Luk long Hem mo Ansa Bae i Kam
I kam long Elda Jemes B. Martino
Blong Olgeta Seventi
Stap obei, tingbaot ol taem ia bifo we yu bin filim Spirit, mo askem samting wetem fet.
Taem mi wan yangfala man, papa mo mama blong mi, tufala i bin joenem Jos blong Jisas Kraes blong Ol Lata-dei Sent . Mifala i save se ol misinari oli stap tijim tufala, be tufala i bin tekem lesen wetem ol misinari tufalawan nomo.
Afta we tufala i talemaot sapraes ia, brata blong mi mo mi i lisin long ol misinari tu, mo ol brata blong mi tu oli kasem mesej blong Restoresen wetem glad hat. Nomata we mi wantem blong save nomo, hat blong mi i no rili rere blong jenis. Be mi bin akseptem jalenj ia blong prea abaot Buk blong Momon se i toktok blong God o no, be mi no kasem wan ansa.
Ating bae yu askem from wanem Papa long Heven i no ansarem prea ia; mi bin askem hemia long miwan. Mi lanem stat long tetaem ia se promes we Moronae i bin mekem, i tru. God i no ansa long ol prea blong yumi se gospel i tru o no, be Hem i ansarem prea taem yumi gat “wan tru hat, wetem tingting we i tru blong wantem save.”1 Hem i no ansa nomo from we yumi interes blong save.
Ating i gat wan samting long laef blong yu we yu gat wan kwestin long hem. Ating i gat wan problem we yu no rili save ansa blong hem. Tedei mi laekem blong serem sam tingting we bae i helpem yu blong kasem ol ansa o help we yu stap lukaotem. I stat taem yumi jenisim laef i kam long gospel blong Jisas Kraes.
Blong Kasem Revelesen i Dipen se Hat blong Yumi i Oraet mo Stret Tingting i Stap long Hat o Nogat
Mi stap tingting long stori blong samfala man insaed long skripja. Eksampol: tekem Leman mo Lemuel. Olsem Nifae, tufala i “bon long wan gudfala papa mo mama” mo [tufala i bin kasem] plante samting long saed blong save blong papa blong [tufala].”2 Tufala i bin komplen agensem papa blong tufala, from hem i bin wan man blong yu visen. Long lukluk blong tufala, hem i bin from krangke tingting blong hat blong hem, from tufala i no save ol samting blong God, mo olgeta i no bilif.3
Hem i interesting blong luk se ol joes blong olgeta i mekem se oli save kasem ol eksperiens we i bildimap fet blong olgeta. Oli lego haos blong olgeta mo ol rij samting blong olgeta. Oli safa taem oli stap wokbaot long dak bus. Afta, oli bin help blong bildim wan bot, mo oli agri blong wokbaot long graon i go long wan ples we oli no save.
Nifae i pas tru long ol semfala eksperiens. Be, ?ol aksen ia, oli bildimap fet blong olgeta, o no? Fet blong Nifae i bin kam strong, be Leman mo Lemuel, tufala i no biliv mo kros moa. Tufala brata ia i bin luk mo harem wan enjel, be nomata long hemia, tufala i gohed blong gat tu tingting.4
Laef long wol ia i no isi long wanwan long yumi. Yumi stap long wol ia blong oli traem yumi mo testem yumi. Hao yumi stap fesem ol eksperiens blong laef, bae plante taem, i mekem wan samting long testemoni blong yumi. Tekem sam long ol wei blong Leman mo Lemuel: Tufala i komplen taem papa blong tufala i talem olgeta blong mekem ol had samting.5 Oli bin traem blong tekem buk we oli wokem long bras, be taem oli bin kasem, tufala i lusum tingting. Fasin blong tufala i bin “Yumi bin traem finis; wanem moa yumi save mekem?”6
I bin hapen se tufala i bin harem nogud, from fasin nogud blong tufala, mo tufala i bin askem fogivnes.7Tufala i prea mo kasem fogivnes. Be skripja i rekodem se, afta tufala i gobak blong komplen mo tufala i no wantem prea. Tufala i kam long Nifae mo talem se tufala i no save “andastanem ol toktok we papa blong olgeta i bin talemaot.”8Nifae i askem tufala sapos tufala “i bin askem Lod.”9 Hemia ansa blong tufala: “Mifala i no bin askem Lod; from Lod i no mekem mifala i save long saed blong eni samting olsem.”10
Fasin blong Gohed blong Stap Obei I Letem Yumi Kasem Ol Ansa
Ansa blong Nifae long ol brata blong hem, hem i wan ki blong yumi gogohed blong kasem ansa long ol prea.
“?Weswe nao i hapen se yufala i no obei ol komanmen blong Lod? ?Weswe nao i hapen se bae yufala i ded, from hat blong yufala i strong?
“?Yufala i no tingbaot ol samting we Lod i bin talemaot?—Sapos yufala i no mekem hat blong yufala i kam strong, mo askem mi wetem fet, mo stap bilivim se bae yufala i kasem, mo wokhad oltaem blong holem ol komanmen blong mi, i tru we bae olgeta samting ia oli mas kam long yufala.”11
Mi save long sam riten misinari we oli bin gat ol eksperiens long saed blong spirit we i no gat kwestin long hem, be samfala long olgeta, from oli no gat fasin (habit) long spirit, mekem se, oli fogetem ol taem we God i bin toktok long olgeta. Long ol riten misinari ia, mo long yumi evriwan, “sapos yufala i wantem blong singim singsing blong lav blong pemaot man, bae mi askem: ?yufala i save filim samting ia naoia?”12 Sapos yu i no filim naoia, yu save filim bakegen, be tingbaot kaonsel blong Nifae. Stap obei, tingbaot ol taem ia bifo we yu bin filim Spirit, mo askem samting wetem fet. Ansa blong yu bae i kam, mo bae yu filim lav mo pis blong Sevya. Ating bae i no kam kwik o long wei we yu wantem, be ansa bae i kam. !No mas givap! !Neva givap!
Bae yumi komperem Leman mo Lemuel wetem ol pikinini boe blong Mosaea. Tugeta grup blong ol man oli groap insaed long famli we i stret mo gud, yet tugeta i go lus. Wan enjel i bin singaotem tugeta blong sakem sin, be ?wanem nao i defren long eksperiens blong ol boe blong Mosaea?
Ol Tes bae Oli Mekem Fet Blong Yumi I Kam Strong
Misinari wok blong olgeta i sakses we bae oli no save fogetem. Taosen oli bin jenisim laef i kam long Lod. Nomata long hemia, yumi fogetem se taem olgeta i statem misin, “ol hat blong olgeta i bin wari tumas mo olgeta bin rere blong gobak, luk, Lod i leftemap tingting blong [olgeta].” Oli bin kasem kaonsel long Lod se: “stanap strong wetem fasin ia blong save wet longtaem long ol hadtaem blong yufala.”13
Stadi long Skripja I Talem long Yumi Tingting Blong God
?From wanem nao ol tes blong ol pikinini boe blong Mosaea i bin mekem olgeta i kam strong moa long fet mo komitmen bitim blong mekem olgeta i komplen o gat tu tingting? Ki hem i we “oli bin kam strong long save blong trutok; from oli ol man blong wan stret haremsave mo oli bin stadi long ol skripja strong oltaem, blong oli save andastanem toktok blong God.”14 Bae yumi fesem ol tes mo gat ol kwestin, be tingbaot se yumi mas “holemtaet rel blong aean oltaem.”15 “Ol toktok blong Kraes bae oli talem long yufala evri samting we yufala i mas mekem.”16 Yumi mas mekem skripja stadi i wan pat blong evri dei laef blong yumi, from hemia bae i openem ol doa long revelesen.
Prea, Tugeta Wetem Fasin blong Livim Kakae, I Invaetem Revelesen
Long ol pikinini boe blong Mosaea, “i no hemia nomo; oli bin mekem plante prea mo livim kakae; taswe oli bin gat spirit blong profesi, mo spirit blong revelesen.”17 Prea mo fasin blong livim kakae bae i mekem se yumi save haremsave ol toktok blong Spirit. Fasin blong toktok wetem Papa long Heven mo semtaem livim kakae mo wota i helpem yumi blong “tekemaot jen ia [blong rabis fasin mo blong tekemaot ol hevi trabol].”18 Prea, tugeta wetem fasin blong livim kakae, bae i givim wan rod i stap blong mekem se taem yumi stap “singaot,…bambae Lod i ansa…[mo taem yumi] krae,…hem bae talem, Mi hemia.”19
Lukluk long Hem
Olgeta fasin blong yumiwan long saed blong relijin olsem—fasin blong stap obei, skripja stadi, prea, mo livim kakae—i mekem ol boe blong Mosaea oli kam strong moa. Taem sam long olgeta fasin ia long saed blong relijin, oli no gat, hemia nao stamba risen we i mekem Leman mo Lemuel i no protektem tufala long temtesen blong komplen mo gat fasin blong gat tu tingting.
Sapos yu bin kasem temtesen blong komplen, sapos yu bin gat tu tingting we i mekem yu no bilif, sapos hadtaem i moa long wanem we yu save karem, lukluk long Hem. Sapos yu wan we i bin lukluk i go longwe o jenisim fasin, lukluk long Hem. ?Yu tingbaot taem we Hem i bin “tok blong pis i go long maen…? ?Wanem bigfala witness nao yu gat we God i moa long hemia?”20 Askem yuwan, “Laef blong mi i stap olsem Kraes naoia olsem we i bin stap bifo?” Plis, lukluk long Hem.
Bae mi gobak long stori blong miwan. Mo afta mi stat blong stap ones. Mi tingbaot taem misinari we i bin stap tijim mi i askem sapos mi rere blong baptaes. Mi ansa se, mi gat sam kwestin yet. Waes misinari ia i talem long mi se, hem i save ansarem olgeta be mi bae i mas ansa long hem fastaem. Hem i askem mi sapos Buk Blong Momon i tru mo sapos Josef Smit i wan profet. Mi talem long hem se mi no save, be mi wantem save.
Kwestin blong mi i mekem fet blong mi i gro. Long mi, ol ansa i no kam olsem wan impoten taem be i kam sloslo. Mi luksave se taem mi “traem ol toktok blong hem, mo yusum wan smol pis blong fet.” Buk Blong Momon i stad blong kam “swit long mi” mo hemi bin “openem save blong mi” mo i rili “leftemap sol blong mi.” Long en mi bin kasem eksperiens se ol skripja oli stat blong kam bigwan insaed long jes blong mi.21 Long tetaem ia nao we mi bin wantem blong kasem baptaes mo komitim laef blong mi long Jisas Kraes.
Mi save fulwan se Buk Blong Momon hem i toktok blong God. Mi save se Josef Smit i wan profet. O, mi gat sam samting yet we mi no andastanem fulwan, be testemoni blong mi abaot trutok i tekem mi kam kolosap long Sevya mo bildimap fet blong mi.
Ol brata mo sista. Tingbaot Nifae mo ol boe blong Mosaea, we oli gat eksperiens long saed blong spirit mo wok wetem fet, afta ansa i kam mo fet blong olgeta i gro. Komperem hemia wetem Leman mo Lemuel, we tufala i gat tu tingting mo komplen. Nomata samtaem tufala i wok long wan wei we i stret, be wok we i no gat fet wetem, i ol olsem ded wok. Yumi mas gat fet wetem wok blong kasem ol ansa.
Mi hop se afta we yu lisin long moning ia, Spirit i bin putum long maen mo hat blong yu wan samting we bae yu mekem blong ol kwestin blong yu oli kasem ansa, o blong yu faenem wan wei long problem we yu stap fesem. Mi serem wetem yufala witness blong mi se Jisas i Kraes. Lukluk long Hem mo ol prea blong yu bae oli gat ansa. Long nem blong Jisas Kraes, amen.