“8–14 Novemba. Doktrin mo Ol Kavenan 129–132: ‘Taem Yumi Kasem Eni Blesing we I Kam long God, Hem I From Fasin blong Stap Obei,’” Kam Folem Mi—Blong Praemeri: Doktrin mo Ol Kavenan 2021 (2020)
“8–14 Novemba. Doktrin mo Ol Kavenan 129–132,” Kam Folem Mi—Blong Praemeri: 2021
Josef Smit we i stap long Nauvu, 1840, i kam long Theodore Gorka
8–14 Novemba
Doktrin mo Ol Kavenan 129–132
“Taem Yumi Kasem Eni Blesing we I Kam long God, Hem I From Fasin blong Stap Obei”
Elda David A. Bednar i eksplenem: “Blong toktok mo talem samting nomo, hemia i no blong stap tij. Blong stap prijim gospel long wei blong Lod, i minim tu blong stap lukluk raon, mo stap lisin, mo stap luksave samting” (“Becoming a Preach My Gospel Missionary,” New Era, Oct. 2013, 6). ?Wanem nao Spirit i tijim yu taem yu stap lukluk raon mo stap lisin long ol pikinini we yu stap tijim?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Jusum wan topik aot long ol seksen 129–32, mo letem ol pikinini oli talem long yu wanem oli bin lanem finis abaot topik ia. Eksampol: ?Wanem nao oli save abaot Papa long Heven o Godhed? ?Abaot mared we i no save finis? ?Abaot selestial kingdom?
Tijim Doktrin: Ol Smol Pikinini
Doktrin mo Ol Kavenan 130:20–21; 132: 5
Ol blesing oli kam taem man i obei long God.
Josef Smit i bin tijim se evri blesing we i kam long God i kam folem ol loa we yumi stap obei long olgeta. ?Olsem wanem yu tijim prinsipol ia long wan wei we ol pikinini bae oli andastanem hemia?
Samfala Aktiviti we Yu Save Mekem
-
Komperem wan samting we i simpol, mo serem wetem ol pikinini blong soem olsem wanem i impoten blong folem ol instraksen; eksampol, toktok wetem olgeta abaot ol step we yumi mas folem blong rere long kaekae o plei wan gem, o bildim wan samting. ?Wanem i hapen taem yumi no stap folem ol instraksen? (Mebi yu gat wan eksperiens blong yuwan we yu save serem.) Ridim Doktrin mo Ol Kavenan 130:21, mo komperem ol instraksen ia long ol komanmen we yumi mas folem blong kasem olgeta blesing we oli kam long Papa long Heven.
-
Askem ol pikinini we sapos oli save tingting long wan taem we oli bin obei wan long ol komanmen blong God. ?Oli bin filim olsem wanem? Tugeta singsing wan singsing abaot fasin blong stap obei, olsem “Keep the Commandments” (Children’s Songbook, 146–47), mo faenemaot ol blesing blong fasin blong stap obei we oli tokbaot long singsing ia. Toktok raon long samfala samting we God i bin givim komanmen long yumi blong mekem. ?Olsem wanem nao God i blesem yumi taem yumi stap obei long ol komanmen ia?
Papa long Heven mo Jisas Kraes oli gat ol bodi blong mit mo bun.
Taem yumi andastanem se God Papa mo Jisas Kraes oli gat ol bodi olsem hemia blong yumi, bae yumi filim se yumi stap kolosap long Tufala, mo rilesensip blong yumi wetem Tufala i kam strong moa.
Samfala Aktiviti we Yu Save Mekem
-
Soem wan pikja blong Jisas Kraes long ol pikinini, mo invaetem olgeta blong poenem ae, maot blong Hem, mo tu, ol nara pat blong bodi blong Hem. Afta long hemia, invaetem olgeta blong stanap mo poenem ol semfala pat ia blong bodi blong olgeta. Aot long Doktrin mo Ol Kavenan 130:22, ridim: “Papa i gat wan bodi blong mit mo bun … Pikinini blong Hem tu.” Testifae se bodi blong yumi i olsem hemia blong Papa long Heven mo hemia blong Jisas Kraes.
-
Tugeta, singsing wan singsing abaot bodi blong yumi “Head, Shoulders, Knees, and Toes” (Children’s Songbook, 275), mo invaetem ol pikinini blong mekem ol aksen we oli go wetem ol toktok. Askem ol pikinini blong talem long yu sam samting we oli save mekem wetem bodi blong olgeta. Talemaot tangkyu blong yu from bodi ia we God i bin givim long yu. ?Olsem wanem yumi save soem we yumi talem tangkyu from spesel presen ia?
-
Invaetem ol pikinini blong droem ol pikja blong Papa long Heven, Jisas Kraes, mo olgetawan. Helpem olgeta blong luk olsem wanem ol bodi blong yumi oli olsem hemia blong Papa long Heven, mo hemia blong Jisas.
Papa long Heven i mekem i posibol blong ol famli oli stap tugeta blong oltaem.
Tru long siling paoa blong Lod mo ol odinens blong tempol, ol famli rilesensip blong yumi oli save stap blong taem we i no save finis sapos yumi stap kipim ol kavenan blong yumi.
Samfala Aktiviti we Yu Save Mekem
-
Helpem ol pikinini blong oli tingting long ol eksampol blong ol samting we oli no stap blong longtaem—kaekae we i go roten, flaoa we i go drae, mo ol narawan moa. Soem wan pikja blong famli blong yu, mo serem olsem wanem yu filim abaot famli ia. Testifae se Lod i bin mekem i posibol, tru long ol odinens blong tempol, blong ol famli oli stap blong oltaem.
-
Openem Doktrin mo Ol Kavenan long seksen 132, mo talem long ol pikinini se hemia i wan revelesen i go long Josef Smit abaot mared mo ol famli. Soem long olgeta ves 19, mo poenem ol toktok ia “long ful taem we i no save finis” taem yu stap ridim ol toktok ia. Invaetem ol pikinini blong ridim ol toktok ia wetem yu.
-
Helpem ol pikinini blong mekem ol pepa doli we oli stap ripresentem ol memba blong famli blong olgeta (luk long aktiviti pej blong wik ia). Katemaot olgeta mo putum olgeta long wan envlop, o fasem olgeta tugeta wetem wan pepa klip blong ripresentem siling paoa we i save mekem ol famli blong yumi oli no save finis.
Pikjawan woman mo wan yang gel long graon long tempolOl tempol odinens oli letem ol famli blong stap tugeta blong oltaem.
Stap Tijim Doktrin: Ol Bigfala Pikinini
Doktrin mo Ol Kavenan 130:18–19
Papa long Heven i wantem mi blong kasem save mo waes.
Plante samting long laef ia, bae oli no go wetem yumi long nekis laef. Be “save mo waes,” bae yumi go wetem (Doktrin mo Ol Kavenan 130:19).
Samfala Aktiviti we Yu Save Mekem
-
Askem ol pikinini blong serem wan samting wetem yu, we oli stap lanem long skul, o oli stap lanem aot long papa mo mama blong olgeta. Invaetem olgeta blong ridim Doktrin mo Ol Kavenan 130:18–19 blong faenemaot wanem bae i hapen long save mo waes blong yumi long nekis laef.
-
?Wanem nao ves 19 i stap tijim yumi abaot wei we yumi save kasem save mo waes? ?Olsem wanem nao yumi save wok wetem strong tingting mo stap obei taem yumi stap lukaot blong lanem samting? (Blong gat moa save long saed blong topik ia, luk long “Edukesen” insaed long Blong Ol Yut Oli Kam Strong [ol pej 9–10].)
Doktrin mo Ol Kavenan 130:20–21; 132:5, 21–23
Ol blesing oli kam taem man i obei long God.
Tingting hevi long wei we Lod i blesem yumi taem yumi stap obei long ol loa blong Hem. ?Wanem eksperiens nao yu save serem wetem ol pikinini blong givim insperesen long olgeta?
Samfala Aktiviti we Yu Save Mekem
-
Singsing wan singsing abaot fasin blong stap obei “Keep the Commandments” (Children’s Songbook, 146–47), mo invaetem ol pikinini blong ridim Doktrin mo Ol Kavenan 130:20–21 mo 132:5. Helpem olgeta blong faenem ol toktok mo ol aedia insaed long skripja ia we i tijim ol semmak samting we oli stap insaed long singsing ia. ?Olsem wanem nao yumi kasem ol blesing we oli kam long God? Askem ol pikinini blong serem olsem wanem oli bin gat blesing from se oli bin obei long ol loa blong God.
-
Tugeta, ridim Doktrin mo Ol Kavenan 132:21–23, mo invaetem ol pikinini blong droem ol pikja we oli ripresentem wanem oli lanem aot long ol ves ia. Leftemap tingting blong olgeta blong oli yusum tingting blong olgeta mo krietem wan samting. Mo givim tingting se, insaed long ol droing blong olgeta, oli save putum ol loa o ol komanmen we oli stap helpem yumi blong stap long rod ia we i no isi we i lidim man long taem we i no save finis.
Doktrin mo Ol Kavenan 131:1–4; 132:15, 19
Papa long Heven i mekem i posibol blong ol famli oli stap tugeta blong oltaem.
I nomata wanem famli situesen blong yumi i stap naoia, yumi save mekem ol joes we bae oli mekem yumi rere blong kasem ol blesing blong wan famli we i no save finis long fiuja.
Samfala Aktiviti we Yu Save Mekem
-
Askem sam long ol pikinini blong ridim Doktrin mo Ol Kavenan 131:1–4 mo ol narawan blong oli ridim 132:15. Helpem olgeta blong oli faenemaot wanem nao ol ves ia oli stap tijim abaot mared. Jusum ol ki sentens aot long 132:19 (olsem, “Sapos wan man i maredem wan waef,” “kavenan we … i no gat en, “i silim,” “obei long kavenan blong mi,” “long ful taem we i no save finis,” mo “blong oltaem mo oltaem”), mo askem ol pikinini blong faenem ol sentens insaed long ves ia. ?Wanem nao ol sentens ia oli stap tijim yumi abaot Jisas Kraes?
-
Singsing “Famli I Stap Tugeta Foreva” (Liahona, Epril 2013, 65), o luklukbak long “Japta 55: Wan Revelesen Abaot Mared” (Doktrin mo Ol Kavenan Stori, 198). Askem ol pikinini blong lisin mo rere blong serem wanem yumi mas mekem blong mekem se ol famli blong yumi oli no save finis. Testifae se i nomata wanem famli situesen blong yumi i stap naoia, yumi save rere yumiwan blong yumi pat blong wan famli we i no save finis.
Stap Leftemap Tingting blong Lanem Samting long Hom
Invaetem ol pikinini blong talem long ol famli blong olgeta hamas oli lavem olgeta, mo hamas oli wantem blong yumi stap wan olsem wan famli we i no save finis.
Stap Kam Antap long Fasin blong Yumi blong Stap Tij
Lukaot gud mo gat hat long ol famli situesen we i stap. “Tedei, ol pikinini oli stap long ol defren kaen mo had famli situesen. … Yumi nidim blong go aot mo toktok long olgeta we oli filim se oli stap olgetawan, we oli filim se oli lego olgeta oli stap biaen i stap, o oli stap aotsaed long fanis” (Neil L. Andersen, “Whoso Receiveth Them, Receiveth Me,” Ensign o Liahona, May 2016, 49, 52).