Yufala I No fraet, Yufala I Biliv Nomo
I Kam long Presiden Dita F. Ukdof
Seken Kaonsela long Fas Presidensi
Taem yumi jusum blong biliv, praktisim fet blong save sakem sin, mo folem Sevya blong yumi, Jisas Kraes, yumi openem ol ae blong spirit long ol naes samting we tingting blong yumi i no save tingting long olgeta.
Babilon mo Daniel
Twante sikis handred yia i pas, Babilon i bin top paoa blong wol. Wan man blong raetem histri bifo i tokbaot ol wol blong Babilon we i goraon long siti ia, se oli 90 mita hae mo 25 mita tik. “I no gat wan nara siti we i bigwan mo naes olsem siti ia.”1
Long taem blong hem, Babilon i bin senta ples blong lanem samting, blong loa, mo ol tingting. Ami blong hem i strong mo i no gat wan i kasem. I bitim paoa blong Ijip. I tekova, i prapa spolem gud evriwan mo tekemaot kapitol siti blong ol man Asiria, Nineve. I winim Jerusalem isi nomo mo i tekem ol bes mo smat pikinini blong Isrel i gobak long Babilon blong wok blong King Nebuknesa.
Wan long ol prisena i wan yang man we nem blong hem Daniel. Plante man blong stadi oli biliv se Daniel i gat samples bitwin 12 mo 17 yia long tetaem ia. Tingbaot hemia ol yang Aronik Prishud man: Daniel, klosap i sem yia long yufala taem oli tekem hem i go long haos blong King blong oli tijim hem long lanwis, loa, relijin mo saens blong Babilon ia blong wol.
?Yu ting se bae yu filim olsem wanem blong oli fosem yu blong aot long haos, wokbaot 800 kilometa i go long wan siti nara ples, mo fosem yu long relijin blong ol enemi blong yu?
Daniel i bin groap olsem wan man blong folem Jehova. Hem i bin biliv mo i bin wosipim God blong Ebraham, Aesak mo Jekob. Hem i bin stadi long ol toktok blong ol profet, mo i bin save wok blong God wetem ol man.
Be naoia, hem i yangfala, hem i prisena-studen long Babilon. Hem i mas harem i hevi long hem blong lego ol bilif blong hem mo folem hemia blong Babilon. Be hem i bin stap tru long fet blong hem—long toktok mo long aksen.
Plante long yufala i save se i olsem wanem blong difendem wan trutok we i no popula. Long Intanet lanwis blong tedei, yumi tokbaot se olgeta we oli no agri wetem yumi oli laetem yumi. Be Daniel i no jes blong fesem sem long pablik. Long Babilon, olgeta we oli jalenjem ol atoriti blong relijin oli andastanem se hemia i minim wanem—mining blong toktok ia—laetem. Traem askem ol fren blong Daniel olsem Sedrak, Mesek, mo Abed-Nego.2
Mi no save se i bin isi blong Daniel blong i wan man blong biliv long wan kaen ples olsem. Sam pipol oli gat blesing ia blong gat wan hat we i biliv—long olgeta, i luk se fet i kam olsem wan presen we i kam long heven. Be mi ting se Daniel i olsem plante long yumi we i mas wok from testemoni blong yumi. Mi biliv strong se Daniel i spendem plante aoa long ni blong hem we i stap prea, i askem ol kwestin mo talem fraet blong hem long olta blong fet, mo i wet long Lod blong i givim save mo waes tingting long hem.
Mo Lod i bin blesem Daniel. Nomata oli kwestinim fet blong hem mo oli mekem hem i sem, hem i bin stap tru long wanem we hem i save, tru long eksperiens blong hem, se i tru.
Daniel i bin biliv. Daniel i no gat tu tingting.
Nao long wan naet, King Nebuknesa i gat wan drim we i trabolem tingting blong hem. Hem i singaotem ol grup blong man blong stadi mo ol kaonsela, mo askem blong oli talem drim ia long hem, mo tu, blong oli talem mining blong hem.
Yes, oli no bin save mekem. “I no gat wan i save mekem wanem we yu askem” oli talem strong. Be hemia i bin mekem Nebuknesa i kros moa, mo i oda blong oli katem long pisis evri waes man, man blong majik, ol man blong stadi long sta mo ol kaonsela—wetem Daniel mo ol nara yang studen blong Isrel.
Yu, we yu save gud long buk blong Daniel, i save wanem i hapen afta. Daniel i askem Nebuknesa blong gat smol taem moa, mo hem mo ol fetful kompanion blong hem oli go long spring blong fet mo paoa blong tingting blong olgeta. Oli bin prea long God mo oli bin askem blong kasem help we i kam long heven long impoten taem ia long laef blong olgeta. Mo nao, “Daniel i luk wan [visen], mo God i soemaot long hem ol samting ya we i stap haed.”3
Daniel, yang boe ia we i kamaot long wan nara nesen—we oli bin tok nogud long hem from hem i bilivim wan defren kaen relijin,—i go long fored blong king mo talemaot long hem drim ia mo mining blong hem.
Stat long dei ia i go, from se hem i bin fetful long God, Daniel i bin kam wan kaonsela long king, mo oli bin savegud hem long ful Babilon from waes tingting blong hem.
Boe ia we i bin biliv mo laef folem fet blong hem i kam wan man blong God. Wan profet. Wan prins blong stret mo gud fasin.4
?Yumi olsem Daniel o no?
Long yumi evriwan we i tekem tabu prishud blong God, mi askem: ?yumi olsem Daniel o no?
?Yumi stap tru long God o no?
?Yumi stap praktisim wanem we yumi stap prijim, o yumi ol Sandei Kristin man nomo?
?Ol aksen blong yumi evri dei, oli stap soemaot klia wanem yumi talem se yumi biliv?
?Yumi stap helpem olgeta we oli pua mo olgeta long nid, olgeta we oli sik mo olgeta we oli gat hadtaem?5
?Yumi stap talem toktok nomo, o yumi strong blong wokbaot folem toktok blong yumi?
Ol brata. God i givim fulap long yumi. Oli tijim yumi long ol tabu trutok blong gospel blong Jisas Kraes we i kambak. God i givim prishud atoriti blong helpem ol nara man mo blong bildimap kingdom blong Hem long wol ia. Yumi stap long wan taem we God i kapsaetem bigfala paoa long spirit. Yumi gat trutok we i fulwan. Yumi gat prishud ki blong silim long wol mo long heven. Ol tabu skripja mo ol tijing blong ol profet mo aposol we oli stap laef oli kam long yumi i bitim bifo.
Ol dia fren blong mi. Bae yumi no tekem olgeta samting ia i nating. Wetem ol blesing mo janis, i gat ol bigfala responsabiliti mo samting blong mas mekem we i kam wetem. Yumi mas girap mo mekem olgeta samting ia.
Siti blong bifo blong Babilon, i nomo gat samting i stap naoia. Saen blong hem i go lus finis. Be fasin blong Babilon mo nogud fasin blong hem i gohed i stap. Naoia, i stap long yumi nao, blong laef olsem ol Kristin man, insaed long wan wol we i nomo biliv. Jalenj blong yumi i blong praktisim evri dei, gospel ia we i kambak blong Jisas Kraes, mo blong laef mo stap tru long ol komanmen blong God. Bae yumi mas stap kwaet taem fren i fos, no sapraes long popula fasin o ol giaman profet, mo no wantem save long jik blong man we i no save God, stanap agensem temtesen blong devel, mo winim fasin blong yumiwan blong stap les.
Jes tingbaot hemia. Bae i bin moa isi long Daniel blong go folem ol wei blong Babilon nomo. Hem i save livim fasin blong laef we God i bin givim long ol pikinini blong Isrel. Hem i save kakae nomo ol rij kaekae we King i givim mo foldaon long ol glad blong wol we man blong wol i stap folem. Bae hem i no save fesem jik olsem.
Bae hem i no save kam popula.
Bae hem i fit insaed nomo long ples ia.
Rod blong hem bae i no tantanem tumas.
Bambae i olsem gogo kasem dei ia we king i bin askem mining blong drim blong hem. Long taem ia, bae Daniel i faenemaot se, semmak olsem ol waes man blong Babilon, hem i lusum wanem i joenem hem long tru spring blong laet mo waes tingting.
Daniel i pasem tes blong hem. Hemia blong yumi i stap gohed yet.
Strong Paoa long Tingting blong Stap Biliv
Setan, enemi blong yumi, i wantem luk yumi foldaon Hem i taltalem ol giaman olsem pat blong hadwok blong hem blong prapa spolem gud bilif blong yumi. Sloslo, hem i stap talem tu se man we i gat tu tingting, rabis tingting, o i selfis, i wan top man mo hem i waes, be olgeta we oli gat fet long God mo ol merikel blong Hem, oli pikinini, oli blaen, o oli spolem hed blong olgeta. Bae Setan i faet strong se i stret ia nao, blong gat tu tingting long ol presen blong Spirit mo ol tijing blong ol profet.
Mi wantem tumas se mi save helpem evriwan we i andastanem wan simpol samting ia nomo: Mifala i biliv long God from ol samting we mifala i save wetem hat mo maen blong mifala, i no from ol samting we mifala i no save. Ol eksperiens blong yumi long saed blong spirit, samtaem, oli tabu tumas blong eksplenem long ol toktok, be hemia i no minim se oli no ril.
Papa long Heven i mekem rere wan kaekae long saed blong spirit blong ol pikinini blong Hem we i givim evri kaen gudfala kaekae—be yet, ol selfis man ia oli no kakae long ol presen blong spirit ia, be oli glad nomo blong stap longwe mo lukluk i go, oli dring long kap blong rabis tingting, tu tingting mo fasin blong no gat respek.
?From wanem eniwan bae i wokbaot tru long laef mo i stap glad nomo long laet blong kandel blong save blong olgetawan nomo, we sapos hem i go long Papa long Heven, bae hem i save kasem bigfala san blong save long saed blong spirit we bae i mekem maen i open bigwan wetem waes tingting mo i fulumap sol blong olgeta wetem glad?
Taem yu mo mi i toktok long ol pipol abaot fet mo bilif, ?i no tru we plante taem yumi harem: “Sapos nomo mi save biliv long wei ia we yu biliv”?
Insaed long kaen toktok ia, i gat wan nara giaman blong Setan: bilif ia i stap long sam pipol be i no long ol narawan. I no gat majik long bilif. !Be blong wantem biliv i fasfala step ia nao we yumi nidim! God i tekem evri man i semmak nomo.6 Hem i Papa blong yu. Hem i wantem toktok long yu. Be, i nidim blong wantem luk smol—blong mekem eksperiens long toktok blong God—mo praktisim wan smol pis blong fet.7 I nidim tu wan tingting we i stap daon. Mo i nidim wan open hat mo wan open maen. I nidim blong lukaotem, lukaotem samting long ful mining blong toktok ia. Mo maet wanem i moa had, i nidim fulap fasin blong save wet, mo stap wet long Lod.
Sapos yumi no traehad blong biliv, yumi olsem man we i ofem spotlaet, mo afta, i blemem spotlaet se i no stap laet.
I no longtaem i pas, mi bin sapraes mo harem nogud blong harem wan man we i kasem Aronik Prishud blong i gat hae tingting mo glad se hem i go longwe long God. Hem i talem: “Sapos God i soemaot Hemwan long mi, nao bambae mi biliv. Be sapos no, bae mi faenem trutok mo dipen long save mo waes blong miwan nomo blong saen rod long fored blong mi.”
Mi no save hat blong yang man ia, be mi harem mi sore tumas long hem. I isi nomo long hem blong sakemaot ol presen ia we Lod i stap givim long hem. Yang man ia i ofem spotlaet, mo afta, i glad long hemwan long toktok blong hem se i no gat laet.
Sore tumas, hemia i kam wan popula fasin tedei. Sapos yumi save traem God blong i pruvum Hem, nao yumi ting se yumi gat eskius blong no folem ol komanmen blong God mo no responsibol long rilesensip we yumi gat wetem Papa long Heven.
Ol brata. Bae mi tok klia: I no gat wan gud samting o bigfala samting long fasin blong stap selfis. Fasin blong gat tu tingting, hem i isi—eniwan i save mekem. Fetful laef nao i nidim blong gat strong klin fasin, strong tingting, mo paoa long tingting. Olgeta we oli holemtaet fet oli moa gud yet bitim olgeta we oli gat tu tingting, taem man i askem ol kwestin o talem sam wari.
Be i no mas sapraesem yumi se fet, sosaeti i no tinghevi long hem. Wol ia i gat longfala histri blong sakemaot fet from i no andastanem samting. Mo hem i gat hadtaem blong andastanem ol samting we oli no save luk. Be, i no from se yumi no save luk samting wetem ae blong bodi blong yumi nao bae yumi talem se i ril. I tru, i gat moa samting long heven mo wol bitim we yumi save drim long hem long ol buk, ol buk blong saens, o tingting blong man.8 Yunives i fulap wetem ol sapraes we oli bigwan tumas—ol samting we man i save andastanem nomo tru long ae blong spirit.
Promes blong Bilif
Taem yumi jusum blong biliv, praktisim fet blong save sakem sin, mo folem Sevya blong yumi, Jisas Kraes, yumi openem ol ae blong spirit blong yumi long ol naesfala samting we tingting i no save tingting long hem. Olsem ia nao bilif mo fet blong yumi bae i gro strong moa, mo bae yumi luk moa.9
Ol brata. Mi testifae se iven long ol taem we i had tumas, Sevya bae i talem long yu olsem we i bin talem long wan papa we i wari tumas long rod long Galili: “Yu no fraet. Yu biliv nomo.”10
Yumi save jusum blong biliv.
From long bilif, yumi faenem stat blong laet.
Bae yumi faenem trutok.11
Bae yumi faenem pis.12
From bilif blong yumi, bae yumi neva hanggri, neva tosta.13 Ol presen blong gladhat blong God bae i letem yumi stap tru long fet blong yumi, mo bae i fulumap sol blong yumi olsem wan wel blong wota we i givim laef we i no gat en.14 Bae yumi save glad ia we i tru mo i stap oltaem.15
From hemia, ol dia fren blong mi, ol brata blong mi long prishud blong God:
Gat strong paoa long tingting blong biliv.
Yufala i no fraet, yufala i biliv nomo.
Stanap wetem Daniel.
Mi prea se wanwan long yumi—yangfala mo olfala—bae i faenem niufala paoa, paoa long tingting mo hat blong wantem biliv. Long nem blong Jisas Kraes, amen.