Ketlan Tempol, i kam long Jon McNaughton

27 Septemba–3 Oktoba

Doktrin mo Ol Kavenan 109–110

“Hem I Haos blong Yu, Wan Ples blong Tabu Fasin blong Yu”

Taem hem i stap tokbaot Doktrin mo Ol Kavenan 109:24–28, Elda David A. Bednar i bin talem, “Mi stap invaetem yufala blong tingting hevi wetem prea, long wanem ol skripja ia oli minim insaed long laef blong yufala, mo blong famli blong yufala” (“Honorably Hold a Name and Standing,” Ensign o Liahona, May 2009, 99). Tingting hevi long invitesen ia taem yu stap stadi.

Raetemdaon Ol Filing mo Tingting blong Yu

Ol doa blong Ketlan Tempol oli no sapos blong open kasem 8 klok moning long namba 27 Maj 1836. Be Ol Sent we oli bin stap hop blong go long dedikesen seves ia, oli stat blong laen finis long 7 klok moning. Taem we ol stul mo ol saedsaed oli fulap kwiktaem wetem olgeta we oli kam wosip, Josef Smit i putum wan nara ples blong man i kam sidaon long hem. Taem hemia i fulap, oli openem wan nambatu ples. Mo i no jes olgeta we oli bin stap laef nomo we oli wantem tumas blong stap long tetaem ia. Plante witnes oli bin testifae se oli bin luk ol enjel, insaed long tempol, mo iven long ruf, long taem mo afta long dedikesen. I rili luk olsem we “ol ami blong heven” oli bin kam blong “singsing mo singaot” wetem ol Lata-dei Sent (“Spirit Olsem Faea,” STSP, pej 28).

?From wanem man i glad tumas long tugeta saed blong vel? Promes ia se bae Ol Sent bae “kasem paoa we i kam long heven” i bin wan risen from wanem oli bin kam tugeta long wan ples long Ohaeo (Doktrin mo Ol Kavenan 38:32). Mo oli bin kasem promes blong plante gudfala moa samting long fiuja. Lod i talem: “Hemia i stat blong blesing we bae mi kapsaetem long hed blong ol pipol blong mi” (Doktrin mo Ol Kavenan 110:10). Taem ia we yumi stap laef long hem naoia—wetem tempol wok we i wok hariap moa mo ol odinens we oli stap long plante milian blong man we oli stap laef mo oli ded finis—i bin stat long Ketlan, taem we “naoia rod i open blong trutok i kam long wol” (Spirit Olsem Faea”).

Luk tu long Saints, 1:232–41; “A House for Our God,” Revelations in Context, 169–72.

Sam Aedia blong Skripja Stadi blong Yuwan

Doktrin mo Ol Kavenan 109

Lod i wantem blesem mi insaed long tabu haos blong Hem.

Long sam wei, Ketlan Tempol i defren long ol tempol we yumi save long olgeta tedei. I no bin gat ol olta, mo i no bin gat ol ples blong baptaes, mo ol odinens olsem baptaes long bihaf blong ol dedman, mo ol siling, oli no bin putumbak yet. Be ol blesing we oli putum insaed long seksen 109, dedikesen prea blong Ketlan Tempol, oli ol blesing we yumi stap kasem insaed long haos blong Lod tedei. Luklukbak long olgeta ves ia blong faenem samfala long ol blesing ia. Taem yu stap rid abaot olgeta, tingting hevi long from wanem oli impoten long yu mo famli blong yu.

Ol ves 5, 12–13 (luk tu long Doktrin mo Ol Kavenan 110:6–8): Insaed long tempol, Lod i save soemaot Hemwan long yumi, mo yumi save filim paoa blong Hem.

Ol ves 9, 17–19, 26, 78–79: Insaed long tempol, yumi stap tekem long yumiwan nem blong Lod.

Ol ves 22–23: Taem yumi stap mekem mo givim ona long ol tempol kavenan, Lod i givim yumi paoa blong mekem wok blong Hem.

Ol ves 24–33: Taem yumi stap go long tempol, we yumi klin inaf blong go insaed long hem, yumi save kasem proteksen blong Lod.

Ol nara blesing:

?Wanem nao Spirit i givim long yu olsem insperesen blong yu go mekem blong kasem olgeta blesing ia?

Doktrin mo Ol Kavenan 109

Dedikesen prea blong Ketlan Tempol i save tijim mi abaot prea.

Seksen 109 i wan dedikesen prea we Lod i bin givim long Josef Smit tru long revelesen (luk long seksen heding). ?Wanem nao yu lanem abaot prea aot long seksen ia? Taem yu stap ridim, i gud blong yu tingting long ol prea we yuwan yu stap givim. ?Wanem tingting mo filing nao yu kasem se i save helpem yu blong kam antap long wei we yu stap toktok wetem Papa long Heven? Eksampol, ?wanem Profet i bin prea from long prea ia?

Doktrin mo Ol Kavenan 110:1–10

Lod i save soemaot Hemwan long mi insaed long tempol ia.

?Hao nao yu yu filim abaot Sevya afta we yu ridim Doktrin mo Ol Kavenan 110:1–10? ?Olsem wanem nao Hem i bin soemaot Hemwan long yu insaed long tempol? ?Long wanem wei Hem i bin helpem yu blong save se Hem i akseptem ol hadwok mo ol sakrifaes blong yu?

Insaed long Ketlan Tempol wanwan en i gat ol pulpit i stap long hem blong ol prishud lida oli yusum.

Doktrin mo Ol Kavenan 110:11–16

Oli nidim ol prishud ki blong mekem wok blong God insaed long Jos tedei.

Blong andastanem abaot ol prishud ki we Moses, Elaeas, mo Elaeja oli bin givim long Josef Smit mo Oliva Kaodri long Ketlan Tempol, maet yu nid blong ridim mesej blong Elda Quentin L. Cook “Rere blong Mitim God” (  Liahona, Mei 2018, 114–17). Elda Cook i tokbaot olsem wanem nao ol ki ia oli go wetem wok blong Jos tedei. Maet bae yu laekem blong tingting blong lanem abaot ol profet blong bifo “Moses,” “Elaeas,” mo “Elaeja” insaed long Gaed long Ol Skripja (olskripja.ChurchofJesusChrist.org). Tingting Hevi long wanem yu save mekem blong help long wok we i go wetem olgeta ki ia.

Luk tu long “Prishud Ki,” Stap Tru long Fet, 150–151; Henry B. Eyring, “Hem I Stap Go Fastaem long Yumi,”   Liahona, Mei 2020, 66–69.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 109.Olsem wan famli, faenem sam ves insaed long seksen 109 we i givim insperesen long yu blong yu spendem moa taem insaed long tempol (eksampol, luk long ol ves insaed long lis anda long “Ol Aedia blong Skripja Stadi blong Yuwan”). Tokbaot olsem wanem yu save mekem wanem we Presiden Russel M. Nelson i givim tingting from: “Faenem wan wei blong mekem wan apoenmen oltaem wetem Lod—blong stap insaed long tabu Haos blong Hem—mo afta, kipim taem mo dei blong apoenmen ia i strik mo wetem glad” (“Blong Kam Ol Lata-dei Sent we I Givim Eksampol,”   Liahona, Nov 2018, 113). O sapos yu o famli blong yu i no go yet long tempol, yufala i save visitim temples.ChurchofJesusChrist.org blong helpem yufala blong rere blong go.

Doktrin mo Ol Kavenan 109:78-80.Hym ia, “Spirit Olsem Faea”STSP, pej 28) oli bin raetem blong oli singsing long dedikesen blong Ketlan Tempol—mo oli stap singsing long hem long evri tempol dedikesen stat long tetaem ia. Yufala i save singsing long hym ia tugeta, mo faenem ol sentens we oli mekem se yu filim moa tangkyu from ol tempol long ol lata-dei dei. ?Olsem wanem hym ia i go wetem mesej we i stap long Doktrin mo Ol Kavenan 109:78–80?

Yufala i save faenem dedikesen prea blong tempol we i stap moa kolosap long yufala long temples.ChurchofJesusChrist.org.

Doktrin mo Ol Kavenan 110.Taem we ol memba blong famli blong yu oli stap ridim seksen 110 mo luk long pikja ia long en blong aotlaen ia, invaetem olgeta blong traem tingting, insaed long maen blong olgeta, olsem wanem bae oli filim sapos oli bin stap wetem Josef Smit mo wetem Oliva Kaodri insaed long Ketlan Tempol. Givim famli blong yu wan janis blong serem olsem wanem oli stap filim abaot Sevya.

Doktrin mo Ol Kavenan 110:15.?Wanem bae i help blong “tanem hat” blong ol pikinini blong yu i go long ol bubu blong olgeta? Yufala i save faenem sam gud aedia long FamilySearch.org/discovery. Yufala i save wok tugeta blong faenemaot nem blong ol bubu we oli nidim ol tempol odinens mo mekem plan blong mekem ol odinens ia long tempol. Yufala i save tokbaot tu olsem wanem wok we Elaeja i bin putumbak insaed long Ketlan Tempol i mekem se yu gat moa lav long ol bubu blong yu.

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Spirit Olsem Faea,” STSP, pej 28

Ol Voes blong Restoresen

Ol Taem we Ol Samting I Hapen long Saed blong Spirit mo Ketlan Tempol

Olsem wan Faea we I Stap Bon, i kam long Glen S. Hopkinson

Andanit ia, i gat ol toktok blong ol Lata-dei Sent we oli bin stap long Ketlan Tempol long taem blong dedikesen blong hem, mo tu, oli bin stap long ol nara miting we oli bin kam afta. Plante oli bin komperem eksperiens blong olgeta wetem wanem we Ol Sent bifo oli bin gotru long hem taem we paoa blong heven i bin kamdaon long olgeta olsem long dei blong Pentekos(Luk 24:49; luk tu long Ol Wok 2:1–4; Doktrin mo Ol Kavenan 109:36–37).

Eliza R. Snow

“Ol seremoni blong dedikesen ia, oli save praktis long olgeta, be i no gat wan lanwis long wol ia we i save tokbaot hao heven i soemaot hem long memori dei ia. Ol enjel oli kamkamaot long sam, mo evriwan we i stap i filim se sam pipol blong heven oli stap, mo wanwan hat i fulap long wan glad we oli no save tokbaot, mo i fulap long glori.”¹

Sylvia Cutler Webb

“Wan long ol fas memori blong mi i dedikesen blong Tempol. Papa blong mifala i tekem mifala i sidaon long leg blong hem, mo i talem long mifala from wanem bae mifala i go, mo mining blong dediketem wan haos long God. Mo nomata we mi yangfala tumas long tetaem ia, mi rimemba klia taem ia. Mi save luk i gobak long ol yia ia, mo luk, long taem we mi luk Josef we i Profet, i stanap wetem ol han blong hem we hem i leftemap i go long heven, we fes blong hem i waet, wota i stap ron i kamdaon long fes blong hem taem hem i stap toktok long memori dei ia. Kolosap evriwan i stap krae. Haos ia i bin fulap long ol pikinini we oli bin stap sidaon long leg blong ol olfala pipol; sista blong mi i sidaon long leg blong papa, mi antap long leg blong mama. Mi save tingbaot se mifala i werem wanem dres. Maen blong mi i yangfala tumas long tetaem ia blong kasem ful mining blong evri samting ia, be taem we taem i bin pas i go, nao moa tingting i kam long mi mo mi talem tangkyu tumas we mi bin gat spesel janis ia blong stap long tetaem ia.”²

Oliva Kaodri

“Long naet, mi gat miting wetem ol ofisa blong Jos insaed long haos blong Lod. Spirit i bin fulap—mi bin luk glori blong God, olsem wan bigfala klaod, we i bin kamdaon mo i stap antap long haos ia, mo i fulumap haos ia olsem wan strong win we i hariap i go. Mi bin luk ol pis tang, we oli olsem faea we oli stap antap long plante, … long semtaem we oli bin toktok ol nara lanwis mo oli bin talem ol profesi.”³

Benjamin Brown

“Oli bin luk plante visen. Wan i bin luk wan pilo o wan klaod i stap antap long wan haos, i saen olsem we taem san i saen long wan klaod, nao i kam olsem gol. Tu narawan oli bin luk trifala man we oli wokbaot insaed long rum wetem ol ki blong olgeta we oli saen gud long han blong olgeta, mo tu, wan jen we i saen gud we i stap long han blong tufala.”⁴

Orson Prat

“God i bin stap ia; ol enjel blong Hem oli bin stap ia, Tabu Spirit i bin stap long medel blong ol pipol, … mo oli bin fulap, stat long hed blong olgeta i go kasem andanit leg blong olgeta wetem paoa mo insperesen we i kam long Tabu Spirit.”⁵

Nancy Naomi Alexander Tracy

“Taem we oli finisim Tempol, mo oli bin dediketem … tufala dei ia, i tufala dei we mi bin hapi moa long laef blong mi. Hym ia we oli bin raetem from stret taem ia, ‘Spirit Olsem Faea I Stap Bon.’ I bin tru se Paoa blong Heven i bin stap antap long haos ia. … I bin filim se hem i bin heven we i stap long wol.”⁶

Ol Not

1. Insaed long Edward W. Tullidge, The Women of Mormondom (1877), 95.

2. Insaed long Karl Ricks Anderson, Joseph Smith’s Kirtland: Eyewitness Accounts (1996), 182–83.

3. Oliver Cowdery diary, Mar. 27, 1836, Jos Histri Laebri, Sol Lek Siti.

4. Leta blong Benjamin Brown i go long waef blong hem, Sarah, samples Epril 1836, Benjamin Brown family collection, Jos Histri Laebri, Sol Lek Siti; speling mo fasin blong raetem sentens, oli jenisim blong i moa olsem hemia blong tedei.

5. Orson Pratt, “Remarks,” Deseret News, 12 Jen 1876, 788.

6. Insaed long Richard E. Turley Jr. and Brittany A. Chapman, eds., Women of Faith in the Latter Days (2011), 1:442.

Moses, Elaeas, mo Elaeja Oli Kamaot long Ketlan Tempol, i kam long Gary E. Smith