“25–31 Oktoba. Doktrin mo Ol Kavenan 124: ‘Wan Haos long Nem blong Mi,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“25–31 Oktoba. Doktrin mo Ol Kavenan 124,” Kam Folem Mi—Blong Wanwan Man, Woman mo Famli: 2021
Nauvu, Hem Ia we I Naes Tumas, i kam long Larry Winborg
25–31 Oktoba
Doktrin mo Ol Kavenan 124
“Wan Haos long Nem blong Mi”
Taem yu stap ridim Doktrin mo Kavenan 124, tingting hevi long ol blesing we Lod i bin invaetem Ol Sent long Nauvu blong oli kasem, mo ol blesing we Hem i stap givim long yu.
Raetemdaon Ol Filing mo Tingting blong Yu
Ol las sikis yia oli bin had tumas long Ol Sent, be long spring blong yia 1839, ol samting oli stat blong luk gud smol: Ol rifuji Sent oli faenem lav mo sore long medel blong ol sitisen blong Kwinsi, Ilinoa. Ol bodigad oli bin letem Profet Josef Smit mo ol nara lida blong Jos blong kamaot long kalabus long Misuri. Mo Jos i jes pem wan graon long Ilinoa, wan ples we Ol Sent oli save kam tugeta long hem. Yes, ples ia i ples blong wota, i fulap long moskito, be komperem wetem ol jalenj we Ol Sent oli bin fesem finis, hemia i inaf. Mekem se oli karemaot wota long ples blong wota ia, mo oli droem wan plan blong wan niu siti, we bae oli singaotem Nauvu. Long lanwis blong Hibru, hemia i minim “naes tumas,” mo i moa olsem wan wei blong soemaot fet, be i no stret gud. Be naoia i go, Lod i bin stap givim tingting long Profet blong Hem wetem filing ia blong mekem samting hariap. Hem i bin gat moa trutok mo odinens blong putumbak, mo Hem i bin nidim wan tabu tempol, wan ples we Ol Sent bae oli kasem olgeta trutok mo odinens ia. Long plante wei, ol semfala filing ia blong fet mo wok hariap, oli impoten long wok blong Lod tedei.
I nomata we Nauvu i bin kam wan naesfala siti wetem wan naesfala tempol, long en, Ol Sent oli lego ples ia. Be wok blong Lod we i naes tru, olsem i bin blong “givim antap long hed blong yufala, ona, fasin blong nomo save ded, mo laef we i no save finis” (Doktrin mo Ol Kavenan 124:55) mo wok ia i neva finis.
Luk long Saints, 1:399–427; “Organizing the Church in Nauvoo,” Revelations in Context, 264–71.
Sam Aedia blong Skripja Stadi blong Yuwan
Doktrin mo Ol Kavenan 124:12–21
Mi save stap wan disaepol we Lod i trastem.
I nomata we plante impoten lida oli lego Jos let long ol yia 1830, bigfala namba blong ol memba oli bin gohed blong stap fetful. Olgeta Sent ia, i gat olgeta we oli bin stap strong tru long ol tes long Misuri, mo olgeta we oli jes joenem Jos. Insaed long Doktrin mo Ol Kavenan 124:12–21, Lod i bin leftemap olgeta antap. ?Wanem sam niu samting abaot fasin blong stap olsem disaepol nao we yu faenem insaed long ol toktok blong Hem? ?I gat eni samting abaot ol fetful sent ia we i givim insperesen long yu blong yu stap olsem olgeta? Maet bae yu wantem tingting hevi tu long wei we Lod i bin talemaot lav we Hem i gat long yu.
Doktrin mo Ol Kavenan 124:22–24, 60–61
Lod i wantem mi blong welkamem mo akseptem ol narawan.
Wetem tingting long wanem Ol Sent oli jes gotru long hem long Misuri, maet oli bin kasem temtesen blong go stap olgetawan nomo, mo no letem ol visita blong go long Nauvu. Kipim hemia long maen blong yu taem yu stap ridim Doktrin mo Ol Kavenan 124:22–24, 60–61. ?Wanem nao i tajem yu abaot instraksen blong Lod blong bildim wan “haos blong slip mo kakae long hem”? (ves 23). ?Wanem nao ol toktok blong Hem oli stap tijim yu abaot misin blong Jos ia blong Hem? Tingting hevi long ol instraksen ia, mo olsem wanem oli blong yu mo hom blong yu.
Luk tu long vidio ia: “A Friend to All,” ChurchofJesusChrist.org.
Doktrin mo Ol Kavenan 124:25–45, 55
Lod i givim komanmen long yumi blong bildimap ol tempol blong mekem se yumi save kasem ol tabu odinens.
I tru nomo se i no bin wan sapraes long ol Lata-dei Sent, se taem oli bin stap gud long Nauvu, Lod i bin givim olgeta ol instraksen blong bildim wan tempol—semmak olsem we Hem i bin mekem long Ohaeo mo long Misuri. ?Wanem nao yu faenem insaed long Doktrin mo Ol Kavenan 124:25–45, 55 we i helpem yu blong andastanem from wanem Lod i bin talem: “ol pipol blong mi oli kasem komanmen oltaem blong bildim long tabu nem blong mi.”? (ves 39).
Stat long taem we oli bin bildim Nauvu Tempol, oli bin bildim o anaonsem ova long 200 tempol. Presiden Russell M. Nelson i tijim: “Yumi save se taem we yumi spendem insaed long tempol i wan bigfala nid blong Lod i sevem yumi, mo yumi kam olsem wan god, mo i impoten long ol famli. Ol atak blong enemi oli stap kam antap bigwan, oli strong moa, mo i gat fulap defren kaen. Nid blong yumi go long tempol oltaem, i bigwan moa bitim bifo.” (“Blong Kam Ol Lata-dei Sent we I Givim Eksampol,” Liahona, Nov 2018, 114). ?Olsem wanem tempol i bin helpem yu blong stanap agensem “ol atak blong enemi”? ?Wanem nao yumi filim blong go mekem blong folem kaonsel blong Presiden Nelson?
Luk tu long Church History Topics, “Nauvoo Temple,” ChurchofJesusChrist.org/study/church-history.
Josef Smit long Nauvu Tempol, i kam long Gary E. Smith
Doktrin mo Ol Kavenan 124:84–118
Lod i wantem blong givim mi ol spesifik kaonsel blong laef blong mi.
Ol ves 84–118 oli fulap wetem ol kaonsel blong ol spesifik man, mo sam long ol kaonsel ia, bae oli no stret wetem laef blong yu. Be maet yu save faenem wan samting we yu nidim blong harem. Tingting blong askem Lod long wanem mesej nao Hem i gat blong givim long yu insaed long ol ves ia, mo askem Spirit blong i soem rod long yu blong faenem kaonsel ia. Afta, disaed se bae yu mekem wanem blong tekem aksen folem. Eksampol: ?Olsem wanem nao fasin blong gat tingting i stap daon i helpem yu blong kasem Spirit? (luk long ves 97).
Maet yu save tingting hevi tu long ol nara kaonsel we Lod i bin givim long yu. ?Long wanem wei nao yu stap tekem aksen folem hemia.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 124:2–11.Sapos Lod i talem long famli blong yu blong “go talemaot strong abaot gospel” i go long “evri king blong wol” (ol ves 2-3), ?wanem nao bae yu talem long ol toktok blong yu? Gat tingting blong krietem wan ofisol toktok tugeta, mo invaetem ol memba blong famli blong givim tingting blong ol trutok blong gospel we oli wantem putum insaed long ofisol toktok ia.
-
Doktrin mo Ol Kavenan 124:15.?I minim wanem blong gat wan stap tru mo strong? ?From wanem Lod i tekem se fasin blong stap tru mo strong i impoten tumas? ?Wanem eksampol blong fasin blong stap tru mo strong we yu bin luk insaed long famli blong yu? (Luk tu long Blong Ol Yut Oli Kam Strong, 19.)
-
Doktrin mo Ol Kavenan 124:28–29, 40–41, 55.?Wanem nao yumi lanem aot long ol ves ia abaot from wanem Lod i givim komanmen long yumi blong bildim ol tempol? Maet famli blong yu i laekem blong droem wan pikja blong wan tempol, i wantem bildim wan wetem ol pleiplei blok o ol nara samting. Taem yufala i stap mekem hemia, toktok raon long from wanem nao yu yu talem tangkyu se yumi gat ol tempol tedei, mo from wanem yumi nidim blong wosip insaed long olgeta oltaem.
-
Doktrin mo Ol Kavenan 124:91–92.?Bae famli blong yu i lanem samting sapos yufala i toktok raon long ol petriakel blesing? Ol memba blong famli we oli bin kasem petriakel blesing blong olgeta oli save serem se i bin olsem wanem blong kasem blesing ia, mo olsem wanem gospel ia i bin blesem olgeta. Yu save luklukbak tu long “Petriakel Blesing” (Gaed long Ol Skripja, olskripja.ChurchofJesusChrist.org).
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Love to See the Temple,” Children’s Songbook, 95.
Ol Voes blong Restoresen
Rilif Sosaeti
Peinting blong oganaesesen blong Rilif Sosaeti we i kam long Paul Mann
Long 1842, afta we Rilif Sosaeti i bin oganaes long Nauvu, Ilinoa, Profet Josef Smit i bin talem: “Jos i neva bin oganaes stret evriwan kasem taem we ol woman oli bin oganaes.”1 Semmak, sapos yu stap stadi abaot Restoresen blong Jos blong Lod mo prishud blong Lod (luk long Doktrin mo Ol Kavenan 107), bae stadi ia i no fulwan kasem taem yu stadi abaot Rilif Sosaeti, we hemia tu, i “wan restoresen blong wan paten blong bifo” abaot ol woman disaepol blong Jisas Kraes.2
Eliza R. Snow i bin plei wan impoten rol long restoresen wok ia. Hem i bin stap taem oli bin oganaesem Rilif Sosaeti blong fas taem, mo olsem sekretari blong sosaeti, hem i bin tekem ol not long taem blong ol miting ia. Hem i bin witnesem se Rilif Sosaeti i bin oganaes “folem paten blong prishud.”3 Andanit ia, oli ol toktok blong hem, we hem i bin stap raetem taem hem i bin stap olsem Jeneral Presiden blong Rilif Sosaeti, blong helpem ol sista blong hem blong oli andastanem tabu wok we i go long ol kavenan gel blong God.
Blong lanem moa abaot hao Rilif Sosaeti i bin oganaes, luk long Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Eliza R. Snow
“I nomata nem ia Rilif Sosaeti i wan nem blong tedei, sosaeti ia hem i blong longtaem bifo finis. Josef Smit i bin talem long yumi se, semfala oganaesesen ia i bin stap long Jos bifo, mo oli tokbaot smol long ol leta we oli raetem long Niu Testeman, taem oli yusum toktok ia ‘woman we God i jusumaot yu’ [luk long 2 Jon 1:1; Doktrin mo Ol Kavenan 25:3].
“Hemia i wan oganaesesen we i no save stap sapos i no gat Prishud, hemia i from se evri atoriti mo paoa blong hem i kamaot long ples ia nao. Taem we oli tekemaot Prishud long wol ia, oganaesesen ia tu, mo evri nara samting we i bin hang long tru oda blong jos blong Jisas Kraes long wol ia, i go lus tu. …
“Mi bin stap long taem we oli oganaesem ‘Woman Rilif Sosaeti blong Nauvu,’ … mo tu, mi bin gat bigfala eksperiens long asosiesen ia, nao mi save givim talem samfala samting we bae oli helpem ol gel blong Saeon blong tekem step long impoten posisen ia, we i fulap wetem ol niu mo fulap moa responsabiliti. Sapos i gat eni gel mo mama long Isrel we i stap filim se hem i no inaf long ples we hem i stap long hem, nao bae hem i faenem se hem i gat moa paoa mo skil blong mekem gud; mo ol paoa mo skil ia, oli gat i stap wetem olgeta we oli bigwan.
Rilif Sosaeti, oli bin oganaesem long wan rum we i stap antap insaed long Red Brikis Stoa.
“Sapos kwestin i kam long maen, se, ?Wanem i stamba tingting blong Woman Rilif Sosaeti? Bae mi ansa—blong mekem gud—blong mekem se oli yusum evri paoa we yumi gat blong mekem gud, i no blong helpem ol puaman nomo, be tu, blong sevem ol sol. Fasin blong wok wan, bae i mekem bigbigfala samting i hapen we man i no save kaontem; bae i moa bitim ol gudfala paoa blong wanwan man o woman. …
“Taem bae oli helpem olgeta we oli pua, Woman Rilif Sosaeti i gat ol narafala diuti blong mekem bitim hemia blong helpem wanem we bodi i wantem. Fasin blong stap pua long tingting mo sik long hat, hemia tu i nidim man blong lukluk long hem; mo plante taem, wan kaen toktok—samfala toktok blong kaonsel, o iven wan wom gudfala sekhan bae i mekem moa gud, mo bae man i laekem moa bitim wan paos we i fulap long gol. …
“Taem we Ol Sent oli kam nara ples, oli strenja long evriwan, mo oli stap tu blong olgeta we oli wet blong stap giaman oli trikim olgeta, Rilif Sosaeti i mas kwik blong lukaotemgud olgeta, mo presentem olgeta long sosaeti, we bae i mekem olgeta oli kam gud moa, mo i leftemap olgeta, mo antap long evri samting, bae i mekem olgeta oli kam strong moa long fet blong olgeta long Gospel; mo taem oli mekem hemia, oli kam ol strong tul blong sevem plante.
“Bae i nidim fulap buk blong raetemdaon ol diuti, ol spesel janis, mo ol responsabiliti we oli kam insaed long ol responsabiliti ia blong Sosaeti. … Mekem wok (anda long daereksen blong bisop blong yu), wetem kwaet fasin, wetem ful tingting, wetem paoa, wetem yuniti, mo wetem prea, mo bae God i blesem ol hadwok blong yu wetem sakses.”4
Nauvu Tempol, i kam long George D. Durrant