Stap Kam Kolosap Moa long God

I Kam long Elda Terens M. Vinson

Blong Olgeta Seventi

Sevya blong yumi i wantem blong yumi rili lavem Hem i go kasem poen ia we bae yumi stretem tingting blong yumi i folem tingting blong Hem.

Apuboe blong mifala we i gat sikis yia, Oli, we i stap singaotem mi “Popi” i mas go karem wan samting insaed long trak. Papa blong hem i sidaon long haos, mo Oli i no save, be i prestem baten mo karemaot lok blong doa blong trak, mo afta, i lokem bakegen taem hem i finis. !Oli i ron i go insaed long haos wetem bigfala smael!

Ful famle i askem hem: “?Olsem wanem yu openem lok blong doa blong trak, mo afta yu lokem bakegen?” Hem i smael nomo.

Gel blong mitufala, mama blong hem, i talem: “!Ating i olsem we Popi i mekem—ating yu gat ol majik paoa olsem hem!”

Taem samting ia i hapen nambatu taem sam minit afta, ansa blong hem long sam moa kwestin abaot ol niu samting we hem i save mekem i go olsem: “!I gud tumas! !Mi ting se i from Popi i lavem mi mo i wan bes fren blong mi, mo hem i lukaot gud long mi!”

Mi bin gat blesing blong save abaot sam tru merikel we i bin hapen long laef blong ol fetful Sent raon long Afrika, Papua Niu Gini, Ostrelia, Niu Silan mo ol aelan blong Pasifik. Mi agri wetem Oli—mi ting se i from ol fetful pipol ia oli filim semmak long saed blong Papa long Heven mo Sevya, semmak olsem Oli i filim abaot mi. Oli lavem God olsem wan bes fren, mo Hem i stap lukaotgud long olgeta.

Ol memba blong Jos ia oli gat raet, mo plante oli kasem, wan witnes long saed blong spirit, mo oli mekem ol tabu kavenan blong folem Lod. Be yet, nomata hemia, sam oli muv i go from Hem, be sam narawan oli no muv. ?Long wijwan grup nao yu stap long hem?

God i sapos blong stap long medel blong laef blong yumi—ples we ae blong yumi i mas stap oltaem. ?I olsem? ?O samtaem Hem i stap longwe long ol tingting blong hat mo plan blong hat blong yumi? (luk long Mosaea 5:13). Luk gud se i no ol tingting blong hat blong yumi nomo we oli impoten, be “ol plan.” ?Olsem wanem ol fasin mo aksen blong yumi oli soemaot se ol plan blong yumi oli tru long God?

Boe blong mitufala, Ben, taem hem i bin gat 16 yia mo i stap givim toktok long stek konfrens, i bin askem kwestin ia, “?Bae yu filim olsem wanem sapos wan i promesem yu wan samting evri wik, be i neva kipim promes blong hem? Hem i gohed: “?Yumi stap series long promes we yumi mekem taem yumi tekem sakramen mo stap mekem kavenan blong obei long ol komanmen blong Hem, mo oltaem tingbaot Hem?”

Lod i givim yumi sam rod blong helpem yumi tingbaot Hem mo ol paoa blong Hem blong givhan. Wan wei, hem i tru long evri samting ia we yumi evriwan i fesem—samting we i kam agensem yu (luk long Alma 32:6). Taem mi lukluk i gobak long ol tes we mi bin fesem, hem i klia se long en, oli mekem mi gro, mi andastanem samting, mo mi gat sore. Oli mekem mi kam kolosap moa long Papa blong mi long Heven, mo Pikinini blong Hem wetem ol eksperiens, mo wan fasin we i gud moa we oli raetemdaon long hat blong mi.

Hem i impoten tumas blong Lod i lidim mo i givim instraksen long yumi. Hem i bin helpem fetful brata blong Jared blong faenem wan long tufala jalenj taem Hem i talemaot long brata blong Jared olsem wanem blong kasem gud win i go insaed long ol bot we oli bin bildim wetem fet (luk long Ita 2:20). Be, luklukgud, Lod i livim jalenj ia i no gat ansa blong smol taem long olsem wanem blong karem laet i kam, be tu, Hem i bin mekem i klia se, Hem, Lod, bae i letem ol hadtaem mo ol tes we i nid blong hapen blong save gat ansa ia. Bae Hem nao i sendem ol win, mo ol ren, mo ol bigfala wota i kam (luk long Ita 2:23–24).

?From wanem bae Hem i mekem olsem? ?Mo from wanem Hem i stap givim woning long eniwan long yumi blong yumi gowe long wan denja, be Hem nomo, Hem i save stopem denja ia blong i no hapen? Presiden Wilfod Wudrof i bin tokbaot storian blong kasem woning tru long Spirit blong karemaot wilkat blong hem, we hem, waef blong hem, mo pikinini blong hem i silip long hem, mo afta, faenemaot se wan waelwin i rutumaot wan bigfala tri mo sakem i foldaon stret long ples we wilkat i bin stap long hem bifo (luk long Teachings of Presidents of the Church: Wilford Woodruff [2004], 47).

Long tufala taem ia, God i save jenisim weta blong mekem se i no gat denja. Be poen hemia—Hem i no stretem problem Hemwan, be Lod i wantem yumi blong developem fet ia we bae i helpem yumi blong dipen long Hem blong stretem ol problem blong yumi, mo gat tras long Hem. Afta long hemia, bae yumi save filim lav blong Hem oltaem moa, mo yumi save kam olsem Hem. Blong yumi blong kam olsem Hem, hemia i gol blong Hem. I tru, hemia nao glori blong Hem, mo wok blong Hem tu (luk long Moses 1:39).

Wan yang boe i stap traem blong flatem wan ples we i graon biaen long haos blong hem, blong hem i save pusum pleiplei trak blong hem. I gat wan bigfala ston i blokem wok blong hem. Boe ia i pusum mo i pulum ston ia wetem evri paoa blong hem, be hamas hamas hem i traem, ston i no muv.

Papa blong hem i stap lukluk hem blong smol taem, afta i go long boe blong hem mo talem: “Yu nidim blong yusum evri paoa blong yu blong muvum ston ia we i bigwan.”

Boe i ansa: “!Mi yusum evri paoa blong mi!”

Papa blong hem i ansa: “No, i no tru. !Yu no kasem help blong mi yet!”

Tufala i bendaon tugeta mo muvum ston ia isi nomo.

Papa blong fren blong mi, Vaeba Rom, we i fas stek presiden blong Papua Niu Gini, i kasem tijing tu se hem i save tanem hem i go long Papa blong hem long Heven long ol taem blong nid. Hem mo wan fren blong hem long vilej, i stap laef nomo long ol krop we tufala i stap planem. Wan dei, hem i laetem wan faea blong kliarem wan pat blong garen blong hem. Be, bifo faea, ples i bin hot tumas, mo ol ples oli drae. Mekem se faea blong hem i kam kaen faea ia we Presiden Tomas S. Monson i bin tokbaot long las jeneral konfrens (luk long “Obedience Brings Blessings,” Ensign o Liahona, May 2013, 89–90). I stat blong kasem ol bigfala gras mo ol smol bus, mo olsem toktok blong boe blong hem i talem, i kam “wan mama blong faea.” Hem i bin fraet from ol narafala man long vilej, mo se tufala i lusum ol krop blong tufala. Sapos ol samting ia oli lus, bae i mas pas long Vilej Kot. Hem i no save kilimdaon faea, be hem i tingbaot Lod.

Naoia mi talem toktok blong boe blong hem, fren blong mi: “Hem i nildaon antap long hil long bus, mo i stat prea long Papa long Heven blong stopem faea. Kwiktaem, wan bigfala dak klaod i kamaot long ples we hem i stap prea mo i ren strong—be i ren nomo long ples we faea i laet long hem. Taem hem i lukluk raon, skae i klia evri ples be nomo long ples we faea i stap laet. Hem i no save bilivim se Lod bae i ansa wan simpol man olsem hem, mo hem i nildaon bakegen mo i krae olsem wan pikinini. Hem i talem se hem i filim i gud tumas” (luk long Alma 36:3).

Sevya blong yumi i wantem blong yumi rili lavem Hem i go kasem poen ia we bae yumi stretem tingting blong yumi i folem tingting blong Hem. Afta, yumi save filim lav blong Hem mo save paoa blong Hem. Afta, bae Hem i save blesem yumi olsem we Hem i wantem. Hemia nao i bin hapen long Nifae, boe blong Hileman, we i kasem poen we Lod i trastem hem fulwan, mo from hemia, Lod i bin blesem hem wetem evri samting we hem i bin stap askem (luk long Hileman 10:4–5).

Insaed long buk, Laef blong Pi, wan stori we i no ril we Yan Martel i raetem, hiro i talemaot filing blong hem abaot Kraes: “Mi no save tekemaot Hem long hed blong mi. Mi no save mekem yet. Mi spendem tri strong dei blong tingting long Hem. Moa Hem i stap long tingting blong mi, moa mi no save fogetem Hem. Mo moa mi stap lanem abaot Hem, moa mi wantem stap wetem Hem” ([2001], 57).

Mi filim olsem ia nao wetem Sevya. Hem i stap kolosap oltaem, speseli long ol tabu ples, mo long ol taem blong nid; mo samtaem, taem mi no tingting long hem, mi filim se Hem i stap kilkilim solda blong mi blong letem mi save se Hem i lavem mi. Mi save givimbak lav ia, long wan wei we mi no stret evriwan, taem mi givim hat blong mi long Hem (luk long D&C 64:22, 34).

Sam manis i pas, mi stap sidaon wetem Elda Jefri R. Holan taem hem i stap mekem asaenmen blong ol misinari i go long ol misin blong olgeta. Taem mitufala i stap aot, hem i wet long mi, mo taem mitufala i stap wokbaot i go, hem i putum han blong hem i raonem solda blong mi. Mi talem long hem se fas taem hem i mekem hemia i bin long Ostrelia. Hem i talem: “!Hemia from mi lavem yu!” Mo mi save se i bin tru.

Mi biliv se sapos yumi gat janis blong wokbaot wetem Sevya long wol ia, se bae yumi filim Hem i putum han blong Hem i raonem solda blong yumi semmak. Semmak olsem ol disaepol we oli stap wokbaot i go long Emeas, hat blong mifala “i harem gud tumas” (Luk 24:32). Hemia nao mesej blong Hem: “[Yu] kam luk” (Jon 1:39). I toktok blong yuwan, i invaetem yu, mo i welkamem yu long invitesen blong Hem blong wokbaot wetem han blong Hem i raonem solda blong yu.

I gud blong yumi evriwan i filim tras long yumiwan olsem Inos, olsem we i kamaot long las ves blong sot, be dip buk blong hem: “Kam long mi, yu we mi bin blesem yu, i gat wan ples i rere blong yu long ol kingdom blong Papa blong mi” (Inos 1:27).

From ol plante eksperiens we mi bin gat, mo from paoa we Spirit i bin testifae long mi, mi testifae wetem tru tingting se God i stap laef. Mi filim lav blong Hem. Hem i wan filing we i swit tumas. Bae yumi mekem wanem i nid blong mekem blong stretem tingting blong yumi folem tingting blong Hem, mo blong yumi lavem Hem tru. Long nem blong Jisas Kraes, amen.