Ol Windo blong Heven

I kam long Elda Deved A Bedna

Blong Kworom blong Ol Twelef Aposol

Ol blesing long saed blong spirit mo bodi oli kam long laef blong yumi taem yumi laef folem loa blong taeting.

Mi wantem blong eksplenem tu (2) impoten lesen mi bin lanem abaot loa blong taeting. Fas lesen i lukluk long ol blesing we i kam long ol wanwan man mo ol famle taem oli fetful blong obei long komanmen ia. Seken lesen i tokbaot moa olsem wanem loa blong taeting i impoten blong mekem Jos blong Jisas Kraes blong Ol Lata-Dei Sent i gro raon long wol. Mi prea se bae Tabu Spirit bae i konfemem trutok blong ol prinsipol mi tokbaot.

Lesen Namba 1—Ol Bigfala Blesing we Yumi No Luksave

Mama blong Sista Bedna i wan fetful woman mo wan hom-meka we i gat insperesen. Long taem we hemi jes mared nomo, hemi kipim gud ol rekod blong mane long haos. Blong plante yia hem i yusum simpol buk blong akaonting nomo blong kipim rekod blong mane blong famle we oli kasem mo hemia we oli spenem. Infomesen we hem i kolektem blong plante yia hem i fulap mo i help bigwan.

Taem Sista Bedna i wan yang woman, mama blong hem i yusum infomesen long buk blong akaon ia blong tokbaot ol besik prinsipol blong sevem mane mo manejem gud hom. Wan dei oli stap lukluk long rekod blong ol mane we oli spenem, mama blong hem i luksave wan fasin we oli bin spendem mane long hem. Mane we oli spendem long dokta mo meresin i smol bitim wanem oli tingting long hem. Hem i save se wanem we hem i faenem i go wetem gospel blong Jisas Kraes mo i eksplenem long gel blong hem wan trutok we i gat paoa: taem yumi laef folem loa blong taeting, oltaem yumi kasem ol bigfala blesing be yumi no luksave from oli no wanem we yumi stap tinting long hem mo i isi tumas blong no luksave. Famle i no bin kasem wan bigfala mane we bae oli luk se i moa long wanem oli stap kasem long hom. Be, Papa long Heven we i gat lav i bin sendem ol blesing we i simpol long ol simpol wei. Sista Bedna i tingbaot oltaem impoten lesen ia we i kam long mama blong hem abaot help we i kam long yumi tru long windo blong heven, olsem we Malakae i bin promesem long OlTesteman (luk long Malachi 3:10).

Oltaem taem yumi tij mo testifae abaot loa blong taeting, yumi tokbaot moa ol blesing we yumi kasem naoia, mo yumi luksave naoia. Mo i tru, ol blesing ia oli hapen. Yet sam long ol defren blesing we yumi kasem taem yumi obei long komanmen ia, oli bigwan be yumi no luksave. Ol blesing olsem, yumi save luksave nomo sapos yumi luksave mo lukgud samting long saed blong spirit (luk long Fas Korin 2:14).

Pikja blong ol “windo” blong heven we Malakae i bin yusum i gat bigfala mining. Ol windo oli letem laet i go insaed long wan bilding. Long sem fasin, laet mo saen blong spirit oli kapsaetem long heven i kam daon tru long ol windo blong heven, mo i kam insaed long laef blong yumi taem yumi respektem loa blong taeting.

Eksampol, wan blesing we yumi no luksave be i bigwan, i wan presen blong spirit, we i fasin blong talem tangkyu we i mekem yumi save harem glad long wanem we yumi gat mo i stopem wanem we yumi wantem. Wan man blong talem tangkyu i rij long fasin blong stap glad. Wan man we i no stap talem tangkyu, i safa from i no gat fasin blong stap glad i stap long hem (luk long Luk 12:15).

Ating bae yumi nidim mo prea from help blong faenem wok we i stret long yumi. Be i nid blong gat ol ae mo sora blong fet (luk long Ita 12:19) blong luksave presen blong spirit blong luksave samting, we i givim moa paoa long yumi blong faenem ol janis blong wok we plante nara pipol oli no luksave—o blong kasem blesing blong wan moa strong tingting blong lukaotem strong moa mo longtaem moa, wan wok, bitim we ol nara pipol oli save o wantem mekem. Maet yumi wantem mo ting blong kasem wan wok we, be blesing we i kam long yumi tru long ol windo blong heven i blong gat moa paoa blong tekem aksen mo jenisim laef stael blong yumi, be i no blong ting se laef stael blong yumi bae i jenis tru long wan nara man o samting.

Ating i stret blong yumi wantem mo wok blong kasem salari we i go antap long wok blong yumi, blong provaedem ol samting we yumi nidim long laef. Be i nid blong gat ol ae mo sora blong fet, blong luksave long yumiwan, wan paoa blong spirit mo bodi (luk long Luk 2:52) blong save mekem moa wetem smol mane we yumi kasem, wan bigfala paoa blong putum ol samting long oda mo mekem samting simpol, mo wan moa paoa blong tekem gud kea long ol samting we yumi gat finis i stap. Maet yumi wantem mo ting blong gat moa mane, be blesing we i kam long yumi tru long ol windo blong heven bae i bigfala paoa moa blong jenisim laef stael blong yumi be i no blong ting se laef stael blong yum bae i jenis tru long wan nara man o samting.

Ol yang strong soldia long Buk blong Momon (luk long Alma 53; 56–58) oli bin prea wetem tru hat se bae God i givim paoa long olgeta mo i mekem olgeta oli fri aot long han blong enemi blong olgeta. Ansa long ol prea ia i no givim wan ekstra tul blong faet o wan bigfala namba blong ol soldia. Nomata long hemia, God i givim long olgeta fetful soldia ia stret save se bae i mekem olgeta oli go fri, pis long sol blong olgeta, mo bigfala fet mo hop long Hem from fridom blong olgeta (luk long Alma 58:11). Olsem ia nao, ol boe blong Hileman oli gat paoa long tingting, oli tingting strong blong win, mo oli go fored wetem ful paoa blong olgeta agensem ol man blong Leman (luk long Alma 58:12–13). Stret save, pis, fet, mo hop i no luk olsem ol blesing we ol yang soldia ia oli wantem, be oli ol stret blesing we ol strong yangfala man ia oli nidim blong go fored mo win long saed bodi mo spirit.

Samtaem yumi askem God blong gat sakses, mo Hem i givim long yumi paoa long saed blong bodi mo spirit. Maet yumi askem strong blong kam rij, mo yumi kam blong luksave samting mo yumi kam antap long fasin blong gat longfala tingting, o yumi askem blong gro long saed blong spirit mo i blesem yumi wetem presen we i gladhat. Hem i save putum long yumi stret save mo biliv long yumiwan taem yumi traehad blong fufilim ol gol we oli gud. Mo taem yumi askem blong yumi kamaot long ol hadtaem long saed blong bodi, tingting, mo long spirit, Hem bae i leftemap yumi blong gat strong tingting mo stanap strong kasem en.

Mi promes se taem yu mo mi i holem gud loa blong taeting, i tru, bae ol windo blong heven oli open mo ol blesing long saed blong spirit mo bodi bae oli kam daon long wei we bae i plante we i plante (luk long Malakae 3:10). Bae yumi tingbaot tu toktok blong Lod:

“Hae God i talem se, Tingting blong mi i no olsem tingting blong yufala, mo fasin blong mi i no olsem fasin blong yufala.

“Skae i antap we i antap, i antap olgeta long graon, mo long sem fasin tingting blong mi i hae we i hae, i antap olgeta long tingting blong yufala, mo fasin blong mi i antap olgeta long fasin blong yufala” (Aesea 55:8–9).

Mi testifae se taem yu lisin gud mo luklukgud long saed blong spirit, bae yumi gat blesing blong gat ol ae we oli save luk klia moa, ol sora we oli harem oltaem, mo ol hat we oli save andastanem moa fulwan ol wei blong Hem we oli bigwan mo yumi no save luksave, ol tingting blong Hem, mo ol blesing blong Hem long laef blong yumi.

Lesen #2---Simpol wei blong Lod

Bifo oli singaotem mi blong kam olsem wan memba blong Kworom blong Olgeta Twelef, mi bin rid plante taem long Doktrin mo Ol Kavenan abaot kaonsel we oli jusumaot olgeta blong lukaotem mo seremaot ol tabu mane blong taeting. Kaonsel we oli putum blong lukaotem ol mane blong taeting i kam tru long revelesen mo i gat insaed long hem Fas Presidensi, Kworom blong Olgeta Twelef Aposol, mo Prisaeding Bisoprik (luk long D&C 120). Taem mi stap rere long Disemba 2004 blong atendem fas miting blong kaonsel ia, mi stap lukluk fored wetem glad blong save gat wan bigfala janis ia blong lanem samting.

Mi stap tingbaot yet ol samting we mi bin eksperiensem mo filim long kaonsel ia. Mi bin kasem wan bigfala glad blong save mo respek blong ol loa blong Lod long saed blong mane blong wanwan man, blong ol famle, mo blong Jos blong Hem. Stamba program long saed blong mane blong Jos blong Jisas Kraes blong Ol Lata-Dei Sent---blong tugeta mane we i kam mo i go---oli eksplenem long seksen 119 mo 120 blong Doktrin mo Ol Kavenan. Tu(2) toktok i stap insaed long ol revelesen ia i givim fandesen long saed blong mane blong Jos.

Long seksen 119, Lod i talem long wan simpol wei nomo se evri memba bae i pem wan aot long ten blong evri mane we oli kasem blong wan ful yia. Hemia bae i stanap olsem wan loa long olgeta blong oltaem (ves 4).

Afta, folem raet blong spendem mane blong taeting, Lod i talem se oli mas givimaot tru long kaonsel we i gat Fas Presidensi blong Jos blong Hem, mo bisop mo kaonsel blong hem, mo tru long hae kaonsel blong Hem, mo tru long voes blong Hem i go long olgeta (luk long D&C 120:1). Bisop mo kaonsel blong hem mo hae kaonsel blong Hem we oli stap tokbaot long revelesen ia oli save olgeta tedei olsem Prisaeding Bisoprik mo Kworom blong Olgeta Twelef Aposol. Ol tabu mane ia, oli yusum olgeta long wan Jos we i gro kwik blong blesem ol wanwan man mo ol famle long saed blong spirit, blong bildim mo mentenem ol tempol mo ol haos blong wosip, sapotem misinari wok, transletem mo pablisim ol skripja, helpem wok blong famle histri, promotem stadi blong famle histri, sapotem ol skul mo edukesen blong relijin, mo fufilim ol nara stamba tingting blong Jos olsem we Lod i daerektem ol wokman blong Hem we Hem i bin odenem olgeta.

Mi sapraes tumas blong luk hao klia mo sot tufala revelesen ia komperem wetem ol bigfala gaedlaen blong faenens mo administresen wok we oli stap yusum long plante oganaesesen mo gavman raon long wol. ?Olsem wanem ol wok blong wan oganaesesen we i bigwan olsem Jos blong Jisas Kraes we i bin kambak i save wok raon long wol tru long sot instraksen ia nomo? Long mi ansa i stret gud nomo: Hemia i wok blong Lod, hem i save mekem wok blong Hemwan (luk long 2 Nifae 27:20), mo Sevya i lidim ol wokman blong Hem taem oli folem ol daereksen mo wok folem wei blong Hem.

Long fas miting ia mi sapraes tumas long simpol prinsipol ia we i lidim ol tingting mo desisen blong mifala. Long wok blong yusum mane insaed long Jos, oli yusum tu stamba prinsipol we i stap evri taem. Faswan, Jos i laef folem nomo wanem hem i gat mo i no spendem bitim wanem hem i kasem. Nambatu, wan pat blong mane we i stap kam long evri yia oli putum long saed i stap blong taem blong imejensi mo taem blong ol nid. Blong plante yia, Jos i bin tijim ol memba blong hem prinsipol blong putum long saed ekstra kaekae, masut, mo mane blong lukluk long taem we imejensi i tekem ples. Jos, olsem wan oganaesesen i folem ol prinsipol we oli oltaem tijim long ol memba.

Taem miting i stap gohed, mi stap tingting se evri memba sapos oli luk olsem wanem i simpol, i klia, i gat oda, i gat jareti, mo paoa blong Lod mo wei blong Hemwan (luk long D&C 104:16) i stap lidim ol wok blong Jos blong Hem. Naoia mi stap tekem pat long Kaonsel blong Serem ol Mane blong Taeting blong plante yia. Bigfala tangkyu mo respek blong mi long paten blong Lod i gro long evri yia, mo ol lesen we mi lanem oli gat moa dip mining.

Hat blong mi i fulap wetem lav mo naes filing blong ol fetful memba blong Jos ia we oli stap obei we oli kam long evri nesen, famle, lanwis, mo pipol. Taem mi stap travel long wol, mi lanem abaot ol hop mo ol drim blong yufala, ol defren kaen wei we yufala i laef long hem, mo ol hadwok blong yufala. Mi bin atendem ol Jos miting wetem yufala mo visitim sam long ol hom blong yufala. Fet blong yufala i mekem fet blong mi i strong. Komitmen blong yufala i mekem mi komitim mi moa. Mo gud blong yufala mo hat blong yufala blong obei loa blong taeting i givim inspiresen long mi blong kam wan gudfala man, hasban, papa, mo lida blong Jos. Mi tingbaot yufala evri taem mi tekem pat long Kaonsel blong Serem Mane blong Taeting. Tangkyu tumas long ol gud fasin blong yufala mo blong stap fetful taem yufala i stap ona long ol kavenan blong yufala.

Ol lida blong Jos we i bin kambak blong Lod oli filim wan bigfala responsabiliti blong lukaotem gud ol tabu ofring blong ol memba blong Jos. Mifala i save gud long tabu fasin blong kleksen blong wido.

“Nao Jisas i stap sidaon long yad blong haos blong God, klosap long ples ya we oli stap sakem kleksen long hem, hem i stap lukluk ol man we oli stap sakem kleksen blong olgeta. Mo i gat plante rijman we oli stap sakem plante mane.

“Nao wan wido woman i kam we hemi pua tumas, mo hemi sakem tu smol mane we i olsem twanti Vatu nomo.

Nao Jisas i singaot ol man blong Hem oli kam long Hem, mo i talem long olgeta se, “Tru mi talem long yufala. Kleksen we wido ya i sakem i moa long ol mane we ol narafala man ya oli sakem.

Ol man ya, taem oli sakem kleksen blong olgeta, oli stap sakem haf mane blong olgeta we i stap nating nomo. Be woman ya we i pua, hem i sakem olgeta mane we hem i gat, we i blong pem kakae blong hem long hem.” (Mak 12:41–44).

Mi save aot long eksperiens se Kaonsel blong Serem Mane blong Taeting i strik blong lukaot gud long kleksen blong wido. Mi talem bigfala tangkyu long Presiden Tomas S. Monson mo ol kaonsela blong hem long gudfala lidasip blong olgeta blong lukaot gud long bigfala wok ia. Mo mi luksave voes (luk long D&C 120:1) mo han blong Lod we i sastenem ol wokman blong hem we oli odenem olgeta blong fufilim ol diuti blong ripresentem Hem.

Wan Invitesen mo wan Testemoni

Blong pem wan ones taeting i moa long wan diuti, hem i wan impoten step long wok blong kam tabu yuwan. Long olgeta we oli pem taeting blong olgeta, mi salut long yufala.

Long yufala we i no stap obei long loa blong taeting naoia, mi invaetem yu blong tingting long ol rod blong yufala mo sakem sin. Mi testifae se tru long fasin blong obei blong yufala long loa ia blong Lod, ol windo bae oli open long yu. Plis no pusumbak dei blong yu blong sakem sin.

Mi testifae, ol blesing long saed blong spirit mo bodi oli kam long laef blong yumi taem yumi laef folem loa blong taeting. Mi talem witnes se ol blesing ia oltaem oli bigwan mo yumi no save luksave. Mi talemaot tu se wei blong Lod we i simpol nomo i klia i stap long ol wok blong Jos blong Hem i provaedem paten we i save lidim yumi olsem wanwan man mo famle. Mi prea se wanwan long yumi i save lan mo lanem samting long ol impoten lesen ia, long tabu nem blong Lod Jisas Kraes, amen.