Yu No Stap Yuwan long Wok Ia
I Kam long Presiden Henri B. Aering
Fas Kaonsela long Fas Presidensi
Taem yu stap muv long wan prishud seves i go long narafalawan, bae yu luk Lod i stap long wok ia wetem yu.
Ol brata. Yumi talem tangkyu we Lod i singaotem Elda Ronal A Rasban, Elda Geri E Stivenson, mo Elda Deil G. Renlan olsem Ol Aposol blong Lod Jisas Kraes. Hat mo prea mo fet blong yumi i sapotem olgeta.
Mifala i save wanem oli save mekem. Be yet, bae oli nidim help long koling blong olgeta, semmak olsem yumi evriwan, se bae Lod i stap wetem olgeta long wok blong Hem. Niufala dikon tu i nidim tras ia, semmak olsem ol hae pris we oli gat eksperiens we oli kasem wan niu koling.
Tras ia i gro taem yu kam blong luk se Hem i singaotem yu tru long ol wokman blong Hem. Tok sapot blong mi i blong helpem yu save se taem yu mekem pat blong yu, Lod i ademap paoa blong Hem long hadwok blong yu.
Eni koling we yumi kasem long kingdom blong Lod i nidim moa bitim jajmen blong man mo paoa blong man. Ol koling ia oli nidim help we i kam long Lod, mo help bae i kam. Iven wan niu dikon bae i lanem se hemia i tru, mo bae hem i gohed blong lan ova long ol yia.
Wan long ol apuboe blong mi i stap ia tedei long naet long fas prishud miting blong hem. Oli odenem hem i kam dikon sikis dei i pas. Bae wan long ol fas prishud wok blong hem bae i blong pasem sakramen long nekis Sandei. Prea blong mi se bae hem i luk taem ia olsem we hem i rili stap.
Maet bae i ting se wok blong hem long Lod i blong pasem sakramen trei ia long ol pipol we oli sidaon long sakramen miting. Be stamba tingting blong Lod i no blong mekem ol pipol oli tekem bred mo wota nomo. Hem i blong mekem olgeta oli kipim wan kavenan we bae i muvum olgeta folem rod we i go long laef we i no save finis. Mo blong hemia i hapen, Lod i mas givim wan eksperiens long saed blong spirit long hem ia we dikon i pasem trei.
Mi bin luk hemia i hapen long wan kea senta taem wan dikon i lei fored blong pasem trei i go long wan olfala woman we i gat waet hea. Hem i lukluk bred se i impoten tumas. Mi neva fogetem smael blong hem taem hem i kakae bred, mo afta, tajem hed blong dikon mo talem laod: “O Tangkyu!”
Dikon ia i stap mekem prishud wok blong hem nomo. Be yet, Lod i blesem dikon plante from wok blong hem. I klia se sista ia i tingbaot Sevya taem hem i talem tru tangkyu from seves blong wan dikon. Hem i save stret, taem dikon i pasem sakramen long hem, se bae hem i gat Spirit blong Lod i stap hem. Hem i no bin stap hemwan long kea senta ia. Mo dikon ia tu, i no stap hemwan long seves blong hem.
Wan yang tija long Aronik Prishud, taem i stap go tijim wan famli, i no filim se hem i patna wetem Lod long wok blong Lod. Mi tingbaot yet simpol testemoni blong wan yang hom tijing kompanion we i kam long haos blong mifala. Spirit i konfemem ol toktok blong hem. Maet hem i nomo tingbaot dei ia, be mi yes.
Lod bae i blesem ol hadwok blong wan yang man bakegen taem Hem i stap singaotem hem blong kam wan pris. Fas baptaes we bae hem i mekem, ating i blong wan yangfala we hem i no save. Bae hem i wari se bae i talem ol stret toktok mo mekem odinens ia i stret.
Be Lod, we boe ia i wokman blong Hem, bae i blesem ofring blong hem. Huia bae hem i baptaesem i jusum blong muv folem rod we i go long laef we i no save finis. Lod bae i mekem bigfala pat blong Hem. Hem i bin mekem long mi taem boe ia we mi baptaesem, wota blong ae blong hem i ron long fes blong hem, mo talem long sora blong mi, “Mi klin. Mi klin.”
Taem yu stap muv long wan prishud seves i go long narawan, bae yu luk Lod i stap long wok tu wetem yu. Mi lanem hemia taem mi mitim wan presiden blong kworom blong ol elda long wan stek konfrens sam yia i pas. Long konfrens, i gat moa long 40 nem we oli presentem blong ol man we bae oli kasem Melkesedek Prishud.
Stek presiden i lei long saed blong mi, mo talem slo: “Ol man ia, evriwan oli lesaktiv fiuja elda.” Mi sek, mi askem presiden wanem program nao i yusum blong sevem ol man ia.
Hem i poenem wan yang man biaen long japel. Hem i se: “Man ia nao. Plante long ol man ia oli kambak from elda kworom presiden ia.” Hem i sidaon long biaen, i dresap nomo, i stretem mo krosem leg blong hem long fored. I werem sus we i nomo gat kala long hem.
Mi askem stek presiden blong presentem hem long mi afta long miting. Taem mitufala i mit, mi talem long yang man ia se mi sapraes long wanem hem i bin mekem mo askem hem olsem wanem hem i mekem. Hem i saksakem solda blong hem. Hem i no wantem se oli talem se hem nao i mekem wok.
Wetem wan slo voes hem i se: “Mi save evri inaktiv man long taon ia. Plante long olgeta oli gat ol pikap trak. Mi tu mi gat wan trak. Mi wasem trak blong mi long ples we oli wasem trak blong olgeta. Mo, oli kam fren blong mi.
“Afta mi wet se wan samting i go rong long laef blong olgeta. I hapen oltaem. Oli tokbaot long mi. Mi lisin mo mi no poenem fingga. Afta taem oli askem: ‘?I gat samting i rong long laef blong mi? I mas gatwan samting we i moa gud bitim hemia.’ Mi talem long olgeta wanem nao i rong, we i no gat, mo weaples nao oli save faenem. Samtaem oli bilivim mi, mo taem oli biliv, mi tekem olgeta wetem mi.”
Yu save luk from wanem hem i no tokbaot hemwan. Hem i from se, hem i save se hem i mekem smol pat blong hem mo Lod i mekem bigwan i stap. Lod nao i tajem hat blong ol man ia long trabol taem blong olgeta. Lod nao i givim filing ia se, i gat wan samting we i gud moa blong olgeta, mo hop se bae oli faenem.
Yang man ia, we—olsem yu—i wan wokman blong Lod, i biliv nomo se sapos hem i mekem smol pat blong hem, Lod bae i helpem olgeta man ia long rod ia blong go hom, mo long hapines we Lod nomo i save givim. Man ia tu, i bin save se Lod i bin singaotem hem olsem wan elda kworom presiden from se bae hem i mekem pat blong hem.
Bae i gat ol taem long seves blong yu we yu no luk bigfala sakses blong yang presiden ia blong kworom blong ol elda. Hemia i taem, taem ia we yu nid blong gat tras se Lod, we i save se bae yu mekem pat blong wok blong yu, i singaotem yu tru long ol wokman blong Hem we oli gat atoriti. Blong gat fet long wokman blong Lod i impoten tumas long misinari seves blong bigfala bubuman blong mi, Henri Aering.
Hem i kasem baptaes long 11 Maj 1855 long Sent Luis, Misuri. Erastus Sno i bin odenem hem long ofis blong pris i no longtaem afta. Orson Spensa i bin singaotem hem blong go long misin long Jeroki Nesen long 6 Oktoba.1 Oli odenem hem wan elda long 11 Oktoba. Hem i klaem long hos mo aot i go long Jeroki Misin long 24 Oktoba. Hem i gat 20 yia mo i wan konvet blong seven manis nomo.
Sapos i gat eni prishud we i gat risen blong filim se hem i no kwalifae o rere, hem i Henri Aering, we i jes kasem baptaes sevem manis nomo bifo. Wan risen we hem i gat strong paoa long tingting blong go, i from hem i biliv long God tru long ol wokman we Hem i givim atoriti long olgeta. Ples ia nao i stamba blong strong paoa long tingting blong hem. Hemia i ples we paoa blong gogohed i kamaot long hem, nomata wanem koling blong yumi long prishud.
Afta we Elda Aering i bin wok blong tri had yia, mo afta long ded blong presiden blong misin, oli singaotem Henri mo sastenem hem olsem misin presiden long wan miting we oli holem long 6 Oktoba 1858.1 Hem i sapraes mo i sek, semmak olsem niufala dikon ia. Hem i raetem: “Mi no ting nating se bae oli singaotem mi long bigfala ofis ia, be hem i tingting blong ol brata, mo mi akseptem wetem glad, mo semtaem mi filim bigfala wiknes blong mi mo mi no gat naf eksperiens.”2
Naoia, Presiden Aering i travel i go long Jeroki Krik, mo Jokto Nesen long 1859. Tru long hadwok blong Presiden Aering, Lod i ademap olsem Henri i talem: “wan namba i kam long jos.” Hem i oganaesem tu branj be luk se “smol nomo oli laef long wok ia.”3
Wan yia afta, Hem i fesem hadtaem from se ol lida blong politik long medel blong ol pipol we hem i wok from, oli nomo letem ol Lata-dei Sent misinari oli mekem wok blong olgeta. Taem hem i stap tingting hevi long wanem we hem i mas mekem, hem i tingbaot toksave blong fas misin presiden blong hem we i talem se bae hem i pulum misin blong hem i go kasem yia 1859.4
Long Oktoba blong sem yia ia, Henri i raet i go long Presiden Brigham Yang blong kasem daereksen, be hem i no kasem wan ansa long kwestin blong hem. Henri i talem: “From se mi no save harem wan toktok i kam long Presidensi blong Jos, mi askem Lod, long prea, mo askem hem blong i talemaot long mi maen mo tingting blong Hem se bae mi stap smol moa, o bae mi go long Saeon.”
Hem i gohed i se: “Drim ia i kam long mi olsem ansa long prea blong mi. Mi drim se mi kasem Sol Lek Siti mo wantaem nomo mi go long ofis blong Presiden Brigham Yang mo faenem hem. Mi talem long hem: “Presiden Yang, mi aot long misin blong mi, mi kam long tingting blong mi, be sapos i gat wan samting i rong long hemia, mi save gobak mo finisim misin blong mi.’ Long drim ia, profet i ansa: ‘yu stap longtaem finis. Hem i oraet.”
Henri i raetem long jenol blong hem: “From se mi bin gat drim bifo we i hapen stret olsem mi luk, mi gat fet blong biliv se bae i olsem tu, mo mi stat blong rere blong go.
Hem i kasem Sol Lek Siti long 29 Ogis 1860, afta we hem i wokbaot long leg nomo. Long nekis dei, hem i wokbaot i go long ofis blong Presiden Brigham Yang.5
Henri i tokbaot eksperiens ia long ol toktok ia: “Mi askem Presiden Yang, we i luk mi wetem kaen fasin. Mi talem long hem: ‘Presiden Yang, mi kam be i no gat wan i sendem mi kam; sapos mi rong mi save gobak mo finisim misin blong mi. Brigham Yang i ansa: ‘Hem i oraet. …Mifala i stap lukaotem yu.”
Henri i tokbaot glad blong hem mo talem: “Olsem ia nao drim blong mi i kamtru.”6
Glad blong hem i kam long wan konfemesen se Lod i bin wok mo i bin lukaotgud long hem. Hem i lanem wanem we i tru long yumi evriwan—se ol wokman blong Lod oli gat insperesen blong save tingting blong Lod. Mo Henri Aering i konfemem, wanem we mi tu mi save, se profet, olsem presiden blong prishud, i gat insperesen long God blong lukaotgud mo kea long ol wokman blong Lod.
Nomata wanem koling yu gat long prishud, sam taem bae yu filim se Papa long Heven i no save long yu. Yu save prea blong save tingting blong Hem, mo wetem gud hat blong wantem mekem eni samting we Hem i askem, bae yu gat wan ansa.
Papa long Heven bae i letem yu filim se Hem i save yu, mo i glad long seves blong yu, mo yu stap kam klin inaf from toktok ia blong Lod we yu wantem harem tumas: “Yu mekem gud wok fetful wokman blong mi. Yu bin stap tru long sam samting mo bae mi mekem yu yu man blong rul ova long plante samting; yu kam stap glad wetem Lod blong yu.”7
Hem i prea blong mi se evri prishud man bae i go aot wetem fet blong sevem evri sol we i blong hem blong lukaot long hem. God bae i ademap paoa blong Hem long hadwok blong ol wokman blong Hem. Bae Lod i tajem hat blong ol pipol blong mekem ol joes we bae i mekem oli muv long rod blong gospel i go from hapines mo longwe long harem nogud.
Hem i prea blong mi tu, se evri prishud man bae i filim lav mo kea blong Papa long Heven, blong Sevya, mo blong profet blong God long koling blong hem.
Mi talem spesel witnes blong mi se yumi stap mekem wok blong Lod Jisas Kraes. Mi testifae se Hem i singaotem yumi long wok blong Hem from Hem i save paoa blong yumi mo help we yumi nidim. Bae Hem i blesem ol hadwok blong yumi bitim we yumi ting long hem, taem yumi givim evri samting blong yumi long seves blong Hem. Mi testifae se profet blong God, we i presiden blong evri prishud long wol ia, i gat insperesen we i kam long God.
Mi talem tangkyu from eksampol blong ol fetful prishud man evri ples. Papa long Heven mo Sevya, Tufala i glad se yufala i stap mekem pat blong yufala. Tufala i save yu mo lavem yu. long nem blong Jisas Kraes, amen.