Libeti Kalabus

Libeti Kalabus long Springtaem, i kam long Al Rounds

18–24 Oktoba

Doktrin mo Ol Kavenan 121–123

“O God, ?Yu Yu Stap Wea?”

Taem yu stap stadi long Doktrin mo Ol Kavenan 121–23, tingting long wanem ol pikinini insaed long klas blong yu oli save finis. Prea blong save olsem wanem blong ademap antap long wanem oli save.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Sapos yu bin leftemap tingting blong ol pikinini blong oli serem wan samting we oli bin lanem long klas long las wik wetem famli blong olgeta, givim olgeta taem blong oli serem ol eksperiens blong olgeta.

tijing pikja bokis

Tijim Doktrin: Ol Smol Pikinini

Doktrin mo Ol Kavenan 121:7–8; 122:7

Samtaem ol hadtaem oli blong gud blong yumi.

Toktok blong Lod long Josef Smit long Libeti Kalabus, i givim wan janis blong helpem ol pikinini blong oli luksave se, samtaem, laef i had, be Papa long Heven mo Jisas Kraes, Tufala i save helpem yumi.

Samfala Aktiviti we Yu Save Mekem

• Invaetem ol pikinini blong oli lisin long toktok ia “pis” taem yu stap serem “Japta 46: Josef Smit long Kalabus long Libeti” (Ol Doktrin mo Kavenan Stori, 172–74) o Doktrin mo Ol Kavenan 121:7–8. Helpem ol pikinini blong tingting long sam wei we yumi save trastem Lod olsem we Josef i bin mekem blong mekem se yumi save filim pis. Eksplenem se iven we Josef i bin gotru long sam had samting, Lod i bin stap wetem hem.

• Blong mekem se ol pikinini oli luksave se ol tes blong laef blong yumi oli blong “gud blong yumi” (Doktrin mo Ol Kavenan 122:7), toktok long olgeta abaot wei we ol masel blong bodi blong yumi oli stap kam bigwan taem yumi karem wan samting we i hevi. Letem olgeta oli priten se oli stap leftemap wan hevi samting, o oli stap mekem wok we i had. Eksplenem se, blong gotru long ol hadtaem, i save helpem spirit blong yumi blong gro-–sapos yumi tanem yumi i go long Lod blong kasem help. Serem samfala eksampol we bae ol pikinini we yu stap tijim bae oli save luk olgeta insaed long ol. Invaetem olgeta blong ripitim wetem yu sentens ia: “Evri samting ia … bae i blong gud blong [yumi].”

Doktrin mo Ol Kavenan 122:8

Jisas Kraes i save olsem wanem mi stap filim.

Long Libeti Kalabus, Jisas Kraes i bin talem long Josef Smit se Hem i bin kamdaon i bitim evri samting (luk long Doktrin mo Ol Kavenan 122:8). Hemia i minim se Hem i save wanem yumi stap gotru long hem, mo yumi save tanem yumi i go long Hem.

Samfala Aktiviti we Yu Save Mekem

• Blong helpem ol pikinini blong lanem blong tanem olgeta i go long Kraes taem oli stap gotru long ol had samting, askem olgeta blong soem long yu se fes blong olgeta i luk olsem wanem taem oli no harem gud, o taem wan samting i mekem olgeta i harem i soa, o oli fraet. ?Hu i save helpem yumi taem yumi stap filim olsem? Ridim Doktrin mo Ol Kavenan 122:8, mo eksplenem se hemia i minim se Jisas Kraes i save olsem wanem yumi stap filim, mo Hem i save helpem yumi.

• Tugeta, singsing long “Jesus Once Was a Little Child” (Children’s Songbook, 55), mo testifae se Jisas Kraes i save helpem yumi from se Hem i save olsem wanem nao yumi stap filim.

  Jisas we i stap long graon long Getsemane

  Jisas i andastanem ol safaring blong yumi. I No Olsem Tingting blong Mi, be Olsem Tingting blong Yu i kam long Walter Rane

Doktrin mo Ol Kavenan 123:17

God i wantem mi blong mekem wanem we mi save mekem wetem fasin blong stap glad.

I nomata we Josef Smit i bin stap long kalabus mo oli bin ronem Ol Sent oli aot long hom blong olgeta, hem i bin leftemap tingting blong Ol Sent blong “mekem wetem glad hat, evri samting we i stap long paoa blong yumi.”

Samfala Aktiviti we Yu Save Mekem

• Ridim Doktrin mo Ol Kavenan 123:17, long ol pikinini, mo invaetem olgeta blong stanap mo singaot wetem glad taem oli harem toktok ia, “wetem glad.” Invaetem olgeta blong priten blong mekem ol defren wok blong givim seves wetem glad.

• Sing tugeta wan singsing abaot seves, olsem “When We’re Helping” (Children’s Songbook, 198). Helpem ol pikinini blong tingting long ol wei we oli save givim seves long ol famli mo fren blong olgeta.

tijing pikja bokis

Stap Tijim Doktrin: Ol Bigfala Pikinini

Doktrin mo Ol Kavenan 121:7–9; 122:7-9

Ol tes blong mi oli save wok blong gud blong mi.

Wan wei we Sevya i bin givim kamfot long Josef Smit taem hem i bin stap safa long Libeti Kalabus, i taem we Hem i tijim Josef se “evri samting ia bae i givim eksperiens long yu, mo bae i blong gud blong yu” (Doktrin mo Ol Kavenan 122:7). Trutok ia i save blesem ol pikinini taem oli fesem ol tes blong olgetawan bakegen.

Samfala Aktiviti we Yu Save Mekem

• Invaetem ol pikinini blong serem wanem we oli save abaot eksperiens blong Josef Smit taem hem i bin stap long kalabus mo long semtaem oli bin stap ronem Ol Sent aot long Misuri (luk long ol japta 45–47 blong Ol Doktrin mo Kavenan Stori, 167–75). Askem ol pikinini se bae oli filim olsem wanem sapos olgeta oli Josef Smit o wan long Ol Sent ia, long tetaem ia. Wetem ol pikinini, ridim Doktrin mo Ol Kavenan 121:7–9; 122:7–9, mo invaetem olgeta blong faenem wan samting we Lod i bin talem, we bae i givim pis long olgeta. ?Olsem wanem nao ol eksperiens we oli had, oli “blong gud blong [yumi]”?

• Askem tu (2) pikinini blong holem wanwan en blong wan string we i longwan inaf blong i slip i krosem rum. Askem wan pikinini blong pinjim wan ples long string. Ridim Doktrin mo Ol Kavenan 121:7–8, mo eksplenem se string ia i ripresentem ol yia blong taem we i no save finis, mo we smol poen o ples ia we oli pinjim, i olsem ol yia blong yumi long wol. ?Hem i minim wanem se ol tes blong yumi long wol ia oli “blong smol taem nomo”?

• Helpem ol pikinini blong traem tingting long maen blong olgeta se bae i olsem wanem blong spendem fo manis insaed long wan ples olsem Libeti Kalabus. ?Wanem nao bae yumi misim plante? ?Bae yumi spendem taem blong yumi olsem wanem? Long Doktrin mo Ol Kavenan 121:7–9; 122:7–9 ?wanem nao Josef Smit i bin lanem we i bin helpem hem blong stap strong tru long eksperiens ia? Leftemap tingting blong ol pikinini blong raetem wan leta i go long wan we i gat hadtaem, mo givim tingting se oli yusum wan wan samting aot long Doktrin mo Ol Kavenan 121:7–9; 122:7–9 insaed long leta blong olgeta.

Doktrin mo Ol Kavenan 121:34–46

Yumi mas stret mo gud blong gat “ol paoa blong heven.”

Helpem ol pikinini we yu stap tijim blong oli luksave se yumi save gat paoa blong God long laef blong yumi nomo sapos yumi stap stret mo gud.

Samfala Aktiviti we Yu Save Mekem

• Droem wan laen wetem ol toktok ia, hae paoa long wan en blong laen, mo lo paoa long nara en. Droem wan aro we i poen i go long medel blong laen. Jusum samfala toktok o sentens aot long Doktrin mo Ol Kavenan 121:34–46 we i tijim olsem wanem yumi fulumap o katemdaon paoa we i kam long heven insaed long laef blong yumi (olsem taem yumi “kavremap o haedem ol sin blong yumi,” “gat hae tingting,” “fasin we i kaen,” mo “lav”). Invaetem ol pikinini, blong wan afta wan, oli jusum wan toktok, mo oli disaed sapos toktok ia i lidim man blong gat moa paoa, o blong i katemdaon paoa, mo muv aro ia i folem. Toktok wetem ol pikinini abaot ol pipol we oli save se oli bin lidim tingting blong man blong mekem gud from se oli bin folem kaonsel blong Lod long ol ves ia.

• Ridim Doktrin mo Ol Kavenan 121:41–42, 45, mo askem ol pikinini blong raetem lis blong ol kwaliti, we oli stap insaed long ol ves ia, we Lod i bin wantem yumi blong gat. Helpem olgeta blong faenemaot mining blong ol toktok we oli no andastanem. Givim, long wanwan pikinini, wan kwaliti, mo helpem olgeta blong tingting long wan wei we oli save soem kwaliti ia. Taem evriwan i serem tingting blong olgeta, askem olgeta blong ridim ol ves 45–46 mo mekem lis blong ol blesing we bae oli kasem sapos oli developem olgeta kwaliti ia.

• Tugeta, ridim fas laen long Doktrin mo Ol Kavenan 121:46. ?Olsem wanem Tabu Spirit i save folem [yumi] oltaem”? Tugeta, singsing long “The Holy Ghost” (Children’s Songbook, 105) o wan nara singsing abaot presen we I Tabu Spirit. ?Singsing ia i stap tijim yumi wanem abaot from wanem yumi wantem blong Tabu Spirit i stap folem yumi oltaem?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong tingting long wan we i stap gotru long wan hadtaem. Helpem olgeta blong faenem wan samting we Josef Smit i bin lanem long Libeti Kalabus we oli save serem wetem hem ia we i stap gotru long hadtaem.

Stap Kam Antap long Fasin blong Yumi blong Stap Tij

Sapotem fasin blong stap lanem samting long hom. “Ol papa mo mama oli ol impoten gospel tija long ol pikinini blong olgeta—tufala i gat tugeta bigfala wok mo bigfala paoa blong lidim tingting blong ol pikinini blong olgeta (luk long Dutronome 6:6–7). Taem yu tijim ol pikinini long jos, prea from ol wei we yu save sapotem ol papa mo mama blong olgeta long stamba rol we i blong olgeta” (Teaching in the Savior’s Way, 25).

aktiviti pej: Jisas Kraes i save wanem we mi stap gotru long hem