Ol Tru Man blong Lukaot long Sipsip
I Kam long Presiden Tomas S. Monson
Hom tijing i ansarem plante prea mo i letem yumi luk ol jenis we i save tekem ples long laef blong ol pipol.
Tedei long aftenun, long Konfrens Senta long Sol Lek Siti mo long ol ples kolosap mo longwe, i gat ol man oli kam tugeta, we oli kasem prishud blong God. I tru, yufala i “tabu prishud”—wan jeneresen we oli jusum, olsem we Aposol Pita i talem.1 Mi gat ona blong gat janis ia blong toktok long yufala.
Taem mi stap groap, evri sama, famle blong mifala bae i draev i go long Provo Kenion, samples 72 kilometa Saot mo i go Is smol long Sol Lek Siti; bae mifala i stap long famle wudhaos blong sam wik. Mifala ol boe, i hariap blong go huk long wota, o blong swim long hol, mo bae mifala i traem mekem trak i ron spid smol. Long tetaem ia, trak we papa blong mi i stap draevem i wan 1928 Oldsmobil. Sapos hem i go ova long 56 kilometa long aoa, mama bae i talem “!Slo daon, slo daon!” bae mi talem “!Purumbut daon long spid Papa! !Purumbut daon!”
Papa bae i draev samples 56 kilometa long aoa i go kasem Provo Kenion, o kasem taem we bae mifala i kasem wan kona mo rod blong mifala i stop smol from wan grup blong sipsip. Bae mifala i lukluk ol handred sipsip ia oli wokbaot go pas, i no gat man i lukaot long olgeta, be wetem sam dog oli singaot blong oli muv i go. Long biaen we biaen, bae mifala i luk man blong lukaot long sipsip long hos blong hem—mo i no gat aean mo rop long maot blong hos. Samtaem man ia i silip long hos blong hem, from se hos i no save weaples blong go, mo singaot blong dog nao i mekem wok.
I defren long wanem mi bin luk long Munik, Jemani, sam yia i pas. Hem i long wan Sandei moning, we mifala i stap ron i go long wan misinari konfrens. Taem mi stap luk aotsaed long windo blong trak blong misin presiden, mi luk wan man blong lukaot long sipsip wetem stik long han, hem i stap lidimol sipsip. Oli stap folem hem long weaples hem i go. Sapos hem i muv lef, oli go lef. Sapos hem i muv raet, oli folem hem i go long saed ia. Mi komperem bitwin tru man we i lidim ol sipsip blong hem, mo man blong lukaot long sipsip we i stap wanwan taem biaen long ol sipsip blong hem.
Jisas i talem: “Mi nao, gudfala man ya blong lukaot long sipsip. Olsem we Papa blong mi i save mi, mo mi mi save hem, oraet long sem fasin, mi mi save ol sipsip blong mi.”2Hem i givim eksampol we i stret gud long wanem nao i wan tru man blong lukaot long sipsip.
Ol brata. Olsem prishud blong God, yumi gat responsabiliti blong lukaot long sipsip. Waes tingting blong Lod i givim ol gaedlaen we yumi save lukaot long ol famle blong Jos, weaples blong givim seves, blong tij, mo testifae long olgeta. Oli singaotem hemia hom tijing, mo abaot hemia nao bae mi toktok long yufala tedei.
Bisop blong wanwan wod long Jos i lukluk long wok blong putum ol prishud olsem hom tija blong visitim ol hom blong ol memba evri manis. Oli go tutu. Taem i posibol, wan yang man we i wan pris, o wan tija long Aronik Prishud i go wetem wan adalt we i gat Melkesedek Prishud. Taem tufala i go long ol hom blong olgeta we oli responsibol long olgeta, hem we i kasem Aronik Prishud i mas tekempat long tijing we i tekemples. Wok olsem bae i mekem ol yang man ia oli rere blong go long misin, mo tu, blong gat wan laeftaem prishud seves.
Program blong hom tijing, i ansa long revelesen blong tedei, we i givim wok long olgeta we oli odenem olgeta long prishud blong “tij, eksplenem, askem mo baptaesem …mo visitim haos blong wanwan memba, mo askem olgeta blong prea long laod voes, mo tu, long sikret, mo mekem ol famle diuti blong olgeta, …blong lukaot long jos oltaem, mo stap wetem olgeta mo mekem olgeta i kam strong moa; mo luk se i no gat rabis fasin insaed long jos, mo i no gat strong fasin wetem wanwan long olgeta, i no gat giaman, i no gat fasin blong tok biaen long bak, i no gat fasin blong tokbaot nogud ol man.3
Presiden Deved O. MaKei i askem strong: “Hom tijing i wan long ol taem we i moa ejen mo i gat moa blesing blong fidim mo givim insperesen, blong givim advaes mo lidim ol pikinini blong Papa. … Hem i wan tabu seves, wan tabu koling. Hem i diuti blong yumi olsem ol Hom Tija blong tekem spirit i go long evri hom mo evri hat. Blong lavem wok ia mo mekem bes blong yumi, bae i tekem bigfala pis, glad, mo stret tingting long wan [gud] mo strong [tija] blong ol pikinini blong God.”4
Long Buk blong Momon, yumi ridim se Alma “i bin konsekretem evri pris blong olgeta mo evri tija blong olgeta; mo oli no konsekretem wan long olgeta hemia nomo sapos oli no ol stret man.
“Taswe oli bin lukaotem ol pipol, mo oli bin fidim olgeta wetem ol samting we i stret.”5
Taem yumi stap wokem ol hom tijing responsabiliti blong yumi, bae yumi waes sapos yumi lanem mo andastanem ol jalenj blong ol memba blong wanwan famle, blong mekem se bae yumi wok gud blong tij mo blong givhan.
Wan hom tijing visit, bae i gat moa sakses sapos oli mekem apoenmen fastaem. Blong givim eksampol long poen ia, bae mi serem wetem yufala, wan eksperiens we mi gat sam yia i pas. Long tetaem ia, Misinari Eksekutiv Komiti, i gat Spensa W. Kimbol, Godon B. Hinkli mo Tomas S. Monson. Wan naet, Brata mo Sista Hinkli i mekem wan kakae long hom blong tufala blong ol memba blong komiti mo waef blong olgeta. Mifala i jes finis naesfala kakae taem wan i noknok long doa. Presiden Hinkli i openem doa, mo faenem wan long tufala hom tija i stanap. Hom tija i se: “Mi save se mi no mekem wan apoenmen blong kam, mo mi no gat kompanion wetem mi, be mi filim se mi mas kam tedei long naet. Mi no save se bae yu gat man long haos.”
Presiden Hinkli i invaetem hom tija blong kam insaed mo sidaon, mo tijim ol trifala Aposol mo waef blong mifala abaot ol diuti blong yumi olsem ol memba. Tija i sem smol, be hem i mekem bes blong hem. Presiden Hinkli i talem tangkyu long hem blong kam, mo afta tija ia i hariap i go aot.
Mi tokbaot wan moa eksampol blong rong fasin blong mekem hom tijing. Presiden Marion G. Romni, we i wan kaonsela long Fas Presidensi sam yia i pas, i stap tokbaot hom tija blong hem we, wan taem i go long Romni hom long wan kolkol naet long winta. Hem i holem hat blong hem long han blong hem, mo i stap tantanem hem taem oli askem hem blong sidaon mo givim mesej blong hem. Hem i stanap nomo, mo talem: “Oke, bae mi talem long yu Brata Romni. I kolkol aotsaed, mo mi livim enjin blong trak i ron blong mekem se i no stop. Mi kam pas nomo blong save talem long bisop se mi mekem ol visit blong mi.”6
Presiden Esra Taf Benson, afta we hem i tokbaot eksperiens ia blong Presiden Romni long wan miting blong ol prishud, i talem: “!Yumi save mekem i gud moa bitim hemia ol brata—moa gud moa!”7 Mi agri.
Hom tijing i moa bitim wan nomol visit wan taem long wan manis. I responsabiliti blong yumi blong tij, givim insperesen, pusum, mo taem yumi visitim olgeta we oli no aktiv, blong mekem oli kambak long jos, mo mekem ol boe mo gel blong God oli kam olsem wan god.
Blong helpem ol wok blong yumi, mi serem waes kaonsel ia we hem i blong ol hom tija tu. Hem i kam long Ebraham Linkon we i talem: “Sapos yu wantem winim man i folem yu, faswan, winim tingting blong hem se yu, yu wan tru fren blong hem.”8Presiden Esra Taf Benson i talem: “Antap long evri samting, stap wan tru fren long man, woman, mo famle we yu stap tijim.” “Wan fren i mekem moa bitim wan diuti visit evri manis. Wan fren i wari moa blong helpem ol pipol bitim blong oli talem gud nem blong hem. Wan fren i kea. Wan fren i soem lav. Wan fren i lisin. Mo wan fren i kam luk yu.”9
Hom tijing i ansarem plante prea mo i letem yumi luk ol jenis we i save tekem ples long laef blong ol pipol.
Wan eksampol i hemia blong Dik Hama, we i kam long Yuta wetem Gavman Graon Grup long taem blong Mane Hadtaem blong Amerika. Hem i mitim mo maredem wan Lata-dei Sent yang woman. Hem i openem Dik Kafe long Sent Joj, Yuta we i kam wan popula ples blong mit.
Man we i kasem wok olsem hom tija long Hama Famle, i Wilad Milni, wan fren blong mi. From se mi save Dik Hama tu from mi stap printim lis blong kakae blong kafe blong hem, bae mi askem fren blong mi, Brata Milni, taem mi stap visitim Sent Joj: “?Olsem wanem long fren blong yumitu, Dik Hama?”
Ansa bae i: “Hem i stap kam, be sloslo.”
Taem Wilad Milni mo kompanion blong hem i stap visitim Hama hom evri manis, oltaem oli save presentem wan mesej blong gospel, mo serem testemoni blong tufala wetem Dik mo famle.
Oli yia oli pas i go, mo wan dei, Wilad i ringim mi wetem gud nius: “Brata Monson,” hem i stat, “Dik Hama i jenisim laef blong hem mo bae hem i baptaes. Hem i gat 90 yia, mo mitufala i fren ful adalt laef blong mitufala. Desisen blong hem i mekem hat blong mi i glad. Mi bin hom tija blong hem blong plante yia.” I gat spesel tiun long voes blong Wilad taem hem i stap talem gud mesej blong hem.
Brata Hama i bin kasem baptaes, mo wan yia afta, i go long naes Sent Joj Tempol, mo i kasem endaomen blong hem mo ol siling blesing.
Mi askem Wilad: “?Yu eva kam blong slakem tingting blong yu olsem hom tija blong hem blong longfala taem?”
Hem i ansa: “No. I inaf long evri hadwok. Taem mi witnesem glad we i kam long ol memba blong Hama famle, hat blong mi i fulap long tangkyu from ol blesing we gospel i tekem i go long laef blong olgeta, mo from janis ia we mi bin gat blong help long sam wei. Mi wan hapi man.”
Ol brata. Bae i spesel janis blong yumi truaot long ol yia blong visitim mo tijim plante pipol—olgeta we oli no aktiv, mo tu, olgeta we oli putum ful tingting. Sapos yumi gat tingting long ol koling blong yumi, bae yumi gat plante janis blong blesem ol laef. Visit blong yumi long olgeta we oli go longwe long Jos, i save kam ki we bae i openem doa blong oli kambak.
Wetem tingting ia long maen, yumi mas go aot long olgeta we yumi responsibol long olgeta, mo tekem olgeta i kam long tebol blong Lod, blong kakae long toktok blong Hem, mo stap glad long Spirit blong Hem olsem kompanion, mo “nomo stap ol strenja mo ol fren wetem olgeta Sent, mo wetem haos blong God.”10
Sapos eniwan long yufala i no kea long hom tijing visit blong yufala, mi talem se i no gat taem olsem tedei blong dediketem bakegen yufala blong mekem ol hom tijing diuti blong yufala. Disaed naoia blong mekem wanem wok moa we i nid blong kasem olgeta we oli putum long han blong yu. I gat ol taem we i nidim blong leftemap tingting, be tu, blong helpem hom tijing kompanion blong yu blong faenem taem blong go wetem yu; be sapos yu gohed, bae yu win.
Ol brata. Ol hadwok blong yumi long hom tijing i stap gogohed nomo. Wok ia bae i no save finis kasem taem Lod mo Masta blong yumi bae i talem: “I inaf.” I gat ol laef blong seksekem. I gat hat blong tajem. I gat sol blong sevem. Janis blong yumi, i speselwan ia blong leftemap, tajem mo sevem olgeta impoten sol we oli trastem yumi wetem. Yumi mas fetful blong mekem hemia, mo mekem wetem hat we i fulap long glad.
Blong endem toktok blong mi, mi tanem mi long wan spesel eksampol blong tokbaot kaen hom tija we yumi mas stap. I gat wan Tija we laef blong Hem i kavremap evri nara laef. Hem i tijim laef mo ded, diuti mo fiuja. Hem i bin laef, i no blong oli wok blong Hem, be blong Hem i wok blong man; i no blong i kasem samting be blong givim; i blong sevem laef blong Hem, be blong sakrifaesem laef blong Hem from ol narawan. Hem i tokbaot wan lav we i naes moa bitim rabis tingting, wan pua laef we i moa rij bitim ol rij samting. Oli talem abaot Tija ia, se Hem i tij wetem atoriti mo i no olsem ol man blong loa.11 Ol loa blong Hem, oli no raetem long ston, be long hat blong man.
Mi tokbaot Masta Tija, we i Jisas Kraes, Pikinini blong God, Sevya mo Ridima blong evri man. Baebol i talem abaot Hem se Hem i go mekem gud.”12 Wetem Hem olsem gaed mo eksampol blong yumi, bae yumi kwalifae blong kasem tabu help blong Hem long hom tijing blong yumi. Ol laef bae i kasem blesing. Ol hat bae oli harem gud. Ol sol, bae Hem i sevem. Bae yumi kam ol tru man blong lukaot long sipsip. Blong bae i hapen olsem, mi prea, long nem blong Jisas Kraes, amen.