2010–2019
Ol Desisen blong Taem we I No Save Finis
Oktoba 2013

Ol Desisen blong Taem we I No Save Finis

I Kam long Elda Rasel M. Nelson

Blong Kworom blong Olgeta Twelef Aposol

Waes yus blong fridom blong yu i mekem desisen blong yu i impoten blong yu gro long spirit, naoia mo long taem we i no save finis.

Ol dia brata mo sista blong mi. Wanwan dei i wan dei blong desisen. Presiden Tomas S. Monson i tijim yumi se “ol desisen i talemaot ples we yumi go long hem.”1 Waes yus blong fridom blong yu i mekem desisen blong yu i impoten blong yu gro long spirit, naoia mo long taem we i no save finis. Yu yu neva yang tumas blong lanem samting, o neva olfala tumas blong jenis. Ol tingting blong lanem samting mo jenis i kam from wan hanggri we i kam long heven insaed long yumi blong yumi progres blong taem we i no save finis.2 Wanwan dei i givim janis blong mekem desisen blong taem we i no save finis.

Yumi ol man we i no save finis—ol spirit pikinini blong paren long heven. Baebol i rekodem se “God i mekem man i tekem fasin blong hem mo i olsem hem,  …wan i man mo wan i woman.”3 I no longtaem i pas, mi harem wan kwaea blong ol pikinini oli singsing hym we yumi laekem, “Mi Pikinini blong God.”4 Mi askem miwan: “?From wanem mi no harem oltaem ol mama we i singsing o ol fetful papa oli singsing long hem? ?Weswe? ?Yumi evriwan i no ol pikinini blong God? Wanem i tru, !i no gat wan long yumi i save stop blong stap wan pikinini blong God!

Olsem ol pikinini blong God, yumi mas lavem Hem wetem evri hat mo sol blong yumi, i bitim we yumi lavem papa mo mama blong yumi long wol.5 Yumi mas lavem ol neiba blong yumi olsem ol brata mo ol sista. I no gat komanmen i bigwan moa bitim tufala ia.6 Mo yumi mas gat respek long praes blong laef blong man, truaot wanwan step blong laef ia.

Ol skripja oli tijim se bodi mo spirit oli sol blong man.7 From yumi gat tu pat, wanwan long yufala i save talem tangkyu long God from ol presen we i bodi mo spirit, we i no gat praes blong ol.

Bodi blong Man

Ol profesenol yia blong mi olsem wan dokta i givim mi bigfala respek long bodi blong man. God i krietem olsem wan presen i go long yu, !I gud tumas! Tingting long ae blong yu we i luk samting, ol sora we oli harem samting, mo fingga we i filim ol naes samting raon long yu. Bren blong yu i letem yu lanem samting, tingting, mo mekem stret tingting. Hat blong yu i pam we i no stop, dei mo naet, mo yu no luksave.8

Bodi blong yu i protektem hemwan. Sobodi i kam olsem wan woning se wan samting i rong mo i nidim blong lukluk. Ol sik we i gat bebet i kasem yu wanwan taem, mo taem i hapen, bodi i krietem tru blad wan samting we i mekem yu save stopem moa sobodi ia.

Bodi blong yu i fiksim hemwan bakegen. Ol katkat mo smol kil oli kam gud. Ol bun we i brok i save kam strong bakegen. Mi talem smosmol nomo long ol plante gud kwaliti we God i givim long bodi blong yumi.

Nomata hemia, i luk se long evri famle, o evri man mo woman, i gat sam situesen blong bodi we i nidim spesel kea.9 Wan paten blong stanap wetem wan jalenj olsem, Lod i bin givim. Hem i se: “Mi givim long ol man samting we i no strong blong mekem se oli save putum tingting blong olgeta i stap daon; … from sapos oli putum tingting blong olgeta i stap daon  … mo gat fet long mi, afta bae mi mekem ol samting we [oli] no strong long olgeta, bae oli kam strong long olgeta.”10

Ol spesel spirit, plante taem oli stap long ol bodi we oli no stret gud.11 Presen ia blong bodi ia, i save mekem wan famle i kam strong moa taem papa, mama mo ol pikinini oli glad blong bildimap laef blong olgeta raon long pikinini ia we i bon wetem ol spesel nid.

Fasin blong kam olfala tu, i wan presen we i kam long God, semmak olsem ded. Ded blong bodi blong yu i wan pat we i nid long bigfala plan blong God blong stap hapi.12 ?From wanem? From se ded bae i letem spirit blong yu i gobak hom long Hem.13 Long wan lukluk we i no save finis, ded i kam kwik tumas nomo long olgeta we oli no rere blong mitim God.

Wetem bodi blong yu we i wan impoten pat blong plan we i no save finis blong God, i no nid blong askem from wanem Aposol Pol i singaotem se i “tempol blong God.”14 Evri taem yu luk long mira, luk bodi blong yu olsem tempol blong yu. Trutok ia—we yumi mas glad from evri dei—i save lidim desisen blong yumi long stret wei long hao blong kea long bodi blong yumi mo hao blong yusum. Mo ol desisen ia bae oli talemaot ples we bae yu go long hem. ?Hao hemia i posibol? From se bodi blong yu i tempol blong spirit blong yu. Mo hao yu yusum bodi blong yu i makem spirit blong yu. Sam long ol desisen we bae i talemaot ples bae yu go long hem, i gat:

  • Wei we bae yu jusum blong kea mo yusum bodi blong yu.

  • Wanem fasin blong spirit we bae yu jusum blong developem.

Spirit blong Man

Spirit blong yu i wan bodi we i no save finis. Lod i talem long profet blong Hem, Ebraham se Hem i bin jusum Ebraham bifo Hem i bin bon.15 Lod i talem kolosap sem toktok abaot Jeremaea16 mo plante narawan moa.17 Hem i talem hemia abaot yu tu.18

Papa blong yu long Heven i bin save yu blong wan longlongfala taem finis. Yu, olsem boe o gel blong Hem; Hem i jusum yu blong kam long wol long stret taem ia, blong stap ol lida blong bigfala wok blong Hem long wol.19 Hem i jusum yu, i no from ol pat blong bodi blong yu, be from fasin blong yulong saed blong spirit, olsem strong tingting, strong paoa long tingting, tru hat, tosta from trutok, hanggri from waes tingting, mo wantem blong givim seves long ol narawan.

Yu bin developem sam long ol fasin ia, long laef bifo. Sam nara fasin, yu save developem long ples ia long wol20 taem yu gohed blong lukaotem olgeta.21

Wan fasin blong spirit we i impoten tumas, i fasin blong kontrol long yuwan—paoa blong putum waes tingting bifo filing blong bodi. Kontrol long yuwan i bildimap wan strong tingting. Mo tingting blong yu i talemaot wanem blong mekem long situesen we i had, i gat temtesen, mo i traem yu. Fasin blong livim kakae i helpem spirit blong yu blong developem fasin blong rul ova long filing blong bodi. Fasin blong livim kakae i mekem se yu gat moa raet long help blong heven, from i mekem prea blong yu i strong moa. ?From wanem i nid blong kontrol long yuwan? God i putum strong filing blong bodi insaed long yumi blong fidim yumi mo gat lav, we i impoten blong famle blong man i gogohed blong laef.22 Taem yumi kontrolem ol filing blong bodi insaed long limit blong loa blong God, yumi save glad long laef we i moa longfala, moa lav mo ful glad.23

Nao i no wan sapraes, se plante long ol temtesen blong aot long plan blong God blong stap hapi, i kam taem yumi no yusum gud ol stamba filing ia we God i givim. Blong kontrolem filing blong bodi blong yumi, i no isi oltaem. I no gat wan long yumi i kontrolem i stret gud.24 Mistek i hapen. Rong desisen i hapen. Sin i hapen. ?Bae yumi mekem wanem nao? Yumi lanem samting aot long olgeta. Mo yumi save sakem sin tru.25

Yumi save jenisim fasin blong yumi. Ol samting we yumi wantem i save jenis. ?Olsem wanem? I gat wan wei nomo. Tru jenis—jenis we i stap oltaem—o save kam tru nomo, taem yu kam gud, yu kam klin tru long paoa blong Atonmen blong Jisas Kraes we i mekem hemia i posibol.26 !Hem i lavem yufala—wanwan long yufala!27 Hem i letem yufala i kasem paoa blong Hem taem yufala i stap obei long ol komanmen blong Hem, wetem strong filing, strong tingting mo stret evriwan. I simpol olsem, mo i tru olsem. !Gospel blong Jisas Kraes, hem i gospel blong fasin blong jenis!28

Wan strong spirit blong man, we i kontrolem ol filing blong bodi blong hem, i masta blong ol filing mo ol strong filing, mo i no slef blong olgeta. !Kaen fridom ia, i impoten long spirit, olsem we oksijen i impoten long bodi! !Fridom aot long fasin blong stap slef yuwan, i blong stap fri tru!29

Yumi “fri blong jusum fridom mo laef we i no save finis, … o blong jusum blong kam prisena mo ded.”30 Taem yumi jusum hae rod we i go long fridom mo laef we i no save finis, rod ia i gat mared long hem.31 Ol Lata-dei Sent oli talemaot se “God i odenem mared bitwin man mo woman, mo famle hem i stamba blong plan blong Krieta.” Yumi save tu se “blong stap olsem man o woman, hem i wan stamba samting we i save talem stret huia nao yumi …[long] laef bifo …, laef long wol ia, mo laef we bae i kam afta mo from wanem hem i olsem.”32

Mared bitwin wan man mo wan woman i stamba blong doktrin blong Lod, mo i impoten tumas long plan we i no save finis blong God. Mared bitwin man mo woman, i paten blong God blong gat ful laef long wol mo long heven. Paten blong God abaot mared, oli no save abiusum, no andastanem o no andastanem gud.33 I no save olsem sapos yu wantem tru glad. Paten blong God abaot mared i protektem tabu paoa blong krietem laef, mo glad blong tru praevet lav.34 Yumi save se Adam mo Iv, God i maredem tufala bifo tufala i save glad ia we i joenem wan hasban mo waef.35

Long dei blong yumi, ol gavman oli gat wan wari blong protektem mared from ol strong famle oli bes wei blong lukluk long helt, edukesen, gudlaef, mo fiuja blong ol jeneresen we oli stap kam antap.36 Be tu, ol gavman oli fesem fos blong ol sosol muvmen mo defren kaen tingting, taem oli stap raetem, mo raetem bakegen mo putum loa i laef. Nomata wanem loa bae oli putum i stap, doktrin blong Lod, long saed blong mared mo klin tingting bae i no save jenis.37 !Tingbaot: sin, iven sapos man i putum long loa se i oraet, be i sin yet long ae blong God!

Taem yumi stap kopi folem fasin blong Sevya we i kaen mo i gat lav mo sore, taem yumi stap tekem ol raet mo ol filing blong evriwan long ol pikinini blong God se oli impoten, yumi no save jenisim doktrin blong Hem. I no stap long yumi blong jenisim. I stap long yumi blong stadi, andastanem mo difendem doktrin blong Hem.

Wei blong laef blong Sevya i gud. Wei blong Hem i tekem jastiti bifo mared mo stap tru fulwan insaed long mared laef.38 Wei blong Lod, i wan wei ia nomo, blong yumi gotru long hapines we i stap oltaem. Wei blong Hem i karem kamfot i kam long sol blong yumi, mo pis we i stap oltaem long hom blong yumi. Mo bes long evriwan, wei blong Hem i lidim yumi hom long Hem mo Papa blong yumi long Heven, long laef we i no save finis, mo fasin blong kam olsem god.39 Hemia i stret stamba blong wok mo glori blong God.40

Ol dia brata mo sista blong mi. Wanwan dei i wan dei blong mekem desisen, mo ol desisen blong yumi oli talemaot ples we yumi go long hem. Wan dei, wanwan long yumi bae i stanap long fored blong Lod blong kasem jajmen.41 Wanwan bae i gat wan intaviu wetem Jisas Kraes.42 Bae yumi ansa from ol desisen we yumi mekem abaot bodi blong yumi, fasin blong spirit blong yumi, mo hao yumi ona long paten blong God abaot mared mo famle. Blong yumi save jusum, wetem waes, ol desisen blong evri dei blong taem we i no save finis, i strong prea blong mi, long tabu nem blong Jisas Kraes, amen.

Ol Not

  1. Thomas S. Monson, “Decisions Determine Destiny” (Jos Edukesen Sistem,6 Nov. 2005), 3; speeches.byu.edu.

  2. Poen ia blong progres blong taem we i no save finis, man ia, W. W. Phelps i bin kasem gud long toktok blong hym we hem i bin raetem “If You Could Hie to Kolob” (Hymns, no. 284). Ves 4 i rid olsem: “I no gat en long klin fasin; / I no gat en long paoa; / I no gat en long waes tingting; / I no gat en long laet. / I no gat en long mared; / I no gat en long yut; / I no gat en long prishud; / I no gat en long trutok.” Ves 5 i finis wetem: “I no gat en long glori; / ThI no gat en long lav; / I no gat en blong stap laef; / I no gat ded long heven.”

  3. Jenesis 1:27; luk tu long Kolosi 3:10; Alma 18:34; Ita 3:15; Moses 6:9.

  4. “Mi Pikinini blong God,” Singsing Tabu mo Singsing blong Ol Pikinini, no. 301.

  5. Luk long Matiu 10:37.

  6. Luk long Mak 12:30–31.

  7. Luk long Doctrine and Covenants 88:15.

  8. Ol nara sistem oli stap wok tu insaed long bodi. Ol samting olsem sodium, potassium, mo kalsium, mo ol nara samting olsem wota, glukos, mo ol protin we i nid blong oli laef. Bodi i faet wetem ol gas olsem oksijen, mo kabon daeoksaed. Mi mekem ol nara samting olsem insulin, adrenalin, mo taeroksin. Ol level blong olgeta samting insaed long bodi, i gat limit blong olgeta i stap. I gat ol rilesensip we i stap bitwin sam pat blong bodi. Eksampol, wan sopsop samting long stamba blong bren i sakemaot wan homon blong muvum korteks blong mekem sam narafala homon. Bodi tempereja i stap long nomol 98.6˚F o 37˚C, nomata yu stap long medel blong wol o yu stap long Not Pol.

  9. Sam kondisen, oli save luk klia; sam narawan oli no luk gud. Sam oli kamaot long famle. Sam pipol oli fesem kansa, sam narafala, oli nogud long sam samting, i gogo olsem. Wanwan long yumi i save luksave weaples hem i no strong, mo wetem tingting we i stap daon, i lanem wanem Lod bae i tijim, blong mekem se wanem yu no strong long hem bae i mekem yu kam strong.

  10. Ita 12:27.

  11. Sam kondisen bae oli kam stret fulwan kasem taem blong Laef Bakegen long Ded, taem “evri samting bae i kambak gud mo fulwan bakegen (luk long Alma 40:23).

  12. Luk long Alma 42:8.

  13. Man we i raetem Ol Sam i talem se olgeta we oli impoten long ae blong Lod i ded blong olgeta sent (Ol Sam 116:15). Ded, i impoten long Lod from se hem i taem ol Sent i kambak hom long Lod.

  14. Fas Korin 3:16; luk tu long 6:19.

  15. Luk long Abraham 3:23.

  16. Luk long Jeremaea 1:5.

  17. Luk long Alma 13:2–3.

  18. Luk long Doctrine and Covenants 138:55–56.

  19. Luk long Alma 13:2–3; Doctrine and Covenants 138:38–57.

  20. Ol gud fasin blong fet, klin fasin, save, kontrol, longfala tingting, fasin we i kaen, fasin olsem hemia blong God, jareti, fasin blong tingting i stap daon, mo fasin blong wok wetem strong tingting (luk long Doctrine and Covenants 4:6) oli pat blong ol presen blong spirit we yumi save developem mo kasem. Fasin blong talem tangkyu i wan narafala fasin blong spirit we oli save developem. Fasin blong talem tangkyu i talem olsem wanem bae yus tap long wan dei, mo hamas wok bae yu mekem. Taem yu bon bakegen long God long saed blong spirit, bae yu kasem pikja blong Hem long fes blong yu wetem tangkyu (luk long Alma 5:14).

  21. Luk long Fas Korin 12; 14:1–12; Moronae 10:8–19; Doctrine and Covenants 46:10–29.

  22. Sam, oli gat temtesen blong kakae tumas. “Fasin blong stap fatfat tumas i wan bigfala wari raon long wol, mo samples 2.8 milian pipol oli ded evri yia from oli fatfat tumas” (“10 Facts on Obesity,” World Health Organization, Mar. 2013, www.who.int/features/factfiles/obesity/en). Sam narafala, oli gat temtesen blong kakae smol tumas. Tufala sik ia i spolem plante laef, mared, mo famle. Mo sam oli gat temtesen tru long strong filing long saed blong seks, we Krieta i blokem. Samting i stap klia long Handbook 2: Administering the Church, we i talem se: “Loa blong Lod long saed blong jastiti, hem i blong no gat seks aotsaed long mared we i folem loa, mo blong stap tru long patna insaed long mared. … Adaltri, fasin blong gat seks wetem man/woman we i no mared, ol rilesen blong man wetem man, o woman wetem woman, mo evri narafala praktis we i no tabu, i no stret, o i no klin, oli ol sin.” Hanbuk i talem bakegen: “Ol fasin we man i stap wetem man, o woman wetem woman, i brekem ol komanmen blong God, i no folem ol stamba tingting biaen long fasin blong man i gat seks, mo i karemaot ol blesing we oli save faenem insaed long famle laef, mo long ol odinens blong gospel we i sevem laef. … Taem Jos i agensem fasin blong man i stap wetem man, o woman wetem woman, Jos i stap go aot tu long ol man mo woman, wetem andastaning mo respek long olgeta we oli gat filing long olgeta we i semmak long olgeta, olsem man wetem man, o woman wetem woman” ([2010], 21.4.5; 21.4.6).

  23. Luk long Fas Korin 6:9–20; Jemes 1:25–27; Doctrine and Covenants 130:20–21. Mo oltaem yumi mas tingbaot se man i stap blong hem i save gat glad (2 Nifae 2:25).

  24. Laef long wol ia, i wan taem blong tes, olsem skripja i eksplenem, we i talem se Lod bae i testem ol man blong luk sapos bae oli mekem evri samting we Lod, God blong olgeta bae i talem long olgeta (luk long Abraham 3:25).

  25. Luk long Mosaea 4:10; Alma 39:9; Helaman 15:7. Handbook 2 i tekem mesej ia: “Fasin ia blong man i laekem man, o woman i laekem woman, Lod i save fogivim tru long tru fasin blong sakem sin” (21.4.6).

  26. Tru long Atonmen blong Jisas Kraes mo tru long fasin blong obei long ol prinsipol blong gospel, Lod bae i save sevem evriwan (luk long Doctrine and Covenants 138:4; Ol Toktok blong Bilif 1:3).

  27. Luk long Ita 12:33–34; Moronae 8:17.

  28. Luk long Mosaea 5:2; Alma 5:12–14.

  29. Luk long Rom 8:13–17; Galesia 5:13–25; Doctrine and Covenants 88:86.

  30. 2 Nifae 2:27.

  31. Luk long Doctrine and Covenants 131:1–4.

  32. “Famle: Wan Ofisol Toktok I Go long Wol,” 35538 852o Liahona, Nov. 2010, 129.

  33. Luk long Matiu 19:4–6; Mosaea 29:26–27; Hileman 5:2.

  34. Wanwan man o woman, taem hem i bon long wol ia, hem i gat wan aedentiti we i blong hemwan nomo, ol kromosom blong hem, mo wan DNA blong hemwan. DNA i wan pat blong bodi we i tekem kod blong yu we bodi i yusum blong develop mo wok gud. DNA blong wanwan i kamaot taem DNA blong wan papa mo wan mama i kombaen blong krietem wan niufala DNA blong wan niufala bodi—wan patnasip bitwin papa, mo wan mama, mo pikinini.

  35. Luk long Jenesis 2:24–25; 3:20–21; 4:1–2, 25.

  36. Dokta Patrik F. Fagan i raetem: “Brikis blong bilding we ol rij mane blong ekonomi i dipen, i haos blong papa mo mama we i mared—speseli rij pikinini we i wosip evri wik. … Evri mared i krietem wan niu haos, wan independen yunit blong ekonomi we i mekem mane, i spendem mane, mo i sevem mane, mo i investem mane” (“The Family GDP: How Marriage and Fertility Drive the Economy,” The Family in America, vol. 24, no. 2 [Spring 2010], 136).

  37. Luk long Eksodas 20:14; Levitikas 18:22; 20:13; Dutronome 5:18; Matiu 5:27–28; Mak 10:19; Luk 18:20; Rom 1:26–27; 13:9; Mosaea 13:22; 3 Nifae 12:27–28; Doctrine and Covenants 42:24; 59:6.

  38. Luk long Gordon B. Hinckley, “This Thing Was Not Done in a Corner,” Ensign, Nov. 1996, 49.

  39. Luk long Doctrine and Covenants 14:7.

  40. Luk long Moses 1:39.

  41. Luk long 2 Nifae 9:41, 46; Mosaea 16:10.

  42. Bambae oli jajem yumi folem ol wok mo ol tingting blong hat blong yumi (luk long Doctrine and Covenants 137:9; luk tu long Hibrus 4:12; Alma 18:32; Doctrine and Covenants 6:16; 88:109).