C. C. A. Christensen (1831–1912), Oli Ronemaot Ol Sent aot long Jakson Kaonti, Misuri, c. 1878, tempera long muslin, 77 ¼ × 113 inj. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970

6–12 Septemba

Doktrin mo Ol Kavenan 98–101

“Stap Kwaet, mo Save se Mi Mi God”

Taem yu stap rid long Doktrin mo Ol Kavenan 98–101, lisin gud long ol tingting mo ol filing we oli kam long yu. ?Olsem wanem nao, we taem yu mekem folem olgeta tingting mo filing ia i helpem yu blong kam man o woman ia we God i wantem yu blong kam?

Raetemdaon Ol Filing mo Tingting blong Yu

Long Ol Sent long ol yia 1830, Indipendens, Misuri, i promes graon ia nao. Hem i “senta ples” blong Saeon (luk long Doktrin mo Ol Kavenan 57:3)—siti blong God long wol ia—we oli stap mekem ol bigfala sakrifaes blong bildim. Long olgeta, kam tugeta blong ol Sent i bin wan taem we i bigwan mo i gat glori, we i mas kam fastaem long Seken Kaming. Be ol neba blong olgeta long eria ia oli bin luk ol samting long defren wei. Ol neba oli gat poen wetem klem ia se God i bin givim graon ia long Ol Sent, oli no glad long wanem bae i kam afta long saed blong politik, ekonomi, mo sosol laef blong plante pipol sapos wan relijin we oli no save gud i kam kwiktaem insaed long eria ia. I no longtaem, ol wari tingting oli kam ol strong tok, mo ol strong toktok ia oli kam ol strong aksen mo vaelens. Long Julae 1833, oli prapa spolem printing ofis blong Jod, mo long Novemba oli fosem Ol Sent blong lego hom blong olgeta, long Jakson Kaonti, Misuri.

Josef Smit i bin ova 800 mael longwe long Ketlan, mo nius ia i tekem wik blong i kasem hem. Be Lod i bin save wanem i bin stap hapen, mo Hem i bin talemaot long profet blong Hem abaot ol prinsipol blong pis mo blong leftemap tingting we bae i givim kamfot long olgeta Sent—ol prinsipol we oli save helpem yumi tu taem yumi fesem fasin blong agens, taem we ol stret mo gud tingting blong yumi oli no save kamtru, o taem yumi nidim wan samting blong rimaenem yumi abaot ol evri dei hadtaem, se bae oli “wok tugeta blong gud blong [yumi]” (Doktrin mo Ol Kavenan 98:3).

Luk long Saints, 1:171–93; “Waiting for the Word of the Lord,” Revelations in Context, 196–201.

Sam Aedia blong Skripja Stadi blong Yuwan

Doktrin mo Ol Kavenan 98:1–3, 11–14; 101:1–16

Ol tes blong mi oli save wok tugeta blong gud blong mi.

Sam long ol hadtaem blong laef blong yumi, oli kam from ol joes blong yumi nomo. Ol narawan oli kam from joes blong ol narawan. Mo samtaem, i no gat man blong blemem—ol nogud samting oli jes hapen nomo. I nomata wanem risen, samting we i kam agensem yumi i save helpem yumi blong mekem ol tabu stamba tingting oli hapen. Taem yu stap ridim wanem we Lod i stap talem abaot hadtaem blong Ol Sent long Doktrin mo Ol Kavenan 98:1–3, 11–14 mo 101:1–16, ?wanem nao yu faenem we i save helpem yu wetem ol tes blong yu? ?Olsem wanem ol ves ia oli save jenisim wei we yu lukluk ol jalenj ia we yu stap fesem? Tingting hevi long wei we ol tes blong yu oli bin wok tugeta blong gud blong yuwan mo blong mekem ol stamba tingting blong God oli kamtru insaed long laef blong yu.

Luk tu long 2 Nifae 2:2; Doktrin mo Ol Kavenan 90:24.

Doktrin mo Ol Kavenan 98:23–48

Lod i wantem mi blong lukaotem pis long wei blong Hem.

I nomata se bae yu no yusum evri samting insaed long Doktrin mo Ol Kavenan 98:23–48 long wei we yu tritim ol narawan, be ?wanem prinsipol nao we yu faenem insaed long ol ves ia we bae i lidim yu taem ol narawan oli mekem nogud long yu? Bae i save help blong makem ol toktok o ol sentens we oli tokbaot olsem wanem Ol Sent oli handelem raorao long Misuri.

Luk long Jeffrey R. Holland, “Seves Ia blong Man I Stretem Hemwan,”   Liahona, Nov 2018, 77–79.

Wan smol pat blong peinting ia: Kraes mo Yangfala Rij Loya, i kam long Heinrich Hoffman.

Doktrin mo Ol Kavenan 100

Lod bae i tekem kea long olgeta we oli wok blong Hem.

Jes sam wik afta we Josef i kam blong save abaot ol fasin blong agens we oli stap hapen long Misuri, wan niu konvet i bin askem hem blong travel i go long Kanada blong hem i serem gospel wetem ol boe blong hem. Josef i bin agri, nomata i sap wari se bae hem i aot long famli blong hem, speseli long taem ia blong agens mo ol nogud toktok agensem famli blong hem, mo agensem Jos. Long rod blong tufala i go long Kanada, Josef mo kompanion blong hem, Sidni Rigdon, tufala i prea from kamfot, mo seksen 100 i ansa blong Lod long prea blong tufala. ?Wanem nao yu faenem insaed long ansa blong Lod we bae i mekem tingting mo hat blong tufala i kwaet, mo bae i helpem tufala?

Mebi yu gat tu samfala eksperiens we i nidim yu blong balensem ol wari blong yu long saed blong ol responsabiliti long Jos, mo wari blong yu long saed blong famli blong yu. ?Olsem wanem nao ol toktok blong Lod insaed long seksen 100 i save helpem yu long ol kaen situesen olsem?

Luk tu long “A Mission to Canada,” Revelations in Context, 202–7.

Doktrin mo Ol Kavenan 101:43–65

Blong stap folem kaonsel blong God i helpem mi blong stap sef.

Parabol we i stap insaed long Doktrin mo Ol Kavenan 101:43–62, Lod i bin givim blong letem se oli ronem Ol Sent oli aot long Saeon. Taem yu stap ridim ol ves ia, ?yu yu luk ol semmak samting bitwin yu mo ol wokman ia insaed long parabol ia? Yu save askem yuwan: ?Mi mi stap gat kwestin long ol komanmen blong God? ?Long wanem wei nao, taem mi no gat inaf fet o komitmen, i letem “enemi ia” blong i lidim mi long laef blong mi? ?Olsem wanem mi save soem long God se “folem hamas we [mi] wantem se [Lod] i lidim [mi] long wan raet mo stret wei blong [hem i] sevem [mi]”? (luk long ol ves 63–65).

Sam Aedia blong Famli Skripja Stadi mo Famli Haos Naet

Doktrin mo Ol Kavenan 98:16, 39–40.Insaed long ol ves ia, ?wanem nao i save helpem yumi blong gat moa pis insaed long famli blong yumi? Yu save singsing wan singsing abaot pis o fogivnes, olsem “Truth Reflects upon Our Senses” (Hymns, no. 273). Ol yangfala pikinini oli save rolplei long fasin blong stap fofogivim wanwan long olgeta.

Doktrin mo Ol Kavenan 99.Taem we Lod i bin singaotem Jon Medok blong lego hom blong hem “blong talemaot gospel ia we i no gat en” (ves 1), hem i jes kambak long wan longfala misin blong wan yia long Misuri (luk long“John Murdock’s Missions to Missouri,” Revelations in Context, 87–89). ?Wanem nao yumi faenem insaed long seksen 99 we maet bae i helpem o i leftemap tingting blong Brata Medok? ?Wanem mesej nao Lod i gat blong givim long yumi tru long revelesen?

Doktrin mo Ol Kavenan 100:16; 101:3–5, 18.Afta we yufala i ridim ol ves ia, yufala i save toktok raon long olsem wanem ol blaksmit, o olgeta we oli stap wokem aean, oli mas hotem aean i hot gud blong karemaot ol doti long hem, afta oli kilkilim long bigfala hama blong sepem aean ia (luk long vidio ia, “The Refiner’s Fire” long ChurchofJesusChrist.org). Maet bae tugeta, yufala i lanem abaot wei we oli stap klinim gud ol nara samting, olsem wota o sol blong solwota. Mebi yufala i save mekem wan samting i kam klin gud olsem wan famli. ?From wanem bae yumi wantem blong kam klin gud? ?Wanem nao ol eksampol ia oli stap tijim yumi abaot hao ol tes blong yumi oli save helpem yumi blong kam wan “pipol we i klin gud”?

Doktrin mo Ol Kavenan 101:22–36.?Olsem wanem nao, ol ves ia oli bin helpem Ol Sent we oli bin fesem agens agensem olgeta? ?Olsem wanem nao oli save helpem ol pipol we oli fraet from ol kondisen blong wol blong yumi tedei?

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Help Me, Dear FatherChildren’s Songbook, 99.

Stap Kam Antap long Stadi blong Yuwan

Lukaotem ol prinsipol. Elda Richard G. Scott i tijim: “Taem yu stap lukaotem save long saed blong spirit, lukaotem ol prinsipol. … Ol prinsipol oli ol trutok we oli stap wanples, oli stap wanples blong yusum long plante defren kaen situesen” (“Acquiring Spiritual Knowledge,” Ensign, Nov. 1993, 86).

Misuri I Stap Bon, i kam long Glen S. Hopkinson