Ol Instraksen blong Singsing Taem mo Sakramen Miting Presentesen blong Ol Pikinini

Ol Dia Presidensi blong Praemeri mo Ol Miusik Lida,

Ol singsing blong Praemeri oli ol tul we i gat paoa blong helpem ol pikinini blong lanem abaot plan blong stap glad blong Papa long Heven, mo ol stamba trutok blong gospel blong Jisas Kraes. Taem ol pikinini oli stap singsing abaot ol prinsipol blong gospel,Tabu Spirit bae i testifae se ol prinsipol ia oli tru. Ol toktok mo miusik bae i stap insaed long maen mo hat blong ol pikinini truaot long laef blong olgeta.

Lukaotem help blong Spirit taem yu stap rere blong tijim gospel tru long miusik. Serem testemoni blong yu abaot ol trutok we yu stap singsing abaot olgeta. Helpem ol pikinini blong luksave olsem wanem miusik i go wetem wanem oli stap lanem mo stap gotru long hem insaed long hom mo insaed long klas blong Praemeri. Ol pikinini mo ol famli blong olgeta bae oli kasem blesing from se yufala i stap traehad.

Mifala i lavem yufala mo sendem tangkyu blong mifala from seves we yufala i stap givim wetem strong tingting blong mekem ol pikinini ia oli kam strong mo blong protektem olgeta.

Praemeri Jeneral Presidensi

Ol Gaedlaen blong Sakramen Miting Presentesen

Anda long daereksen blong bisop, sakramen presentesen blong ol pikinini, oli stap holem long nambafo kwota blong yia. Praemeri presidensi mo miusik lida, oli putum taem blong gat miting long stat blong yia wetem kaonsela insaed long bisoprik we i lukluk long Praemeri blong stat blong toktok raon long ol plan blong presentesen ia. Taem yufala i finisim ol plan ia, kasem raet blong kaonsela ia blong gohed wetem ol plan ia.

Presentesen ia, i mas givim taem long ol pikinini blong presentem wanem we, olgeta, wetem famli blong olgeta, oli bin lanem aot long Doktrin mo Ol Kavenan long hom mo long Praemeri; i mas gat tu ol singsing blong Praemeri we oli bin singsing long olgeta truaot long yia. Wetem prea, tingting long ol gospel prinsipol mo singsing we i sapotem wanem we oli bin lanem. Truaot long yia, kipim sam not abaot ol toktok blong ol pikinini, mo ol eksperiens blong olgeta we bae yufala i save yusum insaed long presentesen ia. Invaetem ol pikinini blong serem ol skripja, ol stori, mo ol testemoni blong olgeta abaot Sevya mo gospel blong Hem insaed long presentesen. Taem yufala i stap plan from presentesen ia, tingting long sam wei we i save helpem kongregesen blong lukluk nomo i go long Sevya mo ol trutok we Hem i bin putumbak long ol lata-dei.

Ol yunit we oli gat ol smol namba blong ol pikinini, oli save tingting long sam wei we ol memba blong famli tu oli save tekpat wetem ol pikinini blong olgeta. Wan memba blong bisoprik i save endem miting wetem wan las sot toktok.

Taem yu stap rere long presentesen, tingbaot ol gaedlaen ia:

• Ol taem blong praktis i no mas tekemaot tumas taem blong ol pikinini aot long ol klas o aot long famli.

• Ol pikja, yunifom o media presentesen, mo ol media presentesen oli no stret blong yusum long taem blong sakramen miting.

Luk long Handbook 2: Administering the Church, 11.5.3, ChurchofJesusChrist.org.

Ol Instraksen blong Singsing Taem

5 minit (Praemeri presidensi): Fas prea, skripja o toktok blong bilif, mo wan toktok

20 minit (miusik lida): Singsing taem

Stamba tingting blong singsing taem, hem i blong helpem ol pikinini blong oli gat moa dip fet long Papa long Heven mo long Jisas Kraes tru long miusik. Praemeri presidensi mo miusik lida i jusum ol singsing blong wanwan manis wetem tingting ia i stap long maen. Ol singsing ia, oli mas kam sapotem olgeta prinsipol we ol pikinini oli stap lanem abaot gospel blong Jisas Kraes insaed long klas blong olgeta mo long hom. Wan lis blong ol singsing ia i stap insaed long gaed ia, we oli kam blong sapotem olgeta prinsipol ia. Ol singsing ia, oli stap tu insaed long ol aotlaen blong Kam Folem Mi—Blong Praemeri.

Taem yu stap tijim ol singsing ia long ol pikinini, invaetem olgeta blong serem wanem we oli bin lanem finis abaot ol stori mo ol doktrin prinsipol we ol singsing ia oli stap tijim. Maet bae yu wantem luklukbak long ol aotlaen blong Kam Folem Mi—Blong Praemeri we ol pikinini oli stap stadi long hem insaed long klas blong olgeta. Hemia bae i helpem yufala blong savegud ol stori mo ol prinsipol we oli stap lanem blong mekem se yu save lukluk olsem wanem nao blong sapotem olgeta taem oli stap lan wetem miusik.

Long taem blong singsing taem, yu save gobak long ol singsing we ol pikinini oli bin lanem bifo mo ol singsing we oli laekem blong singsing long olgeta. Taem yu stap luklukbak long olgeta singsing ia, invaetem ol pikinini blong serem ol tingting mo filing blong olgeta abaot ol trutok we oli faenem insaed long ol singsing ia.

Buk ia, Children’s Songbook i besik risos blong miusik insaed long Praemeri. Ol hym we oli kamaot long hymbuk, mo ol singsing we oli kamaot long Fren mo Liahona tu, oli stret blong yusum. Wanwan taem, bae ol pikinini oli save singsing ol singsing we i tokbaot fasin blong stap tru long kantri, o ol holidei singsing, we oli stret blong singsing long ol long Sandei mo folem yia blong ol pikinini. Sapos yufala i wantem yusum ol nara miusik long Praemeri, we oli no stap long ol buk ia, bisoprik i mas apruvum fastaem (luk long Hanbuk 2: Lukaotem mo Lidim Jos 11.2.4).

Bigfala Lukluk long Praemeri

Evri wik, insaed long Praemeri, i gat:

Singsing Taem:25 minit

Muv i go long ol klas:5 minit

Ol Klas:20 minit

Ol lida blong ol bigfala grup blong Praemeri, oli save serem ol pikinini long tufala grup, mo oli mekem se wan grup i stap long Praemeri klas, mo nara grup i stap long singsing taem. Afta, bae tufala grup i jenisim ples bakegen. Long ol kes olsem, ol lida blong Praemeri oli nid blong stretem taem blong olgeta we i stap antap ia blong i go stret wetem situesen blong olgeta.

Miusik blong Singsing Taem

Jenuware

• Wan singsing: “Prea blong Josef Smit,” STSP pej 14.

• “Search, Ponder, and Pray,” Children’s Songbook,109

• “Family History—I Am Doing It,” Children’s Songbook, 94.

Febwari

• “I Want to Be a Missionary Now,” Children’s Songbook, 168

• “The Priesthood Is Restored,” Children’s Songbook, 89

• “Mi Sapraes Tumas We Jisas Hem i Lavem Mi,” STSP, pej 22.

Maj

• The Church of Jesus Christ,” Children’s Songbook, 77

• “When I Am Baptized,” Children’s Songbook, 103

• “When He Comes Again,” Children’s Songbook, 82–83

Epril

• “Jesus Has Risen,” Children’s Songbook, 70

• “I Want to Be a Missionary Now,” Children’s Songbook, 168

• “Jesus Said Love Everyone,” Children’s Songbook, 61

Mei

• “When He Comes Again,” Children’s Songbook, 82–83

• “Have I Done Any Good?” Hymns, no. 223

• “Choose the Right,” Hymns, no. 239

Jun

• “I’m Trying to Be like Jesus,” Children’s Songbook,78–79

• “Reverence Is Love,” Children’s Songbook, 31

• “Help Me, Dear Father,” Children’s Songbook, 99

Julae

• “Mi Save Ridima Hem I Laef,” STSP, pej 38

• “Have I Done Any Good?” Hymns, no. 223

• “I Feel My Savior’s Love,” Children’s Songbook, 74–75

Ogis

• “The Priesthood Is Restored,” Children’s Songbook, 89

• “The Holy Ghost,” Children’s Songbook, 105

• “Mi Pikinini blong God,” STSP, pej 58

Septemba

• “Reverently, Quietly,” Children’s Songbook, 26

• “I Am like a Star,” Children’s Songbook, 163

• “I Will Be Valiant,” Children’s Songbook, 162

Oktoba

• “Spirit Olsem Faea,” STSP, pej 28

• “I Love to See the Temple,” Children’s Songbook, 95

• “The Church of Jesus Christ,” Children’s Songbook, 77

Novemba

• “Family History—I Am Doing It,” Children’s Songbook, 94

• “Famli I Stap Tugeta Foreva,” Liahona, Epril 2013, 65.

• “Presem Man Ia,” STSP, pej 50

Disemba

• “I Will Follow God’s Plan,” Children’s Songbook, 164–65

• “He Sent His Son,” Children’s Songbook, 34–35

• “Hark! The Herald Angels Sing,” Hymns, no. 209

Yusum Miusik blong Tijim Doktrin

Tingbaot se stamba tingting blong singsing taem, hem i no jes blong tijim ol pikinini olsem wanem blong singsing, be tu, Hem i blong yusum miusik blong helpem ol pikinini blong oli gat moa dip fet long Papa long Heven mo long Jisas Kraes. Olgeta tingting ia oli save givim insperesen long yu taem yu stap plan blong mekem hemia.

Lan abaot Papa long Heven mo Jisas Kraes. Invaetem ol pikinini blong serem wanem oli bin lanem abaot Papa long Heven mo Jisas Kraes aot long ol singsing we yu stap singsing. Invaetem olgeta blong serem ol fevret toktok blong singsing ia, we i tokbaot God mo Sevya.

Ridim ol skripja we oli go wetem ol miusik ia. Plante long ol singsing ia insaed long Children’s Songbookmo long Hymbuk long Inglis mo long Singsing Tabu mo Singsing blong Ol Pikinini, i gat ol refrens i stap, blong ol skripja. Helpem ol pikinini blong oli ridim wan ves long skripja, mo tokbaot olsem wanem ol skripja oli go wetem ol singsing ia. Yu save raetemdaon sam skripja refrens antap long bod, mo invaetem ol pikinini blong oli joenem wanwan skripja i go wetem wan singsing o wan ves blong wan singsing.

Fulumap spes long laen. Raetem wan ves blong singsing long bod, mo yu karemaot sam ki toktok mo putum wan waet spes we i stap. Afta, askem ol pikinini blong singsing long singsing ia, blong lisin long ol toktok we oli mas go long ol waet spes ia. Taem oli stap raet insaed long ol spes ia, toktok raon long wanem gospel prinsipol nao yu lanem aot long ol toktok ia we oli stap long ol waet spes ia.

Toktok we i kam long Ol Lida blong Jos. Invaetem ol pikinini blong lisin long wan sot toktok blong wan lida blong Jos we i stap tijim sem gospel prinsipol we i stap long Praemeri singsing ia. Askem olgeta blong leftemap han blong olgeta taem oli harem wan samting we i helpem olgeta blong andastanem trutok we oli stap singsing abaot. Askem olgeta blong serem wanem we oli harem.

Testifae. Talem wan sot testemoni long ol pikinini abaot ol trutok blong gospel we oli stap long singsing ia blong Praemeri. Helpem ol pikinini blong andastanem se, blong singsing, hem i wan wei we oli save serem testemoni blong olgeta long hem, mo filim Spirit.

Stanap olsem wan witnes. Invaetem ol pikinini blong kam, wan afta wan, blong stanap mo serem wanem oli bin lanem aot long singsing we oli stap singsing long hem, o blong serem olsem wanem oli filim abaot ol trutok insaed long singsing ia. Askem olgeta olsem wanem oli filim taem oli stap singsing long singsing ia, mo helpem olgeta blong oli luksave paoa blong Tabu Spirit.

Yusum ol pikja. Askem ol pikinini blong helpem yufala blong faenem o blong mekem ol pikja we oli go wetem ol impoten toktok o sentens insaed long singsing ia. Invaetem olgeta blong serem olsem wanem ol pikja oli go wetem singsing mo wanem singsing ia i stap tijim. Eksampol. Sapos yu stap tijim singsing ia, “When He Comes Again” (Children’s Songbook, 82–83), yu save putum ol pikja raon long rum we i soem ol samting we ol impoten toktok long singsing i tokbaot, (olsem enjel, sno, mo sta). Askem ol pikinini blong putum tugeta ol pikja mo holem olgeta antap folem stret oda taem yufala i stap singsing long singsing ia tugeta.

Serem wan lesen we oli yusum samting long hem. Yu save yusum wan samting blong givim insperesen blong oli toktok raon long wan singsing. Eksampol. Singsing ia, “When I Am Baptized” (Children’s Songbook, 103) i tokbaot ren. Yu save soem, long ol pikinini, wan pikja blong ren o wan glas wota, mo tokbaot olsem wanem baptaes mo Tabu Spirit i klinim spirit blong yumi olsem we renwota i klinim wol; hemia i save lidim yufala blong toktok raon long ol blesing blong kasem baptaes mo blong stap kasem presen we i Tabu Spirit.

Invaetem ol pikinini blong oli serem eksperiens blong olgeta. Helpem ol pikinini blong joenem ol prinsipol we singsing i stap tijim wetem ol eksperiens we oli gat wetem olgeta prinsipol ia. Eksampol. Bifo oli singsing, “I Love to See the Temple” (Children’s Songbook, 95), yu save askem ol pikinini blong leftemap han blong olgeta sapos oli bin luk wan tempol finis. Invaetem olgeta blong tingting, taem oli stap singsing abaot wei we oli filim taem oli luk wan tempol.

Askem ol kwestin. I gat plante kwestin we yu save askem taem yufala i stap singsing ol singsing. Eksampol. Yu save askem ol pikinini wanem oli lanem aot long wanwan ves insaed long singsing ia. Yu save askem tu blong oli tingting long sam kwestin we singsing ia i save ansarem. Hemia i save lidim olgeta blong toktok raon long ol trutok we singsing ia i stap tijim.

Lisin blong gat ol ansa. Askem ol pikinini blong faenem ol ansa long kwestin. Eksampol. Singsing ia “He Sent His Son” (Children’s Songbook, 34–35) i tekem samfala kwestin mo ansa. Yu save askem ol pikinini ol kwestin, mo afta, mekem olgeta oli lisin long ol ansa taem oli stap singsing.

Stap Helpem Ol Pikinini Oli Lanem mo Oli Tingbaot Ol Singsing blong Praemeri

Ol pikinini oli lanem gud ol singsing taem oli harem mo singim ol singsing ia bakegen mo bakegen. Oltaem, singsing ol toktok blong wan niu singsing i go long ol pikinini—yu no ridim nomo o talem baehat long olgeta. Hemia i mekem se ol pikinini oli joenem gud miusik i go long ol toktok. Afta we yu tijim wan singsing, luklukbak long hem long plante defren wei we i mekem ol pikinini oli glad; mekem hemia truaot long yia. Andanit ia, i gat samfala aedia blong helpem ol pikinini blong oli lanem mo luklukbak long ol singsing ia.

Soem ol hae mo lo not. Blong helpem ol pikinini oli lanem tiun blong wan singsing, holem han blong yu i flat long fored, mo taem yu singsing ol toktok, muvum han blong yu i go antap blong soem ol hae not, mo i go daon blong soem ol not we i lo, o i daon.

Eko. Invaetem ol pikinini blong oli eko long yu taem oli ripitim wanem yu stap singsing. Singsing wan sot sentens o laen long ol pikinini, mo afta, mekem olgeta oli singsing i kambak long yu.

Yusum defren teknik. Singsing long ol defren wei, olsem wispa, ham long maot, klapem bit, jenisim bit, o singsing taem oli stanap o sidaon long semtaem. Yu save mekem wan kiub wetem pepa mo, long wanwan saed blong kiub ia, raetem wan defren wei blong singsing. Invaetem wan pikinini blong rolem kiub ia blong disaed wei we ol pikinini bae oli singsing long singsing ia.

Singsing long ol grup. Givim long wanwan klas, o long wanwan pikinini, wan sentens blong hem i singsing taem hem i stanap; mo mekem oli paspasem ol sentens kasem taem we wanwan klas o wanwan pikinini i gat wan janis blong singsing evri sentens.

Yusum ol aksen. Invaetem ol pikinini blong oli tingting long sam simpol aksen wetem han blong helpem olgeta blong tingbaot ol toktok mo ol mesej blong wan singsing. Eksampol. Taem yu stap singsing “Reverently, Quietly” (Children’s Songbook, 26), yu save invaetem ol pikinini blong krosem han blong olgeta, benem hed, mo tajem hat blong olgeta taem oli singsing ol stret laen ia we i talem ol samting ia, insaed long singsing ia.

Gel i singsing, boe i singsing. Droem wan pikja blong wan boe mo pikja blong wan gel. Taem yufala i luklukbak long wan singsing, holem wan pikja i go antap blong talem se huia bae i singsing pat blong singsing ia.

Sakem basket. Putum ol basket o nara kontena we i gat namba long olgeta, oli stap long fored blong rum—putum basket o kontena i folem namba blong ol ves blong singsing ia. Invaetem wan long ol pikinini blong sakem wan bin bag o wan pis pepa we i olsem balong i go insaed o kolosap long wan basket o kontena we i gat namba. Mekem ol pikinini oli singsing long ves ia we namba blong hem i stap long basket o kontena ia.

Joenem wan pikja mo wan sentens. Raetem wanwan laen blong wan singsing long ol defren pis pepa, mo faenem wan pikja we i ripresentem wanwan laen ia. Putum ol pikja long wan saed blong rum mo ol pepa long narafala saed. Singsing long singsing ia, mo askem ol pikinini blong oli joenem ol pikja i go wetem ol toktok.

Mekem ol posta. Soem ol posta wetem ol toktok blong wanwan ves, o soem ol pikja we oli ripresentem ol toktok ia. Taem ol pikinini oli stap singsing, kavremap sam long ol toktok ia o ol pikja ia, kasem taem oli save singsing wan ful ves we oli nomo lukluk long posta. Yu save invaetem tu ol pikinini blong helpem yu blong mekem ol posta ia.