Paoa blong Yuwan tru long Atonmen blong Jisas Kraes

I Kam long Elda Rijad G. Skot

Blong Kworom blong Olgeta Twelef Aposol

Tru long Atonmen blong Jisas Kraes, wanwan long yumi i save kam klin mo hevi trabol blong fasin blong agens blong yumi bae i go lus.

I no longtaem i pas, mi gat blesing blong mit wetem wan bigfala grup blong yut we oli kam long stet blong Aedaho. Wan yang woman wetem klin fasin i askem mi wanem mi filim i moa impoten samting we oli mas mekem long laef blong olgeta naoia i go. Mi talem se oli save lanem blong luksave paoa blong Atonmen blong Jisas Kraes long laef blong olgeta. Tedei, bae mi eksplenem wan nara pat blong paoa ia, we i paoa blong yuwan we yu save kasem tru long Atonmen blong Jisas Kraes.

Insaed long Buk blong Momon, yumi ridim abaot Amon mo ol brata blong hem we oli stap tijim gospel blong Jisas Kraes long wan pipol we oli bin “wael mo oli bin mekem hat blong olgeta i kam strong mo prapa wael.”¹ Plante long ol pipol oli bin jenisim laef blong olgeta, mo oli bin jusum blong livim fogud ol aksen blong sin blong olgeta. Oli bin jenisim laef blong olgeta fulwan nao, oli bin berem ol tul blong faet blong olgeta mo mekem kavenan wetem Lod se bae oli neva yusum olgeta bakegen.²

Sam taem afta, plante long ol brata blong olgeta we oli no jenisim laef oli kam long olgeta mo oli stat blong kilimded olgeta. Olgeta we oli kam fetful oli jusum blong ded anda long naef blong faet be i no blong spolem laef long saed blong spirit sapos oli tekem ol tul blong faet bakegen. Stret mo gud eksampol blong olgeta i bin helpem moa pipol blong jenisim laef blong olgeta, mo blong sakem daon ol tul blong faet blong olgeta.³

Tru long Amon, Lod i bin lidim olgeta blong go haed long medel blong ol man blong Nifae, mo oli bin save olgeta olsem ol pipol blong Amon.⁴ Ol man blong Nifae oli bin protektem olgeta blong plante yia, be long en, ami blong ol man blong Nifae oli stat blong nomo strong, mo i nidim man blong riplesem olgeta.⁵

Pipol blong Amon i stap long wan denja taem long laef blong olgeta long saed blong spirit. Oli bin tru long kavenan blong olgeta blong oli nomo tekem tul blong faet. Be oli bin andastanem se ol papa oli responsibol blong protektem famle blong olgeta.⁶ Hemia, i luk se i bigwan inaf blong oli tingting tu taem bifo oli brekem kavenan blong olgeta.⁷

Waes prishud lida blong olgeta, Hileman, i bin save se blong brekem wan kavenan wetem Lod, i no gat eskius long hem. Hem i givim nara tingting. Hem i talem bakegen long olgeta se ol boe blong olgeta oli no gilti long ol semfala sin ia, mo from hemia, oli no nid blong mekem semfala kavenan ia.⁸ Nomata ol boe blong olgeta oli yangfala, oli gat strong bodi, mo moa impoten, oli bin gat klin fasin mo oli bin klin gud. Ol boe ia, oli kam strong moa tru long fet blong mama blong olgeta.⁹ Anda long daereksen blong profet we i lida blong olgeta, ol yang man ia oli tekem ples blong papa blong olgeta blong difendem famle mo haos blong olgeta.¹⁰

Ol samting we i bin hapen raon long impoten desisen ia i soemaot olsem wanem Atonmen blong Jisas Kraes i givim paoa long wanwan laef blong ol pikinini blong God. Tingting long ol sopsop filing blong papa blong olgeta. ?Olsem wanem bae oli filim blong save se ol nogud fasin blong olgeta blong bifo i blokem olgeta mekem se oli no save protektem ol waef mo ol pikinini blong olgeta long wan taem blong nid? Oli save stret ol nogud samting we ol boe blong olgeta bae oli fesem naoia, mo ating, long sikret, oli bin krae. !Ol papa, i no ol pikinini, oli sapos blong protektem famle blong olgeta!¹¹ Harem nogud blong olgeta i mas bigwan evriwan.

?From wanem prishud lida blong olgeta we i gat insperesen i fraet long tingting blong olgeta se bae oli karembak tul blong faet blong olgeta “nogud oli lusum sol blong olgeta”?¹² Lod i talemaot se man we i bin sakem ol sin blong hem, hem i fogivim hem, mo Lod i nomo tingbaot ol sin ia bakegen.¹³ Ol fetful papa ia, oli bin sakem sin blong olgeta longtaem finis mo oli kam klin tru long Atonmen blong Jisas Kraes, so, ?from wanem oli kasem kaonsel blong no difendem famle blong olgeta?

Hem i wan stamba trutok se tru long Atonmen blong Jisas Kraes, yumi save kam klin. Yumi save gat klin fasin mo stap klin gud. Be, samtaem, ol nogud joes blong yumi i livim yumi wetem ol risal we oli stap blong longlongtaem. Wan long ol stret stamba blong finisim rod blong sakem sin i blong tekem long yumi, ol sot taem mo longtaem risal, blong ol sin blong yumi. Ol joes blong olgeta bifo i bin mekem se ol papa ia blong Amon oli gat wan fasin blong wol ia we i save kam bakegen olsem wan poen we Setan bae i traem blong yusum bakegen.

Setan bae i traem blong yusum memori blong yumi blong eni rong bifo, blong pulumbak yumi anda long paoa blong hem. Yumi mas oltaem lukaotgud long ol trik blong hem. I bin olsem nao wetem ol fetful papa blong ol pipol blong Amon. Iven afta plante yia we oli bin gat wan fetful laef, i bin nid long olgeta blong oli protektem olgeta long saed blong spirit long eni memori blong ol sin blong bifo.

Long medel blong plante faet, Kapten Moronae i bin lidim wok blong protektem ol taon we oli no strong tumas. “hem i bin mekem se oli mas bildim wan fanis wetem ol bigfala timba, long saed we i kolosap long bigtaon long hol blong olgeta; mo oli bin sakem ol graon blong hol i go agensem fanis ia, we oli bildim wetem ol bigfala timba; … kasem taem we oli bin raonem bigtaon … wetem wan strong wol blong bigfala timba mo graon, we i hae bigwan.”¹⁴ Kapten Moronae i bin andastanem se i nid blong mekem strong ol ples we oli no strong blong mekem se i gat paoa.¹⁵

Ol papa ia blong Amon, oli semmak nomo. Oli nidim ol bigfala timba we i hae moa, mo i bigwan moa bitwin ol fetful laef blong olgeta mo ol nogud fasin blong olgeta blong bifo. Ol boe blong olgeta, we oli gat blesing blong gat ol stret mo gud kastom, oli no save foldaon long ol semfala temtesen. Oli save fetful blong difendem famle blong olgeta mo no spolem gud laef blong olgeta long saed blong spirit.

Gudfala nius long eniwan we i wantem blong oli karemaot ol risal blong ol nogud joes blong bifo, i we Lod i luk ol wik fasin blong yumi i defren long fasin blong agens. Long taem we Lod i givim woning long saed blong agens we oli no sakem sin from se i tekem panismen i kam,¹⁶ taem Lod i tokbaot ol wik fasin, oltaem, hem i wetem sore.¹⁷

Yes i tru, yumi save talem se ol papa blong ol man blong Amon oli bin kasem tijing blong ol rong kastom blong papa mo mama blong olgeta, be evriwan long ol pikinini blong Papa we i stap long Heven i kam long wol ia wetem Laet blong Kraes. Nomata risen blong ol nogud aksen blong yumi, risal blong hem i stat blong wan wik poen long saed blong spirit we Setan bae i traem blong yusum.

Wetem sore, oli bin tijim gospel long olgeta, oli bin sakem sin, mo tru long Atonmen blong Jisas Kraes, oli kam strong moa bitim ol trik blong Setan. I luk olsem se oli no bin filim temtesen ia blong gobak long prapa nogud fasin blong bifo, be yet, taem oli folem profet lida blong olgeta, oli no bin givim wan janis long Setan blong “giaman long ol sol blong olgeta, mo i lidim olgeta i gowe sloslo daon long hel.”¹⁸ Atonmen blong Sevya i no klinim olgeta nomo long sin, be tu, from oli bin obei long kaonsel blong prishud lida blong olgeta, Sevya i bin save protektem olgeta long ol wik fasin blong olgeta mo mekem olgeta oli kam strong moa. Komitmen blong olgeta wetem tingting i stap daon mo blong laef blong olgeta blong livim fogud ol sin blong olgeta, i bin mekem moa blong protektem famle blong olgeta, bitim eni samting we bae oli save mekem long ples blong faet. Taem oli folem toktok, i no bin blokem olgeta blong kasem blesing. I mekem olgeta i strong moa, i blesem olgeta mo i blesem fiuja jeneresen.

En blong stori i givim laet long olsem wanem sore blong Lod i mekem “ol samting we oli no strong oli kam strong.”¹⁹ Ol fetful papa ia oli bin sendem ol boe blong olgeta anda long kea blong Hileman. Nomata ol boe ia oli bin faet long ol strong faet we samfala oli kasem sam kil, i no bin gat wan i bin ded.²⁰ Ol yang man ia, oli bin wan bigfala paoa long ami blong ol man blong Nifae we i bin taed. Ol famle blong olgeta oli kasem blesing, proteksen, mo paoa.²¹ Long taem blong yumi, plante studen blong Buk blong Momon oli kam antap tru long eksampol blong ol boe ia we oli klin gud mo oli stret mo gud.

Wanwan long yumi i bin gat ol taem long laef blong yumi taem yumi bin mekem ol joes we i no gud tumas. Yumi evriwan i stap long bigfala nid blong gat paoa we i pemaot man blong Atonmen blong Jisas Kraes. Wanwan long yumi i mas sakem sin long eni fasin blong agens. Lod i talem se Hem i no save lukluk long sin wetem wan smol pat we Hem i save kseptem.²² Hem i no save mekem from se Hem i save hamas man i mas mekem blong kam olsem Hem.

Plante long yumi i bin letem ol wik fasin blong developem fasin blong yumi. Tru long Atonmen blong Jisas Kraes, yumi, semmak olsem ol man blong Amon, i save bildimap ol fanis long saed blong spirit bitwin yumi mo eni mistek blong bifo we Setan i stap traem blong yusum. Ol fanis long saed blong spirit we oli bildimap raon long ol papa blong ol man blong Amon i bin givim blesing mo paoa long olgeta, famle blong olgeta, kantri blong olgeta, mo ol fiuja jeneresen. Sem samting i tru wetem yumi.

?So olsem wanem yumi bildimap ol fanis ia blong taem we i no save finis? Fas step i mas kam wetem tru hat, wetem dip tingting, mo ful fasin blong sakem sin. Tru long Atonmen blong Jisas Kraes, wanwan long yumi i save kam klin mo hevi trabol blong fasin blong agens blong yumi bae i go lus. Tingbaot, fasin blong sakem sin i no wan panismen. Hem i rod ia we i fulap long hop i go long wan fiuja wetem moa glori.

Papa we i stap long Heven i givim yumi ol tul we i help blong bildimap ol fanis ia bitwin ol wik poen blong yumi mo fasin blong yumi stap fetful. Tingting long ol poen ia:

Mekem kavenan mo kasem ol odinens blong yuwan. Afta, sloslo mo oltaem, wok blong mekem ol odinens insaed long tempol blong ol bubu blong yu.
Serem gospel wetem olgeta we oli no memba, o ol lesaktiv famle o ol fren. Taem yu serem ol trutok ia, i save karem niu laef insaed long laef blong yu.
Fetful blong stap wok long evri koling blong Jos, speseli hom tijing mo visiting tijing. Yu no jes stap olsem wan 15 minit hom o visiting tija long manis. Be, go aot long wanwan memba blong famle. Kam blong save olgeta yuwan. Stap wan tru fren. Tru long ol aksen we oli kaen, soem olgeta hamas yu kea long wanwan long olgeta.
Moa impoten, givim seves long ol memba blong famle blong yuwan. Mekem fasin blong developem spirit long hasban, waef mo pikinini i wan fas wok we i hae moa. Luklukgud long ol samting we yu save mekem blong helpem wanwan long olgeta. Givim fri taem mo tingting blong yu.

Long wanwan long ol tingting ia, i gat wan samting we i semmak: fulumap laef blong yufala wetem seves long ol narafala man. Taem yu lusum laef blong yu long seves blong ol pikinini blong Papa long Heven,²³ ol temtesen blong Setan oli lusum paoa long laef blong yu.

From se Papa blong yumi long Heven i lavem yu bigwan, Atonmen blong Jisas Kraes i mekem se i posibol blong yu gat paoa. ?Hemia i no naes? Plante long yufala i bin filim hevi blong ol nogud joes, mo wanwan i save filim paoa blong Lod we i leftemap yu, paoa ia blong fogivnes, sore, mo paoa. Mi bin filim hemia, mo mi testifae se i stap tu blong wanwan blong yufala, long nem blong Jisas Kraes, amen.