Mekem Se Oltaem Oli Tingbaot Hem Oltaem

I Kam long Klodio R. M. Kosta

Blong Olgeta Seventi

Mi laekem blong stadi mo tingting hevi abaot laef blong Hem we i bin givim evri samting from mi mo from evriwan long yumi.

Mi laekem Praemeri singsing ia we i se:

Talem mi ol stori blong Jisas, mi laekem blong harem,
Ol samting we bae mi askem blong hem i talem long mi spos hem i bin stap ia.
Ol stori folem rod, ol stori taem long solwota,
Ol Stori blong Jisas, talemaot olgeta long mi.1

Mi biliv se taem yumi statem tradisen ia blong talem ol stori abaot Jisas long ol pikinini mo famli blong yumi, i wan spesel wei blong kipim Sabat i tabu long ol hom blong yumi.

Hemia bae i givim wan spesel spirit long hom blong yumi mo givim famli blong yumi wetem ol eksampol we i kam long Sevya Hemwan.

Mi laekem blong stadi mo tingting hevi long laef blong Hem we i givim evri samting blong mi mo blong evriwan long yumi.

Mi laekem blong ridim ol skripja ves abaot laef blong Hem we i no gat sin, mo afta ridim ol skripja we i tokbaot ol taem we Hem i gotru long olgeta; mi sarem ae mo traem blong pikjarem ol tabu taem ia we oli tijim mi mo mekem mi kam strong moa long saed blong spirit.

Ol taem olsem:

Taem Hem i spet long graon, i mekem smol sofmad long hem, mo i tekem sofmad ia, i putum long ae blong man ya mo talem long hem: “Yu go long wota ia Saeloam.” Mo man ia i obei, “mo wasem ae blong hem mo taem hem i kambak, hem i save lukluk.”²
Taem Hem i hilim woman we i gat problem wetem blad mo i tajem en blong klos blong Hem, mo biliv se taem bae hem i tajem Hem nomo bae hem i kam oraet.³
Taem Hem i kamaot long ol disaepol blong Hem, hem i taem we hem i wokbaot antap long solwota.⁴
Taem Hem i go wetem ol disaepol folem rod i go long Emaus mo mekem oli andastanem gud ol skripja.⁵
Taem Hem i kamaot long ol pipol long Amerika mo talem olgeta blong kam long Hem mo putum ol han blong olgeta long saed blong Hem mo filim ol trak blong nil long ol Han mo leg blong hem blong oli save se Hem i bin “God blong Isrel, mo God blong ful wol, mo oli bin kilim hem from ol sin blong wol.”⁶

Mi glad blong save se i gat ol papa mo mama we oli talem ol stori blong Kraes long ol pikinini blong olgeta. Mi luk hemia taem mi stap luk ol pikinini long Jos long Praemeri program mo sam nara wan moa.

Mi talem tangkyu long papa mo mama blong mi blong tijim mi abaot Kraes. Mi gohed blong luk hao eksampol blong Sevya i helpem mi mo dia waef blong mi taem mitufala i tijim ol pikinini blong mifalawan.

Hat blong mi i fulap long glad taem mi luk ol pikinini blong mi oli stap talem ol stori blong Kraes long ol apu pikinini blong olgeta. I mekem mi tingbaot wan long ol skripja we mi laekem, we i stap long 3 Jon, japta 1, ves 4, we i rid olsem: “bae mi no save glad tumas be blong harem se ol pikinini blong mi i wokbaot long trutok.” ?Be olsem wanem long ol apu pikinini blong yumi?

Tangkyu from ol lida blong yumi, we oli tijim yumi oltaem abaot Kraes, abaot kipim Sabat dei i tabu, mo blong tekpat long sakramen evri Sandei blong givim ona long Sevya.

Bae yumi kam blong stap glad moa long Sabat mo sakramen taem yumi stadi long ol stori blong Kraes. Taem yumi mekem olsem, yumi statem ol tradisen we i bildim fet mo testemoni blong yumi mo tu i protektem famli blong yumi.

Sam wik i pas, taem mi stap stadi bakegen long mesej blong Presiden Rasel M. Nelson blong las jeneral konfrens, mo taem mi stap tingting hevi long Sabat dei, mi filim wan bigfala tangkyu from blesing mo spesel janis ia blong save tekpat long sakramen. Blong mi, hemia i wan impoten, tabu, taem long saed blong spirit. Mi glad bigwan from sakramen miting.

Taem mi bin stap tingting hevi, mi stadi gud long blesing blong bred mo wota. Mi ridim mo tingting hevi long ol prea mo odinens blong sakramen. Mi stat blong go tru long hem long maen blong mi mo long hat blong mi ol samting we i hapen long taem ia.

Wetem fasin blong tingting hevi, mi tingtingbak long dei ia, fas dei ia blong bigfala lafet blong bred we i nogat Yis, taem Hem i ansarem kwestin blong ol disaepol abaot ples blong rere long Pasova, mo Hem i se, “Go long taon, luk man ya we mi talem long yufala mo talem se Tija i talem se taem blong hem i kolosap nao. Bae hem wetem ol man blong hem bae oli mekem lafet blong Pasova long haos blong yu.”⁷

Mi traem blong pikjarem long maen blong mi ol disaepol i stap pem gud kakae mo rere long tebol blong kakae wetem Hem long spesel dei ia: wan tebol blong 13 pipol, Hem i ol twelef disaepol we Hem i lavem.

Mi krae taem mi pikjarem Kraes i stap kakae wetem olgeta, taem Hem i talem: “Tru mi talem long yufala, wan long yufala bae i letem mi mi go long han blong ol enemi blong mi.”⁸

Mi tingbaot ol disaepol we oli sore tumas mo stap askem Hem, “Masta, Hu ya? ?Mi⁹

Mo taem Judas i askem Hem sem kwestin, hem i ansa kwaet nomo, “Yu nomo yu talem olsem.”¹⁰

Mi save pikjarem ol han we i hilim, i givim kamfot, i tajem, mo blesem, mo brekem bred olsem Jisas i se, “Tekem, kakae, hemia i bodi blong mi.”¹¹

Afta hem i tekem wan kap i fulumap wetem waen mo talem tangkyu mo givim kap long olgeta, “Yufala evriwan yufala i dring long hem; from hemia i blad blong niu testeman, we i ron from plante man blong oli sakem sin.”¹²

Long maen blong mi, mi luk wanwan disaepol wan afta wan mo luk long ol ae blong olgeta wari blong olgeta from Masta, we oli lavem tumas. I bin olsem se mi bin stap sidaon wetem olgeta, mo stap luk evri samting. Mi filim hat blong mi i soa strong, fulap long harem nogud mo sore long wanem we bae i hapen long eksperiens blong mi.

Sol blong mi i fulap long wan strong tingting blong wantem kam wan moa gud man. Long fasin blong sakem sin mo sore mi hop blong save draemap mo no letem blad blong Hem we i ron long Getsemane, i foldaon smolsmol.

Afta mi tingting hevi abaot sakramen we yumi stap tekem evri wik blong tingbaot hem. Taem mekem olsem, mi tingting hevi long wanwan toktok blong blesing blong bred mo wota. Mi lukbak moa dip long ol toktok ia “mo oltaem tingbaot hem, long blesing blong bred mo “blong oli oltaem tingbaot hem” long blesing long wota.¹³

Mi tingting hevi long wanem i minim blong oltaem tingabaot Hem.

Long mi i minim:

Blong tingbaot laef blong Hem bifo laef long wol ia, taem we Hem i mekem naesfala planet ia.¹⁴
Blong tingbaot se Hem i bon long wan simpol ples blong ol animol long Betlehem Judia.¹⁵
Blong tingbaot se, iven taem Hem i gat twelef yia, Hem i tijim mo prij long ol man blong loa insaed long tempol.¹⁶
Blong tingbaot taem Hem i bin go kwaet Hemwan nomo long wan drae ples blong rere from ministri blong Hem long wol ia.¹⁷
Mo taem hem i bin jenis i kam narafala long fored blong ol disaepol blong Hem.¹⁸
Blong tingbaot taem hem i tijim sakramen long Las Sapa wetem olgeta.¹⁹
Blong tingbaot taem we Hem i bin go long Garen blong Getsemane mo i bin safa bigwan from ol sin blong yumi, ol soa, ol harem nogud, ol sik mekem se blad blong Hem i bin ron aot long skin from.²⁰
Blong tingbaot taem we afta plante safaring mo plante harem nogud, long Getsemane yet, wan disaepol i bin trikim Hem wetem wan kis, mo disaepol ia Hem i singaotem hem se hem i wan fren.²¹
Blong tingbaot taem we oli tekem Hem i go long Paelat mo long Herod blong oli jajem hem.²²
Blong tingbaot taem ia we oli spolem Hem, sakem Hem olbaot, spet long Hem, kilim Hem, mo wipim Hem mo skin blong Hem i kamaot.²³
Blong tingbaot taem we oli fosem wan hat blong king wetem rop blong nil long hed blong Hem. ²⁴
Blong tingbaot se Hem i mas karem kros blong Hemwan i go long Golgota, mo we oli nilim Hem long kros, mo stap harem nogud long evri soa blong bodi mo spirit.²⁵
Mo long kros, wetem hat we i fulap long jareti, Hem i lukluk olgeta we oli krusifaem Hem mo leftemap ae blong hem i go long heven, i prea: “Papa yu fogivim olgeta ya, from we oli no save samting ya we oli stap mekem.”²⁶
Blong tingbaot taem Hem, i save se Hem i bin fulfilim misin blong Hem blong sevem evri man, mo i bin lego spirit blong Hem long han blong Papa blong Hem, Papa blong mifala.²⁷
Blong tingbaot taem Hem i laef bakegen long ded, we i mekemsua se, yumi tu, yumi save laef bakegen long ded mo gat janis blong stap laef wetem Hem blong taem we i no save finis, mo i dipen long ol joes blong yumi.²⁸

Moa long hemia, tingting hevi long sakramen prea mo ol spesel mining blong ol prea ia, hamas i gud tumas blong kasem promes, long taem blong blesing blong sakramen, olsem blong yumi oltaem tingbaot Hem, bae yumi oltaem gat Spirit blong Hem i stap wetem yumi.²⁹

Mi biliv se Lod i gat wan taem blong Hemwan, blong givim revelesen long yumi. Mi andastanem gud hemia taem mi stap stadi long Prija 3:1, 6, we i go olsem:

“Olgeta samting we oli stap kamtru long wol ya, oli stap kamtru stret long taem we God i putum.

“Hem i putum wan taem blong man i faenem samting, mo i putum taem blong man i lusum samting, Hem i putum taem blong man i hivimap ol samting, mo i putum taem blong man i sakemaot ol samting.”

Sakramen i wan taem tu blong Papa long Heven i stap blong tijim yumi abaot Atonmen blong Pikinini blong Hem we Hem i lavem tumas—we i Sevya blong yumi, Jisas Kraes—mo blong yumi kasem revelesen long saed blong Atonmen ia. Hem i wan taem blong noknok, mo bae i open long yu,”³⁰ blong askem mo kasem save ia. Hem i taem blong yumi blong askem God wetem respek from save ia. Mo sapos yumi mekem, mi save se bae yumi kasem save ia, we bae i blesem laef blong yumi bitim mak.

Mi laekem Sabat, sakramen, mo mining blong hem. Mi lavem Sevya wetem evri sol blong mi. Long nem blong Jisas Kraes, amen.