Lukluk I Go Fored mo Biliv

I kam long Elda Edwod Dube

Blong Olgeta Seventi

Long ae blong Lod, i no tumas wanem we yumi bin mekem o wea yumi bin go, be moa long wea nao yumi gat glad hat blong go long hem.

Taem mi bin wan boe, taem we mi bin stap wok wetem mama blong mi long garen, hem i bin tijim mi wan long ol impoten lesen long laef. Hem i bin wan moning, san i stap antap mo mi ting se mitufala i bin stap katem graon longtaem finis. Mi bin stop blong lukluk i gobak long wanem we mitufala i bin mekem finis mo talem long mama blong mi, “!Luk long wanem nao yumitu mekem finis!” Mama i no bin ansa nating. Mi ting se hem i no bin harem mi, mekem se mi ripitim bakegen be long wan voes we i laod smol. Hem i no ansa nating. Mi leftemap smol moa voes blong mi mo ripitim bakegen. Long en, hem i bin tanem hem i kam long mi mo talem, “Edwod, neva luklukbak, luk i go fored long wanem we yumi gat yet blong mekem.”

Ol dia brata mo sista blong mi, kavenan we yumi bin mekem wetem Lod taem we yumi bin baptaes, “blong stap olsem ol witnes blong God long oltaem mo evri samting, mo long evri ples we [yumi] save stap long hem” (Mosaea 18:9), i wan longtaem komitmen. Presiden Ukdof i bin kaonsel, “Olgeta we oli bin go tru wota blong baptaes mo kasem presen we i Tabu Spirit oli putum ol leg blong olgeta long rod blong stap olsem wan disaepol mo kasem wan wok blong folem oltaem mo stap fetful long ol futstep blong Sevya blong yumi.” (“Saints for All Seasons,”Ensign o Liahona, Sept. 2013, 5). Lod tru ol wokman blong Hem i bin singaot yumi blong sev long sam koling, we yumi bin akseptem wetem wan ful komitmen. Taem oli rilisim yumi mo singaotem yumi long wan defren wok we i kamaot, yumi akseptem wetem glad wetem save se ol olfala blong yumi oli bin save, se “long wok blong Lod, hem i no wea ples nao yu givim seves long hem be hem i hao nao yu givim seves.” (J. Reuben Clark Jr., in Conference Report, Apr. 1951, 154).

Mekem se taem wan stek presiden o wan bisop i rilis, hem i akseptem wetem glad rilis ia blong hem, mo taem oli givim wan koling long hem blong wok, tru ol wokman blong Hem, long eni ples we Lod i luk “i stret” (Mosaea 3:19), hem i no tekem eksperiens blong hem fastaem i kam blokem hem, o i no luklukbak mo ting se hem i bin wok inaf ia nao. Hem i “mas taed blong mekem gud samting,” from hem i save se hem i bin “putum fandesen blong wan bigfala wok” wetem wan klia visen se hadwok olsem i save blesem ol laef blong taem we i no save finis. From samting ia, “aot long ol smol samting ol bigfala samting i kam tru” (Luk longD&C 64:33).

Yumi mas “putum yumi fulwan long ol gudfala wok, mo mekem plante samting long tingting blong [yumiwan], mo mekem se ol stret mo gud fasin i save kamtru” (D&C 58:27).

Elda Jefri R. Holan blong Kworom blong Olgeta Twelef Aposol i bin kaonsel se: “Yumi lanem nomo long ol samting we i pas be i no blong yumi laef long hem. Yumi luklukbak blong lanem long ol gud samting be i no long ol nogud eksperiens. Mo taem yumi lan long wanem we yumi nid blong lanem mo karem wetem yumi ol moa gud eksperiens, afta yumi luk i go fored mo tingbaot se fet oltaem, i poen i go long fiuja” (“The Best Is Yet to Be,” Ensign, Jan. 2010, 24; o Liahona, Jan. 2010, 18)..

Taem lesen blong mama blong mi blong lukluk i go fored, i abaot ol samting we yumi save luk long garen, i no semmak tumas long wanem we ol eli Sent i bin go tru long hem. Elda Josef B. Witlin i bin tokbaot gud eksperiens ia: “Long 1846, i gat moa bitim 10,000 pipol we i bin aot long naesfala siti blong Nauvu we oli bin bildim antap long Misisipi Riva. Wetem fet we oli gat long ol profet olsem lida, ol eli memba blong Jos ia oli bin aot long “Naesfala Siti” blong olgeta mo go long drae ples folem rod i go long boda blong Amerika. Oli no bin save weaples nao oli stap go, o hamas kilometa yet blong kasem, bae i tekem hao long blong kasem, o wanem nao bae i fiuja blong olgeta. Be oli bin save, Lod mo ol wokman blong Hem oli bin lidim olgeta”. Ensign, May 1996, 33).

Oli bin save se i bin olsem wanem blong lukluk i go fored mo biliv. Afta 10 mo haf yia, sam long ol memba ia oli bin stap taem oli kasem revelesen ia:

Lod i talem se Hem i blesem evriwan we oli stap obei long ol komanmen blong Hem, nomata sapos hem i long laef ia o long ded. Taem yumi stap fetful long hadtaem, bae yumi kasem wan praes we i bigwan moa insaed long kingdom blong heven.

Yumi no save luk wetem ae blong yumi nomo, long taem naoia, plan ia blong God blong yumi, abaot ol samting we bae oli hapen naoia i go, mo glori we bae i kam afta plante hadtaem. (luk longD&C 58:2–3).

Yumi tu, yumi save lukluk i go fored mo biliv. Yumi save akseptem invitesen blong Lod blong yumi, we i invaetem yumi wetem ol open han blong Hem:

“yufala evriwan we yufala i stap hadwok tumas mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud .

“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet, mo tingting blong mi i stap daon. Mo yufala i mas lan long mi. Nao bambae yufala i save faenem pis long laef blong yufala.

“… from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi” (Matiu 11:28–30).

Dia profet blong yumi, Presiden Tomas S. Monson; ol kaonsela blong hem; mo Kworom blong Olgeta Twelef Aposol i bin givimaot wan invitesen long yumi evriwan blong tekpat long wok blong fasin blong sevem man. Ol niu konvet, yut, yang adalt, olgeta we oli ritae long wok blong olgeta, mo ol fultaem misinari, oli nidim blong oli mekem semmak blong mekem wok blong fasin blong sevem man i muv hariap.

Presiden Boed K. Peka blong Kworom blong Olgeta Twelef Aposol i bin atendem wan kompetisen blong buluk i pulum samting, mo hem i bin lanem wan lesen. Hem i talem eksperiens ia: “Wan flat wud i fulap gud long ol brikis: 4535 kilo—we i faef tan. … Stamba tingting i blong buluk i muvum flat wud ia i go 91 sentimeta. … Mi bin luksave tu sem bigfala miks kala blu grei animol. … bigfala blu buluk blong taem bifo.

Taem hem i stap tokbaot risal blong kompetisen ia, hem i talem: “Ol tim oli bin lus wan afta wan. … !Bigfala blu buluk ia i no win nating! Tu smol defren animol, we saes blong tufala i nogud tumas, be tufala i bin muvum flat wud ia long evri tri taem ia.”

Afta hem i bin givim wan eksplenesen long sapraes risal ia: “Ol bigfala buluk ia oli bigwan, strong mo gat gud saes bitim ol narawan. Be smol buluk i bin gat moa gud timwok mo kodinet gud. Tufala i leftemap hevi samting ia tugeta. Tugeta animol i pulum i go fored semtaem mo paoa blong tufala i muvum flat wud ia” (“Equally Yoked Together,” toktok we i kamaot long wan semina blongrepresentetiv blong rijin, 3 Epril 1975; long Teaching Seminary: Preservice Readings [2004], 30).

Taem yumi lukluk i go fored mo biliv, yumi nidim sem timwok ia blong muvum kwik wok blong fasin blong sevem man taem yumi invaetem ol nara man blong kam long Kraes. Wetem hamas we yumi save mekem, yumi nid blong folem kaonsel blong Presiden Dita F. Ukdof blong “stanap kolosap tugeta mo leftemap long ples we yumi stanap long hem” (“Lift Where You Stand,” Ensign o Liahona, Nov. 2008, 56). Yumi save kam blong save wanem yumi gud long hem, semmak olsem we L. Tom Peri blong Kworom blong olgeta Twelef i se: “Taem mi travel truaot long Jos, mi sapraes long ol gud samting we i stap hapen. Be mi neva filim se yumi, olsem wan pipol, i kasem mak we yumi sud laef long hem. Tingting blong mi, se yumi no wok tugeta oltaem, se yumi stap intres moa long ol ona mo sakses blong wol, mo soem smol intres nomo long sem gol blong evriwan we i blong bildim kingdom blong God” (“United in Building the Kingdom of God,” Ensign, May 1987, 35).

Bae yumi kam wan long wan sem stamba tingting blong mekem man i nomo save ded mo i kasem laef we i no save finis (luk longMoses 1:39).

Sevya blong yumi, Jisas Kraes, we i stap luk stat i go kasem en, i bin save gud rod we bae Hem i wokbaot long hem i go long Getsemane mo Golgota taem Hem i se, “Man we i stap holem stia blong bot, be oltaem i stap lukluk biaen, hem i no naf blong kam we God i King blong hem” (Luk 9:62). Long ae blong Lod, i no tumas wanem we yumi bin mekem o wea yumi bin go, be moa long wea nao yumi gat glad hat blong go long hem.

Ol prinsipol we oli stap lidim yumi, oli bin tijim long yumi tru long Profet Josef Smit. “Stamba tingting blong ol prinsipol blong relijin blong yumi oli ol testemoni blong ol Aposol mo Profet, abaot Jisas Kraes, we Hem i bin ded, oli berem Hem, mo i girap bakegen long nambatri dei, mo i go antap long heven; mo evri narafala samting we i abaot relijin blong yumi oli hang long ol samting ia” (Teachings of Presidents of the Church: Joseph Smith [2007], 49).

Mi testifae se taem yumi folem eksampol blong Sevya blong yumi, Jisas Kraes, mo leftemap ol han blong yumi i go antap long swea wetem aksen ia se bae yumi sastenem profet blong yumi we yumi lavem, Presiden Tomas S. Monson, bae yumi faenem pis, kamfot, glad mo bae yumi “kakae ol gudfala kaekae blong graon ia … long en blong ol las dei ia” (luk longD&C 64:34). Long nem blong Jisas Kraes, amen.