Davis Kaonti, Misuri

14–20 Jun

Doktrin mo Ol Kavenan 64–66

“Lod I Askem blong Mas Gat Wan Hat Mo Wan Maen we I Wantem Mekem Samting”

Presiden Henry B. Eyring i bin talem: “Plante taem, mi go long ol skripja wetem ol kwestin ia ?Wanem nao God i wantem mi blong mekem?’ o ‘Wanem nao Hem i wantem mi blong filim?’ Evri taem, mi faenem ol niu aedia mo tingting we mi neva bin gat bifo (“How God Speaks to Me through the Scriptures,” Feb. 6, 2019, blog.ChurchofJesusChrist.org).

Raetemdaon Ol Filing mo Tingting blong Yu

Long bigfala hot we i mekem man i swet, long manis Ogis 1831, samfala elda oli bin stap travel i gobak long Ketlan afta we oli jekem mo wokbaot long graon blong Saeon long Misuri olsem we Lod i bin talem long olgeta. I no bin wan naesfala wokbaot. Olgeta we oli bin travel—Josef Smit, Oliva Kaodri, Sidni Rigdon, Esra But mo ol narawan—oli harem ples i hot tumas, mo oli taed, mo tingting we i fasfas ia i mekem oli raorao smol. I luk olsem se, blong bildimap Saeon, wan siti blong lav, yuniti, mo pis, bae i tekem wan longfala taem.

Laki tumas, blong bildimap Saeon—long Misuri long 1831, o insaed long hat mo wod blong yumi tedei—i no askem yumi blong mas stret evriwan. Be, Lod i talem: “be yufala, mi talem se yufala i mas fogivim evri man” (Doktrin mo Ol Kavenan 64:10). Hem i askem “askem blong mas gat wan hat mo wan maen we i wantem mekem samting” (ves 34). Mo Hem i askem fasin blong save wet longtaem, from se Saeon, oli bildim antap long fandesen blong “ol smol samting,” we olgeta we oli no “taed blong mekem gud samting” nao, oli stap mekem (ves 33).

Luk tu long Saints, 1:133–34, 136–37.

Sam Aedia blong Skripja Stadi blong Yuwan

Doktrin mo Ol Kavenan 64:1–11

Mi mi mas fogivim evriwan.

Taem yu stap ridim Doktrin mo Ol Kavenan 64: 1-11, tingting long wan taem we Lod i bin fogivim yu. Maet yu nid tu blong tingting long wan we yu nid blong fogivim. ?Olsem wanem lav mo sore blong Sevya i jenisim ol filing we yu gat abaot yuwan mo abaot ol narawan? ?From wanem yu ting se Lod i givim oda long yumi “blong fogivim evriwan” (ves 10). Sapos yu gat hadtaem blong fogivim man, tingting long wanem, ol risos ia we oli kam afta, oli stap tij abaot wei we Sevya i save help: Jeffrey R. Holland, “Seves Ia blong Man I Stretem Hemwan,” Ensign o Liahona, Nov 2018, 77–79; Gaed long Ol Skripja, “Fogiv,” olskripja.ChurchofJesusChrist.org.

Doktrin mo Ol Kavenan 64:31–34

God i wantem wan hat mo wan maen we i wantem mekem samting.

?Yu yu bin harem se yu “taed” wetem evri “gud” samting we yu stap traem blong mekem? Lukaotem mesej we Lod i gat long yu insaed long Doktrin mo Ol Kavenan 64:31–34. ?Hem i minim wanem blong givim long God “wan hat mo wan maen we i wantem mekem samting”? (ves 34).

Doktrin mo Ol Kavenan 64:41–43

Saeon bae i “wan flag long ol pipol.”

Wan flag “wan flag o wan standet we ol pipol oli kam raon long hem we oli wan long wan stamba tingting, o wan aedentiti” (Gaed long Ol Skripja, “Flag,” olskripja.ChurchofJesusChrist.org). ?Olsem wanem Saeon—o Jos blong Lod—i stap olsem wan flag o standet long yu? Tingting long ol nara eksampol blong ol samting ia we oli stap holem antap, olsem wan flag, blong blesem ol pipol: Namba 21:6–9; Matiu 5:14–16; Alma 46:11–20. ?Wanem nao ol ves ia oli stap tijim yu abaot wei we Jos i wan flag long ples we yu stap laef long hem? Lukaotem sam nara wei we Lod i tokbaot Saeon long Doktrin mo Ol Kavenan 64:41–43.

Kapten Moronae mo Taetol blong Fridom, i kam long Gary E. Smith

Doktrin mo Ol Kavenan 65

“Yufala i mekem rere rod blong Hae God we i Masta blong yumi.”

Matiu i tokbaot Jon Baptaes olsem wan we i bin singaot: “Yufala i mekem rere rod blong Hae God we i Masta blong yumi” (Matiu 3:3; luk tu Aesea 40:3). Insaed long Doktrin mo Ol Kavenan 65, Lod i stap yusum semmak lanwis blong tokbaot ol wok blong Hem long ol las dei ia. ?Wanem sem samting nao yu yu luk bitwin wanem we Jon Baptaes i bin mekem Matiu 3:1–12) mo wanem we Lod i wantem yumi blong mekem tedei? ?Wanem nao yu faenem insaed long revelesen ia, we i givim yu insperesen blong mekem ol profesi we oli stap insaed, oli kamtru? Tingting hevi long ol wei we yu “save mekem ol pipol oli save gud long ol gudfala wok blong [God] (ves 4).

Doktrin mo Ol Kavenan 66

Lod i save ol tingting blong hat blong mi.

I no longtaem afta we hem i joenem Jos, William E. McLellin i bin askem long Josef Smit blong talemaot tingting we God i gat long hem. Josef i no bin save, be William i gat faevfala kwestin we hem i bin hop se bae Lod i ansarem hem tru long Profet blong Hem. Yumi no save se wanem nao ol kwestin blong William, be yumi save se revelesen ia, i go long hem, we naoia i stap long Doktrin mo Ol Kavenan 66, mo i bin ansarem evri kwestin blong William, we hem i “glad fulwan long hem” (“William McLellin’s Five Questions,” Revelations in Context, 138).

Taem yu stap ridim seksen 66, tingbaot wanem we Lod i bin save abaot William MakLelin mo ol wari mo ol tingting blong hat blong hem. ?Olsem wanem Lod i stap talemaot long yu se Hem i save yu? Sapos yu gat wan petriakel blesing, tingting blong stadi long hem. Taem yu stap stadi long hem, ?wanem nao Tabu Spirit i stap helpem yu blong andastanem abaot tingting we God i gat long yu?

Luk tu long Saints, 1:138–40; Gospel Topics, “Patriarchal Blessings,” topics.ChurchofJesusChrist.org.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 64:8–10.Ol famli rilesensip oli givim plante janis blong lan blong fogiv. Mebi ol memba blong famli oli save tokbaot olsem wanem fasin blong fofogivim wanwan long yumi i bin blesem famli blong yu. ?Olsem wanem nao Sevya i bin helpem yumi blong fofogivim wanwan long yumi? ?Long wanem wei nao yumi “gat hadtaem” (ves 8) taem yumi no stap fogivim ol narawan?

Doktrin mo Ol Kavenan 64:33.?Wanem nao Papa long Heven i wantem famli blong yu blong mekem “bigfala wok” blong Hem i kamtru? Ating i blong yufala i go long tempol, blong serem gospel wetem wan neba, o winim wan raorao. Maet wanwan memba blong famli i save putum tugeta sam smol samting, olsem smol ston, baten, o pasol pisis, mo yusum olgeta blong ripresentem “ol smol samting” we yumi save mekem evri dei blong “putum fandesen blong wan bigfala wok” blong God. Olsem wan famli, jusum wan long ol smol samting ia blong wok long hem long wik ia.

Doktrin mo Ol Kavenan 66:3.?Olsem wanem nao bae yu tijim se i impoten blong sakem sin? Yu save kasem kaekae long wan plet we i hafhaf klin, mo ridim ol toktok blong Lod i go long William MakLelin: “yu yu klin, be i no fulwan.” Afta, yu save klinim plet mo serem kaekae, mo long semtaem, toktok raon long wei we Jisas Kraes i mekem se i posibol blong yumi stap klin long saed blong spirit.

Doktrin mo Ol Kavenan 66:10.?Olsem wanem famli blong yu i stap folem kaonsel blong Lod blong “no lukaot blong trabolem yuwan,” o blong mekem plante samting oli kam hevi blong mekem? Yu save tokbaot stori blong Meri mo Marta (luk long Luk 10:38–42), mo toktok raon long wei we famli blong yu i save trabolem olgetawan wetem ol samting we oli no blong taem we i no save finis.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Help Me, Dear Father,” Children’s Songbook, 99.

Stap Kam Antap long Fasin blong Yumi blong Stap Tij

Stap oltaem, mo stap blong oli save toktok long yu. Sam long ol bes taem blong tij i stat olsem wan kwestin, o ol wari insaed long hat blong ol memba blong famli. Letem ol memba blong famli oli save, tru long ol toktok mo ol aksen blong yu se yu yu wantem tumas blong lisin long olgeta. (Luk long Teaching in the Savior’s Way,16).

Mi Fogivim Yu, i kam long Greg K. Olsen. Oli kasem raet blong serem. www.GregOlsen.com