Long Evri Memba we I Man mo I Klin Inaf, i kam long Emma Allebes

6–12 Disemba

Ol Toktok blong Bilif mo Ol Ofisol Toktok 1 mo 2

“Mifala I Biliv”

Taem yu stap stadi long wik ia, mo mekem wan plan blong tijim, tingting long wei we yu save helpem ol pikinini insaed long klas blong yu blong mekem bilif blong olgeta i kam strong moa long ol besik trutok blong gospel.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Sakem wan balong i go long wan pikinini, mo askem pikinini ia blong serem wan samting we hem i bilif long hem abaot Jisas Kraes mo Papa long Heven. Ripitim olsem kasem evri pikinini i gat janis blong serem wan samting.

Tijim Doktrin: Ol Smol Pikinini

Ol Toktok blong Bilif

Mi biliv long gospel blong Jisas Kraes.

Yu save yusum Ol Toktok blong Bilif blong luklukbak, wetem ol pikinini, long sam long ol besik bilif blong Jos Ia blong Jisas Kraes. ?From wanem hem i impoten blong ol pikinini we yu stap tijim oli bilivim ol simpol trutok ia?

Samfala Aktiviti we Yu Save Mekem

• Jusum samfala toktok blong bilif we yu filim se oli impoten speseli long ol pikinini we yu stap tijim. Blong wanwan toktok blong bilif, serem wan pikja (luk long aktiviti pej blong wik ia), o serem wan stori (aot long ol skripja o laef blong yu) we i soemaot, o i kliarem wan trutok we oli tijim insaed long toktok blong bilif ia. Talem long ol pikinini from wanem trutok ia i impoten long yu, mo givim taem long olgeta blong oli serem from wanem hemia i impoten long olgeta.

• Faenem ol hym o ol singsing blong ol pikinini we i save helpem ol pikinini blong andastanem wan o moa long wan toktok blong bilif. Maet ol pikinini oli save helpem yu blong jusum. Singsing ol singsing tugeta, mo helpem ol pikinini blong luk olsem wanem ol singsing ia oli go wetem ol toktok blong bilif.

Ol Toktok blong Bilif; mo Ol Ofisol Toktok 1 mo 2

Lod i lidim Jos blong Hem tru long profet blong Hem.

Taem we ol memba blong Jos oli fesem ol defren kaen jalenj, yumi save faenem pis taem yumi save se Papa long Heven i glad blong givim revelesen blong soem rod long yumi. Helpem ol pikinini we yu stap tijim blong mekem fet blong olgeta i strong moa, se, God i stap lidim Jos tru wan profet we i stap laef.

Papa long Heven i stap lidim yumi tru long ol profet.

Samfala Aktiviti we Yu Save Mekem

• Soem wan set blong ol skripja, mo wan pikja blong profet we i stap laef (o las namba blong konfrens blong Ensign o Liahona). Helpem ol pikinini blong faenemaot wanem i go wetem sentens ia: “evri toktok we God i bin talemaot finis,” mo wanem i go wetem sentens ia: “evri toktok we Hem i stap talemaot naoia” (Ol Toktok blong Bilif 1:9).

• Ofem ol laet, mo putum wan pikja blong Jisas Kraes antap long bod. Onem wan tojlaet mo saenem pikja ia blong soem olsem wanem we profet, semmak olsem tojlaet ia, i helpem yumi blong luk Sevya i klia moa.

• Faenem ol simpol daereksen blong mekem wan samting, olsem wan kaekae o wan pleiplei blong pikinini. Folem ol instraksen wetem ol pikinini, mo eksplenem se tru long profet, Papa long Heven i givim ol instraksen blong helpem yumi blong gobak stap laef wetem Hem. ?Wanem nao sam long ol samting we profet i bin tijim yumi blong mekem se yumi stap gobak long God?

Stap Tijim Doktrin: Ol Bigfala Pikinini

Ol Toktok blong Bilif

Ol Toktok blong Bilif oli tijim ol simpol trutok blong gospel.

Samtaem, i luk se gospel i bigwan mo i fasfas tumas, speseli long ol pikinini. Ol Toktok blong Bilif oli save helpem ol pikinini blong oli andastanem, long wan simpol wei, sam long ol besik trutok we yumi, ol Lata-dei Sent, yumi stap biliv long ol.

Samfala Aktiviti we Yu Save Mekem

• Invaetem ol pikinini blong jusum wan ki toktok o ki sentens aot long wan long ol toktok blong bilif mo i serem wetem klas. Afta, givim taem long ol nara pikinini blong oli traem faenem wijwan toktok blong bilif nao, toktok ia, o sentens ia i kamaot long hem. Askem ol pikinini blong serem from wanem toktok ia o sentens ia we oli jusum, i impoten.

• Sam dei bifo klas, askem sam long ol pikinini blong oli rere blong serem insaed long klas, wan sot mesej abaot fevret toktok blong bilif blong olgeta. Insaed long mesej blong olgeta, oli save yusum wan pikja, wan singsing, wan stori o wan eksperiens, o ol nara skripja. Invaetem ol pikinini ia blong oli serem from wanem oli laekem toktok blong bilif ia we oli bin jusum.

• Long bod, raetem ol kwestin we sam oli gat abaot bilif blong olgeta we wan long ol toktok blong bilif ia i save givim ansa long hem. Askem ol pikinini blong jusum wan kwestin mo faenem wan toktok blong bilif we i ansarem kwestin ia. Letem olgeta oli praktis blong stap ansarem kwestin ia mo yusum toktok blong bilif ia.

Ol Ofisol Toktok 1 mo 2

Ol profet oli helpem yumi blong save tingting blong Papa long Heven.

Ol Ofisol Toktok 1 mo 2 oli ol gudfala eksampol blong wei we ol profet oli kasem mo tekem aksen folem ol revelesen we oli kam long God. ?Olsem wanem yu save helpem ol pikinini blong mekem fet blong olgeta i kam antap moa, se, God i stap lidim Jos blong Hem tru long revelesen?

Samfala Aktiviti we Yu Save Mekem

• Askem ol pikinini blong faenem wan toktok blong bilif we i stap tij abaot ol profet o revelesen. Invaetem olgeta blong serem from wanem oli talem tangkyu se yumi gat wan profet we i stap laef. Serem sam eksampol long wei we God i bin lidim Jos tru long revelesen, mo yusum tu sam eksampol we oli stap long Ol Ofisol Toktok 1 mo 2, mo letem ol pikinini oli serem ol eksampol we oli save gud long olgeta (olsem eni las jenis long ol program o polisi blong Jos).

• Givim olgeta skripja refrens ia long ol pikinini: 2 Nifae 26:33; Jekob 2:27. Invaetem olgeta blong faenemaot wijwan skripja i go wetem Ofisol Toktok 1 (we i mekem se i nomo gat fasin blong man i maredem fulap woman) mo wijwan i go wetem Ofisol Toktok 2 (we i mekem se ol blesing blong prishud mo tempol i stap blong evri pipol, i nomata wanem kala blong skin blong hem). Talem testemoni blong yu se Lod i talemaot tingting blong Hem long ol profet blong bifo mo ol profet blong tedei.

• Raetem hemia aot long Ofisol Toktok 1 long bod: “Yu mas mekem jajmen blong yuwan.” ?Hem i minim wanem blong mekem wan jajmen blong yuwan taem profet i stap kasem revelesen? Blong help blong ansa long kwestin ia, yu save serem toktok ia we i kam long Presiden Russel M. Nelson: “Bae yufala i save save, blong yufalawan, wanem i tru, mo wanem i no tru taem yufala i stap lanem blong luksave o haremsave ol kwaet toktok blong Spirit” (“The Love and Laws of God” [Brigham Young University devotional, Sept. 17, 2019], 4, speeches.byu.edu).

• Droem o soem wan pikja blong wol antap long bod. Invaetem wan long ol pikinini blong ridim ol las tu paragraf blong leta blong Fas Presidensi, we deit blong hem i, 8 Jun 1978, we oli kwotem insaed long Ofisol Toktok 2 (we i stat wetem “Hem i bin harem ol prea blong mifala …”). Askem ol pikinini blong kaontem hamas taem ol toktok ia: “blesing,” mo “ol blesing,” oli kamaot. ?Wanem blesing nao i kam from gospel ia? Invaetem ol pikinini blong mekem wan lis blong ol blesing ia antap long bod, raon long droing o pikja blong wol. Testifae se God i lavem evriwan long ol pikinini blong Hem raon long wol, mo Hem i wantem blesem olgeta wetem gospel blong Hem.

Stap Leftemap Tingting blong Lanem Samting long Hom

Helpem ol pikinini blong jusum wan toktok blong bilif we oli wantem lanem baehat, mo helpem olgeta blong mekem wan plan blong mekem olsem.

Stap Kam Antap long Fasin blong Yumi Blong Stap Tij

Ol pikinini oli laekem blong serem wanem we oli stap lanem. I nomata se oli yang, ol pikinini oli save mekem fet blong ol famli memba blong olgeta i kam strong moa. Leftemap tingting blong olgeta blong serem wetem ol famli blong olgeta ol samting we oli stap lanem long Praemeri. (Luk long Teaching in the Savior’s Way, 30.)