I Go long Ol Apu Pikinini blong Mi
I Kam long Presiden Henri B. Aering
Fas Kaonsela long Fas Presidensi
I gat wan komanmen we i kavremap evri samting, we bae i help blong fesem ol jalenj mo bae i helpem yumi krietem wan hapi famle.
Long yia ia, tufala fas apu pikinini bae i mared. Bae long sam yia taem, 10 long ol kasen blong olgeta bae i kasem poen ia long laef blong olgeta we bae oli folem rod ia i kam long naes wol blong krietem famle.
Hapi tingting ia i mekem mi tingting hevi bigwan taem oli bin askem advaes long mi. Wan samting we oli bin askem: “?Wanem joes bae mi save mekem we bae i lidim mi long hapines?” Mo long nara han: “?Wanem joes bae oli save lidim mi long fasin blong no stap hapi?”
Papa long Heven i mekem yumi i wan ia nomo. I no gat tu long yumi i gat ol semfala eksperiens. I no gat tu famle i semmak. So, hem i no sapraes se advaes long olsem wanem blong jusum hapines long famle laef i had blong givim. Yet, wan Papa long Heven wetem lav i putum wan sem rod i go long hapines blong evriwan long ol pikinini blong Hem. Nomata wanem fasin we i blong yumi, o wanem nao bae eksperiens blong yumi, be i gat wan plan blong hapines nomo i stap. Plan ia, i blong folem evriwan long ol komanmen blong God.
Long yumi evriwan, wetem ol apu pikinini blong mi we i lukluk blong mared, i gat wan komanmen we i kavremap evri samting, we bae i help blong fesem ol jalenj mo bae i helpem yumi krietem wan hapi famle. Hem i blong evri rilesensip nomata situesen blong olgeta. Oli ripitim long ful skripja mo long ol tijing blong ol profet blong tedei. Hemia toktok blong Baebol we i talem advaes blong Lod long evriwan we i wantem blong laef tugeta blong oltaem long lav mo hapines:
“Nao wan long olgeta we hem i waes long Loa, hem i askem wan kwestin long Jisas blong traem mekem hem i foldaon.
“Tija. ?Wanem loa blong God we i hae moa long ol narafala loa i winim olgeta evriwan?
Nao Jisas i talem long hem se, “‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’
“Hemia nao loa ya we i hae moa long ol narafala loa mo i nambawan blong folem.
Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’
“Tufala loa ya i stamba blong Loa we God i givim long Moses, wetem ol tok blong ol profet tu.”1
Aot long simpol toktok ia, i no had blong talem sot evri samting we mi bin lanem abaot ol joes we i lidim man long hapines long famle. I stat wetem kwestin: “?Wanem joes i bin lidim mi i go blong lavem Lod wetem olgeta hat mo laef mo tingting blong mi? Long mi, hem i blong jusum blong putum miwan long ples we mi bin filim glad blong fogivnes tru long Atonmen blong Lod.
Sam yia i pas, mi bin baptaesem wan yang man long Albakek, Niu Meksiko, we misinari kompanion blong mi mo mi i bin tijim. Mi putum yangfala man ia i go daon long wota mo tekem hem i kambak antap. Ating hem i tolfala kolosap olsem mi from se hem i toktok stret long sora blong mi. Wetem wota blong ples blong baptaes mo wota blong ae blong hem we i ron long fes blong hem, mo wetem glad long voes, hem i talem: “mi klin, mi klin.”
Mi bin luk ol semfala wota blong hapines long ae blong wan we i talem bakegen ol toktok blong wan Aposol blong God. Aposol ia i talem long hem, afta we i mekem wan intaviu we i naes mo i dip: “Mi fogivim yu long nem blong Lod. Bae Hem i givim stret save se Hem i fogivim yu long stret taem blong Hem mo long wei blong Hem.” Mo Hem i bin mekem.
Mi bin luk from wanem Lod i save talem se taem Hem i fogivim ol sin, Hem i nomo tingbaot olgeta bakegen. Tru long paoa blong Atonmen, pipol we mi save gud mo lavem, oli kam niu, mo i nomo gat risal blong sin. Hat blong mi i fulap wetem lav long Sevya mo Papa blong lav we i bin sendem Hem.
Bigfala blesing ia i kam taem mi leftemap tingting blong ol pipol we mi kea long olgeta blong oli go long Sevya blong oli spel long harem nogud, wan spel we Hem nomo i save givim. From hemia nao mi askem strong long olgeta we mi lavem blong akseptem mo wok strong long evri koling we oli givim long olgeta long Jos. Joes ia, i wan long ol gudfala ki blong kasem hapines long famle.
Ol fos long evri step blong laef i save temtem yumi blong sakemaot, o no wantem save long ol koling blong wok blong Sevya. Hemia i putum spirit blong yumiwan long denja, wetem waef o hasban blong yumi mo famle blong yumi. Sam long ol koling ia, yu luk se i no impoten, be laef blong mi, mo famle blong mi, i bin jenis blong gud taem mi akseptem wan koling blong tijim kworom blong ol dikon. Mi bin filim lav we ol dikon ia oli gat long Sevya mo lav we Sevya i gat long olgeta.
Mi bin luk hemia i hapen long laef blong wan foma stek mo misin presiden, taem God i singaotem hem blong givim advaes long kworom blong ol tija. Mi save abaot wan narawan we i bin wan bisop, mo afta, wan Eria Seventi we Lod i yusum hem blong helpem wan boe long kworom blong ol tija, we i bin kasem kil long wan aksiden. Ol merikel we i kamaot long seves ia i tajem plante laef, mo laef blong mi tu, mo i mekem se i gat moa lav long Sevya.
Taem yumi stap givhan long ol narawan, bae yumi askem blong gat olsem kompanion, Tabu Spirit. Sakses long wok blong Lod, oltaem i tekem merikel i kam we i bitim paoa blong yumiwan. Papa o mama we i fesem pikinini we i agens fulwan, i save se hemia i tru, semmak olsem visiting tija ia we wan woman i kam luk hem blong kasem kamfot taem hasban blong hem i talem long hem se i stap aot long hem. Tufala wokman ia, tufala i glad tumas we tufala i prea long moning ia blong Lod i sendem Tabu Spirit i stap olsem kompanion.
Hem i wetem Tabu Spirit olsem kompanion nomo we yumi save hop blong kasem semmak help long wan mared we i fri long raorao. Mi bin luk olsem wanem kompanionsip ia i impoten blong gat gud taem long wan mared. Merikel blong kam wan, i nidim help we i kam long heven, mo i tekem taem. Gol blong yumi, i blong laef tugeta blong oltaem long ples blong Papa long Heven mo Sevya blong yumi.
Papa mo mama blong mi, tufala i defren long tufala bakegen. Mama blong mi i wan singga mo wan artis. Papa blong mi i lavem kemistri. Wan taem, long wan konset, mama blong mi i sapraes taem papa blong mi i stanap mo i stat blong go bifo ol man i klapem han. Mama blong mi i askem hem se i stap go wea. Ansa blong hem wetem gud tingting: “Be, i finis finis, ?no?” kwaet paoa blong Tabu Spirit nomo i mekem hem i kam ia wetem hem long fas ples, mo i bin tekem hem i bin kambak long konset wanwan taem.
Mama blong mi i stap long Niu Jesi blong 16 yia blong mekem se papa blong mi i save sapotem famle taem i stap mekem ol stadi mo tijim kemistri. Long mama, hemia i wan sakrifaes blong stap longwe long wido mama blong hem, mo sista blong hem we i no mared, we tufala i lukaotgud long hem long olfala fam haos. Tufala tugeta i ded taem Mama i stap longwe long Niu Jesi. Tufala taem ia, i ol taem ia nomo we mi bin luk mama blong mi i stap krae.
Sam yia afta, oli askem papa blong go wok long Yuta. Hem i askem mama blong mi, bakegen wetem tingting se evrisamting i oraet: “Mildred, ?yu ting se bae mi mekem wanem?
Hem i talem: “Henri, mekem wanem yu ting se i bes.”
Hem i no akseptem wok. Nekis moning, mama i raetem wan leta we mi hop se mi gat yet. Mi tingbaot taem hem i bin talem long hem, “No openem long ples ia. Go long ofis mo openem longwe.” I stat wetem wan strong toktok. Papa i bin promesem hem plante yia bifo se, sapos hem i save mekem, bae i tekem hem i go kolosap long famle blong hem. Papa i sapraes long strong toktok blong hem. Hem i no tingbaot tingting blong hat blong mama. Wantaem, hem i sendem wan mesej, hem i akseptem wok.
Hem i talem: “Mildred, ?from wanem yu no talem long mi?”
Mama i talem: “Yu sapos blong tingbaot.”
Oltaem, hem i tokbaot joes ia blong muv i go long Yuta olsem joes blong hem, be neva olsem wan sakrifaes from wok blong hem. Tufala i bin kasem merikel blong kam wan. Bae i moa gud sapos Tabu Spirit i bin mekem Papa i tingbaot promes we hem i bin mekem sam yia bifo. Be hem i bin letem Tabu Spirit blong mekem hat blong hem i sopsop blong mekem se joes blong mama i kam joes blong hem.
Papa long Heven i save stret wanem bae i hapen, i save wanwan long yumi, mo i save fiuja blong yumi. Hem i save wanem hadtaem bae yumi gotru long hem. Hem i sendem Pikinini blong Hem blong safa blong mekem se Hem i save olsem wanem blong helpem yumi long evri tes blong yumi.
Yumi save Papa long Heven i gat ol spirit pikinini long wol ia, we samtaem, i jusum sin mo bigfala fasin no stap hapi. From hemia, hem i sendem Fasbon Pikinini blong Hem blong i Ridima blong yumi, aksen blong lav we i moa bigwan long evri kriesen. From hemia, yumi mas ting se bae i nidim help blong God mo taem blong stretem gud yumi, from laef we i no save finis, blong stap wetem Papa blong yumi.
Laef wetem ol famle bae i testem yumi. Hemia i wan stamba tingting blong God blong givim yumi presen blong laef long wol ia—blong mekem yumi kam strong moa blong pasem ol tes. Hemia bae i tru speseli long famle laef, ples we bae yumi faenem bigfala glad mo bigfala harem nogud we, samtaem, i luk se i moa bitim paoa blong yumi blong gotru long olgeta.
Presiden K. Kanon i talem hemia abaot wei we God i bin mekem yu mo mi i rere, wetem ol pikinini blong yumi from ol tes we bae yumi fesem: “I no gat wan long yumi we i no kasem lav blong God. I no gat wan long yumi we Hem i no tekem kea mo no tritim gud hem. I no gat long yumi we Hem i no wantem sevem, mo i no putum wan wei blong sevem yumi. I no gat wan long yumi we Hem i no sendem ol enjel blong Hem blong lukaot long yumi. Yumi save ting, mo ol narawan oli save ting se yumi nating mo yumi no naf, be trutok i stap se yumi ol pikinini blong God, mo i tru se Hem i givim ol enjel blong Hem—paoa mo strong bodi we yumi no save luk—blong mekem wok ova long yumi mo oli stap lukaotgud long yumi, mo gat yumi andanit long han blong olgeta.”2
Wanem we Presiden Kanon i tijim i tru. Bae yu nidim stret save ia, olsem we mi bin nidim mo dipen long hem.
Mi bin prea wetem fet se wan we mi lavem bae i lukaotem mo filim paoa blong Atonmen. Mi bin prea wetem fet se ol man mo woman enjel bae oli kam helpem olgeta, mo oli bin kam.
God i gat ol rod blong Hem blong sevem wanwan long ol pikinini blong Hem. Long plante, hemia i minim blong stap wetem wan brata o wan sista, o wan bubu we i lavem olgeta nomata wanem samting oli mekem.
Wan yia i pas, wan fren blong mi i tokbaot bubuwoman blong hem. Hem i bin laef wan ful laef, we oltaem hem i fetful long Lod mo Jos blong Hem. Be yet, wan long ol apuboe i jusum wan laef blong kraem. Nao oli sendem hem long kalabus. Fren blong mi i tingbaot se bubuwoman blong hem, taem i draev long bigrod blong go visitim apuboe blong hem long kalabus, hem i krae taem hem i stap prea wetem wari: “Mi bin traem blong laef long wan gud laef. ?From wanem, from wanem mi gat trabol ia blong wan apuboe we i stap prapa spolem laef blong hem?”
Ansa i kam long maen blong hem long ol toktok ia: “Mi bin givim hem long yu from se mi save se yu save, mo bae yu lavem hem nating wanem samting hem i mekem.”
I gat wan naesfala lesen blong yumi evriwan. Rod ia, blong ol papa mo mama, mo ol bubu we i gat lav, mo evriwan long ol wokman blong God, bae i no isi long wan wol we i stap roten. Yumi no save fosem ol pikinini blong God blong jusum wei i go long hapines. God i no save mekem hemia from fridom blong joes we Hem i givim long yumi.
Papa long Heven mo Pikinini we Hem i Lavem Tumas i lavem evriwan long ol pikinini blong God, nating wanem we oli jusum blong mekem, o wanem oli stap kam. Sevya i bin pem praes from evri sin, nomata i nogud olsem wanem. Nomata i mas gat jastis, janis blong givim sore i go long evriwan, mo i no stilim jastis.
Alma i tokbaot hop ia long boe blong hem Korianton long ol toktok ia: “Taswe, folem jastis, plan blong fasin blong pemaot man i no bin save hapen, sapos ol man oli no sakem sin long ples ia blong tes, yes, ples ia blong mekem rere; from sapos i no gat ol samting ia, sore i no save wok from bae i mas smasem gud wok blong jastis. Nao God i no save smasem gud wok blong jastis; sapos i olsem, God i nomo God.”3
Mesej blong mi long ol apu pikinini blong mi, mo long yumi evriwan we i stap traem blong krietem ol famle we oli no save finis, i we, i gat glad i stap fo sua long olgeta we oli fetful. Stat long bifo wol i stat, wan Papa we i stap long Heven wetem lav, mo Pikinini blong Hem we Hem i Lavem, i bin lavem mo i bin wok wetem olgeta we Tufala i save se bae oli go afsaed. God bae i lavem olgeta blong oltaem.
Wan gud samting i we, yu save se oli bin lanem plan blong fasin blong sevem man aot long ol tijing we oli bin kasem long spirit wol. Olgeta, wetem yu, i bin fetful inaf blong oli letem yufala blong kam long wol, be plante oli stap yet.
Wetem help blong Tabu Spirit, evri trutok bae i kamkamaot long tingting blong yumi. Yumi no save fosem hemia long ol narawan, be yumi save letem olgeta oli luk insaed long laef blong yumi. Oltaem, yumi save tekem strong paoa long tingting aot long stret save ia se, wantaem, yumi evriwan i bin filim glad blong stap tugeta olsem wan memba blong wan famle blong Papa blong yumi long Heven. Wetem help blong God, yumi save filim hop ia mo glad ia bakegen. Mi prea se bae i hapen long yumi evriwan, long nem blong Lod, Jisas Kraes, amen.