Katej Kalabus

22–28 Novemba

Doktrin mo Ol Kavenan 135–136

“Hem I Bin Silim Misin blong Hem Mo Ol Wok blong Hem Wetem Blad blong Hemwan”

Taem yu stap rere blong tijim Doktrin mo Ol Kavenan 135–36, lukaot ol prinsipol we oli bin gat paoa blong lidim laef blong yu. Tingting long wei we ol aedia insaed long aotlaen ia oli save helpem ol pikinini blong lanem mo blong yusum olgeta prinsipol ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong oli serem wan samting we oli tingbaot se oli bin lanem long yia ia abaot Josef Smit mo wanem hem i bin mekem i kamtru. Soem ol pikja blong Kam Folem Mi—Blong Wanwan Man, Woman mo Famli blong yia ia, o blong sam aktiviti pej we i pas finis blong helpem olgeta.

Tijim Doktrin: Ol Smol Pikinini

Doktrin mo Ol Kavenan 135:1–2

Josef Smit mo Haeram Smit, tufala i bin givim laef blong tufala from gospel blong Jisas Kraes.

Stori blong Josef mo Haeram Smit, we tufala i bin ded from gospel, i save helpem ol pikinini blong filim tangkyu from ol testemoni mo ol sakrifaes blong ol bigfala man ia.

Samfala Aktiviti we Yu Save Mekem

• Yusum “Japta 57: Oli Bin Kilim Profet” (Ol Doktrin mo Kavenan Stori, 201–5) blong talem long ol pikinini abaot wei we Profet Josef Smit mo brata blong hem, Haeram Smit, tufala i ded. O, letem wan long ol pikinini ia i talem stori ia. Talem testemoni blong yu se Josef Smit i bin wan tru profet mo hem i bin givim laef blong hem long Lod mo gospel blong Hem.

• Serem sam sentens blong ves blong Buk blong Momon we Haeram Smit i bin ridim bifo hem i bin go long Katej Kalabus, we oli raetem i stap long Doktrin mo Ol Kavenan 135:5. Tokbaot olsem wanem ves ia i bin givim kamfot long Haeram. Serem ol skripja we bae oli givim kamfot long yu taem yu stap wari o stap harem nogud.

Doktrin mo Ol Kavenan 135:3

Josef Smit i wan Profet blong God.

Truaot long yia, ol pikinini oli bin lanem wanem we Lod i bin talemaot tru long Profet Josef Smit. Yu save helpem olgeta blong oli tingbaot mo talem tangkyu from wei we wok blong Josef i bin blesem laef blong olgeta.

Samfala Aktiviti we Yu Save Mekem

• Soem ol samting we oli ripresentem wok blong Profet Josef Smit, olsem Buk blong Momon, Doktrin mo Ol Kavenan, o wan pikja blong ol misinari, o wan tempol. Yusum ol sentens we oli stap long Doktrin mo Ol Kavenan 135:3, serem long ol pikinini sam samting we Lod i bin mekem tru long Josef Smit blong sevem yumi. Invaetem ol pikinini blong jusum wan long ol samting ia mo serem from wanem bae oli talem tangkyu from.

• Taem ol pikinini oli stap kala long aktiviti pej blong wik ia, singsing o plei sam singsing abaot Josef Smit, olsem “Presem Man Ia” (STSP, pej 50). Serem ol filing blong yu abaot Profet.

  

  Profet Ia blong Amerika, i kam long Del Parson

Doktrin mo Ol Kavenan 136

God i stap givim ol ol komanmen blong helpem yumi.

Ol Sent oli bin fesem plante tes long ol yia afta long ded blong Josef Smit. ?Olsem wanem kaonsel ia we Lod i bin givim long Ol Sent i helpem ol pikinini we yu stap tijim?

Samfala Aktiviti we Yu Save Mekem

• Serem long ol pikinini sam long ol jalenj se Ol Sent oli bin fesem taem oli stap aot long Nauvu mo kam tugeta wanples long Ol Winta Kwota (luk long ol japta 60 mo 62 insaed long Ol Doktrin mo Kavenan Stori, 211–16, 222–24). Putum wan pikja blong Nauvu Tempol long wan saed blong rum, mo krietem wan simpol salsal long nara saed—maet putum wan blangket insaed long hem, wetem sam jea o wan tebol. Invaetem ol pikinini blong kam tugeta wanples kolosap long pikja, mo talem olgeta se wan yia mo haf afta we Josef Smit i bin ded, oli fosem Ol Sent blong mas aot long Nauvu. Invaetem ol pikinini blong wokbaot i go longwe long tempol, mo kam tugeta wanples long salsal blong ripresentem wokbaot ia i go long Ol Winta Kwota.

• Eksplenem se Lod i bin givim wan revelesen long Brigham Yang, we yumi save faenem long Doktrin mo Ol Kavenan 136, blong helpem Ol Sent taem oli stap wokbaot i go long Sol Lek Vale. Ridim sam sentens aot long seksen 136 we insaed long hem i gat kaonsel we ol yang pikinini oli save andastanem, mo invaetem olgeta blong aktem o droem wanem we Lod i bin askem Ol Sent blong mekem taem oli stap travel i go. Eksampol: ol pikinini oli save droem olgetawan we oli stap givimbak wan samting we i blong wan fren, we oli bin yusum, o oli save singsing wan Praemeri Singsing taem oli stap danis raon long wan kamp faea we oli priten se i stap ia (luk long ol ves 25, 28).

Stap Tijim Doktrin: Ol Bigfala Pikinini

Doktrin mo Ol Kavenan 135

Josef Smit mo Haeram Smit, tufala i bin givim laef blong tufala from gospel blong Jisas Kraes.

Blong ol pikinini oli harem abaot ol sakrifaes blong Josef Smit mo Haeram Smit, i save mekem fet blong olgeta i kam strong moa, mo i save mekem se bae oli wantem blong stap tru long testemoni blong olgeta.

Samfala Aktiviti we Yu Save Mekem

• Askem ol pikinini blong serem wanem we oli save abaot wei we oli bin kilimded Josef mo Haeram Smit. Sapos oli nidim help, poenem olgeta long Doktrin mo Ol Kavenan 135:1 o “Japta 57: Oli Bin Kilim Profet I Ded” (Doktrin mo Ol Kavenan Stori, 201–5). Invaetem ol pikinini blong traem tingting se oli stap laef long Nauvu taem we Profet i bin ded. Askem olgeta blong serem se, sapos i olgeta, bae oli filim olsem wanem. Serem testemoni blong yu abaot Josef Smit, mo invaetem ol pikinini blong mekem sem samting.

• Soem ol pikja blong ol profet (luk long Gospel Art Buk, ol namba: 14, 18, 67). ?Wanem nao samfala samting we God i askem ol profet blong mekem? Eksplenem se Lod i promesem blong blesem ol profet blong Hem from ol sakrifaes blong olgeta we oli mekem taem oli stap givim seves long Hem (luk long Matiu 10:39).

Doktrin mo Ol Kavenan 135:3

Josef Smit i wan Profet blong God.

Semmak olsem evri profet, Josef Smit i bin testifae abaot Jisas Kraes mo i bin tijim yumi olsem wanem blong go long Hem. Helpem ol pikinini blong luk olsem wanem Josef Smit i bin mekem misin blong hem i hapen.

Samfala Aktiviti we Yu Save Mekem

• Tugeta, ridim Doktrin mo Ol Kavenan 135:3, mo askem ol pikinini blong faenemaot wanem we Josef Smit i bin mekem i kamtru. Raetem long bod wanem we oli stap faenem. Invaetem ol pikinini blong jusum wan long ol samting ia mo serem from wanem bae oli talem tangkyu from.

• Leftemap tingting blong ol pikinini blong oli tingting abaot wan fren, o wan we oli laekem hem tumas, we i no save tumas samting abaot Josef Smit. ?Wanem nao bae oli talem long fren ia sapos hem i askem: ?from wanem Josef Smit i impoten long yu? Invaetem ol pikinini blong praktisim wanem bae oli talem long fren ia.

Doktrin mo Ol Kavenan 136:4, 10–11, 18–30

Lod i blesem mi taem mi gat hadtaem blong mekem wan samting.

Afta we oli bin kilimded Josef Smit, oli bin ronemaot Ol Sent blong oli aot long Nauvu. Brigham Yang i bin lidim olgeta i go long Ol Winta Kwota, mo long ples ia, oli bin rere blong wan longfala moa wokbaot i go kasem Sol Lek Vale.

Samfala Aktiviti we Yu Save Mekem

• Talem sot ol eksperiens blong Ol Sent afta we oli bin kilimded Profet Josef Smit (luk long ol japta 58, 60, mo 62 insaed long Ol Doktrin mo Kavenan Stori, ol pej 206–8, 211–16, 222–24). Invaetem ol pikinini blong traem pikjarem long maen blong olgeta se bae oli filim olsem wanem sapos oli mas lego hom blong olgeta, mo faenem wan niu ples blong stap laef long hem long waelples. Eksplenem se, insaed long Doktrin mo Ol Kavenan 136, Lod i bin givim kaonsel long Ol Sent blong oli yusum long taem we oli stap wokbaot i go. Givim wok long wanwan pikinini blong ridim sam ves aot long revelesen ia, olsem ol ves 4, 10–11, 18–30, mo askem ol pikinini blong wanwan i faenem wan samting we i save helpem olgeta wetem ol wari o ol fraet blong olgeta.

• Helpem ol pikinini blong tingting long ol tes we ol pipol oli stap fesem tedei. Invaetem olgeta ia blong faenem wan samting insaed long seksen 136 we bae oli save serem blong leftemap tingting blong wan we i stap gotru long kaen tes olsem. Ol pikinini oli save faenem ol mesej we i leftemap tingting insaed long “Kam Kam Ol Sent” (STSP, pej 2), we i wan hym we Ol Sent oli bin stap singsing long hem taem oli bin stap wokbaot i go.

Stap Leftemap Tingting blong Lanem Samting long Hom

Invaetem ol pikinini blong oli serem wetem famli blong olgeta, o wan fren, from wanem nao oli glad from Profet Josef Smit.

Stap Kam Antap long Fasin blong Yumi blong Stap Tij

Ol pikinini oli laekem blong muvmuv. Long sam taem, bae yu filim se paoa blong ol pikinini i mekem se i had blong lanem samting. Be yu save yusum paoa we oli gat taem yu invaetem olgeta blong dro, singsing, o aktemaot wan prinsipol blong gospel (luk long Teaching in the Savior’s Way, 25–26).