“7–13 Jun. Doktrin mo Ol Kavenan 63: ‘Wanem I Kamaot long Antap I Tabu,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“7–13 Jun. Doktrin mo Ol Kavenan 63,” Kam Folem Mi—Blong Wanwan Man, Woman mo Famli: 2021
Springhil, Davis Kaonti, Misuri, i kam long Garth Robinson Oborn
7–13 Jun
Doktrin mo Ol Kavenan 63
“Wanem I Kamaot long Antap I Tabu”
Lod i talem: “Yufala i kasem Spirit tru long prea” (Doktrin mo Ol Kavenan 63:64). Tingting blong stap prea blong Spirit i lidim stadi blong yu.
Raetemdaon Ol Filing mo Tingting blong Yu
Oli bin jusum ples finis blong siti blong Saeon i stap long hem. Ol lida blong Jos oli bin visitim ples ia mo oli bin dediketem ples ia olsem wan ples blong Ol Sent oli kam tugeta long hem. Folem histri blong Josef Smit, “graon blong Saeon i, naoia, poen blong samting blong laef ia we i moa impoten blong tokbaot” (Doktrin mo Ol Kavenan 63, seksen heding). Be ol samting blong laef long Saeon, oli bin miks. Plante long Ol Sent oli bin wantem tumas blong stat blong kam wanples long Misuri. Long nara han, ol pipol olsem Esra But oli no bin glad wetem graon ia long Saeon, mo oli bin talemaot ol tingting blong olgeta. Wanem we i stap, taem we Josef i bin gobak long Ketlan taem hem i aot long Misuri, hem i bin faenem se i gat raorao mo apostasi i kam insaed long Jos taem hem i bin aot. Long kaen situesen ia nao revelesen we i stap long Doktrin mo Ol Kavenan 63 i bin kamaot. Long ples ia, Lod i bin tokbaot wok blong pem graon mo muvum Ol Sent i go long Misuri. Be long medel blong ol mata ia, i bin gat wan samting we Lod i rimaenem olgeta: “Luk, mi, Lod, bambae mi mekem voes blong mi i toktok aot, mo bambae oli mas obei long hem.” (ves 5). Voes blong Hem, tingting blong Hem, oda blong Hem—evri samting we “i kam long heven”—oli no mas tekem i go tumas, o oli no mas tekem se i nating. Hem i “tabu, mo ol pipol oli mas lukaot gud blong tokbaot” (ves 64).
Sam Aedia blong Skripja Stadi blong Yuwan
Doktrin mo Ol Kavenan 63:1–6, 32–37
Kros blong Lod i girap agensem ol man nogud mo olgeta we oli stap agens.
Taem we revelesen ia i bin kam, Josef Smit i bin fesem plante nogud toktok we i kam long ol memba blong Jos we oli tanem olgeta oli agensem hem (luk long “Ezra Booth and Isaac Morley,” Revelations in Context, 130–36). ?Wanem woning nao Lod i givim insaed long Doktrin mo Ol Kavenan 63:1–6, 32–37 long saed blong “olgeta we oli nogud mo olgeta we oli stap agens”? ?Olsem wanem nao ol kaen woning olsem oli pruf blong lav we i kam long God?
Ol saen oli kam tru long fet mo tru long tingting blong God.
Ol saen mo ol merikel nomo oli no save givim wan fet we i stap oltaem. Eli long 1831, Esra But, wan Metodis minista long Ketlan, i bin disaed blong kasem baptaes afta we hem i bin luk merikel we Josef Smit i hilim han blong fren blong But, Elsa Jonson.
Be yet, afta sam manis nomo, But i lusum fet blong hem mo i stap tokbaot Profet. ?Olsem wanem hemia i save hapen, sapos yumi tekem merikel ia we hem i jes witnesem? Tingting hevi long hemia taem yu stap ridim Doktrin mo Ol Kavenan 63:7–12. Maet bae yu wantem blong tingting se, from wanem sam pipol oli kasem ol saen “blong gud blong man we i blong givim glori long [God]” (ves 12) mo ol narawan oli kasem blong “go kasem panismen blong olgeta (ves 11). Folem wanem we yu bin ridim, long tingting blong yu, ?olsem wanem nao Lod i wantem yu yu tingting mo filim abaot ol saen?
Luk long Matiu 16:1–4; Jon 12:37; Momon 9:10–21; Ita 12:12, 18.
Doktrin mo Ol Kavenan 63:13–23
Blong stap klin i minim blong stap kipim ol tingting mo ol aksen blong mi oli klin evriwan.
Plante pipol bae oli talem se adaltri i wan rong samting. Be long Doktrin mo Ol Kavenan 63:13–19, Sevya i bin mekem i klia se ol rabis tingting tu, i gat nogud risal long saed blong spirit. “?From wanem fasin blong gat rabis tingting i wan sin we i save mekem yu ded? Elda Jeffrey R. Holland i askem. “Okei. Hem i stap prapa spolem gud wok we Spirit i stap mekem long sol blong yumi, mo antap long hemia, mi ting se hem i wan sin from se hem i mekem doti rilesensip ia we i moa hae mo tabu we God i givim long yumi long laef long wol ia—lav ia we wan man mo wan woman i gat long tufala, mo tingting long hat we kapol ia i gat blong tekem ol pikinini oli kam long wan famli we i blong stap blong oltaem” (“Place No More for the Enemy of My Soul,” Ensign o Liahona, May 2010, 44).
?Wanem risal nao Lod i tokbaot long Doktrin mo Ol Kavenan 63:13–19 we bae i go long olgeta we oli no sakem ol rabis tingting mo aksen blong olgeta? Tekemdaon not long ol blesing we Sevya i promesem long ol ves 20 mo23 long olgeta we oli stap fetful. ?Wanem blesing nao i kam long laef blong yu from yu bin stap obei long loa blong jastiti? ?Olsem wanem nao Sevya i stap helpem yu blong kam klin evriwan?
Luk tu long Doktrin mo Ol Kavenan 121:45; Linda S. Reeves, “Klin Inaf blong Kasem Ol Blesing blong Promes,” Ensign o https://www.churchofjesuschrist.org/study/general-conference/2015/10/worthy-of-our-promised-blessings?lang=bis, Okt 2015.
Yumi gat blesing taem yumi stap kipim ol tingting mo ol aksen blong yumi oli klin evriwan.
Doktrin mo Ol Kavenan 63:24–46
Lod i lidim ol afea long saed blong spirit, mo long saed blong laef long wol ia, blong Ol Sent blong Hem.
Afta we Lod i bin faenemaot weaples bae oli bildimap Saeon, Ol Sent long Ohaeo oli stil nidim daereksen abaot wetaem blong stat muv mo weaples blong kasem mane blong pem graon. Taem yu stap ridim Doktrin mo Ol Kavenan 63:24–46, lukaotem daereksen long saed blong spirit mo long saed blong laef long wol ia we Lod i bin givim long saed blong Saeon. ?Wanem daereksen nao long saed blong spirit mo long saed blong laef long wol ia, Lod i stap givim long yu?
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 63:7–12.Stori blong Esra But we i aot long Jos nomata we hem i bin witnesem hiling blong Elsa Jonson (luk long ol smol ditel long “Sam Aedia blong Skripja Stadi blong Yuwan” mo artwok we i kam wetem aotlaen ia), i save mekem yufala i save toktok raon long ol merikel. Mebi ol memba blong famli blong yu oli save tokbaot ol merikel we oli bin mekem fet blong olgeta i kam strong moa, wetem ol eksperiens we oli kamaot long famli blong yu, o long famli histri blong yu. ?Long wanem wei nao oli bin praktisim fet blong olgeta blong save kasem ol merikel ia? ?Wanem nao Doktrin mo Ol Kavenan 63:7–12 i tijim abaot rilesensip bitwin fet mo ol merikel?
-
Doktrin mo Ol Kavenan 63:13–19.?Olsem wanem yumi save protektem yumi long ol nogud samting, wetem ponografi tu? (Yu save faenem plante risos we i save helpem ol famli long AddressingPornography.ChurchofJesusChrist.org.) ?Wanem nao ol blesing blong stap laef long wan laef we i klin long saed blong seks?
-
Doktrin mo Ol Kavenan 63:23.?Olsem wanem yu save helpem famli blong yu blong andastanem olsem wanem “ol sikret blong kingdom,” o ol trutok blong gospel, oli olsem “wan wel blong wota we i laef”? Eksampol. Yufala i save go long wan spring blong wota, o wan reva we i stap kolosap (o soem wan vidio o pikja blong wan). ?Olsem wanem nao ol trutok blong gospel oli olsem wota ia?
-
Doktrin mo Ol Kavenan 63:58.?Wanem woning nao yumi faenem insaed long seksen 63? ?Wanem nao oli sam woning we yumi stap harem long ol lida blong Jos tedei?
-
Doktrin mo Ol Kavenan 63:58–64.Soem long famli blong yu wan samting we famli i holemtaet longtaem. ?Olsem wanem nao yumi stap tritim samting ia i defren long ol nara samting we oli no impoten long yumi? ?Wanem nao Doktrin mo Ol Kavenan 63:58–64 i tijim yumi abaot wanem nao yumi save mekem blong respektem ol tabu samting?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Reverence Is Love,” Children’s Songbook, 31.
Stap Kam Antap long Stadi blong Yuwan
Laef folem wanem yu stap lanem. “Taem yu stap filim glad we i kam taem yu andastanem gospel, bae yu wantem blong yusum wanem we yu bin lanem. Traehad blong stap laef long wan wei we i go wetem wanem yu stap andastanem. Taem yu stap mekem olsem, bae i mekem fet, save, mo testemoni blong yu i kam strong moa.” (Prijim Gospel blong Mi,19).
Hiling blong Solda blong Elsa Jonson, i kam long Sam Lawlor