Ol Krae blong Jeremaea: Lukaot long Fasin blong Kam Slef
I Kam long Elda Kwentin L. Kuk
Blong Kworom blong Olgeta Twelef Aposol
Jalenj blong yumi i blong kamaot long eni kaen fasin blong stap slef, helpem Lod blong karem i kam tugeta ol man we Hem i jusum, mo sakrifaes blong ol jeneresen we i stap kam antap.
Eli long mared blong mitufala, waef blong mi Meri mo mi, i bin disaed se olsem we bae mitufala i save mekem, bae mitufala i jusum ol aktiviti we mitufala i save go long hem tugeta. Mitufala i wantem tu blong stap waes long hamas mane mitufala bae i spendem long olgeta taem olsem. Meri i lavem miusik mo hem i gat wari se bae mi laekem tumas olgeta spot taem, mekem se hem i agri se blong evri entetenmen we oli pem, bae i mas gat tu miusik so, opera, o kalja aktiviti blong wanwan spot taem we oli pem blong go long hem.
Long fas ples, mi no wantem go long opera, be wetem taem, mi bin jenisim tingting blong mi. Mi bin kam blong laekem opera we Giuseppe Verdi i singsing long hem.1 Wik ia bae i namba 200 aniveseri blong taem we hem i bon.
Long yang taem blong hem, Verdi i interes long profet Jeremaea, mo long 1842 taem hem i gat 28 yia, hem i kam popula wetem opera drama, Nabucco, sot nem long lanwis blong Itali blong Nebukadnesa, king blong Babilon. Drama opera ia i tekem sam tingting we i kamaot long ol buk blong Jeremaea, Ol Krae mo Ol Sam long OlTesteman. Drama opera ia i tokbaot tu taem oli tekova long Jerusalem mo fasin blong kam slef blong ol Jiu. Ol Sam 137 i wan insperesen long gud mo naes singsing blong Verdi “Kores blong Ol Hibru Slef.” Taetol blong ol sam ia long ol skripja blong yumi i wan samting we i bigwan tumas. “Be long taem blong slef, ol Jiu oli krae folem reva blong Babylon—from ol harem nogud, oli no save akseptem blong singsing long singsing blong Saeon.”
Stamba tingting blong mi i blong luklukbak long ol defren wei blong stap slef mo fasin blong winim tingting. Bae mi komperem sam situesen blong ol dei blong yumi wetem situesen long dei blong Jerusalem bifo Jerusalem i foldaon. Taem mi stap presentem voes blong woning, mi hapi se bigfala namba blong ol memba blong Jos oli stret mo gud mo stap ronwe long ol fasin we oli mekem Lod i harem nogud long taem blong Jeremaea.
Ol profesi mo ol krae blong Jeremaea oli impoten long ol Lata-dei Sent. Jeremaea mo Jerusalem blong taem blong hem i wanem i stap biaen long stat blong Buk blong Momon. Jeremaea i wan man long taem blong profet Lihae.2 Lod i talem long Jeremaea abaot fasin we oli bin jusum hem: “Taem mi mi no wokem yu yet long bel blong mama blong yu be mi mi save yu finis. Mo taem yu yu no bon yet, be mi mi jusumaot yu o mi makemaot yu, mi mekem yu yu tabu, blong yu kam wan profet, blong yu talemaot tok blong mi long ol man blong olgeta kantri long wol.”3
Lihae i gat wan defren koling, misin mo asaenmen we i kam long Lod. Lod i no singaotem hem long yang taem blong hem, be long taem hem i wan bigman. Long fas taem, mesej blong hem i wan voes blong woning, be afta we hemi bin fetful blong talemaot semfala mesej olsem Jeremaea, Lod i komandem Jeremaea blong karem famle blong hem mo go long ples we i no gat man long hem.4 Taem hem i mekem olsem, Lihae i no blesem nomo famle blong hem nomo, be tu, evri pipol.
Long ol yia bifo Jerusalem i lus evriwan,5 ol mesej we Lod i bin givim long Jeremaea i naes tumas mo man i no save fogetem. Hem i talem se:
“My people have changed their glory for that which doth not profit. … [Ol pipol blong mi oli bin lego god blong olgeta from sam narafala god we i no givhan long olgeta.]
“… [oli] gowe long springwota we i save givim laef, oli biaen long ol narafala god we oli olsem tank we oli brok, i no save holem wota.”6
Taem Hem i tokbaot olgeta disasta we bae oli kam long ol man long Jerusalem, Lod i talem i tok sore mo talem: “Taem blong tekemaot kakae long garen i pas, mo draetaem i finis, be Hae God i no sevem yumi yet.”7
God i wantem se man mo woman i fri blong jusum bitwin gud mo nogud. Taem nogud joes i kam fasin we i rul long wan kalja o nesen, i gat ol series risal, tugeta long laef long wol ia mo long laef we i stap kam. Ol pipol oli save kam ol slef, o oli putum olgetawan long fasin blong slef, i no tru long ol samting nogud olsem drag, be tu, tru long ol nogud tingting we i mekem wan man i aot long fasin blong stap stret mo gud.
Taem yumi tanem baksaed blong yumi long fasin blong wosipim God we i tru mo i stap laef, mo yumi stap wosipim ol giaman god olsem mane mo kam popula mo stap mekem ol rong fasin long saed blong seks mo gat ol rong fasin, i mekem yumi foldaon long evri kaen wei blong stap slef. Ol samting ia, i gat: fasin blong kam slef long saed blong spirit, long saed blong bodi, mo long saed blong waes, mo samtaem i mekem yumi prapa lus gud. Jeremaea mo Lihae, tufala i tijim tu se olgeta we oli stret mo gud, oli mas helpem Lod blong stanemap Jos mo Kingdom blong Hem mo karembak tugeta Isrel we i bin go wanwan olbaot.8
Ol mesej blong olgeta i gogo long evri ples mo oli bin talem strong ova plante handred yia long evri dispensesen. Oli stap long stamba blong gospel blong Jisas Kraes we i kambak long las dispensesen ia.
Taem ol Jiu oli stap long kalabus mo ol laen blong Israel oli bin go wanwan, mo tu ol ten traeb blong Israel, oli ol impoten trutok insaed long gospel we i bin kambak. Ol ten traeb we oli bin lus oli Not Kingdom blong Isrel mo oli bin karem olgeta i go prisena long Asiria long 721 bifo Kraes. Oli bin go long ol kantri long Not.9 Nambaten toktok blong bilif blong yumi i talem, “Mifala i biliv se bambae Isrel i mas kambak tugeta, mo ol Tenfala Traeb bae oli mas kambak bakegen.”10 Mifala i biliv tu se olsem pat blong kavenan we Lod i mekem wetem Ebraham, bae i no nomo ol laen blong Ebraham bae i kasem blessing be evri pipol blong wol bae i kasem blesing. Olsem Elda Rasel M. Nelson i talem, blong Israel i kambak “i no wan mata blong ples. Be i mata blong komitmen blong wanwan man. Ol pipol ‘oli save kam blong kasem save blong Lod’, [3 Nifae 20:13] mo “no nid blong livim homples blong olgeta.”11
Doktrin blong yumi i klia: “Lod i seraotem mo mekem ol twelef traeb blong Isrel oli harem nogud from ol fasin nogud mo fasin blong agens blong olgeta. Be, Lod i yusum fasin blong seraotem ol pipol blong hem we hem i bin jusum i go long medel blong ol nesen long wol blong blesem olgeta nesen ia.”12
Yumi lanem impoten lesen aot long taem blong harem nogud ia. Yumi mas mekem evri samting long paoa blong yumi blong stap longwe long sin mo fasin blong go agens we i save lidim yumi i go long fasin blong kam slef.13 Yumi luksave tu se fasin blong stap stret mo gud i wan kondisen blong helpem Lod blong karem i kam tugeta ol man we hem i jusum mo kam tugeta blong Israel.
Slef, fasin blong winim tingting, fasin blong stap dipen mo blong kam olsem slef oli save kam long fulap rod. Oli save kam olsem ol fasin blong slef long saed blong bodi, be tu, oli save kam taem yumi lusum samting, o lusum fridom blong joes, we i mekem se yumi nomo save progres. Jeremaea i talem klia se fasin we i no stret mo i nogud, mo fasin blong go agens, oli ol stamba risen blong Jerusalem i lus evriwan, mo blong Babylon i kam prisena.14
Ol narafala kaen fasin blong slef oli save spolem tu spirit blong man. Gud fasin blong fridom blong joes, oli save yusum nogud long plante wei.15 Bae mi tokbaot fo we oli prapa spolem man long kalja blong tedei.
Faswan. Adiksen we i blokem fridom blong joes, we i go agensem ol klin biliv mo i spolem gud helt, i mekem man i kam slef. Wok blong drag mo alkol, nogud tingting long saed blong seks, ponografi, fasin blong plei mane, fasin blong kontrolem man wetem mane mo ol nara harem nogud, i givim long olgeta we oli slef mo stap long sosaeti, wan harem nogud we i bigwan tumas we i had blong makem.
Seken. Sam long ol adiksen o fasin blong oltaem wantem stap mekem ol samting, we oli no nogud be i save yusum ol gudfala taem we yumi save yusum blong fulfilim sam gudfala samting. Sam long ol samting ia i gat: fasin blong yusum tumas intanet, ol video mo lektronik gem, ol spot, ol pleiplei mo plante narafala.16
Olsem wanem yumi sevem taem blong stap wetem famle i wan long ol impoten poen we yumi stap fesem long plante kalja. Long taem we miwan nomo mi bin wan memba blong Jos long loa kampani blong mifala, wan woman loya i eksplenem long mi olsem wanem hem i oltaem filim olsem wan man we i stap traem blong sakem tri bol long ea long semtaem. Wan bol i praktis blong loa blong hem, wan i mared blong hem, mo wan i ol pikinini blong hem. Kolosap we hem i nomo gat taem blong hemwan. Hem i wari tumas se, oltaem, wan bol foldaon i stap. Mi givim tingting ia se bae mifala i mit olsem wan grup mo toktok raon long ol fas wok blong mifala. Mifala i faenemaot se fas risen blong mifala i wok, i blong sapotem famle blong mifala. Mifala i agri se blong mekem plante mane i no impoten bitim ol famle blong mifala, be mifala i luksave se blong givim seves long kastoma wetem evri samting we mifala i gat i wan impoten samting. Toktok i go tu long saed blong wanem we mifala i stap mekem long wokples we i no go wetem fasin blong no spendem taem wetem famle. ?I gat presa blong spendem taem long ples blong wok we i no nid?17 Mifala i disaed se gol blong mifala, i blong gat wan ples we i stret long famle, hemia blong ol man mo ol woman. Yumi mas stanap long fored mo protektem taem blong spendem wetem famle blong yumi.
Nambatri, bigfala fasin blong control long ol dei blong yumi olsem we i bin stap truaot long ful histri i ol biliv blong ol tingting mo politik we oli no folem gospel blong Jisas Kraes. Blong riplesem ol tingting blong man wetem ol trutok blong gospel i save lidim yumi go longwe long simpol mesej blong Sevya. Taem Aposol Pol i bin visitim Aten, hem i traem blong tij long saed blong laef bakegen long ded blong Jisas Kraes. Long wok ia yumi rid long Ol Wok: “Oli tok olsem from we oltaem ol man Aten, mo ol strenja tu long ples ya oli wantem sidaon blong harem ol niufala tok.”18 Taem ol man oli luksave simpol mesej blong Pol, we i no niu, oli sakemaot mesej ia.
Hemia i semak long ol dei blong yumi taem oli sakemaot o no agri long ol trutok blong gospel, o oli tantanem blong mekem olgeta i kam waes, mo pulum tingting o i go folem ol kalja muvmen mo ol waes blong man. Sapos yumi no lukaot gud, yumi save kam prisena blong olgeta samting ia mo putum save blong yumiwan long fasin blong kam slef. I gat plante voes tedei we oli stap talem long ol woman olsem wanem blong laef.19 Plante taem, ol voes ia oli agensem wanwan long olgeta bakegen. Wan bigfala wari i ol tingting we oli spolem mo putum daon ol respek blong ol woman we oli stap jusum blong mekem sakrifaes we i nid blong kam olsem ol mama, ol tija, ol woman blong givim kaekae o ol fren blong pikinini.
Sam manis i pas, tufala yang apugel blong mitufala oli visitim mitufala—wan long wan wik. Mi bin stap long haos mo openem doa. Waef blong mi, Meri i bin stap long wan nara rum. Long tugeta kes, afta tufala i haggem tufala mo tufala i talem kolosap semmak samting. Tufala i lukluk raon mo talem se “Mi laekem blong stap haos blong bubuwoman. ?Wehem bubuwoman?” Mi no bin talem long tufala be mi stap tingting, “?hemia i no haos blong bubuman tu?” Be mi luksave se taem mi wan boe, famle blong mi i stap go long haos blong bubuwoman. Ol toktok blong wan singsing we mi save gud i kam long maen blong mi: “ova long reva mo tru long ol wud blong go long haos blong Bubuwoman.”
Nao, letem mi talem wetem wan klia voes se mi sapraes tumas wetem edukesen mo ol nara janis we i stap blong ol woman. Mi luksave ol hadwok mo ol wok long haos we woman i mas mekem i bin kamdaon long plante ples long wol from ol teknoloji blong tedei mo from ol women i stap mekem wan impoten kontribusen long every eria blong wok. Be sapos yumi letem kalja blong yumi i mekem spesel rilesensip we ol pikinini oli gat wetem mama mo bubuwoman i go daon mo ol narafala we oli fidim olgeta, bae yumi kam blong sore from.
Nambafo, ol fos we i agensem ol prinsipol blong relijin we yumi holem i save mekem yumi kam slef. Wan long ol nogud fasin ia i we taem ol stret mo gud pipol we oli akaontebol long God long saed blong ol fasin blong olgeta, oli fosem olgeta blong mekem ol aktiviti we i go agensem tingting blong olgeta—eksampol, ol man blong helt we oli fosem olgeta blong jus bitwin help wetem fasin blong kilimded pikinini we i go agensem tingting blong olgeta, o blong lusum wok blong olgeta.
Jos i wan smol namba iven taem yumi joen wetem olgeta we oli gat ol semak tingting. Bae i had blong jenisim Sosaeti long bigfala skel, be yumi mas wok blong mekem klin fasin blong tingting long kalja i kam antap. Ol Lata-dei Sent long evri kantri oli mas stap ol gudfala sitisen, ol man blong tekem pat long ol aktiviti blong gavman, tijim olgetawan long saed blong problem we i stap, mo vot.
Be fas tingting blong yumi, i mas oltaem blong mekem evri sakrifaes we i nid blong protektem famle blong yumi mo jeneresen we i stap kam antap.20 Bigfala namba oli no kam yet ol slef blong ol bigfala adiksen o ol giaman tingting. Yumi mas help blong priperem olgeta long wan wol i saon plante olsem Jerusalem we Lihae mo Jeremaea i kasem eksperiens long hem. Antap long hemia, yumi mas priperem olgeta blong mekem mo kipim ol tabu kavenan, mo blong stap olsem ol stamba man blong helpem Lod i stanemap Jos blong Hem mo karembak Israel we i bin seraot mo ol man we Lod i jusum long evri ples.21 Olsem Doktrin mo ol Kavenan i talem gud: “Olgeta we oli stret mo gud bae oli kam wanples aot long medel blong evri nesen, mo bambae oli kam long Saeon, mo oli stap singsing ol singsing blong wan glad we i no gat en.”22
Jalenj blong yumi i blong kamaot long eni kaen fasin blong stap slef, helpem Lod blong karem i kam tugeta ol man we Hem i jusum, mo sakrifaes blong ol jeneresen we i stap kam antap. Yumi mas oltaem tingbaot se yumi no sevem yumiwan. Yumi kam fri tru long lav, gladhat, sakrifaes blong Sevya we i pem praes. Taem famle blong Lihae i ronwe, laet blong Lod i lidim olgeta. Sapos yumi stap tru long laet blong Hem, folem ol komanmen blong Hem mo stap dipen long ol valiu blong Hem, bae yumi aot long fasin blong kam slef long spirit, long bodi, mo long saed blong save, mo i semak tu long krae blong yumiwan long ples we i no gat man long hem, from Hem i gat paoa blong sevem man.
Bae yumi stap longwe long lus tingting mo harem nogud blong olgeta we oli foldaon long kalabus, mo oli nomo save akseptem blong singsing long singsing blong Saeon. Long nem blong Jisas Kraes, amen.