“11–17 Oktoba. Doktrin mo Ol Kavenan 115–120: ‘From Sakrifaes blong Hem Bae I Moa Tabu long Mi Bitim Eni Gud Wok blong Hem,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“11–17 Oktoba. Doktrin mo Ol Kavenan 115–120” Kam Folem Mi—Blong Wanwan Man, Woman mo Famli: 2021
Fa Wes, i kam long Al Rounds
11–17 Oktoba
Doktrin mo Ol Kavenan 115–120
“From Sakrifaes blong Hem Bae I Moa Tabu long Mi Bitim Eni Gud Wok blong Hem”
God i wantem toktok wetem yu. Taem yu stap stadi long ol skripja, prea mo askem Hem ol kwestin we oli save helpem yu blong faenemaot ol mesej blong Hem we i kam long yu.
Raetemdaon Ol Filing mo Tingting blong Yu
I bin gat wan risen blong gat hop abaot niufala ples blong Ol Sent oli kam tugeta wanples, hemia long Fa Wes, Misuri, long Julae 1838. Taon i bin stap gro kwiktaem, mo i luk se graon i gudfala, mo revelesen i talem se i no longwe long Adam-ondi-Ahman, wan ples we i gat bigfala mining long saed blong spirit (luk long Doktrin mo Ol Kavenan 107:53–56; 116). Be stil, i mas had blong Ol Sent oli no tingting long wanem we oli bin lusum. Oli bin ronemaot olgeta long Indipendens, ples ia we oli jusum blong Saeon i stap long hem, mo ol janis blong gobak kwik, i jes nogat. Antap long hemia, Ol Sent oli mas ronwe long Ketlan, Ohaeo, mo oli lego naes tempol, afta tu yia nomo. Mo long tetaem ia, i no jes ol enemi aotsaed long Jos we oli stap mekem trabol—plante hae memba blong Jos oli tanem olgeta agensem Josef Smit; insaed long olgeta ia, i gat Olgeta Tri Witnes blong Buk blong Momon, mo fo memba blong Olgeta Twelef. Sam bae oli askem: ?Kingdom ia blong God i rili stap gro i go strong moa, o i stap go we i nomo strong?
Be yet, olgeta we oli bin fetful, oli no bin letem ol kaen kwestin olsem i kam stopem olgeta. Be, oli stat blong bildim wan niu tabu ples, long taem ia, we i stap lon Fas Wes. Oli bin mekem plan blong wan niu tempol. Lod i bin singaotem fo niu tempol, mo tu long olgeta i bin Jon Teila mo Wilfod Wudrof—we bae afta, oli bin kam ol Presiden blong Jos (luk long Doktrin mo Ol Kavenan 118:6). Ol Sent oli bin lanem se, blong mekem wok blong God, i no minim se yu neva foldaon; i minim se yu “girap bakegen.” I nomata we bae yu mas givap sam samting, olgeta sakrifaes ia bae God i tekem se bae oli tabu, iven “bae i moa tabu bitim eni gud wok” (Doktrin mo Ol Kavenan 117:13).
Luk long Saints, 1:296–99; “Far West and Adam-ondi-Ahman,” Revelations in Context, 235–41.
Sam Aedia blong Skripja Stadi blong Yuwan
Nem blong Jos, Lod nao i putum i stap.
Presiden Russell M. Nelson i talem se nem blong Jos, “i wan poen we i impoten tumas” (“Stret Nem blong Jos,” Liahona, Nov 2018, 87). Tingting abaot from wanem nao hemia i tru taem yu stap ridim Doktrin mo Ol Kavenan 115: 4–6. ?Wanem nao i joenem nem blong Jos wetem wok mo misin blong Jos?
Luk tu long 3 Nifae 27:1–11.
Saeon mo ol stek blong hem oli givim wan ples blong “haed long strong win.”
I nomata ol hadtaem we Ol Sent oli bin stap fesem long 1838, Lod i stil wantem luk se bae oli mekem plante samting. Insaed long Doktrin mo Ol Kavenan 115: 5-6, lukaotem ol toktok we oli tokbaot plante rol we Lod i wantem Jos blong Hem mo ol memba blong Hem oli mekem i kamtru long wol ia. Eksampol: ?Wanem nao yu filim se yu sapos blong mekem blong “girap mo saenaot”? (ves 5). ?Wanem strong win long saed blong spirit nao we yu stap luk raon long yu, mo olsem wanem nao yumi stap faenem “wan ples blong haed” tru long wok blong mekem man i kam tugeta? (ves 6).
Luk tu long 3 Nifae 18:24.
Long Lod, ol sakrifaes blong mi oli tabu.
Blong aot long Ketlan, maet i bin had long ol pipol olsem Niuwel K. Witni, we i bin stap gat wan gudfala laef wetem famli blong hem longwe. ?Wanem nao yu faenem insaed long Doktrin mo Ol Kavenan 117:1–11 we maet i bin helpem olgeta blong mekem sakrifaes ia? ?Olsem wanem ol ves ia oli jenisim wei we yu lukluk long wanem we i rili impoten?
Sakrifaes we Lod i bin askem Oliva Granja i bin defren: Lod i bin givim wok long hem blong stap long Ketlan mo stretem ol faenens blong Jos. Wok ia i bin hevi, mo taem hem i bin stap ripresentem Jos wetem tru mo strong fasin, long en, hem i no kasem fulap mane. Tingting se, ?olsem wanem nao ol toktok blong Lod insaed long ol ves 12–15 oli go tu wetem ol samting we Lod i bin askem yu blong mekem.
Luk tu long Matiu 6:25–33; Boyd K. Packer, “The Least of These,” Ensign o Liahona, Nov. 2004, 86–88; “Far West and Adam-ondi-Ahman,” Revelations in Context, 239–40.
Niuwel K. Witni i bin kasem komanmen ia blong muv i go long Adam-ondi-Ahman, olsem we i stap long pikja long ples ia.
Taem mi pem taeting, mi stap help blong bildimap mo “mekem graon blong Saeon i kam tabu.”
Ol instraksen insaed long ol seksen 119 mo 120 bae yu harem se i semmak long wei we oli yusum mane tedei, blong mekem wok blong Lod. Tedei, Ol Sent oli givim “wan aot long ten long evri samting we oli winim long wan yia” (Doktrin mo Ol Kavenan 119:4), mo ol mane ia, wan kaonsel i stap lukaotem; insaed long kaonsel ia i gat, Fas Presidensi, Kworom blong Olgeta Twelef Aposol, mo Prisaeding Bisoprik. Tingting long ol kwestin ia taem yu stadi long ol seksen ia:
-
?Olsem wanem nao, taem yumi stap folem loa blong taeting, hem i “mekem graon blong Saeon i kam tabu.” ?Olsem wanem loa ia i help blong mekem ples we yu stap laef long hem i kam wan “wan graon blong Saeon” long yu?Doktrin mo Ol Kavenan 119:6).
-
?Wanem i impoten tumas, long yu, abaot sentens ia “tru long voes blong mi i go long olgeta” insaed long Doktrin mo Ol Kavenan 120?
Luk tu long Malakae 3:8–12; David A. Bednar, “The Windows of Heaven,” Ensign o Liahona, Nov. 2013, 17–20; “The Tithing of My People,” Revelations in Context, 250–55.
Sam Aedia blong Famli Skripja Stadi mo Famli Haos Naet
-
Doktrin mo Ol Kavenan 115:4–6.?Yu ting se bae i wok long famli blong yu blong ridim olgeta ves ia taem yufala i stap lukluk san i girap? Bae i save helpem yu blong toktok raon long wanem nao i minim blong “girap mo saenaot” (ves 5). O, yufala i save toktok raon tu, se, ?i olsem wanem blong lukaotem wan ples blong stap long hem long taem blong strong win? ?Olsem wanem eksperiens ia i olsem blong faenem “wan sef ples” insaed long Jos? (ves 6). Afta, yufala i save tokbaot ol wei we famli blong yu i save helpem ol narawan blong stap glad long sef ples ia we Jos i givim.
-
Doktrin mo Ol Kavenan 117:1–11.Famli blong yu i save komperem wan “drop” wetem wan samting we i moa “hevi” (ves 8), olsem wan jag blong wota. Hemia i save lidim yufala blong toktok raon long wanem i no impoten tumas insaed long laef blong yumi, we i save stopem yumi blong kasem ol bigfala moa blesing we oli kam long God.
-
Doktrin mo Ol Kavenan 119.Tugeta, yufala i save singsing wan singsing olsem “I Want to Give the Lord My Tenth” (Children’s Songbook,150). ?Wanem nao singsing ia long seksen 119 we i save tijim yu abaot from wanem yumi stap pem taeting? Ol yangfala pikinini, bae oli lan moa aot long wan lesen we i yusum wan samting: yu save givim olgeta ol smol samting, helpem olgeta blong kaontem hamas hem i wan aot long ten, mo talem olgeta from wanem yu stap pem taeting. (Luk tu long Stap Tru long Fet, 217–18.)
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Want to Give the Lord My Tenth, Children’s Songbook,150.
Stap Kam Antap long Fasin blong Yumi blong Stap Tij
Leftemap tingting blong oli gat wan indipenden laef. “Taem ol memba blong famli oli gat kwestin, samtaem i moa gud blong tijim olgeta olsem wanem blong faenem ol ansa olgetawan, be i no blong ansarem kwestin stret wantaem (Teaching in the Savior’s Way,28).
Taem yumi givim 10 pesen long Lod olsem taeting, hemia i help blong mekem wok blong Hem blong sevem ol man i go moa.