Nauvu, Hem Ia we I Naes Tumas, i kam long Larry Winborg

25–31 Oktoba

Doktrin mo Ol Kavenan 124–125

“Wan Haos long Nem blong Mi”

?Wanem lesen aot long Doktrin mo Ol Kavenan 124–25 we oli pikinini oli nidim blong lanem? Tingting hevi long kwestin ia taem yu stap stadi long wik ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong wan tempol we i stap kolosap long yufala. Askem ol pikinini wanem oli save abaot ol tempol. Letem oli serem ol filing blong olgeta abaot blong stap go long tempol wan dei.

Tijim Doktrin: Ol Smol Pikinini

Doktrin mo Ol Kavenan 124:15, 20

Jisas i hapi taem mi traem blong mekem gud.

Insaed long revelesen we oli raetemdaon long seksen 124, Lod i talemaot we Hem i glad long Haeram Smit mo Joj Mila from se tufala i stap traehad blong stap folem Hem. ?Olsem wanem bae yu helpem ol pikinini blong luksave se Lod i laekem tumas taem oli traem blong mekem gud?

Samfala Aktiviti we Yu Save Mekem

• Helpem ol pikinini blong oli tingting long sam samting we oli save mekem, we i gud. Soem ol pikja we oli save givim ol aedia long olgeta (yu save faenem sam insaed long Gospel Art Buk o insaed long ol magasin blong Jos). Askem ol pikinini blong poen i go long ol gud samting ia. Ridim Doktrin mo Ol Kavenan 124:15 i go long ol pikinini, mo askem olgeta blong lisin long wei we Lod i bin filim taem we Haeram Smit i bin jusum blong mekem gud. ?Jisas i filim olsem wanem taem yumi stap traem blong mekem ol gud samting?

• Givim, long ol pikinini, ol pepa hat, mo askem olgeta blong droem ol pikja blong olgeta bakegen we oli stap mekem ol gud samting. Invaetem olgeta blong serem wanem we oli droem wetem klas. ?Yumi filim olsem wanem taem yumi mekem gud samting? Testifae se Jisas i stap hapi taem yumi traem blong mekem raet samting.

• Singsing wan singsing abaot ol samting we Jisas i wantem yumi blong mekem, olsem “Jesus Wants Me for a Sunbeam” (Children’s Songbook, 60–61).

Doktrin mo Ol Kavenan 124:28–29, 39

Jisas i givim oda long ol pipol blong Hem blong oli mas bildimap ol tempol.

Oltaem, ol tempol oli bin pat blong plan we Papa long Heven i gat long ol pikinini blong Hem. Blong andastanem hemia, bae i helpem ol pikinini we yu stap tijim, blong oli filim moa bigfala respek long tempol.

Samfala Aktiviti we Yu Save Mekem

• Helpem ol pikinini blong oli andastanem se, taem Ol Sent oli faenem wan niu hom long Nauvu, Lod i bin talem long olgeta blong bildim wan tempol (luk long “Japta 50: Ol Sent long Nauvu” Ol Doktrin mo Kavenan Stori, 183–84, o vidio we i go wetem long ChurchofJesusChrist.org). Invaetem ol pikinini blong priten se oli stap bildim wan tempol.

• Wetem ol pikinini, ridim sentens ia: “tabu haos blong mi we ol pipol blong mi oli kasem komanmen oltaem blong bildim long tabu nem blong mi” (Doktrin mo Ol Kavenan 124:39). Letem ol pikinini oli holem wan pikja blong wan tempol bifo (luk long Gospel Art Buk, namba 52 o luk long aktiviti pej blong wik ia) mo wan pikja blong wan tempol insaed long eria blong yufala. Eksplenem se Papa long Heven mo Jisas Kraes, Tufala i oltaem givim komanmen long ol pipol blong Tufala blong bildim ol tempol—long ol taem bifo mo long taem blong yumi tedei. Serem ol toktok mo ol sentens we oli kamaot long Doktrin mo Ol Kavenan 124:28–29 blong helpem ol pikinini blong oli andastanem from wanem Lod i wantem yumi blong bildim ol tempol.

• Invaetem ol pikinini blong oli finisim aktiviti pej blong wik ia blong helpem olgeta blong andastanem se yumi ol pipol blong God, mo we, oltaem, God i bin givim komanmen long ol pipol blong Hem blong oli mas bildim ol tempol.

Stap Tijim Doktrin: Ol Bigfala Pikinini

Doktrin mo Ol Kavenan 124:12–21

Lod i laekem taem we mi mi stap fetful.

Long seksen 124, Lod i presem samfala Sent from oli bin fetful. Ol toktok blong Hem oli save helpem ol pikinini blong faenemaot ol kwaliti we oli mas developem.

Samfala Aktiviti we Yu Save Mekem

• Jusum sam gudfala kwaliti we oli tokbaot long Doktrin mo Ol Kavenan 124: 12–21, mo raetemdaon olgeta long bod raon long pikja blong Sevya. Askem ol pikinini blong luklukgud insaed long ol ves 12–21, mo lukaotem ol toktok ia. Helpem olgeta blong oli andastanem se maet bae oli no save gud ol toktok ia. Folem ol ves ia, ?olsem wanem Lod i filim abaot ol pipol we oli developem ol kwaliti ia?

Doktrin mo Ol Kavenan 124:28–30, 38–41

Jisas i givim oda long ol pipol blong Hem blong oli mas bildimap ol tempol.

Ol pikinini we yu stap tijim bae oli bigwan inaf blong go long tempol mo tekpat long ol odinens blong tempol. ?Wanem nao yu save mekem blong helpem olgeta blong oli rere?

Samfala Aktiviti we Yu Save Mekem

• Kavremap wan pikja o wan droing blong tempol. Invaetem ol pikinini blong ridim Doktrin mo Ol Kavenan 124:38–41 blong kasem sam help abaot wanem i stap long pikja. Letem ol pikinini oli karemaot wanem i kavremap pikja mo toktok raon long wanem ol ves ia oli stap tijim, mo from wanem nao Lod i wantem yumi blong bildim ol tempol.

• Invaetem ol pikinini blong ridim Doktrin mo Ol Kavenan 124:28–30 blong faenem ol risen we Lod i bin givim long Josef Smit blong bildim Nauvu Tempol. Serem ol filing blong yu abaot tempol mo eni eksperiens we yu gat blong mekem ol baptaes blong ol dedman. Helpem ol pikinini blong disaed se bae oli wet kasem wetaem bifo oli bigwan inaf blong mekem ol baptaes blong ol dedman insaed long tempol.

• Sapos yu gat wan tempol rekomen, soem rekomen ia long ol pikinini, o invaetem wan yut insaed long wod blong soem ol pikinini rekomen blong hem. Talem long ol pikinini from wanem wan tempol rekomen i impoten mo wanem nao yumi nidim blong mekem blong kasem wan. Leftemap tingting blong olgeta blong stat rere naoia blong kasem rekomen blong olgeta.

  

  Josef Smit long Nauvu Tempol, i kam long Gary E. Smith

Doktrin mo Ol Kavenan 124:91–92

Wan petriakel blesing i save soem rod long mi wetem insperesen.

Sapos yu kasem wan petriakel blesing, luklukbak long hem bifo yu tijim ol pikinini abaot ol blesing ia. ?From wanem yumi talem tangkyu from petriakel blesing blong yumi? ?Olsem wanem bae yu givim insperesen long ol pikinini blong oli rere blong kasem hemia blong olgeta?

Samfala Aktiviti we Yu Save Mekem

• Invaetem wan long ol pikinini blong ridim Doktrin mo Ol Kavenan 124:91–92, mo invaetem klas blong lisin long wanem we Lod i bin singaotem Haeram Smit blong mekem. ?Wanem nao ol pikinini oli save abaot ol petriakel blesing? Sapos yu bin kasem wan petriakel blesing, soem long pikinini se hem i luk olsem wanem. (Tingbaot se stret samting we oli raetem insaed long petriakel blesing blong yu, i tabu.) Eksplenem se ol petriakel blesing, oli ol spesel blesing we yumi kasem long ol petriak. Olgeta blesing ia, oli save helpem yumi blong lanem moa abaot yumiwan mo wanem we Papa long Heven i wantem yumi blong mekem.

• Tingting blong invaetem wan papa, o mama, o brata o sista, blong wan long ol pikinini we yu stap tijim blong serem, wetem klas, from wanem oli glad tumas blong petriakel blesing blong olgeta. Askem olgeta blong serem olsem wanem oli bin disaed blong kasem blesing blong olgeta. Talem testemoni blong yu abaot ol petriakel blesing.

Stap Leftemap Tingting blong Lanem Samting long Hom

Invaetem ol pikinini blong serem, wetem wan memba blong famli blong hem, wan samting we oli bin lanem abaot ol tempol mo from wanem oli bin wantem go long tempol wan dei.

Stap Kam Antap long Fasin blong Yumi blong Stap Tij

Ol pikinini oli save luksave paoa blong Spirit. Tijim ol pikinini se ol filing blong pis, lav, mo wom filing we oli filim taem oli stap tokbaot o singsing abaot Jisas Kraes mo gospel blong Hem i kam long Tabu Spirit. Ol filing ia i save bildimap ol testemoni blong olgeta.