revelation manuscript book in display case

21–27 Jun

Doktrin mo Ol Kavenan 67–70

“Praes blong Olgeta I Moa Bigwan Bitim Ol Rij Samting blong Ful Wol Ia”

Nomata we plante long ol revelesen insaed long Doktrin mo Ol Kavenan oli bin go long ol spesifik pipol folem ol spesifik situesen, oli blong gud blong yumi evriwan (Testemoni blong Olgeta Twelef Aposol blong testifae long Trutok blong Buk blong Doktrin mo Ol Kavenan,” Fas Toktok long Doktrin mo Ol Kavenan). Taem yu stap stadi, lukaotem ol trutok mo ol prinsipol we oli blong gud blong yu.

Raetemdaon Ol Filing mo Tingting blong Yu

Stat long 1828 kasem 1831, Profet Josef Smit i bin kasem plante revelesen we i kam long Lod, wetem sam tabu kaonsel blong wanwan man, ol instraksen blong lidim Jos, mo ol insperesen visen blong ol las dei. Be plante long Ol Sent oli no bin ridim olgeta. Ol revelesen ia, oli no bin pablisim olgeta yet, mo samfala kopi nomo we i bin stap, oli bin raetem long ol pej we oli stap wanwan, mo oli bin pasem raon long ol memba mo ol misinari nao oli bin pasem raon.

Afta, long Novemba 1831, Josef i bin singaotem wan kaonsel blong ol lida blong Jos, blong toktok raon long ol revelesen we oli bin pablisim. Afta we oli bin askem tingting blong Lod, ol lida oli bin mekem ol plan blong pablisim Buk blong Olgeta Komanmen—wanem we i kam fastaem long Doktrin mo Ol Kavenan blong tedei. I no longtaem afta, evriwan i bin save rid olgetawan, toktok ia blong God, we Hem i talemaot tru long wan profet we i stap laef, tru pruf se “ol ki blong ol sikret blong kingdom blong Sevya blong yumi oli stap bakegen long han blong man.” From ol risen ia, mo plante moa risen, Ol Sent blong bifo, mo blong naoia, oli tekem se ol revelesen ia, “praes blong hem i moa bigwan bitim ol rij samting blong ful Wol ia” (Doktrin mo Ol Kavenan 70, seksen heding).

Luk long Saints, 1:140–43.

stadi blong yuwan pikja bokis

Sam Aedia blong Skripja Stadi blong Yuwan

Doktrin mo Ol Kavenan 67:1–9; 68:3–6

God i stanap long saed blong ol wokman blong Hem mo ol toktok we oli stap talem long nem blong Hem.

Desisen ia, blong pablisim ol revelesen we Josef Smit i bin kasem, i luk olsem i wan isiwan, be sam fasfala lida blong Jos oli bin save gud se i wan aedia o nogat. Wan wari we i bin stap, i from ol samting we i no stret long lanwis we Josef Smit i bin yusum blong raetem ol revelesen. Revelesen we i stap long seksen 67 i kam olsem ansa blong wari ia. ?Wanem nao yu lanem abaot ol profet mo revelesen aot long ol ves 1 kasem 9? ?Wanem moa niu tingting yu kasem aot long seksen 68:3–6?

Bifo oli printim Buk blong Olgeta Komanmen, samfala lida blong Jos oli bin saenem wan testemoni, we oli bin raetem, se ol revelesen insaed long buk ia oli tru. Blong luk wan kopi blong testemoni blong olgeta, luk long “Testimony, circa 2 November 1831,” Revelation Book 1, 121, josephsmithpapers.org.

Doktrin mo Ol Kavenan 68:1–8

Insperesen we i kam long Tabu Spirit i talemaot tingting blong Lod.

Ol toktok long ol ves ia, oli bin kamaot taem we Orson Haed mo ol narawan, oli kasem koling ia blong “talemaot gospel we i no gat en, tru long Spirit blong God we i laef, long wan pipol i go long narafala pipol, mo long wan graon i go long narafala graon” (ves 1). ?Olsem wanem nao, toktok we i stap long ves 4 i save helpem wan we Lod i sendem hem blong go prijim gospel? ?Olsem wanem nao hemia i blong yu tu? Tingting long wan taem we “Tabu Spirit i lidim,” (ves 3) o i talem, o i mekem samting. ?Wanem nao yu faenem insaed long ol ves ia we i save givim yu tras ia blong folem ol kwaet toktok long saed blong spirit?

Doktrin mo Ol Kavenan 68:25–28

Papa mo mama, tufala i gat fas wok ia blong tijim ol pikinini blong tufala.

Sista Joy D. Jones, Praemeri Jeneral Presiden i bin tijim: “Wan nambatri ki blong helpem ol pikinini blong save stanap agensem sin, hem i blong stat taem oli smol nomo, blong putum long maen blong olgeta, ol besik doktrin mo prinsipol blong gospel —stat wetem ol skripja, Ol Toktok blong Bilif, smol buklet ia, Blong Ol Yut Oli Kam Strong, ol singsing blong Praemeri, ol hym, mo testemoni blong yumiwan—we bae i lidim ol pikinini blong yumi i go long Sevya.” (“Wan Jeneresen we I Save Stanap Agensem Sin,” Ensign o https://www.churchofjesuschrist.org/study/general-conference/2017/04/a-sin-resistant-generation?lang=bis, Epril 2017).

Folem wanem i stap long Doktrin mo Ol Kavenan 68:25–28, ?wanem nao oli sam “besik doktrin blong gospel” we Sista Jones i bin tokbaot se bae ol papa mo mama oli mas tijim long ol pikinini blong olgeta? ?From wanem hemia i wan impoten responsabiliti we oli givim long papa mo mama? ?Bae yufala i talem wanem long wan papa o mama we i filim se hem i no naf blong tijim olgeta samting ia long pikinini blong hem?

Luk tu long Tad R. Callister, “Papa mo Mama: Stamba Gospel Tija blong Ol Pikinini blong Olgeta,” Ensign o https://www.churchofjesuschrist.org/study/general-conference/2014/10/parents-the-prime-gospel-teachers-of-their-children?lang=bis, Nov. 2014.

famli we i stap stadi

Hom i stret ples blong ol pikinini oli lanem gospel.

famli stadi pikja bokis

Sam Aedia blong Famli Skripja Stadi mo Famli Haos Naet

Doktrin mo Ol Kavenan 67:10–14.?Olsem wanem nao fasin blong stap jalus, stap fraet mo gat hae tingting oli holemtaet yumi blong gro kolosap long Lod? ?From wanem, “wan man we i folem fasin blong wol” i no save stap long ples we Lod i stap long hem? (ves 12; luk tu long Mosaea 3:19). ?Wanem nao yumi faenem insaed long ol ves ia, we i givim insperesen blong “gohed wetem fasin blong stap wet longtaem gogo kasem taem [yumi] kam stret evriwan”? (ves 13).

Olsem wan famli, yu save luklukbak tu long mesej blong Elda Jeffrey R. Holland, “Bae Yufala I Mas Stret Evriwan—long En” (Ensign o https://www.churchofjesuschrist.org/study/general-conference/2017/10/be-ye-therefore-perfect-eventually?lang=bis, Okt 2017).

Doktrin mo Ol Kavenan 68:3–4.Ol memba blong famli oli save serem sam eksperiens we i bin mekem fet blong olgeta i kam strong moa se, ol toktok blong ol wokman blong Lod, oli “tingting blong Lod,” “maen blong Lod,” mo “paoa blong Lod blong we i go kasem fasin blong sevem man” (ves 4). O, oli save lukaotem ol mesej blong las jeneral konfrens we i go wetem ol jalenj we famli blong yu i stap fesem.

Doktrin mo Ol Kavenan 68:25–35.Ol ves ia, oli tekem impoten kaonsel i go long “ol pipol we oli stap long Saeon” (ves 26). ?Wanem nao yumi gat insperesen blong kam antap long hem afta we yumi stap ridim ol ves ia? Bae i gud tumas blong krietem ol pikja we i soemaot ol prinsipol long ol ves ia, mo haedem olgeta raon long haos blong yufala. Afta, long ol dei we i stap kam, taem wan i faenem wan pikja, yu save yusum olsem wan janis blong tij abaot prinsipol ia. ?From wanem hom i bes ples blong ol pikinini oli lanem olgeta samting ia?

Doktrin mo Ol Kavenan 69:1–2.Oli bin sendem Oliva Kaodri i go long Misuri wetem ol kopi we oli raetem, blong ol revelesen blong Profet, blong oli printim, wetem mane tu blong help blong bildim Jos longwe. ?Wanem kaonsel nao Lod i givim long ves 1 abaot wokbaot blong Oliva? ?From wanem i impoten blong stap wetem ol pipol “we bae oli tru mo fetful”? (ves 1). ?Wetaem nao ol fren oli bin lidim tingting blong yumi blong mekem ol gud mo ol nogud desisen? ?Olsem wanem nao yumi save stap olsem ol man blong lidim tingting blong ol narafala man long wan gud wei?

Doktrin mo Ol Kavenan 70:1–4.Lod i bin givim, long samfala elda, responsabiliti ia blong lukluk ova long wok blong pablisim ol revelesen. I nomata we yumi no gat spesifik responsabiliti ia, ?long wanem wei oli save tekem se yumi “ol man blong wok blong lukaotem gud ol revelesen mo ol komanmen”? (ves 3).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Home Can Be a Heaven on Earth,” Hymns, namba 298.

Stap Kam Antap long Fasin blong Yumi blong Stap Tij

Yusum ol skripja ia long laef blong yumi. Afta we yu ridim wan skripja, invaetem ol memba blong famli blong oli yusum long laef blong olgeta. Eksampol, yu save invaetem olgeta blong oli tingting long ol semmak situesen we oli save fesem we i yusum ol semfala prinsipol blong gospel.

stoa blong print blong Grandin

Buk blong Olgeta Komanmen, we i bin kam fastaem long Doktrin mo Ol Kavenan, oli bin printim insaed long wan stoa blong print olsem hemia ia.