“31 Mei–6 Jun. Doktrin mo Ol Kavenan 60–62: ‘Evri Samting we I Stap Laef I Stap long Han blong Mi,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“31 Mei–6 Jun. Doktrin mo Ol Kavenan 60–62” Kam Folem Mi—Blong Wanwan Man, Woman mo Famli: 2021
Kamp Faea long Misuri, i kam long Bryan Mark Taylor
31 Mei–6 Jun
Doktrin mo Ol Kavenan 60–62
“Evri Samting we I Stap Laef I Stap long Han blong Mi”
Presiden Esra Taf Benson i bin tijim se taem yumi stap stadi long ol skripja, “bae yumi gat plante moa testemoni. Komitmen bae i kam strong moa. Famli i kam strong moa. Revelesen we i go long wanwan man o woman bae i kam fulap” (“The Power of the Word,” Ensign, May 1986, 81).
Raetemdaon Ol Filing mo Tingting blong Yu
Long Jun 1831, Josef Smit i bin holem wan konfrens wetem ol elda blong Jos long Ketlan. Longwe, Lod i bin oganaesem sam long ol elda ia blong oli stap long kompanionsip, mo sendem olgeta i go long Jakson Kaonti, Misuri, wetem wok ia: “Prij folem rod” (Doktrin mo Ol Kavenan 52:10). Plante long ol elda oli bin strong blong mekem hemia, be sam, nogat. Mekem se taem we taem i kam blong travel i gobak long Ketlan, Lod i talem: “Be, mi no glad long sam [elda], from we oli no wantem openem maot blong olgeta, be oli haedem talen we mi bin givim long olgeta, from se oli fraet long man” (Doktrin mo Ol Kavenan 60:2). Plante long yumi bae i save filim sore long ol elda ia—bae yumi filim se yumi fraet smol blong openem maot blong yumi mo serem gospel. Mebi “fraet long man ia” i fulap tumas long yumi. Mebi yumi stap kwestinim se yumi klin inaf o yumi save mekem samting o no. Nomata wanem risen blong yumi, Lod “i save ol samting we i no strong long man, mo i save olsem wanem blong givhan long [yumi]” (Doktrin mo Ol Kavenan 62:1). Long evriwan long ol revelesen ia i go long ol fasfala misinari, i gat ol toksave we i putum pis we oli save helpem yumi blong winim ol fraet blong yumi blong stap serem gospel—o blong winim ol nara fraet we yumi save kam blong fesem: “Mi, Lod, mi rul long ol heven antap.” “Mi save mekem yufala i tabu.” “Evri samting we i laef i stap long han blong mi.” Mo “yufala i mas stap glad, ol smol pikinini; from we mi stap long medel blong yufala.” (Doktrin mo Ol Kavenan 60:4, 7; 61:6, 36.)
Sam Aedia blong Skripja Stadi blong Yuwan
Lod i glad taem mi openem maot blong mi blong serem gospel.
Yumi evriwan i gat ol eksperiens we yumi gat janis blong serem gospel wetem wan, be, from sam risen, yumi no bin serem. Taem yu stap ridim ol toktok blong Lod i go long ol fasfala misinari we oli no bin “openem maot blong olgeta,” tingbaot ol janis blong yu blong serem gospel. ?Olsem wanem testemoni blong yu long saed blong gospel i olsem wan “talen,” o wan rij samting we i kam long God? ?Long wanem wei nao, samtaem, yumi stap “haedem talen blong yumi”? (; luk tu long ).Doktrin mo Ol Kavenan 60:2; Matiu 25:14–30
Lod i stretem ol fasfala misinari ia, be tu, Hem i bin traem blong givim insperesen long olgeta. ?Wanem nao oli ol gudfala mesej we i kam long Hem we yu faenem insaed long ol seksen 60 mo 62? ?Olsem wanem ol mesej ia oli bildim tras blong yu blong serem gospel ia? Long ol dei we oli stap kam, lukaotem sam janis blong openem maot blong yu mo serem wanem God i trastem yumi wetem.
Luk long Doktrin mo Ol Kavenan 33:8–10; 103:9–10; Dieter F. Uchtdorf, “Misinari Wok: Stap Serem Wanem I Stap long Hat blong Yu,” Ensign o Liahona, Mei 2019, 15–18.
God i wantem mi blong serem gospel wetem ol narafala man.
Doktrin mo Ol Kavenan 61:5–6, 14–18
?Lod i bin sakem nogud strong tok i go long evri wota?
Woning blong Lod insaed long Doktrin mo Ol Kavenan 61 long wan wei, i bin wan woning abaot evri denja we ol pipol blong Hem oli save fesem taem oli stap travel i go long Saeon long Misuri Reva, we oli bin save long tetaem ia, se hem i wan denja reva. Woning ia, yumi no mas tekem se i minim se yumi no mas travel o pas long wota o solwota. Lod i gat “evri paoa,” wetem paoa blong kontrolem ol wota (ves 1).
Lod i gat olgeta paoa mo i save protektem mi.
Long rod i gobak long Ketlan, Josef Smit mo ol nara lida blong Jos oli bin gat wan eksperiens we i putum laef long denja, long Misuri Reva (luk long Saints, 1:133–34). Lod i stap yusum janis ia blong givim woning mo givim instraksen long ol wokman blong Hem. ?Wanem nao yu stap faenem insaed long Doktrin mo Ol Kavenan 61 we i leftemap tingting blong yu blong putum tras blong yu long Lod taem yu stap fesem ol jalenj blong yuwan? Eksampol; ?From wanem hem i impoten blong save se God i “i stap oltaem i go kasem oltaem”? (ves 1).
I gat ol semfala niu tingting long seksen 62. ?Wanem nao Lod i tijim yu abaot Hemwan mo paoa blong Hem, insaed long revelesen ia?
Tingting hevi long ol eksperiens we i stap bildimap fet, we yu bin gat taem we Lod i bin helpem yu blong winim wan enemi long saed blong spirit o long laef long wol ia.
Lod i wantem mi blong mekem sam desisen “olsem we mi luk se i gud.”
Samtaem, Lod i givim yumi ol spesifik daereksen, mo ol nara mata, Hem i lego long yumi blong disaed long hem. ?Olsem wanem yu stap luk prinsipol ia i stap insaed long Doktrin mo Ol Kavenan 62? (Luk tu long Doktrin mo Ol Kavenan 60:5; 61:22). ?Olsem wanem yu bin luk prinsipol ia i wok insaed long laef blong yu? ?From wanem hem i impoten blong yumi mekem samfala desisen mo no gat ol spesifik daereksen we i kam long God?
Luk tu long Ita 2:18–25; Doktrin mo Ol Kavenan 58:27–28.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 60:2–3.?From wanem nao sam long ol fasfala misinari oli bin stap fraetfraet blong serem gospel? ?From wanem nao, samtaem, yumi stap fraetfraet, o no sua? Tingting blong mekem wan rolplei long olsem wanem nao ol memba blong famli oli save serem gospel long ol defren kaen situesen.
-
Doktrin mo Ol Kavenan 61:36–39.?Wanem risen nao yumi stap luk insaed long ol ves ia blong yumi “stap kwaet”? (Luk tu long Jon 16:33). Maet ol famli blong yu oli save raet o droem ol pikja blong ol samting we i tekem glad i kam long olgeta mo putum gud olgeta insaed long wan “stap kwaet” glas botel. (Meksua se yu putum ol pikja blong Sevya mo ol rimaenda se Hem i lavem yumi.) Truaot long wik, taem ol memba blong famli oli nidim wan rimaenda blong ol risen blong stap hapi, oli save jusum wan samting we i stap long glas botel.
-
Doktrin mo Ol Kavenan 61:36.?Olsem wanem yu save helpem famli blong yu blong tingbaot se Sevya “ i stap long medel blong [yumi]”? Yu save disaed tugeta, long weaples bae yufala i hangem wan pikja blong Hem insaed long hom blong yufala. ?OIsem wanem yumi save invaetem Sevya insaed long evri dei laef blong yumi?
-
Doktrin mo Ol Kavenan 62:3.Mebi yu save gat wan famli testemoni miting afta we yufala i ridim ves ia. Blong eksplenem wanem hem i wan testemoni, yu save serem samfala pat blong mesej blong Presiden M. Russell Ballard “Pure Testimony” (Ensign o Liahona, Nov. 2004, 40–43). ?From wanem hem i impoten blong raetemdaon ol testemoni blong yu?
-
Doktrin mo Ol Kavenan 62:5, 8.?From wanem Lod i givim ol komanmen abaot evri saed blong laef blong yumi? Folem ves 8, ?olsem wanem nao yumi sapos blong tekem desisen?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Testimony,” Hymns, no. 137.
Stap Kam Antap long Stadi blong Yuwan
Letem Spirit i lidim yu long stadi blong yu. Letem Tabu Spirit i lidim yu. Stap lisingud long ol kwaet toktok blong Hem taem Hem i stap lidim yu i go long ol samting we yu nidim blong lanem evri dei, iven sapos ol kwaet toktok blong Hem i stap talem se bae yu ridim o stadi long wan defren topik, be i no hemia we yu stap stadi long hem oltaem; o i talem se bae yu mekem, be long wan defren wei.
Gudfala Man blong Lukaot long Sipsip, i kam long Del Parson