“6–12 Disemba. Ol Toktok blong Bilif mo Ol Ofisol Toktok 1 mo 2: ‘Mifala I Biliv,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“6–12 Disemba. Ol Toktok blong Bilif mo Ol Ofisol Toktok 12,” Kam Folem Mi—Blong Wanwan Man, Woman mo Famli: 2021
Long Evri Memba we I Man mo I Klin Inaf, i kam long Emma Allebes
6–12 Disemba
Ol Toktok blong Bilif mo Ol Ofisol Toktok 1 mo 2
“Mifala I Biliv”
Taem yufala i stap stadi long Ol Toktok blong Bilif mo Ol Ofisol Toktok 1 mo 2, tingting long wanem jenis oli bin mekem long Jos. ?Wanem nao i tajem yu abaot ol trutok ia we ol Ofisol Toktok ia oli stap tijim?
Raetemdaon Ol Filing mo Tingting blong Yu
Long ol 200 yia afta long Fas Visen blong Josef Smit, God i bin gohed blong givim “wan revelesen folem nara revelesen, wan save folem nara save” i go long ol lida blong Jos blong Hem (Doktrin mo Ol Kavenan 42:61). Long sam kes, revelesen ia i lidim ol lida blong Jos blong oli mekem ol jenis long ol polisi mo ol praktis blong Jos, “folem wanem we Lod i wantem, mo i makem ol sore blong hem i go folem fasin blong laef blong ol pikinini blong ol man” (Doktrin mo Ol Kavenan 46:15. Ol Ofisol Toktok 1 mo 2 oli ripresentem kaen revelesen ia—wan i lidim Jos blong stopem praktis blong fasin blong maredem fulap woman, mo narawan i mekem se ol blesing blong prishud, wetem hemia blong ol blesing blong tempol, oli stap blong ol pipol blong eni kaen kala blong skin. Ol jenis olsem, oli pat blong wanem i minim blong gat wan “jos we i tru mo i laef” (Doktrin mo Ol Kavenan 1:30), wetem wan profet we i tru mo i stap laef.
Be, i gat ol samting tu we oli no jenis—ol fandesen trutok we oli no save finis. Mo samtaem, stamba tingting blong revelesen i blong ademap moa laet long ol trutok ia, mo i helpem yumi blong luk samting i klia moa. Ol Toktok blong Bilif—ol 13 stret toktok blong Josef Smit abaot wanem ol Lata-dei Sent oli mas biliv long ol—i stap blong mekem ol stamba tingting ia oli klia. Tufala kaen revelesen ia oli blesem mo soem rod long Jos, wan Jos we i stanap strong long trutok we i no save finis, be yet, i save gro mo i save jenis taem we Lod i mekem yumi gat moa andastaning blong helpem yumi fesem ol jalenj blong tedei. Long nara toktok: “Mifala i biliv long evri toktok we God i bin talemaot finis, evri toktok we Hem i stap talemaot naoia, mo mifala i biliv we bambae Hem i talemaot yet plante bigfala mo impoten samting abaot kingdom blong God” (Ol Toktok blong Bilif 1:9).
Sam Aedia blong Skripja Stadi blong Yuwan
Ol Toktok blong Bilif, insaed i gat ol fandesen trutok blong gospel ia we i kambak.
Wan wei we yu save stadi long Ol Toktok blong Bilif, hem i blong mekem wan lis blong ol trutok we oli stap long wanwan toktok blong bilif ia, mo afta, insaed long ol skripja we oli go wetem ol trutok ia. ?Olsem wanem nao ol skripja ia oli kam mekem save blong yu i kam moa rij abaot ol trutok we oli stap long Ol Toktok blong Bilif?
Luk tu long Gaed long Ol Skripja, “Ol Toktok blong Bilif,” olskripja.ChurchofJesusChrist.org; L. Tom Perry, “The Doctrines and Principles Contained in the Articles of Faith,” Ensign o Liahona, Nov. 2013, 46–48; “Chapter 38: The Wentworth Letter,” insaed long Teachings of Presidents of the Church: Joseph Smith, 435–47.
Ol Toktok blong Bilif 1:9; mo Ol Ofisol Toktok 1 mo 2
Jos Ia blong Jisas Kraes, revelesen nao i stap lidim.
“Mifala i biliv we bambae [God] i talemaot yet plante bigfala mo impoten samting abaot kingdom blong God” (Ol Toktok blong Bilif 1:9), iven taem we ol samting ia i minim blong jenisim ol polisi mo praktis blong Jos. Wetem prinsipol ia long maen, luklukbak long Ol Ofisol Toktok 1 mo2, mo lukaotem ol toktok mo ol sentens we bae oli mekem fet blong yu i kam strong moa wetem revelesen we i stap gohed blong kam. ?Wanem sam nara eksampol blong revelesen we i gogohed blong go long profet blong Lod we yu save tingting long ol? ?Olsem wanem ol revelesen ia oli tajem laef blong yu? ?Olsem wanem oli bin mekem wok ia blong kingdom blong Papa long Heven i wok i go fored?
Luk tu long Amos 3:7; 2 Nifae 28:30.
Wok blong God i mas muv fored.
Insaed long “Sam Pat blong Tri Toktok we i kam long Presiden Wilfod Wudrof long Saed blong Pablik Anaonsmen” (we i stap long en blong Ofisol Toktok 1), ?wanem nao ol risen we profet i givim long bihaf blong Lod, blong stopem praktis blong maredem fulap woman? ?Hemia i tijim yu wanem abaot wok blong God?
Blong gat moa infomesen abaot histri bakgraon blong Ofisol Toktok 1, luk long “The Messenger and the Manifesto” (Revelations in Context, 323–31) mo “Plural Marriage and Families in Early Utah” (Gospel Topics, topics.ChurchofJesusChrist.org).
Wilford Wudrof, i kam long H. E. Peterson
Yumi save trastem Lod, iven sapos yumi no gat wan save we i stret evriwan.
Ol skripja oli tijim yumi blong trastem Lod, (luk long Ol Proveb 3:5), mo hemia nao wanem plante memba blong Jos blong laen blong Afrika oli bin mekem taem we Jos i bin holemtaet olgeta blong no kasem prishud odinesen mo ol odinens blong tempol. Iven we oli no bin andastanem from wanem polisi ia i bin stap—mo plante taem oli harem nogud long ol risen we oli bin stap tijim long tetaem ia, we Jos i sakemaot tedei—plante fetful memba we oli kamaot long laen blong Afrika, oli bin trastem Lod mo oli bin stap fetful truaot long laef blong olgeta. Taem yu stap ridim Ofisol Toktok 2, tingting hevi long hao nao yu bin lanem blong trastem Lod, iven we yu no bin gat wan save we i stret evriwan.
Sapos yu stap lan abaot fet blong ol blak memba blong Jos, bae i save givim insperesen long yu. Hemia samfala stori blong olgeta, we oli stap long history.ChurchofJesusChrist.org:
-
“Jane Elizabeth Manning James” (Church History Topics)
-
“In My Father’s House Are Many Mansions” (story of Green Flake)
-
“You Have Come at Last” (story of Anthony Obinna)
-
“Break the Soil of Bitterness” (story of Julia Mavimbela)
-
“I Will Take It in Faith” (story of George Rickford)
Luk tu long “Witnessing the Faithfulness,” Revelations in Context, 332–41; Gospel Topics, “Race and the Priesthood,” topics.ChurchofJesusChrist.org; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.
Sam Aedia blong Famli Skripja Stadi mo Famli Haos Naet
-
Ol Toktok blong Bilif.Tingting long hao nao, famli blong yu i save mekem ol “smol lesen” blong Ol Toktok blong Bilif. Eksampol: Truaot long wik, wanwan memba blong famli i save jusum wan toktok blong bilif, mo i faenem wan skripja we i go wetem, o wan pikja, wan hym, wan singsing blong ol pikinini, o i save serem wan eksperiens blong hemwan.
O, ol memba blong famli oli save gat taem, wan afta wan, blong askem kwestin long wanwan long olgeta abaot Jos mo ol bilif blong yumi, mo afta, i ansarem ol kwestin ia wetem wan toktok blong bilif.
-
Ol Ofisol Toktok 1 mo 2.Ol Ofisol Toktok 1 mo 2 oli helpem yumi andastanem rol blong revelesen blong tedei insaed long Jos. Taem we famli blong yu i stap ridim olgeta, tingting blong toktok raon long hao nao profet i stap lidim yumi tedei “tru long insperesen blong God we I Gat Olgeta Paoa” (Ofisol Toktok 1). ?Olsem wanem tufala ofisol toktok oli mekem fet blong yumi i kam strong moa long wan God we i stap laef we Hemwan nao i stap lidim Jos ia blong Hem? ?Olsem wanem nao yumi stap luk han blong Hem insaed long wok blong Jos tedei? Yu maet wantem disaed blong luklukgud long samfala long ol risos ia tugeta, we oli stap long “Aedia blong Skripja Stadi blong Yuwan” we i stap antap ia.
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Keep the Commandments,” Children’s Songbook, 146–47.
Stap Kam Antap long Fasin blong Yumi Blong Stap Tij
Folemap ol invitesen blong tekem aksen. “Taem yu folemap wan invitesen blong tekem aksen, yu stap soem long ol memba blong famli se yu stap kea abaot olgeta, mo long olsem wanem gospel ia i stap blesem laef blong olgeta. Mo tu, yu givim olgeta ol janis blong serem ol eksperiens blong olgeta” (Teaching in the Savior’s Way, 35).
