“28 Jun–4 Julae. Doktrin mo Ol Kavenan 71–75: ‘I No Gat Wan Tul blong Faet we Oli Mekem Agensem Yufala we Bae I Win,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“28 Jun–4 Julae. Doktrin mo Ol Kavenan 71–75” Kam Folem Mi—Blong Wanwan Man, Woman mo Famli: 2021
I Stap long Hat blong Man blong Lukaot long Sipsip, i kam long Simon Dewey
28 Jun–4 Julae
Doktrin mo Ol Kavenan 71–75
“I No Gat Wan Tul blong Faet we Oli Mekem Agensem Yufala we Bae I Win”
Elda Quentin L. Cook i bin tijim “Tabu Spirit i save lidim tingting blong man taem hem i stap mekem skripja stadi blong hemwan, mo taem i gat prea insaed long hom” (“Jenis long Laef we I Tru mo I Stap I Go long Papa long Heven mo Lod Jisas Kraes,”,” Ensign o Liahona, Nov 2018, 10).
Raetemdaon Ol Filing mo Tingting blong Yu
Stat long taem finis we hem i bin wan yang boe, Josef Smit i bin stap fesem ol toktok agensem hem—iven ol enemi—taem hem i bin stap traem blong mekem wok blong God. Be ating bae i brekem hat blong hem let long yia 1831, taem we Esra But i bin stat blong poenem fingga long Jos, from se long kes ia, Esra i bin wan foma memba blong Jos. Esra i bin luk Josef i yusum paoa blong God blong hilim wan woman. Hem i bin kasem invitesen blong go wetem Josef blong go lukluk graon ia long Saeon long Misuri. Be afta long hemia, hem i bin lusum fet blong hem, mo hem i traem blong spolem nem blong Profet, nao hem i bin pablisim plante leta long niuspepa blong Ohaeo. Mo i luk se ol hadwok blong hem i stap wok: “ol nogud filing we i bin kam antap agensem Jos” long eria ia (Doktrin mo Ol Kavenan 71, seksen heding). ?Bae ol man blong biliv oli mekem wanem long wan kes olsem ia? I luk se i no gat wan stret ansa we i stret long evri situesen, be i luk se, plante taem—wetem kes ia tu long 1831—pat blong ansa blong Lod i blong difendem trutok mo stretem ol giaman toktok tru long “fasin blong prijim gospel” (ves 1). Yes. Oltaem bae man i tok agensem Jos, be long en, “i no gat wan tul blong faet we oli mekem agensem yutufala we bae i win” (ves 9).
Luk long “Ezra Booth and Isaac Morley,” Revelations in Context, 134.
Sam Aedia blong Skripja Stadi blong Yuwan
Bae Lod i sakemaot ol tok blong agensem wok blong Hem long stret taem blong Hem.
Maet bae yumi wari taem we yumi harem ol pipol oli stap talem nogud o stap spolem Jos o ol lida blong hem, speseli taem yumi fraet se ol pipol we yumi save mo lavem olgeta, bae tingting blong olgeta i save jenis from ol kaen tok blong agens ia. Taem wan samting semmak i bin hapen long Ohaeo long 1831 (luk long seksen heding blong Doktrin mo Ol Kavenan 71), mesej blong Lod i go long Josef Smit mo Sidni Rigdon, i wan mesej blong gat fet, blong no fraet. Taem yu stap stadi long Doktrin mo Ol Kavenan 7:1, ?wanem nao yu faenem we i bildimap fet blong yu long Lod mo wok blong Hem? ?Wanem nao i tajem yu abaot instraksen we Lod i bin givim long ol wokman blong Hem long kaen situesen olsem?
Luk tu long Robert D. Hales, “Christian Courage: The Price of Discipleship,” Ensign o Liahona, Nov. 2008, 72–75; Jörg Klebingat, “Defending the Faith,” Ensign, Sept. 2017, 49–53.
Ol bisop oli ol man blong lukluk ova long ol afea, long saed blong spirit mo long saed blong laef long wol ia, blong kingdom blong Lod.
Taem we Niuwel K. Witni i kasem koling blong stap olsem seken bisop blong Jos, ol diuti blong hem oli bin defren smol long ol bisop blong tedei. Eksampol. Bisop Witni i bin lukluk ova long konsekresen blong ol propeti mo raet ia blong stap long Misuri, long graon blong Saeon. Be taem yu stap rid abaot koling mo ol diuti blong hem long Doktrin mo Ol Kavenan 72, maet bae yu luk se i joen long wanem ol bisop oli stap mekem tedei—wetem sem kaen tingting ia long saed blong ol diuti blong olgeta. Eksampol: ?long wanem wei nao “yu givim wan ripot” i go long bisop blong yu? (Vesves 5). ?Long wanem wei nao bisop blong yu “i lukaotem stoahaos blong Lod” mo i lukaotem gud ol konsekresen blong ol memba blong wod? (luk long ves 10, 12). ?Olsem wanem nao wan bisop i bin helpem yu?
Luk tu long Gospel Topics, “Bishop,” topics.ChurchofJesusChrist.org.
Niuwel K. Witni i bin stap lukaotem stoahaos blong bisop.
Mi save lukaotem sam janis blong serem gospel.
Afta we Josef Smit mo Sidni Rigdon oli kambak long smol taem misin blong tufala blong stretem ol damej we Esra But i bin mekem (luk long Doktrin mo Ol Kavenan 71), Lod i bin talem long tufala blong gobak long wok blong stap transletem Baebol (luk long Bible Dictionary, “Joseph Smith Translation”). Be tu, hem i bin wantem blong gohed blong prijim gospel. Taem yu stap ridim Doktrin mo Ol Kavenan 73, tingting long wei we yu save mekem wok blong prijim gospel i gogohed mo i “posibol blong mekem” (ves 4)—o i ril—i pat blong laef blong yu wetem ol nara responsabiliti.
Lod i stap blesem olgeta we oli fetful blong talemaot gospel blong Hem.
Blong ansarem oda ia blong “Yufala i go long ful wol” blong prijim gospel (Doktrin mo Ol Kavenan 68:8), plante fetful elda oli bin askem sam moa infomesen abaot wei we Lod i bin wantem olgeta blong mekem folem oda ia. ?Wanem toktok mo sentens yu yu faenem long Doktrin mo Ol Kavenan 75:1–12 we i save helpem yu blong andastanem olsem wanem blong prijim gospel long wan wei we i wok gud? ?Wanem blesing nao Lod i promesem long ol fetful misinari? Tingting long hao nao ol instraksen mo blesing ia oli blong yu taem yu stap serem gospel.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 71.?Wanem nao oli askem Josef Smit mo Sidni Rigdon blong mekem taem ol narawan oli bin stap tok agensem Jos mo ol lida blong Jos? ?Olsem wanem nao yumi “stap mekem rere rod” blong ol pipol oli kasem ol revelesen blong God? (Doktrin mo Ol Kavenan 71:4).
-
Doktrin mo Ol Kavenan 72:2.?Olsem wanem ol bisop oli blesem famli blong yumi? ?Wanem nao bisop blong yumi i askem yumi blong mekem, mo olsem wanem nao yumi save sastenem hem? Maet famli blong yu i save mekem wan kad blong talem tangkyu long bisop blong yufala from seves we hem i stap givim.
-
Doktrin mo Ol Kavenan 73:3–4.?Bae famli blong yu bae i karem samting sapos hem i stap lanem abaot Josef Smit Translesen blong Baebol? (luk long Bible Dictionary, “Joseph Smith Translation”). yu save lukluk sam ples we Josef Smit Translesen i bin stretem, mo toktok raon long ol bigfala trutok ia we Lod i talemaot tru long Profet. Blong gat sam moa eksampol, luk long Josef Smit Translesen blong Jenesis 14:25–40 mo Jenesis 50:24–38 insaed long Baebol apendiks; ol defren futnot long Matiu 4:1–11; mo Luk 2:46, futnot d.
-
Doktrin mo Kavenan 74:7.?Wanem nao ves ia i stap tijim yumi abaot Jisas Kraes mo ol smol pikinini?
-
Doktrin mo Ol Kavenan 75:3–5, 13, 16.Yu save helpem famli blong yu blong andastanem olsem wanem Lod i wantem yumi blong givim seves long hem taem oli tokbaot ol samting we i defren bitwin “fasin blong stap mekem nating” mo “fasin blong stap wok wetem ful paoa.” Maet yu save jusum sam wok blong haos, mo invaetem ol memba blong famli blong soem olsem wanem oli stap mekem ol wok ia long fasin blong stap mekem nating, mo afta, wetem ful paoa blong olgeta. ?Olsem wanem nao yumi stap wok blong Lod wetem evri paoa blong yumi? Folem wanem we i stap long Doktrin mo Ol Kavenan 75:3–5, 13, 16, ?wanem nao Hem i stap promesem long ol fetful wokman blong Hem?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Yumi mas gohed,” STSP, pej 10.
Stap Kam Antap long Stadi blong Yuwan
Lukaotem ol toktok mo ol sentens we oli givim insperesen. Taem yu stap rid i go, Spirit bae i tekem samfala toktok o sentens i kam long maen blong yu. Tingting blong tekemdaon not long ol toktok mo sentens ia we oli kamaot long Doktrin mo Ol Kavenan 71–75 we i givim insperesen long yu.
Droing blong wan yang man wetem wan prishud lida we i kam long D. Keith Larson