Josef i luk papa, mama, mo brata blong hem insaed long selestial kingdom (Visen blong Josef Smit abaot Selestial Kingdom, Robert Barrett)

29 Novemba–5 Disemba

Doktrin mo Ol Kavenan 137–138

“Visen blong Fasin blong Pemaot Ol Dedman”

Lukaotem ol prinsipol insaed long ol revelesen ia we yu luk se bae oli impoten long ol pikinini we yu stap tijim. ?Olsem wanem bae yu helpem olgeta blong andastanem olgeta prinsipol ia?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong Jisas Kraes we i stap long spirit wol, semmak olsem hemia we i stap long aotlaen blong wik ia insaed long Kam Folem Mi—Blong Wanwan Man, Woman o Famli. Askem ol pikinini blong serem wan samting we oli save abaot spirit wol.

Tijim Doktrin: Ol Smol Pikinini

Doktrin mo Ol Kavenan 137:1–5

God i givim mi wan rod ia blong mi stap wetem famli blong mi blong oltaem.

Long wan visen, Josef Smit i bin luk ol memba blong famli blong hem oli stap tugeta long selestial kingdom. ?Olsem wanem nao yu save yusum visen ia blong tijim ol pikinini se ol famli oli save stap tugeta blong oltaem?

Samfala Aktiviti we Yu Save Mekem

• Soem wan pikja blong wan insaed long famli blong yu, mo tokbaot hamas yu wantem stap wetem hem long selestial kingdom. Eksplenem se brata blong Josef Smit, Alvin, i bin ded taem hem i wan yang man nomo, mo Josef i bin misim hem plante. Ridim Doktrin mo Ol Kavenan 137:1, 5, mo askem ol pikinini huia nao Josef Smit i bin luk long visen blong hem abaot selestial kingdom (luk tu long Ol Doktrin mo Kavenan Stori, 152–53). Invaetem ol pikinini blong stretem mo openem han blong olgeta bigwan blong soem hamas oli lavem famli blong olgeta, mo askem olgeta blong serem from wanem oli wantem blong stap wetem ol famli blong olgeta insaed long selestial kingdom.

• Yusum Doktrin mo Ol Kavenan 137:1–5 mo aktiviti pej blong wik ia blong helpem ol pikinini blong oli faenemaot ol ditel abaot visen blong Josef Smit abaot selestial kingdom. Invaetem olgeta blong droem wan pikja blong olgetawan mo famli blong olgeta long aktiviti pej, mo long semtaem, plei o singsing wan singsing abaot famli, olsem “Famli I Stap Tugeta Foreva” (Liahona, Epril 2013, 65).

Doktrin mo Ol Kavenan 138:6–11

Tabu Spirit i save helpem mi blong andastanem ol skripja.

Samtaem, ol skripja oli had blong andastanem, speseli long ol pikinini. Doktrin mo Ol Kavenan 138:11 i stap tijim se Tabu Spirit i save openem “ol ae blong andastaning blong [mifala] i open.”

Tabu Spirit i save helpem yumi blong andastanem wanem yumi stap ridim long ol skripja.

Samfala Aktiviti we Yu Save Mekem

• Soem wan pikja blong Presiden Joseph F. Smith (luk long Gospel Art Buk, namba 127). Eksplenem se hem i bin nambasikis Presiden blong Jos, mo wan dei, taem hem i bin stap ridim ol skripja blong hem, mo i stap tingting hevi long olgeta (i tingting strong se oli minim wanem). Taem yu stap ridim Doktrin mo Ol Kavenan 138:6, 11, invaetem ol pikinini blong oli priten se oli Presiden Smit mo oli mekem ol aksen we oli go wetem ol toktok ia.

• Talem long ol pikinini abaot wan taem we yu bin tingting hevi abaot wan samting long ol skripja, mo Tabu Spirit i bin helpem yu blong andastanem. Tugeta, singsing wan singsing abaot skripja stadi, olsem “Search, Ponder, and Pray” (Children’s Songbook, 109). ?Wanem nao singsing ia i talem wanem yumi se yumi mas mekem blong andastanem ol skripja?

Doktrin mo Ol Kavenan 138:18–35

Evriwan long ol pikinini blong Papa long Heven bae oli gat janis blong harem gospel.

Afta we oli bin hangem Jisas Kraes long kros, Jisas Kraes i bin visitim ol fetful Sent blong Hem long spirit wol. Hem i bin givim instraksen long olgeta blong tijim gospel long olgeta we oli no kasem gospel yet.

Samfala Aktiviti we Yu Save Mekem

• Soem wan pikja blong tumb (luk long Gospel Art Buk, namba 58, 59 o Ol Baebol Foto, namba 14), o droem wan pikja blong tumb long bod. Soem wan pikja blong Sevya we i stap long spirit wol, be bodi blong Hem i stap insaed long tumb (olsem hemia we i stap long aotlaen blong wik ia insaed long Kam Folem Mi—Blong Wanwan Man, Woman o Famli). Taem yu stap mekem hemia, askem ol kwestin, long ol pikinini, blong helpem olgeta blong oli luksave ol ki ditel insaed long Doktrin mo Ol Kavenan 138:18–19, 23–24, 27–30, olsem: huia Jisas i bin visitim, olsem wanem oli filim, mo wanem Hem i bin askem olgeta blong mekem.

• Soem wan pikja blong ol misinari (luk long Gospel Art Buk, namba 109, 110), mo askem ol pikinini blong serem wanem we ol misinari oli stap mekem. Yu save invaetem olgeta blong oli aktemaot sam long ol samting we ol misinari oli stap mekem. Ridim Doktrin mo Ol Kavenan 138:31–34 long ol pikinini. Eksplenem se, semmak olsem we i gat ol misinari long wol ia, i gat tu ol misinari long spirit wol we oli stap tijim ol pipol longwe.

Stap Tijim Doktrin: Ol Bigfala Pikinini

Doktrin mo Ol Kavenan 137:1–5

God i givim mi wan rod ia blong mi stap wetem famli blong mi blong oltaem.

Josef Smit i bin gat wan visen abaot selestial kingdom mo hem i bin luk papa mo mama blong hem, mo brata blong hem Alvin. Visen ia i tijim yumi we, sapos yumi stret mo gud, ol famli rilesensip blong yumi bae oli gohed bakegen long nekis laef.

Samfala Aktiviti we Yu Save Mekem

• Invaetem ol pikinini blong oli ridim Doktrin mo Ol Kavenan 137:1–5 mo droem wan pikja blong wanem oli ridim (luk tu long aktiviti pej blong wik ia). ?Olsem wanem Josef Smit i bin filim taem hem i bin luk ol memba blong famli blong hem insaed long selestial kingdom?

• Soem vidio ia: “Families Can Be Together Forever” (ChurchofJesusChrist.org), o singsing wan singsing abaot ol famli, olsem “Famli I Stap Tugeta Foreva” (Liahona, Epril 2013, 65). ?Wanem nao vidio o singsing ia i stap tijim yumi abaot wanem yumi save mekem blong mekem se ol famli blong yumi oli no save finis?

Doktrin mo Ol Kavenan 138:1–11

Taem mi stap tingting hevi long ol skripja, Tabu Spirit i save helpem mi blong andastanem ol skripja ia.

?Wanem nao ol pikinini oli save lanem aot long eksampol blong Presiden Joseph F. Smith, we bae i save mekem se oli kam antap long wei we oli stap stadi long ol skripja blong olgeta?

Samfala Aktiviti we Yu Save Mekem

• Invaetem ol pikinini blong ridim Doktrin mo Ol Kavenan 138:1–11, mo helpem olgeta blong raetem wan sot sentens we i talem eksperiens blong Presiden Joseph F. Smith. ?Wanem nao hem i bin mekem we i lidim hem long bigfala visen ia? ?I minim wanem blong tingting hevi, o tingting longtaem long ol skripja?

• Askem ol pikinini wanem nao oli stap mekem taem oli gat ol kwestin abaot gospel. Serem sam eksampol aot long ol skripja, o aot long laef blong yuwan, abaot ol taem we yu bin tingting hevi long ol skripja mo Spirit i bin mekem yu andastanem olgeta (eksampol: luk long 1 Nifae 11:1–6; Doktrin mo Ol Kavenan 76:19–24; Josef Smit—Histri 1:11–12).

Doktrin mo Ol Kavenan 138:12–35

Evriwan long ol pikinini blong Papa long Heven bae oli gat janis blong harem gospel.

Presiden Josef F. Smit i bin lanem se wok blong stap prijim gospel i stap gohed insaed long spirit wol. Wok ia i meksua se evriwan bae i gat wan janis blong akseptem gospel.

Samfala Aktiviti we Yu Save Mekem

• Long bod, listimdaon sam ves aot long seksen 138. Afta, mekem lis, folem wan defren oda, blong ol toktok we oli talem sot wanwan set blong ol ves ia. Invaetem ol pikinini blong majem ol toktok ia i go wetem ol stret ves. Samfala ves ia, i gat: 12–16 (ol stret mo gud spirit oli kam tugeta wanples blong wet long Jisas blong i kamkamaot), 18–19 (Sevya i kamaot long ol stret mo gud spirit, 29–30 (Jisas i jusum ol mesenja blong Hem blong prijim gospel), 31–35 (olgeta spirit we oli stret mo gud, oli prijim gospel), mo sam moa i go olsem. Afta we ol pikinini oli mekem maj gem ia, askem olgeta blong serem wanem oli lanem aot long ol ves ia.

• Askem sam long ol pikinini blong ridim Doktrin mo Ol Kavenan 138:33 blong faenemaot wanem prinsipol blong gospel nao oli bin tijim long ol spirit blong olgeta we oli ded. Askem ol nara pikinini blong ridim ol prinsipol we oli tijim insaed long Ol Toktok blong Bilif 1:4. ?Wanem i semmak long ol ves ia, mo wanem nao i defren? ?Wanem nao hemia i stap tijim yumi abaot Papa long Heven mo plan blong Hem?

Stap Leftemap Tingting blong Lanem Samting long Hom

Invaetem ol pikinini blong putum plan blong wan taem long wik ia, we bae oli yusum blong tingting hevi long ol skripja ia we oli stap ridim.

Stap Kam Antap long Fasin blong Yumi blong Stap Tij

Leftemap tingting blong gat fasin blong stap kwaet. Helpem ol pikinini blong andastanem se wan impoten pat blong stap kwaet, hem i blong stap tingting long Papa long Heven mo Jisas Kraes. Maet bae yu rimaenem olgeta pikinini blong stap kwaet taem oli singsing wan singsing kwaet kwaet nomo, o oli mekem tiun blong singsing ia nomo, o soem wan pikja blong Jisas Kraes.