Kam Joenem Mifala
I kam long Presiden Dita F. Ukdof
Seken Kaonsela long Fas Presidensi
Nomata wanem situesen blong yu, histri blong yu, o paoa blong testemoni blong yu, i gat rum i stap blong yu insaed long Jos ia.
Wan taem, i gat wan man we i stap drim se hem i stap long wan bigfala rum wetem ol ripresentativ blong ol relijin blong wol we oli stap tugeta. Hem i luksave se i gat fulap samting abaot wanwan relijin we i gud blong gat mo i impoten.
Hem i mitim wan naes kapol we i ripresentem Jos blong Jisas Kraes blong Ol Lata-dei Sent mo i askem: “?Wanem nao yufala i askem long ol memba blong yufala blong mekem?”
“Mifala i no askem eni samting” tufala i ansa. “Be Lod i askem blong mifala i givim evri samting.”
Kapol ia i gohed blong eksplenem abaot ol koling blong Jos, hom mo visiting tijing, fultaem misin, famle haos naet evri wik, tempol wok, welfea mo yumaniterian seves, mo ol wok we oli givim blong tij.
Man ia i askem: “?Yufala i stap pem ol man blong yufala from evri wok we oli stap mekem?”
“O, no” kapol ia i eksplenem. “Oli glad blong givim fri taem blong olgeta.”
“Mo tu,” kapol ia i gohed, “Evri sikis manis, ol memba blong Jos oli spendem wan wiken blong go o lukluk ten aoa blong jeneral konfrens.”
Man ia i tingting se, “?Ten aoa blong man i stap givim toktok?”
“?Be, olsem wanem long jos seves blong yufala long evri wik? ?Oli blong hamas aoa?”
“!Tri aoa evri Sandei!”
Man ia i talem “O lala. ?Be ol memba blong jos blong yufala oli stap mekem evri samting we yufala i stap talem?”
“Olgeta samting ia mo moa. Mifala i no tokbaot yet wok blong famle histri, yut kamp, ol divosen, skripja stadi, lidasip trening, yut aktiviti evri wik, eli moning seminari, klinim bilding blong jos, mo yes, i gat loa blong Helt blong Lod, livim kakae blong helpem olgeta we oli pua, mo taeting.”
Man ia i talem: “Wet. Tingting i fasfas smol. ?From wanem wan bae i wantem joenem wan kaen jos olsem?”
Kapol ia i smael mo i talem: “Mitufala i stap wet long kwestin ia.”
?From Wanem Wan bae I Joenem wan Kaen Jos Olsem?”
Long wan taem we plante jos raon long wol oli stap fesem namba blong memba blong olgeta i stap go daon, Jos blong Jisas Kraes blong Ol Lata-dei Sent—nomata namba blong hem i smol komperem wetem sam nara jos—i wan long ol jos we i gro kwik long wol. Stat long Septemba 2013, Jos i gat moa long 15 milian memba raon long wol.
I gat plante risen from hemia, be bae mi talemaot sam.
Jos blong Sevya
Faswan, Jos ia, i kambak long taem blong yumi, mo Jisas Kraes Hemwan i putumbak. Long jos, bae yu faenem atoriti blong mekem wok long nem blong Hem—blong mekem baptaes blong kam klin aot long sin, blong givim presen we i Tabu Spirit, mo blong silim man long wol mo long heven.1
Olgeta we oli joenem Jos ia, oli lavem Sevya Jisas Kraes, mo oli wantem folem Hem. Oli stap glad long save ia, se God i stap toktok long man long wol bakegen. Taem oli stap kasem ol tabu prishud odinens mo oli mekem ol kavenan wetem God, oli save filim paoa blong Hem insaed long laef blong olgeta. 2Taem oli go insaed long tabu tempol, oli filim se oli stap wetem Hem. Taem oli stap ridim ol tabu skripja3mo stap laef folem ol tijing blong ol profet blong Hem, oli stap gro i kam klosap moa long Sevya we oli lavem.
Wan Fet we I Laef
Wan nara risen, hem i from se Jos i givim ol janis blong mekem gud.
Man i save presem yu from yu biliv long God, be plante pipol oli wantem mekem moa bitim blong stap lisin long sam tabu toktok, o stap drim long ol haos blong olgeta long heven. 4 Oli wantem blong putum fet blong olgeta long aksen. Oli wantem pulum han blong sot blong olgeta i go antap, mo stap fulwan long bigfala wok ia.
Mo hemia nao i stap hapen taem oli joenem mifala—oli gat fulap janis blong yusum ol talen, lav mo sore, mo taem long ol gudfala wok. From se mifala i no stap pem ol lokol man long ol kongregesen raon long wol, ol memba blong mifala oli mekem wok blong seves olgetawan. Oli singaotem olgeta tru long insperesen. Samtaem, mifala i volontia; samtaem oli askem mifala blong volontia. Mifala i luk ol wok, oli no olsem ol hevi wok, be olsem ol janis blong mekem folem ol kavenan we mifala i mekem wetem glad blong givim seves long God mo ol pikinini blong Hem.
Ol Blesing we Yumi Holemtaet Gud
Wan nambatri risen from wanem ol pipol oli joenem Jos, i from we fasin blong wokbaot long rod blong disaepol i lidim yumi long ol gudfala blesing.
Mifala i luk baptaes olsem stat poen long rod blong mifala olsem disaepol. Evri dei wokbaot blong mifala wetem Jisas Kraes i lidim mifala long pis mo stamba tingting long laef ia, mo wan bigfala glad mo laef long taem we i no save finis long wol we i stap kam.
Olgeta we oli stap fetful blong folem rod ia, oli stap longwe long plante hol, harem nogud, mo rigret blong laef.
Olgeta we oli no strong long spirit, mo oli ones long hat blong olgeta oli faenem ol bigfala save long jos.
Olgeta we tingting i hevi wetem sin, oli faenem fogivnes, fridom mo spel.
Long Olgeta we Oli Stap Aot long Jos
Fasin blong lukaotem trutok i lidim ol milian pipol i kam long Jos blong Jisas Kraes. Be, i gat sam we oli stap aot long Jos we oli bin laekem long wan taem.
Wan i save askem: “Sapos gospel i gud tumas, ?from wanem bae wan i aot?”
Samtaem yumi ting se i from man i mekem nogud long olgeta, o oli les, o oli sin. Be, i no simpol olsem. Wanem i tru, i we, i no gat wan risen nomo we i go wetem ol defdefren situesen.
Sam long ol gudfala memba oli traehad blong plante yia wetem kwestin ia se ?bae oli aot long Jos o nogat?
Long Jos ia we yumi givim ona long fridom blong joes blong wanwan; long Jos ia we wan yang man i putumbak from hem i bin gat ol kwestin mo i faenem ol ansa, yumi respektem olgeta we oli ones taem oli stap lukaotem trutok. Ating hat blong yumi i brok taem wokbaot blong olgeta i tekem olgeta i go longwe long Jos mo trutok ia we oli bin faenem; be mifala i ona raet blong olgeta blong wosipim God we I Gat Olgeta Paoa folem wanem tingting blong olgeta i talem long olgeta, semmak olsem we mifala i klemem spesel janis ia blong mifalawan. 5
Ol Kwestin we Oli No Gat Ansa
Sam oli traehad wetem ol kwestin we i no gat ansa abaot ol samting we oli bin mekem, o talem bifo. Mifala i talem stret se long kolosap 200 yia blong Jos Histri—wetem wan longfala laen blong ol samting we i bin hapen we i givim insperesen, i gud, i leftemap bilif—i bin gat ol samting we oli talem mo mekem we i save mekem pipol i askem kwestin.
Samtaem, ol kwestin oli kam antap from nomo yumi no gat evri infomesen yet, mo yumi nidim sam moa fasin blong wet longtaem. Taem ful trutok i kam long save blong yumi, bae ol samting we oli no foldaon stret bae oli kam stret long tingting blong yumi.
Samtaem, i gat defren tingting long wanem nao i “tru samting”i minim. Wan kwestin we i krietem tu tingting long sam, afta long gud stadi, bae i bildimap fet long ol narawan.
Ol Mistek blong Ol Pipol we Oli No Stret Evriwan
Mo blong talem stret, i bin gat ol taem we ol memba o ol lida insaed long Jos oli mekem mistek nomo. I save gat sam samting we oli talem o mekem we oli no stret wetem ol valiu, ol prinsipol o doktrin blong mifala.
Mi ting se Jos bae i stret gud evriwan nomo sapos ol man we oli stret gud evriwan oli lidim. God i stret gud evriwan, mo doktrin blong Hem i klin gud. Be Hem i wok tru long yumi—Ol pikinini blong Hem we yumi no stret gud evriwan—mo ol pipol we oli no stret gud evriwan oli mekem ol mistek.
Insaed long taetol pej blong Buk blong Momon, yumi ridim: “Mo nao, sapos i gat sam samting we i no stret oli ol mistek blong ol man; from samting ia, no toktok agensem ol samting blong God, blong mekem se yufala i stap klin gud long fored blong jea blong jajmen blong Kraes.”6
I bin olsem oltaem nomo, mo bae i stap olsem kasem stret dei taem Kraes Hemwan bae i rul Hemwan long wol ia.
Sore tumas we sam oli foldaon from ol mistek we man i bin mekem. Be nomata ol mistek ia, trutok we i no save finis blong gospel we i kambak, mo Jos blong Jisas Kraes i no gat mak long hem, oli no daonem o prapa spolem.
Olsem wan Aposol blong Lod Jisas Kraes, mo olsem wan we i bin luk long ae blong hem ol kaonsel mo ol wok blong Jos ia, mi talemaot tabu witnes blong mi: “Evri bigfala desisen we i tajem Jos mo ol pipol blong hem we oli stap mekem, oli tingting long olgeta wetem prea, mo oli stap go long springwota blong evri waes tingting blong kasem daereksen. … God bae i no letem blong wok blong Hem i go olbaot.”
I Gat Rum I Stap blong Yu
Long olgeta we oli go longwe long Jos, mi save talem ol dia fren blong mi, se i gat wan ples yet i stap blong yu long ples ia.
Kam, ademap talen, presen, mo paoa blong yu long hemia blong mifala. Bae long en, yumi kam moa gud olsem wan ansa.
Sam oli save askem,“?Be olsem wanem long ol tu tingting blong mi?”
Hem i nomol blong gat kwestin—sid blong ones fasin blong wantem save samting, plante taem, i givim smol lif mo i kam bigwan olsem wan bigfala oktri blong andastaning. I gat sam memba blong Jos we, long eni taem, oli no trabol wetem ol series kwestin. Wan long ol stamba tingting blong Jos, i blong fidim mo lukaotgud long sid blong fet ia—iven we samtaem, i stap putum rus long sanbij we i gat tu tingting o fasin blong no save stret. Fet i blong hop from ol samting we yumi no save luk be oli tru i stap.7
Ol brata mo sista—mi plis long yufala—gat tu tingting long ol tu tingting blong yufala bifo yufala i gat tu tingting long bilif blong yufala.8 Yumi neva mas letem tu tingting i holemtaet yumi i kalabus, mo i blokem yumi long lav, pis, mo ol tabu presen we oli kam tru long fet long Lod Jisas Kraes.
Sam oli save talem , “Mi no fit wetem yufala, ol pipol insaed long Jos ia.”
Sapos yu save luk insaed long hat blong mifala, ating bae yu faenem se yu fit wetem mifala i moa bitim wanem we yu tingting. Ating bae yu sapraes blong faenem se mifala tu i wantem samting, mo gat ol trabol, mo gat ol hop we i semmak long hemia blong yu. Haos mo ples we yu groap bae i defren long wanem we yu faenem long plante Lata-dei Sent, be hemia i save stap olsem wan blesing. Ol brata mo sista. Ol dia fren. Mifala i nidim talen mo tingting we i blong yufala nomo. Ol defdefren man mo woman, mo pipol raon long wol i wan paoa blong Jos ia.
Sam oli save talem, “Mi no ting se mi save laef folem ol standet blong yufala.”
!Hemia nao wan moa risen blong kam! Jos i stap blong i fidim olgeta we oli no stret evriwan, olgeta we oli traehad, mo olgeta we oli stap wari. Hem i fulap wetem ol pipol we oli wantem wetem ful hat blong olgeta, blong obei long ol komanmen nomata se oli no save gudolsem wanem blong mekem.
Sam oli save talem , “Mi save wan memba blong Jos blong yufala we i tufes . Bae mi neva joenem wan jos we i gat wan man olsem hem we i memba.”
Sapos yu talem mining blong tufes olsem wan we i no save laef stret gud evriwan folem bilif blong hem, nao, bae yumi evriwan i ol tufes. I no gat wan long yumi i semmak olsem Kraes we yumi save se i sapos blong stap olsem. Be yumi wantem blong winim man we i folem fasin blong wol, mo kam gud moa wetem help blong Atonmen blong Jisas Kraes.
Sapos hemia nao ol tingting blong hat blong yu, nao, nomata wanem situesen blong yu, histri blong yu, o paoa blong testemoni blong yu, i gat rum i stap blong yu insaed long Jos ia. !Kam joenem mifala!
!Kam Joenem Mifala!
Nomata ol samting we yumi, olsem man, yumi no strong long hem, mi gat tras se bae yu faenem, long medel blong ol memba blong Jos ia, plante gudgudfala sol we wol ia i save givim long yu. Jos blong Jisas Kraes, i stap pulum olgeta we oli kaen mo stap lukaotgud long man, olgeta we oli ones mo oli save wok.
Sapos yu ting se bae yu faenem ol pipol we oli stret gud evriwan long jos, bae yu harem nogud from. Be, sapos yu lukaotem doktrin blong Kraes we i klin gud, toktok blong God “we i stap hilim sol we i harem nogud,” 9 mo stap lukaotem paoa blong Tabu Spirit we i mekem man i tabu, nao, bae yu faenem hemia long jos. Long taem ia we fet i nomo strong—long taem ia we plante oli stap go longwe long paoa blong heven—long Jos, bae yu faenem wan pipol we i wantem tumas blong save mo kam kolosap moa long Sevya blong olgeta taem oli givim seves long God mo ol narafala man, semmak olsem yu. !Kam joenem mifala!
?Bae Yufala Tu I Gowe long Mi?
Mi stap tingbaot wan taem long laef blong Sevya, we plante oli livim Hem.10 Jisas i bin askem ol twelef disaepol blong Hem:
“?Yufala tu i wantem gowe long mi?
“Nao Saemon Pita i talem long hem se: ‘Masta. ?Bambae mifala i save go long hu? Yu nomo yu gat ol tok blong laef ya we i no save finis.’”11
Samtaem, yumi gat semfala kwestin ia blong ansarem. ?Bae yumi tu i gowe long Hem? O, olsem Pita, bae yumi hang long ol toktok blong laef we i no save finis.
Sapos yu lukaotem trutok, we i minim wan rod blong tanem bilif i kam aksen; sapos yu stap lukaotem wan ples we yu pat long hem: !Kam joenem mifala!
Sapos yu bin aot long bilif we yu akseptem wan taem: Kambak bakegen. !Joenem mifala!
Sapos yu gat temtesen blong givap: Stap smol taem moa. I gat rum i stap blong yu insaed long jos.
Mi askem strong long olgeta evriwan we i harem o ridim ol toktok ia: Kam joenem mifala. Kam folem singaot blong Kraes we i kaen gud. Tekem kros blong yu mo folem Hem.12
!Kam joenem mifala! From long jos, bae yu faenem samting ia we praes blong hem i bigwan tumas.
Mi testifae se long ples ia bae yu faenem ol toktok blong laef we i no save finis, rod i go long pis, promes blong fasin blong pemaot man, mo glad.
Mi prea strong se taem yu tru blong lukaotem trutok, bae long hat blong yu, bae yu wantem blong kam joenem mifala. Long nem blong Jisas Kraes, amen.