afta, hem i wokbaot i kambak long living rum. Hem i gat wan naesfala smael. Hem i wokbaot i kam long mifala mo talem: “Mi wari se Mildred bae i go long spirit wol hemwan. Mi stap ting se bae hem i lus long medel blong bigfala grup ia.”
Nao i talem: “Mi jes prea naoia. Mi save Mildred i oraet. Mama blong mi i stap blong mitim hem.”
Mi tingbaot se mi smael taem hem i talem hemia, mi traem tingting long bubuwoman blong mi, ol sot leg blong hem we i wokbaot kwik i hariap long medel blong wan grup blong pipol blong meksua se hem i mas stap mo kisim aeneli blong hem taem bae i kam.
Nao, wan long ol risen we papa blong mi i askem mo i kasem kamfot i from se, oltaem, hem i prea wetem fet stat long taem we hem i smol. Hem i save gud hao blong kasem ansa we i go long hat blong hem blong givim kamfot mo soem rod. Antap long fasin blong stap mekem prea, hem i bin savegud ol skripja mo ol toktok blong ol profet we oli stap laef. Mekem se hem i luksave ol kwaet toktok blong Spirit, we maet yufala i bin filim tedei.
Spirit i bin mekem moa bitim blong leftemap tingting mo lidim hem. Spirit i bin jenisim hem tru long Atonmen blong Jisas Kraes. Taem yumi akseptem promes ia blong gat Spirit i stap wetem yumi oltaem, Sevya i save givim yumi fasin blong kam klin blong laef we i no save finis, we i presen we i moa hae long evri nara presen we God i givim (luk long D&C 14:7).
Yufala i tingbaot toktok blong Sevya: “Nao hemia i komanmen: Sakem sin, yufala evriwan long evri en blong wol, mo kam long mi mo kasem baptaes long nem blong mi, blong yufala i save kam klin taem we yufala i kasem Tabu Spirit, blong yufala i save stanap mo no gat mak long fored blong mi long las dei.”(3 Nifae 27:20).
Olgeta komanmen ia oli kam wetem promes ia long Lod:
“Mo nao, i tru, i tru, mi talem long yu, putum tras blong yu long Spirit ia we i lidim man blong mekem gud—yes, blong mekem samting i stret, blong wokbaot wetem tingting we i stap daon, blong yumi mekem stret jajmen; mo hemia i Spirit blong mi.
“I tru, i tru, mi talem long yu, bambae mi soemaot smol, Spirit blong mi, we bambae i givim laet long maen blong yu, we bambae i fulumap sol blong yu wetem glad” (luk long D&C 11:12–13).
Mi talem testemoni blong mi se God Papa i laef, se Jisas Kraes we i laef bakegen long ded i lidim Jos blong Hem, se Tomas S. Monson i holem evri ki blong prishud, mo se revelesen tru long Tabu Spirit i lidim mo sapotem Jos blong Jisas Kraes blong Ol Lata-dei Sent mo ol memba blong hem we tingting blong olgeta i stap daon. Long nem blong Jisas Kraes, amen.
Mi testifae moa long yufala se olgeta gudfala man ia, we oli bin toktok long yumi tedei olsem ol witnes blong Lod Jisas Kraes, olsem ol memba blong Kworom blong Olgeta Twelef Aposol, God i singaotem olgeta. Mi save se Spirit i bin lidim Presiden Monson blong singaotem olgeta. Mo taem yu stap lisin long olgeta mo testemoni blong olgeta, Tabu Spirit bae i konfemem long yu wanem mi stap talem long yu. God i singaotem olgeta. Mi sastenem olgeta mo lavem olgeta mo save se Lod i lavem olgeta, mo bae i helpem olgeta long seves blong olgeta. Mo mi mekem hemia long nem blong Lod Jisas Kraes, amen.