“20–26 Septemba. Doktrin mo Ol Kavenan 106–108: ‘Blong Gat Ol Heven Oli Open,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“20–26 Septemba. Doktrin mo Ol Kavenan 106-108” Kam Folem Mi—Blong Wanwan Man, Woman mo Famli: 2021
20–26 Septemba
Doktrin mo Ol Kavenan 106–108
“Blong Gat Ol Heven Oli Open”
Elda Ulisses Soares i bin tijim: “Yumi nidim blong stap wetem [Sevya], yumi draon insaed long ol skripja, yumi glad long ol skripja, stap lanem doktrin blong Hem, mo traehad blong laef long wei we Hem i bin laef” (“?Olsem Wanem Nao Mi Save Andastanem?” Liahona, Mei 2019, 6). Taem yu stap draonem yu insaed long Doktrin mo Ol Kavenan 106–108, raetemdaon ol wei we yu save traehad blong laef folem ol trutok we yu bin faenemaot.
Raetemdaon Ol Filing mo Tingting blong Yu
Long fas lukluk, bae yu luk se Doktrin mo Ol Kavenan 107 bae i abaot fasin blong stap oganaesem ol ofis long wan lidasip strakja we i blong Jos blong Lod. I tru, taem we oli pablisim revelesen ia, membasip blong Jos i bin stap gro finis we i bitim namba blong ol ofis blong ol lida we i bin stap. So, blong talemaot gud ol rol mo ol responsabiliti blong Fas Presidensi, Kworom blong Olgeta Twelef Aposol, Olgeta Seventi, ol bisop, mo ol presidensi blong kworom, i bin wan nid mo i bin help. Be i gat plante moa samting long tabu instraksen ia long seksen 107 we i bitim blong jes givim wei blong oganaesem ol prishud ofis mo kworom. Long ples ia, Lod i stap tijim yumi abaot wan oda blong prishud blong bifo we Hem i bin “stanemap long taem blong Adam” (ves 41). Stamba tingting biaen long hem, stat long stat, i blong mekem i posibol long ol pikinini blong God—we i tekem yu tu—blong kasem ol odinens blong gospel we i sevem man, mo blong stap glad long “evri blesing blong jos long saed blong spirit—blong gat spesel janis ia blong kasem ol sikret blong kingdom blong heven, [mo] blong gat ol heven oli open long olgeta” (ol ves 18 kasem 19).
Luk long “Restoring the Ancient Order,” Revelations in Context, 208–12.
Sam Aedia blong Skripja Stadi blong Yuwan
Doktrin mo Ol Kavenan 106; 108
Lod i givim instraksen, i leftemap tingting mo i sapotem olgeta we Hem i singaotem olgeta blong givim seves.
Insaed long Doktrin mo Ol Kavenan 106 mo 108, Lod i bin givim kaonsel mo promes long tufala memba we oli bin singaotem tufala blong givim seves insaed long Jos. ?Wanem sentens, insaed long ol revelesen ia, oli leftemap tingting mo oli givim niu tingting abaot stret seves blong yu insaed long kingdom blong God? Hemia tu sentens blong tingting long hem:
-
Olsem wanem nao yu bin kasem “gladhat mo wan stret save” we bae yu yu save “stanap wetem”? (Doktrin mo Ol Kavenan 106:8).
-
?Olsem wanem nao bae yu “stap lukaotgud stat naoia i go blong stap folem strong ol tabu promes,” mo ol kavenan blong yu? (Doktrin mo Ol Kavenan 108:3).
?Wanem nara sentens insaed long ol seksen 106 mo 108 we oli gat mining long yu?
Luk tu long Russell M. Nelson, “Givhan Wetem Paoa mo Atoriti blong God,” Liahona, Mei 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28.
Lod i lidim Jos blong Hem tru long prishud atoriti.
Taem yu bin stadi long Restoresen blong gospel, maet yu bin luk se Lod i no stap eksplenem wan doktrin fulwan insaed long wan revelesen ia nomo. Be, Hem i talem ol samting “laen folem laen” (Doktrin mo Ol Kavenan 98:12) taem we situesen we i stap i mekem se bae i olsem. Nomata we Lod i bin givim instraksen finis abaot prishud, olsem long yia 1829 (eksampol, luk long ol seksen 20 mo84), Hem i bin givim moa instraksen long Ol Sent long 1835 abaot ol spesifik ofis blong prishud, we i bin nid blong rulum mo lidim bigfala grup blong sipsip blong Hem we i stap kam bigwan.
Taem yu bin stap ridim abaot olgeta prishud ofis ia, tingting long hao nao yu save sapotem olgeta we yu stap givim seves long olgeta long ol koling ia tru long “tras, fet, mo prea,” (Doktrin mo Ol Kavenan 107:22).
-
Fas Presidensi mo Presiden blong Jos (ol ves 9, 21–22, 65–66, 91–92)
-
Olgeta Twelef Aposol (ol ves 23–24, 33–35, 38, 58)
-
Olgeta Seventi (ol ves 25–26, 34, 93–97)
-
Ol bisop (ol ves 13–17, 68–76, 87–88)
Doktrin mo Ol Kavenan 107:1–20
Ol odinens blong prishud oli givim ol blesing long saed blong spirit mo long saed blong laef long wol ia long evriwan long ol pikinini blong Papa long Heven.
Elda Neil L. Andersen i tijim: “Prishud i paoa mo atoriti blong God we Hem i givim blong sevem ol man mo blesem evriwan,—ol man, ol woman mo ol pikinini. … Taem yumi stap klin inaf, ol odinens blong prishud oli save mekem laef blong yumi i kam rij moa long wol ia, mo oli save mekem yumi rere from ol bigfala naes promes blong wol ia we bae i stap kam (“Power in the Priesthood,” Ensign o Liahona, Nov 2013, 92). Taem yu stap ridim Doktrin mo Ol Kavenan 107:1–20 (luk speseli long ol ves 18–20) mo haf mesej blong Elda Andersen, tingting blong raetemdaon ol tingting mo ol filing blong yu abaot wei we paoa blong God i mekem laef blong yu long wol ia i rij, mo wei we Hem i stap mekem yu yu rere from taem we i no save finis. ?Wanem nao yu stap mekem blong kasem moa fulwan—mo helpem ol narawan blong kasem—olgeta blesing ia?
Luk tu long Doktrin mo Ol Kavenan 84:19–27; Dallin H. Oaks, “Melkesedek Prishud mo Ol Ki,” Liahona, Mei 2020, 69–72.
Doktrin mo Ol Kavenan 107:41–57
Prishud i blesem ol famli.
Adam i wantem se laen blong hem bae i kasem blesing tru long prishud. ?Wanem promes nao hem i bin kasem? (luk long ol ves 42, 55). Taem yu stap rid abaot wanem Adam i bin mekem, tingting long hamas yuwan yu wantem blong famli blong yu i stap glad long ol blesing blong prishud. ?Wanem nao yu gat insperesen blong mekem blong helpem famli blong yu blong kasem olgeta blesing?
Adam I Stap Blesem Laen blong Hem i kam long Clark Kelley Price
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 106:6.?Wanem nao famli blong yumi i save mekem blong mekem se i gat “glad long heven”?
-
Doktrin mo Ol Kavenan 107:22.?Wanem nao yumi stap mekem blong sapotem ol lida blong yumi “ tru long … tras, fet mo prea”?
-
Doktrin mo Ol Kavenan 107:27–31, 85.Ol prinsipol we oli lidim ol kaonsel blong Jos oli save helpem yumi tu blong kaonsel tugeta olsem wan famli. ?Wanem prinsipol nao insaed long ol ves ia yumi save yusum insaed long ol famli kaonsel blong yumi? (Luk long M. Russell Ballard, “Ol Famli Kaonsel,” https://www.churchofjesuschrist.org/study/general-conference/2016/04/family-councils?lang=bis, Epril 2016.)
-
Doktrin mo Ol Kavenan 107:99–100.Givim, long wan memba blong famli, ol instraksen we yu raetem blong mekem wan wok insaed long haos, mo invaetem hem blong jusum wei blong mekem wok ia i hapen: wetem strong tingting, wetem fasin blong no wantem save, o wetem fasin blong no ridim instraksen we i stap. Letem haf famli i lukluk hem i mekem wok ia, mo oli traem faenemaot se wijwan wei nao memba blong famli ia i bin jusum. Afta, letem ol nara memba blong famli oli kam mekem, wan afta wan. ?From wanem nao Lod i nidim yumi blong mekem tugeta samting ia: lanem diuti blong yumi mo mekem olgeta wetem evri strong tingting? (Luk long Becky Craven, “Lukaotgud agens Lukaot Wanwan Taem” Liahona, Mei 2019, 9–11).
-
Doktrin mo Kavenan 108:7.?Olsem wanem nao yumi save mekem wanwan long yumi i kam strong moa tru long ol storian blong yumi? ?long ol prea blong yumi? ?Long ol samting we yumi askem strong man blong mekem, o long ol toktok blong leftemap tingting? ?Long evri samting we yumi stap mekem? Maet bae yu jusum wan long olgeta ia blong wok long hem olsem wan famli.
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “We Listen to a Prophet’s Voice,” Hymns, no. 22.
Stap Kam Antap long Stadi blong Yuwan
Raetemdaon Ol Filing blong Yu. Taem ol tingting mo ol filing long saed blong spirit i kam long yu, raetemdaon olgeta. Taem yu mekem, i soem long Lod se yu yu tekem daereksen blong Hem i impoten. (Luk long Teaching in the Savior’s Way, 12, 30.)
Melkesedek i blesem Ebram, i kam long Walter Rane