Yumi wetem Olgeta mo Olgeta wetem Yumi, i kam long Caitlin Connolly

1–7 Novemba

Doktrin mo Ol Kavenan 125–128

“Wan Voes blong Stap Glad blong Olgeta we Oli Laef Mo Olgeta we Oli Ded”

Sapos yu yu stap tijim ol smol pikinini mo yu nidim moa help, luk long “Lukluk long Ol Nid blong Ol Yangfala Pikinini,” long stat blong lesenbuk ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Helpem ol pikinini blong tingting long wan samting we oli bin lanem long hom o long Praemeri long wik ia. Givim olgeta sam minit blong oli droem wan pikja blong wanem oli tingting long hem, mo afta, blong oli serem hemia wetem klas.

Tijim Doktrin: Ol Smol Pikinini

Doktrin mo Ol Kavenan 126:3

Mi lavem famli blong mi.

Afta we Brigham Yang i kambak hom afta we hem i bin prijim gospel, Lod i bin talem long hem blong i lukluk nomo blong stap lukaot gud long famli blong hem.

Samfala Aktiviti we Yu Save Mekem

• Serem long ol pikinini infomesen ia abaot Brigham we i stap long “Japta 50: Ol Sent long Nauvu” (Ol Doktrin mo Kavenan Stori, 184), o talem sot wanem i stap insaed long Doktrin mo Ol Kavenan 126 wetem ol toktok blong yuwan. Ridim Doktrin mo Ol Kavenan 82:19 i go long ol pikinini, mo tokbaot bigwan sot sentens ia “lukaotem gud famli blong yu.” ?Hem i minim wanem blong lukaot gud long famli blong yumi? Helpem ol pikinini blong oli tingting long sam wei we oli save soem lav long ol memba blong famli blong olgeta.

• Bifo klas i stat, invaetem ol pikinini blong tekem wan pikja blong famli blong olgeta (o askem olgeta blong droem ol pikja). Afta, askem olgeta blong serem wan samting we oli lavem abaot famli blong olgeta. Serem wan pikja blong famli blong yu, mo mekem sem samting. Eksplenem from wanem Papa long Heven i wantem yumi blong kea long ol memba blong famli blong yumi. Singsing wan singsing we i stap tijim trutok ia, olsem “When We’re Helping” (Children’s Songbook, 198).

Doktrin mo Ol Kavenan 128:5, 12

Evriwan long ol pikinini blong God oli nidim janis ia blong kasem baptaes.

Antap long wok blong stap helpem ol pikinini blong rere blong mekem ol kavenan blong baptaes blong olgetawan, tijim olgeta se yumi save helpem olgeta we oli bin ded, be oli no bin kasem baptaes blong oli kasem ol semfala blesing.

Samfala Aktiviti we Yu Save Mekem

• Soem wan pikja blong Jisas Kraes we i stap kasem baptaes (luk long Gospel Art Buk, namba 35), o soem vidio ia: “The Baptism of Jesus” (ChurchofJesusChrist.org). Askem ol pikinini sapos oli bin luk finis wan i kasem baptaes. ?Wanem nao oli tingbaot abaot baptaes ia? Yusum wan pikja o vidio blong soem long ol pikinini se, taem yumi kasem baptaes, yumi go andanit evriwan long wota, mo afta, yumi kam antap bakegen, semmak olsem we Jisas i bin mekem. Openem skripja long Doktrin mo Ol Kavenan 128:12, mo eksplenem se Josef Smit i bin tijim se, blong kasem baptaes, i mekem yumi tingbaot Laef Bakegen long Ded.

• Talem long ol pikinini abaot wan we yu save hem, (olsem wan bubu) we i bin ded be hem i no bin baptaes. Ridim Doktrin mo Ol Kavenan 128:5, mo letem wanwan long olgeta i kam blong holem wan pikja blong ples blong baptaes long wan tempol (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Testifae se Papa long Heven i letem yumi blong kasem baptaes long wol ia long bihaf blong ol pipol we oli ded finis. Long wei ia, evriwan long ol pikinini blong God oli save kasem baptaes mo mekem ol kavenan wetem Hem.

Doktrin mo Ol Kavenan 128:18

Papa long Heven i wantem mi blong lanem abaot famli histri blong mi.

I gat ol simpol wei we ol yang pikinini i save tekpat long wok blong famli histri. Helpem olgeta blong filim lav long ol pipol ia insaed long famli tri blong olgeta.

Samfala Aktiviti we Yu Save Mekem

• Krietem wan pepa jen wetem nem blong ol pipol insaed long famli blong yu (luk long aktiviti pej blong wik ia,) mo tekem i go blong soem long klas. Talem sam samting abaot ol pipol we oli stap long jen blong yu. Ridim Doktrin mo Ol Kavenan 128:18, long ol pikinini, mo eksplenem se Josef Smit i bin tijim se “i gat wan strong ring we i joenem ol papa mo ol pikinini.” Helpem ol pikinini blong mekem ol stret famli jen blong olgeta, mo invaetem olgeta blong tekem ol jen ia oli gobak hom, mo askem papa mo mama blong olgeta blong ademap nem blong ol bubu blong olgeta.

• Askem ol pikinini blong serem wan samting abaot wan long ol bubu blong olgeta. Talem wan long ol fevret stori blong yu abaot papa mo mama blong yu, o abaot ol bubu blong yu. Soem ol pikja, sapos i posibol. Leftemap tingting blong ol pikinini blong oli lan moa abaot ol bubuman mo bubuwoman blong olgeta, mo ol nara bubu.

Stap Tijim Doktrin: Ol Bigfala Pikinini

Doktrin mo Ol Kavenan 126

Mi save help blong lukaot gud long famli blong mi.

?Olsem wanem nao yu save helpem ol pikinini we yu stap tijim blong oli givim seves long ol memba blong famli blong olgeta long ol wei we i gat mining?

Samfala Aktiviti we Yu Save Mekem

• Ridim tugeta Doktrin mo Ol Kavenan 126:3. ?From wanem nao Papa long Heven i bin askem Brigham Yang blong “lukaotem gud famli” blong hem? ?Olsem wanem nao yumi save mekem sem samting long ol famli blong yumi? Mekem wan lis blong ol samting we yumi save mekem naoia blong givim seves long ol famli blong yumi. ?Olsem wanem we, taem yumi mekem olgeta samting ia, i stap helpem yumi blong kam moa olsem Papa long Heven?

• Serem long ol pikinini, stori blong Sista Carole M. Stephen abaot apuboe blong hem, Porter (luk long “We Have Great Reason to Rejoice,” Ensign o Liahona, Nov. 2013, 115). ?Wanem nao Porter i bin mekem blong hem i lukaot gud long famli blong hem? ?Olsem wanem nao yumi save folem eksampol blong hem?

Doktrin mo Ol Kavenan 128:1, 15–18

Baptaes blong ol dedman i krietem wan “jen” ia bitwin mi mo ol bubu blong mi.

Josef Smit i bin tijim se baptaes blong ol dedman i joenem yumi long ol bubu blong yumi semmak olsem ol ring ia blong wan jen. ?Olsem wanem nao yu save helpem ol pikinini blong filim glad ia we i kam taem yumi kam blong lanem abaot ol bubu blong yumi, mo meksua se yumi mekem tempol wok long bihaf blong olgeta?

Samfala Aktiviti we Yu Save Mekem

• Serem klas long tufala grup, mo askem fas grup blong ridim Doktrin mo Ol Kavenan 128:1 blong faenemaot wanem topik i bin stap wok long maen blong Josef Smit. Askem ol nara grup blong ridim ves 17 mo faenemaot wanem topik hem i stap tekem se i “gat moa glori.” Letem olgeta oli serem wanem we oli faenem, mo tokbaot from wanem topik ia i gat glori olsem, o i impoten tumas olsem. Sapos i posibol, invaetem wan yut we i bin mekem finis ol baptaes blong ol dedman blong i serem eksperiens blong hem, mo i eksplenem from wanem yumi stap mekem wok ia.

• Tingting blong yusum samting blong tijim lesen; lesen ia bae i soem we yumi nidim blong helpem ol bubu blong yumi we oli no bin baptaes. Eksampol: soem wan presen o wan swit kaekae, be yu putum long wan ples we ol pikinini oli no save kasem. Talem long pikinini ia se hem i save gat samting ia, be hem i no save muvaot long jea blong hem. Askem wan nara pikinini wanem oli save mekem blong helpem pikinini ia blong kasem samting ia. Tugeta, ridim Doktrin mo Ol Kavenan 128:15, mo tokbaot olsem wanem hemia i go wetem lesen ia we i yusum wan samting.

• Invaetem ol pikinini blong mekem wan pepa jen wetem nem blong papa mo mama, blong ol bubu, mo ol bigfala bubu blong olgeta, mo sam moa (luk long aktiviti pej blong lesen ia). Sapos ol pikinini oli no save nem blong ol bubu blong olgeta, leftemap tingting blong faenemaot nem blong olgeta, mo raetem olgeta long jen ia long hom. Tugeta, ridim Doktrin mo Ol Kavenan 128:18 blong faenemaot se “joen ring” ia bae i mekem long famli histri “i fulwan mo i komplit.” Talem wan stori abaot wan bubu we i helpem yu blong filim se yu joen long hem. O soem vidio ia: “Courage: I Think I Get It from Him” (ChurchofJesusChrist.org).

• Soem wan tempol rekomen long ol pikinini, mo talem long olgeta olsem wanem yu kasem wan. Helpem olgeta blong luk fored blong kasem tempol rekomen blong olgetawan blong mekem se oli save go long tempol mo kasem baptaes long bihaf blong ol stret bubu blong olgeta.

  

  Yumi save faenem ol nem blong ol bubu blong yumi mo mekem ol tempol odinens long bihaf blong olgeta.

Stap Leftemap Tingting blong Lanem Samting long Hom

Invaetem ol pikinini blong askem wan long haos blong helpem olgeta blong lanem moa abaot famli histri blong olgeta. Oli save askem blong harem ol stori abaot wan bubu o oli save yusum FamilySearch.org blong faenem ol nem blong ol bubu blong olgeta we oli no bin baptaes.

Stap Kam Antap long Fasin blong Yumi blong Stap Tij

Letem ol pikinini oli soem wanem oli krietem. Taem ol pikinini oli stap bildimap samting, o kalarem wan samting we i go wetem stori o prinsipol, oli stap lan, mo plante taem oli tingbaot prinsipol ia i gud moa. Oli save yusum tu wanem we oli krietem blong tijim ol narawan. (Luk long Teaching in the Savior’s Way, 25).