No Gat Fasin Blong Stap Flas Mo Tingting Blong Hat I Stap Daon.
I Kam long Elda Yulises Soares
Blong Presidensi blong Olgeta Seventi
Blong no stap flas i no minim blong no stap strong, be hem i minim blong mekem samting wetem gud tingting mo fasin we i kaen.
Momon i tijim se wan man “i no save gat fet mo hop, hemia nomo sapos hem i no gat fasin blong stap flas mo tingting blong hat blong hem i stap daon.”1 Hem i ademap se sapos wan i no gat ol fasin ia, “fet blong hem mo hop i blong nating, from i no gat wan we God i akseptem long fored blong hem, be olgeta nomo we oli no stap flas mo tingting blong hat blong olgeta i stap daon.”2
Fasin blong no stap flas i kwaliti blong olgeta we oli “stap fraet long God, oli stret mo gud, oli gat tingting i stap daon, oli kasem tijing, oli save wet longtaem long taem we oli stap safa.”3 Olgeta we oli gat fasin ia, oli glad blong folem Jisas Kraes mo ol gospel tijing blong Hem, mo fasin blong olgeta i no strong, oli kwaet, akseptem samting, folem tingting, mo oli save wet longtaem.
Aposol Pol i tijim se fasin blong no stap flas i wan frut blong Spirit.4 From hemia, yumi save kasem isi nomo sapos “Tabu Spirit ya, hem i givim laef long yumi finis.”5 Mo blong Tabu Spirit i givim laef long yumi, long laefstael blong yumi i mas soemaot stret mo gud fasin long fored blong Lod.
Taem yumi stap tekem nem blong Kraes long yumi, oli wantem luk se yumi traehad blong mekem folem ol fasin blong Hem, mo jenisim fasin blong yumi blong kam olsem hemia blong Kraes, evri dei. Sevya, taem i tok long ol disaepol blong Hem, i se: “Fasin blong yufala i mas stret gud, olsem fasin blong Papa blong yufala long heven.”6 Sapos yumi kam long Kraes, yumi sakemaot evri samting we i no blong God, mo lavem God, nao, tru long gladhat blong Kraes, dei bae i kam we bae yumi kam stret gud wetem Hem.7
“Ol fasin olsem hemia blong Kraes oli ol presen we i kam long God. [Ol fasin ia] oli kam taem yumi yusum fridom blong joes blong yumi long stret mo gud fasin. …Wetem tingting blong mekem gud long God, yumi mas luksave wanem yumi no strong long hem mo mas wantem mo tingting strong blong kam antap.”8
Fasin blong no stap flas i impoten blong yumi kam moa olsem Kraes. Sapos yumi no gat fasin blong no stap flas, bae yumi no save developem ol impoten klin fasin. Blong no stap flas i no minim blong no stap strong, be hem i minim blong mekem samting wetem gud tingting mo fasin we i kaen, blong soem paoa, klia tingting, gud tingting long yuwan, mo kontrol long yuwan.
Fasin blong no stap flas i wan long ol bigfala fasin insaed long laef blong Sevya. Hem, Hemwan, i tijim ol disaepol blong Hem: “Yufala i mas lan long mi, from mi wan kwaet man mo tingting blong mi i stap daon.”9
Yumi gat blesing blong yumi bon wetem sid blong fasin blong no stap flas insaed long hat blong yumi. Yumi nid blong andastanem se i no posibol blong planem sid tedei mo tumoro i kam wan bigfala tri finis, be i tru long wan longfala taem. Kraes i askem yumi blong yumi tekem kros blong Hem evri dei,10 we i minim se yumi mas lukluk long hem oltaem mo wantem hemia oltaem.
Presiden Lorenso Sno, nambafaef profet long dispensesen blong yumi i tijim se: “Hem i diuti blong yumi blong traem blong kam stret evriwan, …blong kam antap evri dei, mo blong lukbak long rod blong yumi long las wik mo mekem ol samting i moa gud long wik ia; mekem ol samting i gud moa tedei bitim we yu bin mekem long yestedei,11 mo gogohed olsem, wan step blong stret mo gud fasin i go long narafala step. So, fas step blong kasem fasin blong no stap flas i blong kam antap evri dei, evri wik blong kam antap. Evri dei, yumi nidim blong traem blong kam gud moa bitim dei bifo taem yumi stap wokbaot tru long rod ia, step afta wan moa step.
Presiden Sno i ademap:
Yumi gat ol smol krangke rod blong yumi mo ol samting we yumi no strong long hem; yumi mas traem blong winim olgeta kwiktaem, mo … mas [putum] filing ia insaed ol hat blong ol pikinini blong yumi … blong oli save lanem blong [gat gud fasin] long fored blong Kraes long eni taem.
“Sapos wan hasban i save laef wetem waef blong hem wan dei we tufala i no raorao, o no talem wan nogud toktok long narawan, o no mekem Spirit blong God i harem nogud … ; hem i stret evriwan kasem ples ia. Afta, letem hem i traem blong stap semmak long nekis dei. Be sapos hem i no mekem long nekis dei we hem i traem, hemia i no wan risen from wanem hem i no save mekem bakegen long nambatri dei.” 12
Taem bae Hem i luksave hadwok mo strong wok blong yumi, Lod bae i givim yumi wanem we yumiwan i no save kasem from yumi no stret evriwan, mo from yumi man.
Wan nara impoten step blong kasem fasin blong no stap flas, i blong lanem olsem wanem blong kontrolem kros blong yumi. From se man we i folem fasin blong wol i stap insaed long wanwan long yumi, mo from yumi laef long wan wol we i fulap long ol fos, blong kontrolem kros blong yumi i save kam wan long ol jalenj blong laef blong yumi. Tingting smol taem se ?bae yu mekem wanem taem wan i no folem ol tingting blong yu, long stret taem we yu wantem? ?Olsem wanem taem ol pipol oli no agri wetem ol tingting blong yu nomata yu save stret se oli gat stret ansa long wan problem? ?Wanem nao yu talem taem wan i talem samting we i mekem yu harem nogud, i tokbaot nogud ol hadwok blong yu, o i no kaen hemia from nomo se oli no filim oraet? Long ol taem ia mo long ol narafala had situesen, yumi mas lanem blong kontrolem kros blong yumi mo talem ol filing blong yumi wetem longfala tingting mo fasin blong winim tingting. Hemia i impoten tumas insaed long ol hom blong yumi mo insaed long ol rilesensip wetem ol kompanion blong yumi we i no save finis. Long ol 31 yia we mi bin mared wetem swithat blong mi, plante taem, hem i talem ol kwaet toktok we i mekem mi tingbaot hemia taem mitufala i stap fesem ol jalenj blong laef.
Long medel blong ol instraksen we oli stap long Seken Leta i go long Timoti, Aposol Pol i talem:
“Be man blong wok blong Masta blong yumi, hem i no mas man blong faet, hem i mas mekem i gud long olgeta man. Mo hem i mas wan gudfala man blong tij, we tingting blong hem i longfala.
“Mo hem i mas wan man we i save stretem ol man we oli agens long hem, long fasin we i kaen nomo. Maet God bambae i givim janis long ol man ya, blong oli tanem tingting blong olgeta from ol sin blong olgeta blong oli save gud ol trutok.
“Long fasin ya, bambae oli save kasem stret tingting blong olgeta bakegen.”13
Taem yumi kontrolem ol aksen blong yumi, taem yumi stap kwaet mo no kros, mo stap longwe long raorao, bae yumi stat kwalifae from presen blong no stap flas. Presiden Henri B. Aering i bin talem wan taem: “Taem we yumi, wetem fet, yumi kontrolem kros blong yumi mo daonem hae tingting blong yumi, Tabu Spirit bae i givim raet blong Hem, mo ol tabu promes mo kavenan oli kamtru.14
Wan nara step blong kasem fasin blong no stap flas i blong putum tingting i stap daon. Lod i talem long Tomas B. Mas tru long Profet Josef Smit se Tomas B. Mas i mas Putum tingting blong hem i stap daon; mo Lod, God blong hem, bae i tekem han blong hem mo lidim hem, mo givim ansa long ol prea blong hem.15
Mi biliv se, olgeta nomo we oli putum tingting blong olgeta i stap daon oli save luksave mo andastanem ansa blong Lod blong prea blong olgeta. Olgeta we oli gat tingting i stap daon, oli save tijim olgeta, oli luksave hao oli dipen long God mo wantem blong folem tingting blong Hem. Olgeta we oli gat tingting i stap daon oli no stap flas, mo oli gat paoa ia blong lidim tingting blong ol nara man blong mekem semfala samting. Promes blong God i go long olgeta we oli gat tingting i stap daon i we bae Kraes i holem han blong olgeta mo lidim olgeta. Mi biliv tru se bae yumi no nid blong tekem ol longfala rod mo stap harem nogud long laef blong yumi sapos yumi holem han blong Lod mo wokbaot wetem Hem.
Wan long ol naesfala stori blong taem blong yumi we mi bin harem i stori blong Brata Moses Malangu taem i jenisim laef blong hem. Stori blong hem i stat long 1964, taem hem i kasem wan kopi blong Buk blong Momon. Hem i intres taem hem i stap ridim buk, be i long eli 1970 nomo, hem i luk wan LDS jos saen long wan bilding long Joanesbeg, Saot Afrika, taem hem i stap wokbaot folem wan rod. Brata Malangu i tingting mo go insaed long bilding blong lanem moa abaot Jos. Long kaen fasin, oli talem long hem se hem i no save kam long seves, o kasem baptaes from ol loa blong kantri, i blokem long tetaem ia.
Brata Malangu i akseptem desisen ia wetem fasin blong no stap flas, tingting i stap daon, mo hem i no bin gat nogud tingting, be hem i gohed blong gat strong tingting blong lanem moa abaot Jos. Hem i askem ol lida blong Jos sapos oli save livim wan windo blong mitinghaos i open long taem blong Sandei miting, blong hem i save sidaon aotsaed mo lisin long seves blong Jos. Blong plante yia, famle blong Brata Malangu, mo ol fren oli kam long jos evri Sandei tru long windo. Wan dei long 1980, oli talem long olgeta se oli save go long Jos mo kasem baptaes. Wan dei blong glori blong Brata Malangu.
Afta, Jos i bin oganaesem wan branj kolosap long ples blong hem long Soweto, we i gro mo i kam wan stek long 1999. Hemia i posibol nomo from strong tingting, strong paoa long tingting mo fasin blong ol pipol blong stap fetful, olsem Brata Malangu we i gohed blong stap fetful blong plante yia anda long ol had situesen.
Wan long ol fren blong Brata Malangu, we i joenem Jos long semfala taem, i talembak stori ia long mi taem mi visitim Stek blong Soweto. Long en blong storian blong mitufala, hem i haggem mi. Long taem ia, mi filim se han blong Sevya i raonem mi. Fasin blong no stap flas i kamaot long ae blong brata ia. Wetem wan hat we i fulap long gud samting mo tangkyu, hem i askem sapos mi save talem long Presiden Monson hamas hem i glad mo gat blesing, wetem ol narawan, blong gat tru gospel long laef blong olgeta. Eksampol blong Brata Malangu mo fren blong hem blong no gat fasin blong stap flas i lidim plante laef blong mekem gud—speseli laef blong mi.
Ol brata mo sista. Mi biliv se Sevya Jisas Kraes i hae eksampol blong fasin blong no stap flas. Long ol las taem blong laef blong Hem long wol ia, afta we oli akiusum mo panisim Hem, mo i tekem kros blong Hem i go long Golgota, we ol enemi blong Hem i stap jikim mo sakem nogud toktok long Hem, we plante we oli save long Hem mo witnesem ol merikel oli livim Hem, oli bin nilim Hem long kros.
Iven afta we Hem i safa bigwan long bodi, Lod i tanem Hem long Papa blong Hem mo i toktok wetem hat blong Hem we i no flas mo i stap daon: “Papa plis yu fogivim olgeta ya, from we oli no save samting ya we oli stap mekem.”16 Kraes i fesem bigfala harem nogud long bodi mo spirit, mo givim janis long yumi blong jenisim fasin blong yumi long spirit mo no stap flas semmak olsem Hem.
Mi talem witnes blong mi se Jisas Kraes i Sevya blong yumi. Mi testifae long yufala se, from lav blong Hem, hem i posibol blong jenis. Hem i posibol blong livim ol samting we yumi no strong long hem i stap biaen. Hem i posibol blong sakemaot ol nogud paoa long laef blong yumi, blong kontrolem kros blong yumi, blong no stap flas, mo developem ol fasin blong Sevya blong yumi. Hem i soem rod long yumi. Hem i givim yumi stret eksampol ia mo i givim komanmen long wanwan long yumi blong kam olsem Hem. Invitesen blong Hem i blong yumi folem Hem, folem eksampol blong Hem, mo kam olsem Hem. Long saed blong ol trutok ia, mi talem testemoni blong mi, long tabu nem blong Hem we i Jisas Kraes. amen.