Kasem Taem Yumi Mit Bakegen

I Kam long Presiden Tomas S. Monson

Bae yumi soem moa kaen fasin long wanwan long yumi, mo bae yumi go mekem wok blong Lod.

Ol brata mo sista blong mi. Hat blong mi fulap gud taem yumi kam blong klosem gudfala jeneral konfrens ia blong Jos. Yumi bin kakae long saed blong spirit taem yumi bin lisin long ol kaonsel mo testemoni blong olgeta we oli tekpat long wanwan sesen.

Yumi bin gat blesing blong mit long ples ia long bigfala Konfrens Senta wetem pis mo sefti. Yumi gat konfrens i brodkas long plante ples, i krosem ol kantri i go long ol pipol evri ples. Nomata yumi longlongwe long yumi long bodi, mifala i filim spirit blong yufala.

Long ol Brata we oli rilisim olgeta long konfrens ia, mi wantem talem bigfala tangkyu long bihaf blong ful Jos from ol fo yia seves blong yufala. I gat fulap we oli kasem blesing tru long ol wok blong yufala long wok blong Lod.

Mi talem tangkyu long Tabenakol Kwaea mo ol nara kwaea we oli tekpat long konfrens ia. Miusik i bin naes mo i ademap gud filing blong Spirit we yumi bin filim long wanwan sesen.

Mi talem tangkyu from ol prea blong yufala long bihaf blong mi mo long bihaf blong evri Jeneral Atoriti mo ol jeneral ofisa blong Jos. Mifala i kam strong moa tru long olgeta.

Bae ol blesing blong heven i stap wetem yufala. Bae hom blong yufala i fulap wetem lav mo kaen fasin, mo wetem Spirit blong Lod. Bae, oltaem, yufala i fidim testemoni blong yufala abaot gospel, blong oli protektem yufala agensem bigfala faea blong enemi.

Konfrens i finis. Taem yumi gobak hom, bae yumi mekem long sef wei. Bae Spirit we yumi bin filim long ples ia bae i stap mo gohed blong stap wetem yumi taem yumi go mekem ol samting we yumi stap mekem evri dei. Bae yumi soem moa kaen fasin long wanwan long yumi, mo bae yumi go mekem wok blong Lod.

Ol brata mo sista blong mi. Bae God i blesem yufala. Bae pis we Hem i promesem i stap wetem yufala naoia mo oltaem. Mi talem tata long yufala kasem taem yumi mit bakegen long sikis manis taem. Long nem blong Sevya blong yumi we i Lod Jisas Kraes, amen.