Josef i luk papa, mama, mo brata blong hem insaed long selestial kingdom (Joseph Smith’s Vision of the Celestial Kingdom, Robert Barrett)

29 Novemba–5 Disemba

Doktrin mo Ol Kavenan 137–138

“Visen blong Fasin blong Pemaot Ol Dedman”

Presiden M. Russell Ballard i tijim: “Mi invaetem yufala blong tingting gud mo ridim [Doktrin mo Ol Kavenan 138]. Taem yufala i mekem olsem, bae Lod i blesem yu blong andastanem moa, mo glad moa long lav blong God, mo plan blong Hem blong fasin blong sevem man, mo hapines blong ol pikinini blong Hem” (“Visen blong Fasin blong Pemaot Ol Dedman”,”   Liahona, Nov 2018, 71).

Raetemdaon Ol Filing mo Tingting blong Yu

Ol revelesen we oli raetemdaon insaed long Doktrin mo Ol Kavenan 137 mo 138 i gat moa long 80 yia mo moa long 2,400 kilometa i seperetem. Seksen 137 Profet Josef Smit i bin kasem long 1836 insaed long Ketlan Tempol we i no finis yet, mo seksen 138, Josef F. Smit i bin kasem taem hem i bin nambasikis Presiden blong Jos long 1918 long Sol Lek Siti. Be long saed blong doktrin, tufala visen ia oli stap wok saedsaed. Tufala tugeta i ansarem ol kwestin abaot fiuja blong ol pikinini blong God long nekis laef. Mo tugeta, i ademap moa dip mining taem yumi tingting long ol eksperiens blong laef blong ol profet we oli bin kasem ol revelesen ia.

Visen blong Josef Smit i bin helpem hem blong andastanem fiuja we i no save finis, blong brata blong hem we hem i lavem tumas, Alvin, we i bin ded sikis yia bifo atoriti blong baptaes i bin kambak. Ol kwestin se Lod i sevem Alvin blong taem we i no save finis, oli bin stap wetem Josef long ful taem ia. Visen blong Josef F. Smit i talemaot, tru long revelesen, ol bigfala trutok abaot spirit wol—mo i tru, i wan revelesen we i givim kamfot long wan we i stap krae sore from plante memba blong famli we oli ded. Josef F. Smit i bin lusum papa blong hem, Haeram Smit, taem hem i gat 5 yia, mo hem i lusum mama blong hem, Meri Filding Smit, taem hem i gat 13 yia. Taem we hem i bin kasem visen ia long 1918, hem i bin krae sore from ded blong 13 pikinini finis.

Plante kwestin we ol pipol oli gat abaot laef afta long ded, ansa i kamaot long ol revelesen ia. Seksen 137 i givim sam moa laet long ol kaen kwestin olsem, mo seksen 138 i openem ol keten oli go bigwan moa. Tugeta, tufala seksen ia oli testifae abaot “lav, we i bigwan mo i mekem man i sapraes, we Papa mo Pikinini i bin soemaot” (Doktrin mo Ol Kavenan 138:3).

Sam Aedia blong Skripja Stadi blong Yuwan

Doktrin mo Ol Kavenan 137

Evri sol bae oli gat wan janis blong jusum glori ia we i no save finis.

Semmak andastaning we i bin stap long medel blong Ol Kristin Man long 1836, i bin we, sapos wan i bin ded we hem i no bin baptaes—olsem brata blong Josef Smit, Alvin—bae hem i no save go long heven. Yet, Josef i bin luk Alvin, long wan visen abaot selestial kingdom. Taem yu stap ridim seksen 137, tingting hevi long wanem yu lanem abaot Papa long Heven, plan blong Hem blong fasin blong sevem man, mo selestial kingdom.

Luk tu long Saints, 1:232-35.

Doktrin mo Ol Kavenan 138:1–11, 25–30

Blong stap ridim mo tingting hevi long ol skripja, i stap helpem mi blong kasem revelesen.

Samtaem, revelesen i kam iven we yumi no stap lukaot blong kasem wan. Be plante taem moa, i kam from se yumi stap wok wetem strong tingting blong lukaotem mo rere from revelesen. Taem yu stap ridim Doktrin mo Ol Kavenan 138:1–11, 25–30, luk wanem we Presiden Josef F. Smit i bin stap mekem taem we “ol ae blong andastaning blong [hem] i bin open” blong andastanem gud moa misin ia blong Sevya blong pemaot man. Afta, yu tingting long hao nao bae yu save folem eksampol blong Presiden Smit. Eksampol: ?Wanem jenis yu save mekem long skripja stadi blong yu blong letem moa “fasin blong tingting hevi long ol skripja.” mo moa “mi stap tingting i gobak long bigfala sakrifaes [blong Sevya] blong pem praes”? (Olol ves 1–2).

Long mesej blong hem ia, “Visen blong Fasin blong Pemaot Ol Dedman” (  Liahona, Nov 2018, 71–74), Presiden M. Russell Ballard i talemaot sam moa wei we Presiden Smit i bin rere blong kasem revelesen ia. Tingting long hao nao yu yu bin rere from ol eksperiens ia we yu stap gat, o bambae yu gat yet long fiuja.

Luk tu long vidio ia: “Ministry of Joseph F. Smith: A Vision of the Redemption of the Dead,” ChurchofJesusChrist.org.

Josef F. Smit, i kam long Albert E. Salzbrenner

Doktrin mo Ol Kavenan 138:25–60

Wok blong fasin blong sevem man i stap hapen long tugeta saed blong vel.

Presiden Russell M. Nelson i tijim: “Mesej blong yumi long wol i simpol mo i ones: mifala i stap invaetem evriwan long ol pikinini blong God, long tugeta saed blong vel, blong kam long Sevya blong olgeta, blong kasem ol blesing blong tabu tempol, gat wan glad we i gogohed blong stap, mo kwalifae from laef we i no save finis”(“Yumi Mas Gohed,”   Liahona, Mei 2018, 118–19). Tingting hevi long toktok ia taem yu stap ridim Doktrin mo Ol Kavenan 138:25–60. Mo tu, tingting long ol kwestin ia:

• ?Wanem nao yu lanem aot long ol ves ia abaot hao wok blong fasin blong sevem man i stap hapen insaed long spirit wol? ?From wanem hem i impoten, long yu, blong yu save se wok ia i stap tekem ples? ?Olsem wanem ol ves ia oli stap mekem fet blong yu long Atonmen blong Sevya, i kam strong moa?

• ?Wanem nao ol ves ia oli stap tij abaot huia i stap tekpat long wok ia blong fasin blong sevem man insaed long spirit wol? ?From wanem hem i impoten blong andastanem se wok ia blong fasin blong sevem man i stap hapen long tugeta saed blong vel?

Luk tu long Dallin H. Oaks, “Gat Tras long Lod,”   Liahona, Nov 2019, 26–29; “Susa Young Gates and the Vision of the Redemption of the Dead,” Revelations in Context, 315–22.

Sam Aedia blong Famli Skripja Stadi mo Famli Haos Naet

Doktrin mo Ol Kavenan 137:1–5.Invaetem famli blong yu blong droem wanem we oli ting se hem i selestial kingdom, folem wanem i stap long ol ves ia. ?Wanem nao yu faenem insaed long ol ves ia we i helpem yu blong luk fored blong stap laef longwe? ?Wanem nao yu stap mekem naoia blong rere blong stap laef long wan selestial kingdom wetem Papa long Heven mo Jisas Kraes?

Doktrin mo Ol Kavenan 137:5–10.Blong stap lanem se bae i minim wanem long Josef Smit blong luk se samfala memba blong famli blong hem oli stap tugeta insaed long selestial kingdom, famli blong yu i save wajem vidio ia: “Ministry of Joseph Smith: Temples” (ChurchofJesusChrist.org). Maet yu save tokbaot wan we yu save, we i bin ded mo i no gat janis blong kasem baptaes. ?Wanem nao Doktrin mo Ol Kavenan 137:5–10 i stap tijim yumi man o woman ia?

Doktrin mo Ol Kavenan 138:12–24.?Wanem nao Doktrin mo Ol Kavenan 138:12–24 i tijim abaot ol pipol we Sevya i bin visitim olgeta insaed long spirit wol? ?Wanem blesing nao oli bin kasem? ?Wanem nao yumi save lanem aot long eksampol blong olgeta?

Doktrin mo Ol Kavenan 138:38–55.Ol ves ia oli tokbaot olgeta we Presiden Josef F. Smit i bin luk long spirit wol, mo i tokbaot olgeta smol. Mebi famli blong yu i save mekem wan lis blong ol bubu blong yu we oli stap long spirit wol, mo tu, oli rere long ol ditel abaot laef blong olgeta.

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Search, Ponder, and Pray,” Children’s Songbook, 109.

Stap Kam Antap long Fasin blong Yumi blong Stap Tij

Stap tingting hevi long ol skripja. Presiden David O. McKay i singaotem fasin blong save tingting hevi long wan samting blong wan longfala taem “i wan long ol doa we i moa tabu, we yumi pastru long ol blong stap wetem Lod” (Teachings of Presidents of the Church: David O. McKay [2003], 32).

Hem we Oli Givim Wok Ia long Hem, i kam long Harold I. Hopkinson. Jisas Kraes i bin givim wok long olgeta spirit we oli stret mo gud blong oli prijim gospel insaed long spirit wol.