Ol Skripja
Fas Toktok

Fas Toktok

Doktrin mo Ol Kavenan, hem i ol tabu revelesen mo ol toktok we oli kam tru long insperesen, we oli putum i kam tugeta, mo Lod i givim blong stanemap mo putum rul blong kingdom blong God long wol ia long ol las dei. Nomata we plante long ol seksen ia oli go long ol memba blong Jos Ia blong Jisas Kraes blong Ol Lata-dei Sent, ol mesej, ol woning, mo ol fasin blong askem strong samting oli blong gud blong evri kaen man, mo buk ia i tekem wan invitesen i go long evri pipol long evri ples blong harem voes blong Lod Jisas Kraes, we i stap toktok long olgeta from gudfala laef blong olgeta long wol ia mo Lod i save sevem sol blong olgeta blong taem we i no save finis.

Plante long ol revelesen ia insaed long buk ia, oli kam tru long Josef Smit Junia, fas profet mo presiden blong Jos Ia blong Jisas Kraes blong Ol Lata-dei Sent. Ol narafala revelesen, oli bin kam tru long sam we oli bin kam afta long hem insaed long Presidensi (luk long ol heding blong ol seksen 135, 136, mo 138, mo Ol Ofisol Toktok 1 mo 2).

Buk blong Doktrin mo Ol Kavenan i wan long ol standet tabu wok blong Jos we i go wetem Tabu Baebol, Buk blong Momon, mo Perel we I Gat Bigfala Praes. Be, Doktrin mo Ol Kavenan, i spesel tumas from se i no wan translesen blong wan pepa blong bifo, be i kamaot long taem naoia, mo God i bin givim tru long ol profet we Hem i bin jusum blong putumbak tabu wok blong Hem mo blong stanemap kingdom blong God long wol ia long taem naoia. Insaed long ol revelesen, wan i save harem kaen be strong voes blong Lod Jisas Kraes, we i stap toktok bakegen long dispensesen ia blong taem blong evri wok blong God i kamtru; mo wok we i stap insaed i blong mekem yumi rere long Seken Kaming blong Hem, blong mekem i kamtru mo blong i go stret wetem ol toktok blong evriwan long ol tabu profet stat long taem we wol i stat.

Josef Smit Junia i bon long 23 Disemba 1805, long Saron, Windso Kaonti, Vemon. Long yangfala laef blong hem, hem i bin muv wetem famli blong hem i go long ples we tedei oli singaotem Manjesta, long Wes pat blong Niu Yok. Long Spring blong yia 1820, taem hem i bin stap laef long ples ia, mo hem i bin gat 14 yia, nao hem i bin gat fas visen blong hem; mo long visen ia, God, Papa we I No Save Finis, mo Pikinini blong Hem, Jisas Kraes, Tufala i bin visitim hem. Long visen ia, Tufala i bin talem long hem se tru Jos Ia blong Jisas Kraes, we Jisas i bin stanemap long taem blong Niu Testeman, mo i bin gat gospel we i fulwan, i nomo stap long wol. Ol nara tabu taem oli bin hapen, mo long ol taem ia plante enjel oli bin tijim hem; oli bin soem long hem se God i bin gat wan spesel wok blong hem i mekem long wol, mo tru long hem, bae Jos Ia blong Jisas Kraes bae i kambak long wol.

Afta long sam taem, wetem help we i kam long heven, Josef Smit i bin save transletem mo printim Buk blong Momon. Bitwin taem ia, hem mo Oliva Kaodri, Jon Baptaes i bin odenem tufala long Aronik Prishud, long Mei 1829 (luk long D&K 13), mo i no longtaem afta, ol Aposol blong bifo, Pita, Jemes mo Jon oli bin odenem tufala long Melkesedek Prishud (luk long D&K 27:12.) Ol narafala odinens oli bin kam afta, long taem we Moses, Elaeja, Elaeas, mo plante profet blong bifo oli bin givim ol ki blong prishud (luk long D&K 110; 128:18, 21). I tru we, ol odinesen ia, oli blong putumbak atoriti we i kam long heven i kam long man long wol. Long namba 6 Epril 1830, anda long daereksen we i kam long heven, Profet Josef Smit i bin oganaesem Jos, mo olsem ia nao, tru Jos Ia blong Jisas Kraes i bin stap wok bakegen olsem wan oganaesesen long medel blong ol man, wetem atoriti blong tijim gospel mo mekem ol odinens blong fasin blong sevem man. (Luk long D&K 20 mo Perel we I Gat Bigfala Praes, Josef Smit—Histri 1.)

Ol tabu revelesen ia, oli bin kasem olgeta olsem ansa blong prea, long ol taem we i bin gat nid from, mo i bin kamaot folem ol tru situesen blong laef abaot ol tru pipol. Profet mo olgeta we oli wok wetem hem, oli bin lukaotem help we i kam long heven, mo ol revelesen ia oli talem se i tru se oli bin kasem help. Insaed long ol revelesen ia, wan i save luk restoresen mo gospel blong Jisas Kraes we i stap kambak mo stat blong dispensesen ia blong taem evri wok blong God i kamtru. Wokbaot blong Jos i go long Wes, stat long Niu Yok mo Pensilvania i go long Ohaeo, mo Misuri, mo Ilinoa, mo laswan i go long Bigfala Flat Ples blong Wes Amerika mo ol bigfala hadwok blong olgeta Sent blong traem bildimap Saeon long wol long taem blong tedei, oli kamaot tu insaed long ol revelesen ia.

Plante long ol fas seksen oli tokbaot ol samting long saed blong wok blong transletem mo pablisim Buk blong Momon (luk long ol seksen 3, 5, 10, 17, mo 19). Sam seksen afta, i soemaot wok blong Profet Josef Smit blong mekem wan translesen blong Baebol tru long insperesen, mo tru long wok ia, hem i bin kasem plante long ol seksen wetem ol bigfala doktrin (eksampol, luk long ol seksen 37, 45, 73, 76, 77, 86, 91, mo 132; wanwan long olgeta i go stret wetem wok blong transletem Baebol).

Insaed long ol revelesen, oli presentem ol doktrin blong gospel wetem ol toktok we i eksplenem ol stamba samting, olsem huia hem i Godhed, man i kamaot wea, sapos Setan i tru, stamba tingting blong gat wan bodi we i save ded, from wanem i nid blong gat fasin blong stap obei, nid blong gat fasin blong sakem sin, ol wok blong Tabu Spirit, ol odinens mo ol samting blong mekem blong wok blong fasin blong sevem man i hapen, fiuja blong wol, ol fiuja laef blong man afta long Laef Bakegen long Ded mo Jajmen, fasin we rilesen blong mared i stap blong taem we i no save finis, mo wanem i famli we i no save finis. Semmak, hem i soemaot sloslo wanem hem i fasin blong administresen blong Jos, wetem ol koling blong ol bisop, Fas Presidensi, Kaonsel blong Olgeta Twelef, mo Olgeta Seventi mo taem oli stanemap ol narafala prisaeding ofis, mo ol kworom. Laswan, testemoni we buk ia i givim abaot Jisas Kraes—olsem wanem Hem i tabu, Hem i gat glori, Hem i stret evriwan, Hem i gat lav, Hem i gat paoa blong pemaot man—mo hemia i mekem buk ia i gat bigfala praes long famli blong man mo “Jos i tekem se praes blong hem i moa bigwan bitim ol rij samting blong ful Wol ia” (luk long heding blong D&K 70).

Ol revelesen, long fas ples, ol man blong raet blong Josef Smit oli bin raetemdaon olgeta, mo ol memba blong Jos oli glad mo hariap blong serem wetem ol narafala man, ol kopi blong ol revelesen ia, we oli raetem long han. Blong mekem se ol rekod ia oli stap blong wan longfala taem, ol man blong raet ia oli kopi ol revelesen ia blong mekem ol rekod buk, we ol lida blong Jos oli bin yusum blong rere blong printim ol revelesen ia. Josef mo ol fasfala Sent oli stap tekem ol revelesen ia long semfala wei we oli stap lukluk long Jos: i laef, i stap jenis, mo bae oli mekem i gud moa wetem moa revelesen. Oli bin luksave tu se i gat ol smol mistek we oli no minim blong mekem, i hapen taem oli bin stap kopi ol revelesen ia mo mekem olgeta oli rere blong printim. Olsem ia nao, wan konfrens blong Jos long yia 1831, i bin askem Josef Smit blong “stretem ol rong toktok, o ol mistek ia, we bae Hem i save faenem tru long Tabu Spirit.”

Afta we Josef Smit i luklukbak long ol revelesen mo i stretem olgeta, ol memba blong Jos long Misuri oli stat blong printim wan buk we oli singaotem A Book of Commandments for the Government of the Church of Christ (Wan Buk blong Olgeta Komanmen blong Lidim Jos Ia blong Kraes), we i tekem plante long ol fas revelesen blong Profet. Fas taem we oli traem blong pablisim ol revelesen ia, hemia i no bin gotru taem wan grup blong ol nogud man oli prapa spolem gud ofis blong printim ol buk long Jakson Kaonti long 20 Julae 1833.

Taem oli harem se oli prapa spolem gud ofis blong printim buk long Misuri, Josef Smit mo ol nara lida blong Jos oli statem blong rere long wok blong pablisim ol revelesen long Ketlan, Ohaeo. Long wok ia blong stretem bakegen ol mistek, mekem ol toktok oli klia, mo luksave ol developmen long doktrin blong Jos mo oganaesesen blong Jos, Josef Smit i bin mestem blong jenisim sam toktok blong sam revelesen blong mekem rere olgeta blong oli pablisim long yia 1835 olsem Doctrine and Covenants of the Church of the Latter Day Saints (Doktrin mo Ol Kavenan blong Jos Ia blong Ol Lata Dei Sent). Josef Smit i givim raet blong oli pablisim wan nara edisen blong Doktrin mo Ol Kavenan, we oli bin pablisim nomo afta we sam nogud man oli bin kilimded Profet from bilif blong hem long yia 1844.

Ol fas Lata-dei Sent oli lukluk long ol revelesen ia se oli impoten tumas, mo oli lukluk long olgeta olsem ol mesej we oli kam long God. Long wan taem, kolosap long en blong yia 1831, samfala elda blong Jos oli talem tabu testemoni blong olgeta se Lod i testifae long sol blong olgeta se ol revelesen ia oli tru. Testemoni ia, oli pablisim long 1835 edisen blong Doktrin mo Ol Kavenan, olsem testemoni we oli raetem, blong Olgeta Twelef Aposol:

Testemoni blong
Olgeta Twelef blong testifae long Trutok blong
Buk blong Doktrin mo Ol Kavenan

Testemoni blong ol Witnes blong Buk blong Ol Komanmen blong Lod; ol komanmen ia we Lod i bin givim long Jos blong hem tru long Josef Smit Junia, we voes blong Jos i bin putum hem from stamba tingting ia.

From hemia, mifala i wantem talem testemoni blong mifala long ful wol blong evri kaen man, long evriwan we i stap long fes blong wol, se Lod i bin testifae long sol blong mifala, tru long Tabu Spirit we i bin kam antap long mifala, se ol komanmen ia oli kam tru long insperesen we i kam long God, mo i blong gud blong evri man, mo ol komanmen ia oli tru tumas.

Mifala i talem testemoni ia i go long wol, mo Lod i man we i givhan long mifala; mo hem i tru long gladhat blong God Papa, mo Pikinini blong Hem, Jisas Kraes, we mifala i gat spesel janis ia blong talemaot testemoni ia long wol, mo mifala i glad tumas long hem, mo stap prea long Lod se bae hem i blong gud blong ol pikinini blong ol man oltaem.

Nem blong Olgeta Twelef oli:

  • Tomas B. Mars

  • Deved W. Paten

  • Brigham Yang

  • Hiba J. Kimbol

  • Orson Haed

  • Wiliam MakLelin

  • Parli P. Prat

  • Luk S. Jonson

  • Wiliam Smit

  • Orson Prat

  • Jon F. Boeton

  • Laeman E. Jonson

Long ol narafala edisen blong buk blong Doktrin mo Ol Kavenan, oli bin ademap ol narafala revelesen o ol narafala samting we oli bin raetemdaon, olsem we ol stret grup o ol konfrens blong Jos i bin kasem mo akseptem olgeta. Edisen blong yia 1876, Elda Orson Prat nao i bin rere long hem anda long daereksen blong Brigham Yang, mo i putum ol revelesen oli folem oda we ol samting oli hapen folem deit, mo i putum ol niu heding wetem ol fas toktok we i givim infomesen blong histri.

Stat long edisen blong yia 1835, i bin gat ol buk blong seven lesen blong stadi we oli bin putum i go wetem; oli bin singaotem olgeta, Lectures on Faith (Ol Lesen long saed blong Fet). Oli bin rere long olgeta lesen ia blong oli yusum insaed long Skul blong Ol Profet long Ketlan, Ohaeo, stat long 1834 i go kasem 1835. Nomata i gud blong luk ol doktrin mo givim tijing, oli bin karemaot ol lesen ia long Doktrin mo Ol Kavenan stat long 1921 edisen from se oli no bin givim o presentem olgeta olsem ol revelesen long ful Jos.

Long Inglis edisen blong yia 1981 blong Doktrin mo Ol Kavenan, oli ademap trifala pepa ia blong fas taem. Oli ol seksen 137 mo 138, we i givim ol stamba samting blong fasin blong sevem ol dedman; mo Ofisol Toktok 2, we i anaonsem se evriwan we i man mo i memba blong Jos, oli save odenem hem long prishud nomata weaples hem i kam long hem mo wanem kala blong skin blong hem.

Wanwan niu edisen blong Doktrin mo Ol Kavenan, i gat ol ples we oli stretem ol mistek blong bifo mo oli ademap ol niu infomesen, speseli ol histri pat long heding blong ol seksen. Edisen ia, i givim moa klia deit, mo nem blong ol ples mo i stretem sam moa samting. Ol jenis ia, oli mekem blong mekem se buk ia i kam kolosap moa long stret histri infomesen. Ol nara spesel pat blong las edisen ia i tekem ol map we oli soem ol stamba ples we oli bin kasem ol revelesen, mo tu, i gat ol foto blong ol ples blong Jos histri we oli gud moa, wetem ol joen-refrens, heding blong ol seksen, sot toktok blong ol topik blong seksen, mo evri samting ia i blong helpem huia we i rid blong andastanem mo stap glad long mesej blong Lod olsem we i stap Doktrin mo Ol Kavenan. Ol infomesen blong ol heding blong ol seksen oli kamaot long Histri blong Jos we Oli Raetem long Han mo History of the Church (Histri blong Jos) we oli pablisim (we oli putum long ol heding olsem histri blong Josef Smit) mo Joseph Smith Papers (Ol Pepa blong Josef Smit).