Ol Doktrin mo Prinsipol We I Stap Insaed long Ol Toktok blong Bilif
I kam long Elda L. Tom Peri
Blong Kworom blong Olgeta Aposol
Wanwan toktok blong bilif i putum wan moa spesel valiu antap long andastading blong yumi long gospel blong Jisas Kras.
Taem mi bin kasem wok ia blong toktok long prishud sesen blong jeneral konfrens, semtaem mi tingbaot wan gudfala Praemeri tija. Bigfala tingting blong hat blong hem i blong rere long mifala blong stap klin inaf blong kasem prishud. Hem i bin givim wan had tes blong save graduet long Praemeri—stap lanem baehat ol nem blong ol memba blong Kworom blong Olgeta Twelef Aposol mo ol Toktok blong Bilif. Hem i bin mekem wan promes tu—sapos evriwan i save talemaot gud ol Toktok blong Bilif baehat, mifala i save jusum wan ples mo go aot olsem las klas blong mifala.
Mifala i disaed long wan spesel ples we mifala i laekem blong klaem i go antap long ol ston long hil antap long fas haedro taem oli go insaed long Logan Kenion. I gat wan smol flat ples long ples blong sap ston ia, we i gat wan ples blong mekem faea we yu save kukum hotdog mo rusum ol masmalo long hem. Taem mifala i jusum ples ia, mifala i no tingting long tija blong mifala, we i moa olfala long mifala, mo i tru i, hem i no save wokbaot strong. Sapos mifala i tingting gud, bae i luk se bae i had blong wokbaot ia. Be promes blong hem i mas kipim, mo hem i bin kam wetem strong tingting.
Faswan mifala i klaem i go antap long hil. Long taem blong mifala i no bin gat ol lektrik rop blong stopem mifala blong klaem. Wetem sam help, tija i bin kasem hil. Taem mifala i kasem hil, mifala i go daon bakegen longwan ples blong ston we oli singaotem “Totel Bei.”
Afta we mifala i kasem, i bin tekem tija blong mifala wan smol taem blong pulum win blong hem. Taem we mifala i rere blong sidaon mo kakae, hem i karembak paoa blong tijim mifala long las lesen. Hem i bin talem long mifala hamas hem i glad blong tijim mifala long Praemeri long tu yia i pas. Hem i glad long olsem wanem mifala i save baehat ol Toktok blong Bilif. Hem i save talem wan eni namba long ol Bilif, mo mifala i save kwotem stret i go long hem. Mo hem i talem long mifala, se blong save baehat wan Toktok blong Bilif bae i no minim wan samting bitim we blong save plante toktok insaed, hemia nomo sapos yumi andastanem ol doktrin mo prinsipol we i stap insaed long olgeta. Hem i leftemap tingting blong mifala blong stadi gospel doktrin we i stap long wanwan Toktok blong Bilif. Hem i bin eksplenem se doktrin we i stap long ol Toktok blong Bilif i seperet long ol seksen:
I. Godhed mo Stamba Doktrin blong Kraes
Yumi lanem long fas Toktok blong Bilif se i gat tri man insaed Godhed: God Papa, Jisas we i Kraes, mo Tabu Spirit.
Nambatu Toktok blong Bilif i tijim yumi se yumi responsibol long ol aksen blong yumiwan long wol ia.
Nambatri i givim wan visen long misin blong Sevya from fasin blong sevem ol pikinini blong Papa long Heven.
Nambafo i tijim olsem wanem ol fas prinsipol mo odinens i impoten.
Paoa blong ol toktok blong tija blong mifala i bin wan sos blong insperesen long mi from ol impoten samting we i hem i putum long gospel stadi. Skripja i lidim yumi i go long wan standet blong trutok we i save jajem save blong yumi we yumi stap kasem, sapos i tru o i rong. Tru doktrin i kam long God, sos mo stamba blong evri trutok. Ol tijing mo tingting blong tru doktrin i stap long gospel blong Lod mo Sevya blong yumi. Ol Fols tijing i kam long Setan, papa blong ol giaman. Disaea blong hem i blong spolem, jenisim, mo tanem ol trutok we i kam. Hem i wantem blong giaman long yumi, mekem se sam long yumi bae i lusum rod i gobak long hom blong yumi long heven.
Ol skripja i tijim yumi olsem wanem blong stap longwe long ol giaman tijing. Eksampol, long leta blong Pol i go long Timoti yumi ridim:
“Ol tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin.
Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok. (Seken Timoti 3:16–17).
Doktrin ia (we Pol i tokbaot) hem i impoten semmak long Jos olsem wan batri long wan mobael fon. Taem yu karemaot batri long mobael fon, i nomo yus. Wan jos we i nomo tijim tru doktrin i semmak nomo i no yus. I no save lidim yumi gobak long Papa long Heven mo long hom we i no save finis.
II. Oganaesesen mo Oda blong Prishud
Afta we yumi statem blong andastanem besik doktrin blong Kraes, nambafaef mo sikis long ol tok blong bilif i tijim yumi abaot oganaesesen mo oda blong prishud. Anda long daereksen blong Lod, Josef Smit i bin yusum prishud atoriti blong oganaesem Jos blong Sevya—paoa blong God. Jos blong Jisas Kraes blong Ol Lata-dei Sent i semmak oganaesesen we Kraes i bin oganaesem mo lidim taem Hem i bin stap long wol.
Hem i bin wan dei blong glori blong Josef Smit mo Oliva Kowdri long Mei 1829 taem oli bin go long ol wud blong prea abaot doktrin blong baptaes blong sakemaot sin we oli bin ridim taem tufala i stap transletem Buk blong Momon. I bin gat plante tijing abaot baptaes long ol defren jos long eli 1800, mo Josef mo Oliva i bin save se oli no tru evriwan. Oli bin wantem save abaot stret fasin blong baptaes, mo tu, huia i gat atoriti blong baptaes.
Long ansa blong krae blong tufala i go long Lod, wan mesenja long heven, Jon Baptaes, i bin kamaot long tufala. Hem i putum han long hed blong tufala wan afta narawan mo givim long tufala paoa blong baptaes, mo stap talem long tufala se long tufala wokman blong hem, long nem blong Mesaea, hem i givim Prishud blong Eron (luk long D&C 13:1).
!Hem i wan gudfala dei long histri blong wol! Prishud i bin kambak long wol ia.
Taem yumi kasem prishud, yumi kasem atoriti blong mekem wok long nem blong God mo lid long ol wei blong trutok mo stret mo gud fasin. Atoriti ia i wan sos blong paoa blong stret mo gud fasin we i impoten tumas, mo i yus long gud blong ol pikinini blong God long wol mo bae i gohed iven afta laef ia. I nidim blong prishud i kambak bifo tru Jos blong Jisas Kraes i oganaes. Hemia i stamba lesen long nambafaef mo sikis long ol tok blong bilif.
III. Ol Tul we i no save finis long wokbaot blong laef ia
Ol nekis tri long ol toktok blong bilif—seven, eit, mo naen—i soem ol tul we i nidim i stap blong tijim yumi long wokbaot blong yumi long laef ia. Yumi kasem ol presen blong spirit blong lidim yumi taem yumi folem ol tijing blong Lod mo blong protektem yumi aot long devel. Ol skripja i olsem wan nara gaed—sapos yumi ridim gud toktok blong God, bae Hem i soemaot long yumi rod blong go bak long laef we i no save finis.
Nambanaen Toktok blong bilif i tijim yumi se God i bin soem, mo i stap soem, mo bae hem i soem long fiuja plante bigfala mo impoten trutok long ol profet, sia mo reveleta. Mifala i lanem se antap long fasin blong lisin long smol kwaet voes blong Spirit mo ridim ol skripja, se nara tul blong lidim yumi, hem i ol Jos lida, we oli bin jusum, singaotem, mo setem apat olgeta blong blesem laef blong yumi tru ol lesen we oli tijim.
IV. Ol Memba Misinari
Nambaten, leven, motwelefToktok blong bilif i tijim yumi olsem wanem blong kondaktem misinari wok mo serem gospel long wan wol we i gat plante kantri mo defren loa. Yumi lanem abaot kam tugeta blong Isrel blong rere from Seken Kaming blong Sevya. Yumi kasem tijing se ol man mo woman oli ejen blong olgetawan, mo oli save akseptem o sakemaot tok blong God folem tingting blong olgetawan. Long en, yumi lanem se taem yumi serem gospel blong Jisas Kraes long fo kona blong wol, se yumi mas respektem ol gavman blong wanwan kantri we yumi go insaed. I tru, yumi biliv blong stap obei, gat ona, mo sastenem loa blong wanwan lan.
V. Ol Fasin We Yu Mas Traehad blong Kasem
Nambatetin toktok blong bilif i givim wan moa dip lukluk long olsem wanem yumi mas kondaktem ol laef blong yumi mo presentem yumiwan. I rid olsem: Mifala i biliv blong mas ones, talem trutok, stap klin, stap kaen, stap stret mo gud, mo mekem gudfala fasin long evri man; blong talem stret, mifala i stap talemaot se mifala i stap folem wanem we Pol i bin tijim—Mifala i biliv long evri samting, mifala i hop long evri samting, mifala i bin winim plante samting, mo mifala i hop blong winim evri samting. Sapos i gat samting we i klin, i luk naes, o i gudfala mo i nambawan tru, mifala i lukaotem ol samting ia.”
Yumi evriwan i mas traehad blong kasem ol fasin ia mo laef long wan wei we i soem se yumi ol gud eksampol long ol fasin ia. Trutok we oli tijim insaed long ol tok blong bilif i folem wan i go long narawan olsem ol pat blong wan mobael fon we oli sapotem wanwan long olgeta. Jes olsem wan mobael fon, taem i kam wetem wan pepa we i talem olsem wanem blong putum tugeta, Ol Toktok blong Bilif i givim yumi ki doktrin blong Restoresen. Wanwan tok blong bilif i mekem hem i moa impoten hemwan long andastaning blong yumi long gospel blong Jisas Kraes.
Praemeri Tija blong mi i helpem mi blong mekem wan stret desisen blong stadi ol doktrin blong kingdom. Hem i bin tijim mi blong lukaotem moa mining we i stap long ol simpol Toktok blong Bilif. Hem i bin promesem mi se sapos mi givim taem moa blong stadi ol tabu trutok, save we mi kasem bae i jenisim laef blong mi long wan moa gud wei, mo mi testifae long yu se i bin hapen.
Afta long gudfala lesen blong tija blong mi antap long hil ia long Logan Kenion, mifala i luksave se mifala i bin stap longtaem moa bitim we mifala i bin plan from. Naet i kam kwik, mo mifala i luksave se i gat wan problem.
Tija blong mi i bin traehad blong kasem wan gudfala ples, be blong gobak i wan bigfala jalenj blong yumi. Samting ia i bin mekem se joes we mifala i bin mekem blong go long aktiviti ia i no wan gud wan. Klaem i gobak i bin had long mifala, be i moa had blong wan olsem tija blong mifala.
Taem mifala i traehad blong helpem hem i gobak long hil ia, tu polisman i bin kamaot. Presiden blong praemeri i bin sendem olgeta i kam from mifala, nogud se mifala i lus. Wanem i hapen mo ol lesen we mi kasem i bin wan eksperiens long laef blong mi we bae mi neva save fogetem.
Ol yang man—mi leftemap tingting blong yufala blong yusum ol gudfala save blong yufala blong stadi mo lanem Ol Toktok blong Bilif mo ol doktrin we oli tijim. Oli stap long medel mo i tru long ol sot toktok blong doktrin blong Jos. Sapos yu yusum olgeta olsem wan gaed blong lidim ol stadi blong yu long gospel blong Jisas Kraes, bae yu faenem yuwan rere blong givim witnes blong ol trutok we i kambak long wol ia. Bae yu save talemaot moa long simpol wei, mo long stret fasin, mo long ol wei we i moa dip ol stamba bilif we i impoten tumas long yu olsem wan memba blong Jos blong Jisas Kraes blong ol Lata-dei Sent.
Mi ademap testemoni blong mi long ful trutok insaed long Ol tetin Toktok blong Bilif, long nem blong Lod mo Sevya blong yumi, iven Jisas Kraes, amen.