Nativiti long Kopa mo Amba, i kam long J. Kirk Richards

20–26 Disemba

Krismes

Presen Ia blong Tabu Pikinini blong God we I No Gat Samting I Bitim

Krismes i wan bigfala taem blong glad long plante pikinini. Tingting long hao bae yu helpem olgeta blong joenem glad ia long Krismes taem wetem glad ia blong gospel blong Sevya.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong oli serem wanem oli bin mekem long wik ia we i jes pas blong selebretem taem ia we Sevya i bon i kam long wol.

Tijim Doktrin: Ol Smol Pikinini

Mi save “givim testemoni blong mi” blong selebretem taem ia we Jisas i bon i kam long wol.

Insaed long “Kraes we I Laef” (ChurchofJesusChrist.org), Fas Presidensi mo Kworom blong Olgeta Twelef Aposol oli givim testemoni blong olgeta abaot Jisas Kraes blong “makem taem we Jisas Kraes i bon i kam long wol.” Tingting long wei we bae yu leftemap tingting blong ol pikinini blong serem ol testemoni blong olgeta wetem ol narawan.

Samfala Aktiviti we Yu Save Mekem

• Soem long ol pikinini wan pikja blong “Kraes we I Laef”(luk long aotlaen blong wik ia long Kam Folem Mi—Blong Wanwan Man, Woman mo Famli). Poen i go long toktok ia Kraes long taetol, mo letem ol pikinini oli poen i go long toktok ia tu. Mo tu, poenem ol signeja long en blong pej, mo talem long ol pikinini se, long yia 2000, Fas Presidensi mo Olgeta Twelef Aposol, oli bin raetem testemoni blong olgeta abaot Jisas Kraes, mo oli saenem nem blong olgeta long hem, mo oli serem i go long wol.

• Soem wan pikja blong Jisas Kraes, mo invaetem wanwan pikinini blong stanap mo serem wan samting we hem i save abaot Hem. Sapos oli nidim help, soem ol trutok we oli stap long “Kraes we I Laef.” Mekem ol pikinini oli tingbaot se, taem oli stap tokbaot Jisas long ol narawan, oli stap serem testemoni blong olgeta ia nao.

• Talem long ol pikinini olsem wanem yu bin kasem testemoni blong yu abaot Jisas Kraes, mo wanem yu stap mekem blong holem testemoni ia blong yu i stap strong. Helpem olgeta blong oli tingting long sam wei we oli save mekem testemoni blong olgeta abaot Jisas Kraes i kam moa strong, mo invaetem olgeta blong jusum wan samting we bae oli mekem.

Papa long Heven i bin sendem Pikinini blong Hem olsem wan presen we Hem i bin givim long yumi.

Blong stap givim mo kasem ol presen, i wan tradisen pat blong Krismes long plante pipol. Tradisen ia, i sapos blong mekem yumi tingbaot “presen ia blong tabu Pikinini blong God we i no gat samting i bitim” (“Kraes we I Laef”).

Samfala Aktiviti we Yu Save Mekem

• Askem ol pikinini blong oli tokbaot ol presen we oli bin givim finis, o oli bin kasem. Ridim las sentens blong “Kraes we I Laef,” long olgeta, mo invaetem olgeta blong lisin long presen ia we God i bin givim long yumi. (Sapos i nid, helpem olgeta blong andastanem se “i no gat samting i bitim” i minim se “i moa gud i bitim eni nara samting.”) ?From wanem Pikinini blong God, Jisas Kraes, i bin bes presen ia?

• Sing tugeta wan singsing abaot Jisas Kraes, olsem “He Sent His Son” (Children’s Songbook, 34–35). Helpem ol pikinini blong pikimap wan sentens long singsing ia we bae oli wantem droem (olsem wan “niubon bebi,” o “wokbaot wetem ol man”). Taem oli stap dro, askem ol pikinini blong talem long yu abaot wei we oli stap filim abaot wanem we Jisas i bin mekem blong olgeta. Serem ol filing blong yu tu.

Jisas i invaetem mi blong folem eksampol blong Hem.

Pat blong “bigfala paoa” blong Sevya long wol ia, i bin eksampol blong Hem we i stret evriwan. ?Olsem wanem bae yu givim insperesen long ol pikinini blong yu blong stap folem Hem?

Samfala Aktiviti we Yu Save Mekem

• Aot long nambatu paragraf blong “Kraes we I Laef,” ridim long ol pikinini sam long ol samting we Jisas i bin mekem. Soem ol pikja abaot laef blong Hem (luk long aktiviti pej blong wik ia), mo invaetem ol pikinini blong tokbaot wanem we Sevya i stap mekem long ol pikja ia. Helpem olgeta blong tingbaot ol wei we oli save folem eksampol blong Hem.

• Jusum wan vidio blong “Light the World” (ComeuntoChrist.org) blong soem long ol pikinini, o tokbaot wan taem we yu bin kasem blesing from wan we i bin mekem seves semmak olsem seves blong Kraes. Invaetem wan pikinini blong aktemaot wan simpol aksen blong seves, mo askem ol nara pikinini blong traem talem se hem i stap mekem wanem. Mekem wanwan pikinini i gat wan taem blong mekem hemia. Helpem ol pikinini blong tingting abaot wan samting we oli save mekem blong givim seves long wan insaed long famli blong olgeta.

Stap Tijim Doktrin: Ol Bigfala Pikinini

“Yumi givim testemoni blong yumi.”

Eksampol blong ol profet mo ol aposol we oli bin raetem “Kraes we I Laef” i save givim insperesen long ol pikinini blong serem testemoni blong olgeta abaot Jisas Kraes.

Samfala Aktiviti we Yu Save Mekem

• Long bod, raetem: Mi save se Jisas Kraes … mo invaetem ol pikinini blong oli serem ol wei we oli save finisim sentens ia. Givim tingting long olgeta blong lukluk insaed long “Kraes we I Laef” blong gat sam aedia. ?Wanem nao yumi save mekem blong mekem ol testemoni blong yumi abaot Jisas Kraes oli kam strong moa? ?Olsem wanem nao ol narawan oli kasem blesing taem yumi stap serem ol testemoni blong yumi?

• Poenemaot se “Kraes we I Laef,” Fas Presidensi mo Kworom blong Olgeta Twelef Aposol nao i bin saenem. Ridim tugeta Doktrin mo Ol Kavenan 107:23. ?Wanem nao i mekem se Ol Aposol oli defren long “ol nara ofisa insaed long Jos”? Jusum wan long ol vidio blong “Special Witnesses of Christ” mo serem wetem ol pikinini (ChurchofJesusChrist.org). ?From wanem yumi talem tangkyu from se yumi gat ol spesel witnes blong Kraes long taem blong yumi tedei?

“I no gat nara man we i save gat bigfala paoa olsem blong lidim tingting blong man.”

Insaed long “Kraes we I Laef” ol profet mo ol aposol oli talemaot se i no gat wan moa we i gat moa paoa long tingting blong ol pikinini blong God, bitim Jisas Kraes. Tingting hevi long wei we bae yu helpem ol pikinini blong oli lanem abaot bigfala paoa we Sevya i gat long ol tingting blong yumi evriwan.

Samfala Aktiviti we Yu Save Mekem

• Long wanwan pikinini, givim wan sentens we i kamaot long “Kraes we I Laef,” mo askem olgeta blong droem wan pikja abaot sentens ia. Taem we wanwan pikinini i stap soem pikja blong hem long klas, askem ol nara pikinini blong oli traem faenem wanem we pikja ia i stap soem, mo faenem sentens we i go wetem insaed long “Kraes we I Laef.” ?Olsem wanem yumi kasem blesing from se laef mo misin blong Jisas Kraes.

• Helpem ol pikinini blong oli faenem ol defren nem o taetol blong Jisas Kraes, we oli stap insaed long “Kraes we I Laef” mo raetem laen andanit long olgeta sapos i posibol, (sam eksampol: Mesaea, Fasbon, faswan mo laswan, loya, mo jif kona ston). Tokabaot wanem we wanwan long ol taetol ia i stap tijim yumi abaot Hem. (Sam long ol taetol ia, oli tokbaot mining blong ol insaed long Gaed long Ol Skripja o Bible Dictionary.)

“Hem i laet, mo laef, mo hop blong wol.”

Krismes i wan taem blong stap glad from hop ia we Jisas Kraes i bin tekem i kam long wol ia tru long ol tijing blong Hem, eksampol blong Hem, mo sakrifaes ia we i pem praes.

Laet blong Wol, long Howard Lyon

Samfala Aktiviti we Yu Save Mekem

• Invaetem wanwan pikinini blong droem wan Krismes tri, o droem wan antap long bod. Invaetem ol pikinini blong flasem tri wetem ol toktok o sentens we oli kamaot long “Kraes we I Laef,” we i tokbaot presen ia we Sevya i bin givim long yumi (olsem “laet,” mo “laef,” mo “hop”). Letem olgeta oli tokbaot from wanem oli jusum ol toktok o sentens ia.

• Helpem ol pikinini blong faenem ol hym blong Krismes we oli tokbaot laet, laef, mo hop, we taem ia we Sevya i bon, i tekem i kam long wol—eksampol: “O Little Town of Bethlehem” o ““Hark! The Herald Angels Sing” (Hymns, ol namba 208–9). Tugeta, singsing long hym ia, mo letem ol pikinini oli serem olsem wanem Jisas i bin tekem laet, laef, mo hop insaed long laef blong olgeta.

• Askem sam long ol pikinini blong rid abaot ol man blong lukaot long sipsip insaed long Luk 2:8–20. Askem ol narawan blong rid abaot Simeon insaed long Luk 2:25–33. Invaetem olgeta blong serem wetem wanwan long olgeta olsem wanem ol man blong lukaot long sipsip mo Simeon oli bin filim taem oli bin faenemaot se Jisas i bin bon i kam long wol. ?From wanem oli bin filim olsem? ?From wanem, taem we Hem i bon i kam long wol ia, i bin tekem “bigfala glad”?

Stap Leftemap Tingting blong Lanem Samting long Hom

Invaetem ol pikinini blong oli tingting long wan insaed long famli blong olgeta blong oli save serem testemoni blong olgeta abaot Jisas Kraes. Helpem olgeta blong oli tingting long wanem oli save talem blong mekem fet blong memba blong famli ia i kam strong moa.

Stap Kam Antap long Fasin blong Yumi blong Stap Tij

Rere yuwan taem yu stadi long ol skripja. “Taem yu prea mo stadi long toktok blong God, i mekem se yumi lisin gud long Tabu Spirit. Afta long hemia, Hem i save givim insperesen long yumi blong tekem wanem we yumi bin stadi long hem taem yumi stap tij mo leftemap ol narawan” (Teaching in the Savior’s Way, 12).