“12–18 Julae. Doktrin mo Ol Kavenan 77–80: ‘Bambae Mi Lidim Yufala I Go,’” Kam Folem Mi—Blong Famli: Doktrin mo Ol Kavenan 2021 (2020)
“12–18 Julae. Doktrin mo Ol Kavenan 77–80” Kam Folem Mi—Blong Wanwan Man, Woman mo Famli: 2021
Stap Gobak Hom, i kam long Yongsung Kim
12–18 Julae
Doktrin mo Ol Kavenan 77–80
“Bambae Mi Lidim Yufala I Go”
Lod i talem long Josef Smit se bae Hem i “talem long sora blong [hem] ol toktok blong waes tingting (Doktrin mo Ol Kavenan 78:2). ?Wanem toktok blong waes tingting nao yu bin kasem taem yu bin stap stadi long Doktrin mo Ol Kavenan 77–80?
Raetemdaon Ol Filing mo Tingting blong Yu
Taem Jos Ia blong Jisas Kraes i bin kambak, i no tu yia yet, be namba blong ol memba i kasem 2000, mo i stap go long plante ples kwiktaem. Long Maj 1832, Josef Smit i mit wetem ol nara lida blong Jos blong “tokbaot ol wok blong Jos”: nid ia blong pablisim ol revelesen, pem graon blong kam tugeta long hem, mo kea long olgeta we oli pua (luk long Doktrin mo Ol Kavenan 78, seksen heding). Blong mitim ol nid ia, Lod i bin singaotem wan smol namba blong ol lida blong Jos blong mekemap Yunaet Kampani, wan grup we bae i joenem ol hadwok blong olgeta blong “pusum wok blong Lod i go” (ves 4) long ol eria ia. Be iven long ol administretiv wok olsem, Lod i bin stap lukluk nomo long ol samting we oli blong taem we i no save finis. Long en, stamba tingting blong printing wan stoa blong printim buk, o wan stanemap wan stoahaos—olsem eni nara samting insaed long kingdom blong God— hem i blong rere ol pikinini blong Hem blong kasem “wan ples long selestial wol” mo “ol rij samting blong taem we i no save finis” (ol ves 7, 18). Mo sapos ol blesing ia oli had blong andastanem naoia, long medel blong ol bisi samting blong evri dei laef, Hem i talem kwaet nomo long yumi, “yufala i stap glad, from we bambae mi lidim yufala i go” (ves 18).
Sam Aedia blong Skripja Stadi blong Yuwan
God i stap talemaot ol sikret blong Hem long olgeta we oli lukaot blong save olgeta.
Twelef yia afta long Fas Visen, invitesen insaed long Jemes 1:5 blong “askem God” i gohed blong lidim Josef Smit taem hem i no bin gat inaf waes. Taem we hem mo Sidni Rigdon i bin gat ol kwestin abaot buk blong Revelesen taem oli bin stap wok long translesen blong Baebol, Josef, long wan nomol fasin, i bin askem waes long God. Taem yu stap ridim Doktrin mo Ol Kavenan 77, tingting hevi blong raetemdaon ol niu tingting insaed long ol stret japta insaed long buk blong Revelesen.
Antap long hemia, tingting hevi long wei we yu save folem eksampol blong Profet Josef taem yu stap stadi long ol skripja. Maet yu save askem Papa long Heven: “?Wanem nao mi mas andastanem?”
Translesen blong Baebol, i kam long Liz Lemon Swindle
?Wanem nao i Yunaet Kampani?
Oli bin stanemap Yunaet Kampani (United Firm) blong lukaotem ol printing mo bisnis afea blong Jos long Ohaeo mo Misuri. Insaed long hem i gat Josef Smit, Newel K. Witni, mo ol nara Jos lida we oli bin putum tugeta ol risos blong olgeta blong save kavremap ol nid blong Jos blong gro. Sore nomo, Yunaet Kampani i foldaon long kaon mo i brokdaon long 1834 taem oli nomo save pemaot ol kaon.
Luk tu long “Newel K. Whitney and the United Firm,” Revelations in Context, 142–47; “United Firm,” Church History Topics, ChurchofJesusChrist.org/study/church-history.
Mi save help blong “mekem wok ia [blong Jos] i go.”
Lod i bin talem long Josef Smit mo ol nara lida blong Jos se blong lukaotem wan stoahaos mo wan ples blong printim ol samting bae i helpem blong “mekem wok ia i go, we yufala i putum yufala long hem” (Doktrin mo Ol Kavenan 78:4). ?Wanem nao bae yu talem se i “wok ia” blong Jos? Tingting hevi long hemia taem yu stap ridim Doktrin mo Ol Kavenan 78:1–7. Maet blong stap tingbaot ol ves ia i save gat paoa long wei we yu stap mekem ol koling blong yu long Jos o givim seves long famli blong yu. ?Olsem wanem bae seves blong yu i “mekem wok ia [blong Jos] i go?” ?Olsem wanem nao hemia i rere long yu blong “wan ples long selestial wol”? (ves 7).
Doktrin mo Ol Kavenan 78:17–22
Lod bae i lidim mi i go.
?Yu yu bin filim finis olsem wan smol pikinini, we maet from wan samting we yufala “i no andastanem yet” o “no save tekem”? (Doktrin mo Ol Kavenan 78:17–18). Lukaotem kaonsel long ol ves ia we i save helpem yu “stap glad” (ves 18) long ol kaen taem ia. 7?From wanem yu ting se Lod samtaem i singaotem ol man we oli stap folem Hem, “ol pikinini” (ves 17). Yu save tingting hevi tu long olsem wanem, maet Lod i stap “lidim yufala i go” (ves 18).
Singaot ia blong go wok blong God i moa impoten bitim ples we bae mi go wok long hem.
Folem Doktrin mo Ol Kavenan 80, Elda David A. Bednar i bin tijim, “Ating wan long ol lesen we Sevya i stap tijim yumi long revelesen ia i we, wan wok we oli givim blong wok long wan spesel ples i wan nid, mo i impoten, be i no impoten olsem singaot ia blong givim seves” (“God I Singaotem Yu long Wok,” Ensign o Liahona, Epril 2017, 68). Tingbaot ol koling blong Jos we yu gat naoia o bin gat. ?Wanem nao ol eksperiens we i bin helpem yu blong lanem se ol toktok blong Bedna oli tru? Wanem sam moa lesen we oli ademap we yu save faenem long Doktrin mo Ol Kavenan 79–80 we i save helpem wan man we i jes kasem wan niu koling?
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 77:2.Afta we yufala i ridim ves ia, ol memba blong famli oli save droem ol pikja blong fevret “animol, … ol animol we oli stap wokbaot long graon, … [o] blong ol pijin” we God i bin mekem. ?Wanem nao yumi lanem abaot kriesen blong God long ves ia? (luk tu long Doktrin mo Ol Kavenan 59:16–20). Yu save singsing tu wan singsing abaot kriesen blong God, olsem “My Heavenly Father Loves Me” (Children’s Songbook, 228–29), mo soem ol penting we oli kam wetem aotlaen ia.
-
Doktrin mo Kavenan 77:14.Ves ia i eksplenem se Jon i bin kakae wan buk we i bin ripresentem misin blong hem blong karem Isrel i kam tugeta. ?Wanem nao, saen ia blong stap kakae, i stap talem abaot olsem wanem yumi sapos blong mekem pat blong yumi blong karem Isrel i kam tugeta o blong mekem ol nara samting we Lod i wantem yumi blong mekem? Hemia sam nara skripja we oli yusum kakae blong tijim wan trutok long saed blong spirit: Jon 6:48–51; 2 Nifae 32:3; Moronae 4. Maet bae yu save mekem wan kaekae we famli blong yu i laekem blong kakae tugeta long taem blong storian ia.
-
Doktrin mo Ol Kavenan 78:17–19.Ol memba blong famli oli save dro ol pikja blong ol blesing we oli kam long God, we oli glad mo talem tangkyu from. ?Wanem nao yumi stap mekem blong soem fasin blong talem tangkyu from ol blesing ia? Yu save storian raon tu long olsem wanem famli blong yu i stap folem kaonsel blong akseptem “evri samting wetem fasin blong talem tangkyu” (ves 19). ?Wanem nao Lod i promesem long olgeta we oli mekem hemia?
-
Doktrin mo Ol Kavenan 79:1.Serem testemoni blong yu blong “paoa” we yu bin kasem taem oli odenem yu o setem yu apat long ol koling insaed long Jos. ?Wanem ol spesel presen mo insperesen we Lod i bin blesem yu wetem taem yu bin stap mekem wok blong Hem?
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Yu Gat Blesing Kaontem Evriwan” STSP, pej 8.
Stap Kam Antap long Fasin blong Yumi blong Stap Tij
Droem wan pikja. Ridim sam ves olsem wan famli, mo afta, givim taem blong ol memba blong famli oli droem wan samting we i go wetem wanem yufala i stap ridim. Hangem ol pikja ia raon long hom blong yufala blong rimaenem famli blong yufala long saed blong ol prinsipol we yufala i bin lanem.
Karen blong God, i kam long Sam Lawlor