Fa Wes, i kam long Al Rounds

11–17 Oktoba

Doktrin mo Ol Kavenan 115–120

“From Sakrifaes blong Hem Bae I Moa Tabu long Mi Bitim Eni Gud Wok blong Hem”

Letem Spirit i lidim yu i go long ol prinsipol ia we ol pikinini oli nidim moa. Mat bae yu save faenem sam aktiviti aedia we oli save helpem yu blong yu yusum wetem ol yangfala pikinini mo ol pikinini we oli bigwan moa.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Wanwan taem, bae i gud blong toktok long ol papa mo mama blong wan long ol pikinini longtaem bifo taem, mo talem se bae pikinini i kam long klas we hem i rere blong serem wan samting we hem i bin lanem long hom. Maet pikinini ia bae i glad blong lidim wan aktiviti insaed long klas, we hem i bin mekem wetem ol memba blong famli blong hem.

Tijim Doktrin: Ol Smol Pikinini

Doktrin mo Ol Kavenan 115:4–5

Mi mi blong Jos Ia blong Jisas Kraes blong Ol Lata-dei Sent.

?Olsem wanem nao yu save helpem ol pikinini blong oli luksave ol blesing blong stap pat blong Jos Ia blong Jisas Kraes?

Samfala Aktiviti we Yu Save Mekem

• Askem ol pikinini sapos eniwan long olgeta i save talem ful nem blong Jos. Soem logo blong Jos long olgeta (we i stap long wan buk o magasin, o misinari nem tag), raetem nem ia antap long bod, o ridim i go long olgeta olsem we i stap long Doktrin mo Ol Kavenan 115:4. Askem ol pikinini blong talem nem ia wetem yu long semtaem we yu stap poen i go long wanwan toktok. Poenemaot ol impoten toktok insaed long nem ia, mo helpem ol pikinini blong oli andastanem from wanem ol toktok ia oli impoten (luk long “Japta 43: Jisas Kraes I Putum Nem blong Jos blong Hem,” Ol Doktrin mo Kavenan Stori, 164).

• Singsing wetem ol pikinini “The Church of Jesus Christ” (Children’s Songbook, 77), mo serem wetem ol pikinini olsem wanem yu stap filim we yu yu wan memba blong Jos Ia blong Jisas Kraes. Letem olgeta oli serem olsem wanem oli stap fil abaot Jos.

• Invaetem ol pikinini blong oli stanap taem yu stap ridim toktok ia, “girap” long Doktrin mo Ol Kavenan 115:5. Invaetem olgeta blong oli openem fingga blong olgeta olsem ol laet blong san taem yu ridim “saenaot.” Tugeta, singsing wan singsing abaot we yufala i stap wan laet long ol narawan, olsem “I Am like a Star” (Children’s Songbook, 163). Mekem ol pikinini oli tingbaot se laet blong yumi i kam long Jisas Kraes, mo helpem olgeta blong oli tingting abaot sam wei we oli save “saenaot.”

Doktrin mo Ol Kavenan 117:6

Jisas Kraes bin krietem wol ia mo evri samting we i stap insaed long hem.

Blong leftemap tingting blong Wiliam Marks mo Niuwel K. Witni blong oli givim propeti olsem sakrifaes mo muv i go long Misuri, Lod i bin mekem tufala i tingbaot se Hem nao i bin krietem evri samting long wol ia. ?Olsem wanem bae ol pikinini oli save kasem blesing taem oli save trutok ia?

Samfala Aktiviti we Yu Save Mekem

• Tekem, o droem sam pikja blong ol kriesen we oli stap long Doktrin mo Ol Kavenan 117:6 we Lod i bin mekem (o invaetem ol pikinini blong droem ol pikja blong olgetawan). Invaetem ol pikinini blong holem antap, o blong poenem ol pikja taem yu stap ridim ves ia. Talem long ol pikinini from wanem hem i impoten long yu blong save se Jisas Kraes i bin krietem olgeta samting ia.

• Tugeta, singsing wan singsing abaot ol kriesen blong Lod, olsem “My Heavenly Father Loves MeChildren’s Songbook, 228–29). Letem ol pikinini oli tokbaot sam long ol samting we God i bin krietem we i helpem olgeta blong filim lav blong Hem.

Doktrin mo Ol Kavenan 119–20

Taeting i helpem Jos blong mekem wok blong God.

Plante long ol pikinini we yu stap tijim, maet oli yangfala tumas blong winim mane mo pem taeting, be i gud blong olgeta oli andastanem olsem wanem taeting i helpem bigfala wok we Jos i stap mekem truaot long wol.

Samfala Aktiviti we Yu Save Mekem

• Eksplenem se from wanem yumi stap pem taeting, mo oli stap yusum blong wanem (luk long “Japta 44: Taeting,” Ol Doktrin mo Kavenan Stori, 165–66, o vidio we i go wetem long ChurchofJesusChrist.org). Droem 10 koen long bod, mo askem ol pikinini blong helpem yu blong kaontem olgeta. Disaed hamas blong givim long Lod olsem taeting.

• Tugeta, singsing wan singsing abaot taeting olsem: “I Want to Give the Lord My Tenth” (Children’s Songbook, 150), mo talem long ol pikinini from wanem yu jusum blong pem taeting. Sapos i posibol, serem wan stori we i blong yuwan.

Stap Tijim Doktrin: Ol Bigfala Pikinini

Doktrin mo Ol Kavenan 115:4–6

Eksampol blong mi i save helpem ol narawan blong kam long Kraes mo faenem wan sef ples.

Ol pikinini we yu stap tijim, bae oli save ol pipol we ol strong win blong laef i stap kasem olgeta, mo oli nidim “wan ples blong haed” (ves 6) we Jos i stap givim. Tingting long wei we bae yu givim insperesen long ol pikinini blong oli “girap mo saenaot”(ves 5) mo blong oli serem laet blong olgeta wetem ol pipol ia.

Samfala Aktiviti we Yu Save Mekem

• Tekem wan tojlaet o pikja blong san, o wan nara samting blong ripresentem laet blong gospel blong Sevya. Taem we i taem blong olgeta blong holem laet, invaetem pikinini blong ridim Doktrin mo Ol Kavenan 115:4–5 mo talem nem blong wan samting we oli save mekem blong “saenaot” olsem wan laet blong ol narawan (luk long 3 Nifae 18:24).

• Invaetem ol pikinini blong oli droem wan pikja blong wanem oli tokbaot insaed long Doktrin mo Ol Kavenan 115:6. Eksampol: oli save droem wan strong win, wetem ol pipol we oli go haed insaed long wan bilding blong Jos. ?Wanem nao sam samting we oli stap insaed long strong win ia i save ripresentem? ?Olsem wanem nao Jos i givim wan ples blong haed long ol samting ia?

Doktrin mo Ol Kavenan 117

Long Lod, ol sakrifaes blong mi oli tabu.

Long seksen 117, Lod i bin givim kaonsel long Wiliam Marks mo Niuwel K. Witni blong givim ol samting we tufala i gat long Ketlan, olsem sakrifaes, mo bae oli kasem ol moa bigfala blesing long Misuri. Hem i bin givim ona tu long Oliva Granja from ol sakrifaes we hem i bin mekem. ?Wanem nao yu filim se ol pikinini oli save lanem aot long ol eksampol blong olgeta?

Samfala Aktiviti we Yu Save Mekem

• Invaetem ol pikinini blong gat pikja long maen blong olgeta se oli gat wan stoa we i wok gud long Ketlan, semmak olsem Niuwel K. Witni. Bae oli filim olsem wanem sapos Lod i askem olgeta blong oli lego stoa blong olgeta mo muv i go long wan niu ples? Ridim 3 Nifae 117:1–11, long ol pikinini mo askem olgeta blong stopem yu taem we oli harem wan samting we bae i helpem olgeta blong gat fet ia blong mekem ol sakrifaes mo obei long Lod. ?Wanem nao yumi stap givim olsem sakrifaes tedei blong obei long Lod?

• Talem sot, long ol pikinini, from wanem nao Ol Sent oli bin aot long Ketlan, o, letem wan long ol pikinini i mekem hemia, “Japta 41: Trabol long Ketlan,” Ol Doktrin mo Kavenan Stori, 158–60). Eksplenem se Lod i bin askem Oliva Granja blong stap long Ketlan mo pem ol kaon blong Jos. ?From wanem hemia bae i wan wok we bae i had? Long Doktrin mo Ol Kavenan 117:13 wanem nao Lod i bin talem we bae i save helpem Oliva—o eniwan long yumi—blong mekem ol sakrifaes ia blong obei long Lod?

Doktrin mo Ol Kavenan 119–20

Taeting i helpem Jos blong mekem wok blong God.

Tingting hevi long wei we bae yu helpem ol pikinini oli andastanem olsem wanem taeting—iven wan smol amaon blong vatu we oli pem—i givhan long wok blong bildimap kingdom blong Lod (luk long Stap Tru long Fet, 191–192).

Samfala Aktiviti we Yu Save Mekem

• Askem ol pikinini blong traem tingting long maen blong olgeta se wan fren i stap luk wan bilding blong Jos mo i askem: ?Olsem wanem nao Jos i stap pem bilding ia? ?Olsem wanem nao bae yumi eksplenem hemia long fren ia? Givim tingting long ol pikinini blong lukluk i go long Doktrin mo Ol Kavenan 119:4, mo 120:1 taem oli stap tingting long kwestin ia.

• Helpem ol pikinini blong tingting long ol samting we Jos i save mekem from taeting. Olsem wanem ol samting ia oli blesem laef blong yumi? Serem ol filing blong yu abaot loa blong taeting mo olsem wanem hem i blesem yu.

  

  Taem yumi stap pem taeting, yumi save soem lav we yumi gat long God, mo givhan long wok blong Hem.

Stap Leftemap Tingting blong Lanem Samting long Hom

Invaetem ol pikinini blong luksave wanem oli filim insaed long hat blong olgeta o ol tingting we oli kam long maen blong olgeta long taem blong Praemeri tedei. Leftemap tingting blong olgeta blong serem ol filing mo tingting ia wetem famli blong olgeta.

Stap Kam Antap long Fasin blong Yumi Blong Stap Tij

Sapotem ol papa mo mama. Faenem ol wei blong serem wetem ol papa mo mama wanem we ol pikinini oli stap lanem long Praemeri, mo askem olgeta olsem wanem yu save sapos ol hadwok blong olgeta olsem ol papa mo mama” (luk long Teaching in the Savior’s Way, 25).