“Bambae Mi Stap Wetem Yu Oltaem, we Neva Bambae Mi Lego Yu Samtaem”
I Kam long Presiden Tomas S. Monson
Papa blong yumi long Heven … i save tu se yumi lanem samting, mo gro, mo kam strong moa taem yumi fesem mo laef tru ol tes we yumi gotru long olgeta.
Long jenol blong mi tedei naet, bae mi raetem, “Hemia i bin wan long ol sesen we i fulap moa long insperesen bitim eni nara jeneral konfrens we mi bin atendem. Evri samting i bin gud tumas mo i fulap gud long saed blong spirit.”
Ol brata mo sista, sikis manis i pas, taem yumi bin stap mit tugeta long jeneral konfrens blong yumi, swit waef blong mi, Franses, i ledaon long hospital, mo bin stap safa from hem i bin foldaon sam dei bifo. Long Mei, afta plante wik we hem i faet strong blong winim ol kil blong hem, hem i flae i go long taem we i no save finis. Mi misim hem bigwan. Hem mo mi, i bin mared long Sol Lek Tempol long 7 Oktoba 1948. Tumoro bae i namba 65 mared aniveseri blong mitufala. Hem i bin lav blong laef blong mi, hem we mi trastem bigwan, mo bes fren blong mi. Blong talem se mi misim hem, i no talemaot stret dip filing blong mi.
Konfrens ia i makem 50 yia stat long taem we Presiden Deved O. MaKei i singaotem mi long Kworom blong Olgeta Twelef Aposol. Truaot ol yia ia, mi neva bin filim wan samting be ful mo komplit sapot blong swit kompanion blong mi. Mi no save kaontem ol sakrifaes we hem i mekem blong mi save wok long koling blong mi. Mi neva harem wan toktok blong komplen long hem, taem plante taem mi mas spendem sam dei, mo samtaem sam wik longwe long hem mo ol pikinini blong mitufala. Hem i bin wan enjel tru.
Mi wantem talem tangkyu blong mi, mo tu hemia blong famle blong mi, from ol bigfala lav we i kam long mifala stat long taem Frances i ded. Plante handred kad mo leta we oli kam raon long wol, oli talemaot gud toktok abaot hem, mo pasem sore long famle blong mifala. Mifala i kasem plante naesfala flaoa. Mifala i glad from plante donesen we oli bin mekem, long nem blong hem, long Jeneral Misinari Fand blong Jos. Long bihaf blong mifala we hem i livim biaen, mi talemaot bigfala tangkyu from ol kaen fasin mo toktok blong hat blong yufala.I wish to express
Wanem i bin wan bigfala kamfot long mi, long sad taem ia blong seperesen, hem i testemoni blong mi abaot gospel blong Jisas Kraes, mo save we mi gat se dia Franses blong mi i stap laef yet. Mi save se mitufala i seperet blong smol taem. Mitufala i bin sil long haos blong God, tru long wan we i gat atoriti blong joenem man long wol mo long heven. Mi save se bae mitufala i joen bakegen wan dei, mo bae mitufala i neva save seperet bakegen. Hemia nao save we i stap sapotem mi.
Ol brata mo sista, bae i stret blong talem se i no gat wan man o woman we i bin laef we hem i no gat safaring mo harem nogud, o i neva gat wan taem long histri blong man we i no bin gat trabol mo harem nogud.
Taem rod blong laef i tanem long wan kona we i had tumas, i gat temtesen blong askem kwestin ia: “?From wanem mi?” Samtaem, i luk olsem i no gat laet long en blong rod, i no gat san i girap bakegen long en blong naet blong tudak. Yumi filim fulap wetem slak tingting from drim i no kamtru, mo harem nogud long hop we i lus. Yumi joen mo talem toktok blong Baebol: “?I gat plante meresin long Gilead?”1 Yumi filim se man i lego yumi, hat i brok, yumi stap yumiwan. Yumi gat fasin ia blong luk hadtaem blong yumi tru long nogud tingting blong lusum hop. Yumi no save wet longtaem from wan ansa long problem blong yumi, mo fogetem se, plante taem, yumi nidim blong gat gud fasin blong heven we i blong gat longfala tingting.
Ol hadtaem we oli kam long yumi i givim ril tes blong paoa blong yumi blong stanap strong. Wan stamba kwestin i stap blong wanwan long yumi i ansarem: ?Bae mi foldaon nomo, o bae mi finisim wok? Sam oli foldaon taem oli no save girap bitim jalenj blong olgeta. Blong finisim wok, i minim blong stap strong go kasem en blong laef.
Taem yumi tingting hevi long ol samting we i save hapen long yumi, yumi save talem wetem Job blong bifo: “Evri taem nomo, man i pulum trabol i kam long hem.”2 Job i “wan gudfala man” we i “stap lukaot gud blong no mekem wan samting we i nogud.”3 Aksen blong hem i blong Kristin man, i gat mane, be Job i mas fesem wan tes we i save prapa spolem eni man. Hem i lusum evri propeti blong hem, ol fren blong hem oli sakemaot hem, i harem nogud long safaring blong hem, i lus hop taem famle blong hem i ded, nao hem i stap blong hem i “tok nogud long [God] mo ded.”4 Hem i stanap agensem temtesen ia, mo talemaot wetem ful hae sol blong hem:
“I gat wan witnes blong mi i stap long heven …i tok long saed blong mi.”5
“Mi save ridima blong mi i laef.”6
Job i gohed blong stap fetful. ?Bae yumi tu i mekem semmak sapos yumi fesem ol jalenj we i blong yumi?
Long eni taem we yumi filim se yumi daon from ol hadtaem blong laef, yumi mas tingbaot se ol narawan oli pas long semmak rod, oli bin stap strong, mo afta, oli bin win.
Histri blong Jos, long dispensesen ia blong taem blong evri wok blong God i kamtru, i fulap wetem ol eksperiens blong olgeta we oli traehad, be yet, oli bin stap strong mo oli bin stap glad. ?Risen blong hem? Oli bin mekem gospel blong Jisas Kraes i stap long medel blong laef blong olgeta. Hemia nao wanem bae i pulum yumi i gotru long wanem i kam blokem rod blong yumi. Bae yumi stap fesem yet ol had jalenj, be bae yumi save fesem olgeta, fesem wetem strong tingting, mo kamaot wetem viktri.
Stat long bed blong harem nogud, i go kasem pilo we i wetwet long wota blong ae, oli leftemap tingting blong yumi i luk long heven tru long tabu tras mo bigfala promes ia: “Bambae mi stap wetem yu oltaem, we neva bambae mi lego yu samtaem.”7Kamfot ia, i no gat praes blong hem.
Taem mi bin travel longwe mo long plante ples long wol blong mekem ol wok blong koling blong mi, mi kam blong save plante samting—wetem tru poen ia se, harem nogud mo safaring i stap long ful wol. Mi no save stat blong makem evri hat we i soa, mo harem nogud we mi bin witnesem taem mi bin visitim olgeta we oli fesem harem nogud, gat sik, fesem divos, traehad wetem boe o gel aotsaed long Jos, o safa from risal blong sin. Lis i save gogohed, from se i gat plante problem tumas we i save kasem yumi. Blong tokbaot wan eksampol nomo, i had, be yet, taem mi tingting long jalenj, ol tingting blong mi i go long Brata Brem, wan Sandei Skul tija blong yangfala taem blong mi. Hem i wan fetful memba blong Jos, wan man wetem wan hat blong gol. Hem mo waef blong hem, Sadi i gat eit pikinini, we plante oli gat sem yia long olgeta long famle blong mi.
Afta Franses mo mi i bin mared mo muvaot long wod, mitufala i stap luk Brata mo Sista Brem mo ol memba blong famle blong tufala long ol mared, fenerol, mo tu long ol kam tugeta blong wod.
Long 1968, Brata Brem i lusum waef blong hem, Sadi. Tu long ol eit pikinini blong tufala tu, i ded, long ol yia afta.
Wan dei, kolosap 13 yia i pas, bigfala apugel blong Brata Brem i ringim mi. Hem i eksplenem se bubuman blong hem i kasem 105 yia. Hem i talem se: “Hem i stap long wan smol kea senta, be i stap mit wetem ful famle evri Sandei, mo i stap tijim wan gospel lesen.” Hem i gohed: “Long las Sandei, Bubuman i talem long mifala: ‘Ol pikinini. Bambae mi ded long wik ia. ?Bae yufala i save ringim Tomi Monson. Bae hem i save wanem blong mekem.’”
Mi visitim Brata Brem long nekis naet. Mi no bin luk hem blong samtaem. Mi no save toktok long hem, from hem i no save harem mi. Mi no save raetem wan mesej blong hem i ridim, from se hem i no save luk. Famle i talem long mi se oli toktok long hem taem oli tekem fingga blong raet han, mo afta, raet long lef han, nem ia blong hu i stap visitim hem. Eni mesej, oli mas talem long wei ia. Mi bin folem wei ia, tekem fingga blong hem mo spelem “T-O-M-I M-O-N-S-O-N,” nem we hem i save mi long hem. Brata Brem i glad tumas, i tekem han blong mi, mo putum antap long hed blong hem. Mi save se hem i wantem kasem wan prishud blesing. Draeva we i bin tekem mi long kea senta i joenem mi, mo putum han blong mifala antap long hed blong Brata Brem mo givim wan blesing. Afta, wota blong ae i kamaot long ae ia we i no save luk. Hem i holem han blong mitufala wetem tangkyu. Nomata hem i no harem blesing we mitufala i givim, Spirit i bin strong, mo mi biliv se hem i kasem insperesen blong save we mitufala i bin givim blesing we hem i nidim. Swit man ia i no save luk samting. I no save harem samting. Hem i stap, naet mo dei, insaed long wan smol rum insaed long wan kea senta. Mo yet, smael long fes blong hem mo ol toktok hem i talem i tajem hat blong mi: “Tangkyu” hem i talem, “Papa blong mi long Heven i gud tumas long mi.”
Long wik ia, semmak olsem we Brata Brem i talem finis, hem i ded. Neva hem i stap tingting long wanem we hem i no gat; be, oltaem, hem i glad tumas from ol blesing blong hem.
Papa blong yumi long Heven we i givim fulap blong stap glad long hem, i save tu se yumi lanem samting, mo gro, mo kam strong moa taem yumi fesem mo laef tru ol tes we yumi gotru long olgeta. Yumi save se i gat ol taem we bae yumi gat hat i soa, we bae yumi harem nogud, mo taem we bae Hem i testem yumi i kasem mak blong yumi. Be, ol hadtaem ia oli letem yumi jenis i kam gud, blong yumi bildimbak laef blong yumi long wei we Papa long Heven i tijim yumi, mo blong kam defren long wanem yumi bin stap—moa gud bitim fastaem, gat moa save bitim fastaem, moa raef bitim fastaem, wetem moa strong testemoni we yumi bin gat bifo.
Hemia nao i mas kam stamba tingting blong yumi—blong gogohed mo stap strong, yes, be tu, blong kam moa fit long spirit taem yumi stap mekem rod blong yumi tru long sansaen mo sado. Sapos i no gat ol jalenj blong winim, mo ol problem blong stretem, bae yumi stap olsem nomo, we yumi no progres i go from gol blong laef we i no save finis. Poet i talem ol sem tingting long ol toktok ia:
Gud timba i no gro isi nomo,
Moa win i strong, moa tri i strong.
Moa skae i hae, moa tri i tolfala,
Moa hariken i strong, moa tri i strong.
Tru long san mo kolkol, tru long ren mo sno,
Long ol tri mo ol man, ol gud timba oli gro.8
Masta nomo i save se tes, sobodi, mo safaring blong yumi i bigwan olsem wanem. Hemwan i save givim pis we i no save finis long ol taem we samting i agensem yumi. Hemwan i tajem sol blong yumi we i trabol wetem ol toktok blong kamfot:
“Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud.
“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.
“Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”9
Nomata hem i ol bes taem, o ol mowas taem, Hem i stap wetem yumi. Hem i promesem se tingting blong Hem bae i neva jenis.
Ol brata mo sista blong mi. Bae yumi komitim yumi long Papa blong yumi long Heven we i jenis nating folem ol yia o hadtaem blong laef blong yumi. Yumi no nid blong gotru long had eksperiens blong yumi tingbaot Hem, mo yumi no mas mekem Hem i putum tingting blong yumi daon bifo yumi givim fet mo tras blong yumi long Hem.
Bae yumi oltaem traehad blong stap kolosap long Papa blong yumi long Heven. Blong mekem olsem, yumi mas prea long Hem mo lisin long Hem evri dei. Yumi nidim Hem tru, long evri aoa, ol aoa blong sansaen, o blong ren. Bae promes blong Hem i stamba toktok blong yumi: “bambae mi stap wetem yu oltaem, we neva bambae mi lego yu samtaem.”10
Wetem evri paoa blong sol blong mi, mi testifae se God i stap laef mo i lavem yumi, se Wan Stret Pikinini Nomo blong Hem i bin laef, mo i bin ded from yumi, mo gospel blog Jisas Kraes i laet ia we i kamtru, i saen tru long tudak blong laef blong yumi. Bae i olsem oltaem, mi prea long tabu nem blong Jisas Kraes, amen.