“5–11 Julae. Doktrin mo Ol Kavenan 76: ‘Praes blong Olgeta Bae I Bigwan, Mo Glori blong Olgeta Bae I No Save Finis,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“5–11 Julae. Doktrin mo Ol Kavenan 76,” Kam Folem Mi—Blong Wanwan Man, Woman mo Famli: 2021
Ples blong Haed i kam long Shaelynn Abel
5–11 Julae
Doktrin mo Ol Kavenan 76
“Praes blong Olgeta Bae I Bigwan, Mo Glori blong Olgeta Bae I No Save Finis”
Insaed long seksen 76, Lod i stap talemaot hamas Hem i wantem blong talemaot trutok long yumi (luk long ol ves 7–10). Ridim olgeta skripja wetem fet ia se Hem i save, mo Hem i talemaot long yu “ol samting we i blong God” (ves 12) we yu nidim blong save. Afta, raetem ol niu tingting we yu kasem taem yufala “i bin stap yet anda long Spirit” (ol ves 28, 80, 113).
Raetemdaon Ol Filing mo Tingting blong Yu
“?Wanem bae i hapen long mi afta mi ded?” Kolosap evri relijin long wol, i tokbaot kwestin ia long sam wei. Blong plante handred yia, plante kastom blong Ol Kristin Man, we oli stap dipen long ol tijing blong Baebol, oli stap tij abaot heven mo hel, abaot paradaes blong olgeta we oli stret mo gud, mo trabol tingting blong ol man nogud. ?Be i tru se ful famli blong man, i rere blong oli seraotem olgeta stret folem olgeta we oli gud mo nogud? ?Mo wanem nao, toktok ia, heven i stap minim long yu? Long Febwari 1832, Josef Smit mo Sidni Rigdon i stap askem tufalawan sapos i no gat moa blong save long saed blong topik ia (luk long Doktrin mo Ol Kavenan 76, seksen heding).
Yes, I gat. Taem we oli bin stap tingting hevi long ol samting ia, Lod i bin “Lod i bin tajem ol ae blong andastaning blong [olgeta] mo oli bin open, mo glori blong Lod i bin saen raon long [olgeta]” (ves 19). Josef mo Sidni, tufala i kasem wan revelesen we i gud tumas, i talem fulap samting, i givim fulap laet, mekem se Ol Sent oli singaotem taem ia i simpol nomo: “Visen.” Hem i mekem ol windo blong heven oli open bigwan, mo i givim long ol pikinini blong God wan maen we i longfala abaot taem we i no save finis. Visen ia, i bin talemaot se heven i hae moa, i bigwan moa, mo i tekem moa samting bitim wanem we ol pipol oli bin stap ting long hem bifo. God i gat moa sore mo stret bitim wanem we yumi save andastanem. Mo ol pikinini blong God oli gat wan fiuja ples we i no save finis, we i gat moa glori bitim wanem we yumi save stap tingting long hem.
Luk long Saints, 1:147–50; “The Vision,” Revelations in Context, 148–54.
Sam Aedia blong Skripja Stadi blong Yuwan
Fasin blong sevem man i kam tru long Jisas Kraes, Pikinini blong God.
Taem we Wilfod Wudrof i ridim visen we oli tokbaot insaed long seksen 76, hem i bin talem: “mi bin filim blong lavem Lod moa bitim oltaem long laef blong mi” (luk long “Ol Voes blong Restoresen” we i stap long en blong aotlaen ia). Mebi, yu bin gat ol semmak filing taem yu stap ridim revelesen ia. Long en, i no gat eniwan long ol bigfala blesing ia we oli tokbaot long seksen 76 we bae i posibol sapos i no gat Sevya. Maet yu save talemaot wanwan ves insaed long seksen 76 we i tokbaot Lod Jisas Kraes. ?Wanem nao ol ves ia oli stap tijim yu abaot Hem mo rol blong Hem long plan blong God? ?Olsem wanem oli lidim wei we yu stap filim abaot Hem? Taem yu stap ridim mo tingting hevi, bae yu kasem ol filing mo tingting abaot wanem yu save mekem blong “kasem wan testemoni abaot Jisas” mo blong stap “strong” moa (ol ves 51, 79).
Doktrin mo Ol Kavenan 76:39–44, 50–112
God i wantem blong sevem “evri wok blong han blong hem.”
Sam pipol, wetem sam fasfala memba blong Jos, oli bin agensem visen ia long seksen 76 from se hem i stap tijim se kolosap evriwan bae God i sevem olgeta mo bae oli kasem sam digri blong glori. Maet oli bin agens, from se oli no bin andastanem gud abaot huia God mo rilesensip blong Hem wetem yumi. Taem yu stap ridim revelesen ia, ?wanem nao yu stap lanem abaot fasin blong God mo plan we Hem i gat long ol pikinini blong Hem?
Tingting long wanem i defren bitwin fasin blong God i sevem yumi (long ded blong bodi mo long saed blong spirit; luk long ol ves 39, 43–44) mo fasin blong save kam olsem wan god (stap laef wetem God mo blong kam olsem Hem; luk long ol ves 50–70).
Luk tu long Jon 3:16–17; Doktrin mo Ol Kavenan 132:20–25.
Doktrin mo Ol Kavenan 76:50–70, 92–95
Papa long Heven i wantem mi blong kasem laef we i no save finis insaed long selestial kingdom.
?Yu yu askem yuwan finis—o yu bin wari finis—se, yes o no, yu kwalifae from selestial kingdom? Taem yu ridim ol toktok we oli tokbaot olgeta we oli kasem glori ia ol ves 50–70, 92–95), yu no lukluk long wan lis blong ol samting we yu mas mekem, be yu lukaotem wanem we God i bin mekem—mo i stap mekem—blong helpem yu blong kam olsem Hem. Taem yu stap ridim visen ia long wei ia, ?olsem wanem nao yu stap filim abaot ol hadwok blong yuwan?
Maet yu save tingting tu long bigfala blesing ia, we i blong save ol ditel ia abaot selestial kingdom. ?Olsem wanem nao visen ia blong selestial glori i jenisim wei we yu lukluk, mo wantem laef long hem long evri dei?
Luk tu long Moses 1:39; Joy D. Jones, “Valiu we I Bitim Praes blong Pem,” Ensign o https://www.churchofjesuschrist.org/general-conference/2017/10?lang=bis, Okt 2017; J. Devn Cornish, “?Mi Mi Stret Evriwan ia? ?Bae Mi Save Kasem Ples Ia?” Ensign o https://www.churchofjesuschrist.org/general-conference/2016/10?lang=bis, Okt 2016.
Josef Smit i bin luk visen blong ol digri blong glori insaed long rum ia.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 76:22–24, 50–52, 78–79, 81–82.?Wanem nao yumi lanem aot long ol ves ia abaot hamas ol testemoni blong yumi oli impoten? ?Wanem rol nao ol testemoni blong yumi oli gat long fiuja ples blong yumi long taem we i no save finis? Maet bae i help blong luk long mining blong toktok ia, strong blong toktok raon long wei blong “stap strong long testemoni abaot Jisas” (ves 79). Mo tu, yu save singsing long “I Will Be Valiant” (Children’s Songbook, 162).
-
Doktrin mo Ol Kavenan 76:24.Maet famli blong yu i luk wanem i joen ol trutok insaed long seksen 76 mo olgeta trutok we oli stap tijim insaed long “Mi mi Pikinini blong God” (STSP, pej ; Wan long ol trutok ia i stap long Doktrin mo Ol Kavenan 76:24. ?Bae olsem wanem nao wol ia bae i defren sapos evriwan i andastanem se yumi evriwan, yumi ol pikinini blong God? ?Olsem wanem trutok ia i jenisim wei we yumi tritim ol narawan? Maet blong stap lukluk ol pikja blong ol defren boe mo gel blong God long wol ia bae i save helpem famli blong yu blong tingting hevi long kwestin ia. (Luk tu long “Vidio Presentesen: I Am a Child of God,” ChurchofJesusChrist.org.)
Tingting blong singsing long “Mi Pikinini blong God” tugeta mo lukaotem wanem i joenem olgeta long olgeta prinsipol we oli stap long seksen 76 (eksampol, luk long, ol ves 12, 62, 96).
-
Doktrin mo Ol Kavenan 76:40–41.Sapos yumi mas talem sot “ol gudfala nius” (ves 40), long ol ves ia long wan sot hedlaen long niuspepa, mo wan post, bae yumi talem wanem? ?Wanem gudfala nius nao yumi faenem insaed long seksen 76?
-
Doktrin mo Ol Kavenan 76:50–70.?Olsem wanem nao bae yu helpem famli blong yu blong wet from mo rere from laef we i no save finis insaed long selestial kingdom? Yu save wok tugeta blong faenem ol pikja, ol skripja, mo ol tijing blong profet blong go wetem ol sentens insaed long Doktrin mo Ol Kavenan 76:50–70. Maet bae yu faenem ol samting ia insaed long ol magasin blong Jos, long ChurchofJesusChrist.org, o insaed long ol futnot blong ol skripja. Afta, yu save putum tugeta ol pikja, skripja, mo ol tijing long wan posta we i save rimaenem famli blong yufala abaot ol gol blong yufala we oli no save finis.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Mi Save Ridima Hem I Laef,” STSP, pej 38.
Ol Voes blong Restoresen: Ol Testemoni blong “Visen”
Wilfod Wudrof
Wilfod Wudrof i bin joenem Jos long Disemba 1833, kolosap tu yia afta we Josef Smit mo Sidni Rigdon i kasem visen ia we oli raetemdaon long Doktrin mo Ol Kavenan 76. Hem i bin stap laef long Niu Yok long tetaem ia, mo i bin lanem abaot “Visen” tru long ol misinari we oli stap long eria ia. Sam yia afta, hem i bin toktok aot long ol filing mo tingting long saed blong revelesen ia.
“Stat long taem we mi smol i kam, oli bin tijim mi se i gat wan Heven mo i gat wan Hel, mo oli talem se evri nogud man, oli gat wan panismen, mo olgeta we oli stret mo gud, oli gat wan glori. …
“… Taem mi bin ridim visen … i givim laet long maen blong mi, mo i givim mi bigfala glad; long mi, i luk se God we i bin soemaot prinsipol ia long man, i bin waes, stet mo i bin tru, i bin gat ol fasin mo gud tingting mo save; mi bin filim se Hem i strong wetem lav, sore, jastis mo jajmen, mo mi filim blong lavem Lod i bitim bifo long laef blong mi.”1
“Visen ia i wan revelesen we i givim moa laet, mo trutok moa prinsipol bitim eni revelesen we i stap long eni nara buk we yumi eva ridim. Hem i talemaot klia blong yumi andastanem situesen blong yumi naoia, se yumi kam wea, mo from wanem yumi stap ia, mo weaples yumi stap go long hem. Eni man i save se, tru long revelesen wanem i pat o situesen blong hem.”2
“Bifo mi luk Josef, mi talem se mi no kea se mi olfala hamas, o yangfala hamas; mi no kea se fes blong hem i olsem wanem—se hea blong hem i longwan o i sot; man ia we i givim revelesen ia i wan profet blong God. Mi bin save hemia miwan.”3
Phebe Crosby Peck
Taem we Phebe Peck i bin harem Josef mo Sidni i bin stap tijim “visen” ia, hem i bin stap long Misuri mo i bin stap lukaotem faevfala pikinini olsem wan singgel mama. Visen i tajem hem bigwan mo i givim insperesen long hem mekem se hem i bin raetem hemia blong serem wanem hem i bin lanem wetem ol nara memba blong famli.
“Lod i bin stap talemaot ol sikret blong Kingdom blong heven long ol pikinini blong Hem. … Josef Smit mo Sidni Rigdon, tufala i mekem wan las spring, mo mifala i bin gat plante miting we i gat glad taem oli bin stap ia, mo mifala i bin gat plante sikret we i open long lukluk blong mifala, we i givim mi pis long hat. Yumi save lukluk se God bae i kamdaon taem bae yumi stap rere ol smol haos blong pis from ol pikinini blong Hem. Mo huia bae i no akseptem gospel we i fulwan mo bae i no stanap olsem ol strong soldia long wok ia blong Kraes, bae i no save stap long ples we Papa mo Pikinini i stap long hem. Be i gat wan ples we oli mekem i rere blong olgeta we oli no kasem gospel, be hem i wan ples we glori blong hem i smol nomo; i no olsem we bae yu go stap long Selestial kingdom. Bae mi no traem blong talem moa long saed blong ol samting ia from se naoia, oli stap printim olgeta mo oli stap go aot nao long wol. Maet yu gat wan janis blong rid yuwan, mo sapos yu gat wan janis olsem, mi hop se bae yu lukaotgud blong rid, mo gat wan prea long hat, from se i gud blong luk olgeta samting ia. Mo mi wantem blong yu lukluk gud long wanwan long olgeta, from se i wanem we i lidim yumi long hapines blong yumi long wol ia mo long wol we i stap kam.”4
Glori Folem Ol Digri, i kam long Annie Henrie Nader