13–19 Disemba

Famli: Wan Ofisol Toktok I Go long Wol

“Famli Hem I Stamba blong Plan blong Krieta”

?Wanem prinsipol we yu faenem insaed long “Famli: Wan Ofisol Toktok I Go long Wol” we yu filim insperesen ia blong serem wetem ol pikinini? Taem yu stap rere blong tij, raetemdaon ol kwaet toktok we yu kasem long Spirit.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong tekem o droem wan pikja blong famli blong olgeta blong oli kasem serem wetem klas. Askem ol pikinini blong serem wan samting we oli lavem abaot famli blong olgeta, o wan samting we oli bin lanem abaot ol famli long wik ia.

Tijim Doktrin: Ol Smol Pikinini

Ol famli oli impoten insaed long plan blong Papa long Heven.

?Olsem wanem yu save yusum famli ofisol toktok blong helpem ol pikinini blong oli andastanem olsem wanem ol famli oli impoten insaed long plan ia blong God?

Samfala Aktiviti we Yu Save Mekem

• Helpem ol pikinini blong tingbaot sam samting we i impoten tumas we oli wantem blong talem evriwan abaot ol samting ia. Soem long ol pikinini wan kopi blong “Famli: Wan Ofisol Toktok I Go long Wol,” mo eksplenem se ol profet mo ol aposol oli bin raetem toktok ia blong talemaot long evriwan hamas ol famli oli impoten long Papa long Heven. Askem ol pikinini se from wanem oli ting se ol famli oli impoten tumas long Papa long Heven. Serem wan samting aot long ofisol toktok ia, we yu filim se evriwan i nidim blong save long hem.

• Soem long ol pikinini wan pikja blong wan tempol mo wan pikja blong wan famli. Letem ol pikinini oli holem ol pikja taem yu stap ridim las sentens blong nambatri paragraf blong famli ofisol toktok. Askem olgeta blong poen i go long ol stret pikja taem yu ridim ol toktok ia: “tempol” mo “famli.” Testifae se, from ol odinens blong tempol, ol famli blong yumi oli save yunaet blong oltaem. Tugeta, singsing wan singsing abaot ol famli we oli no save finis, olsem “I Love to See the Temple” (Children’s Songbook, 95), mo helpem ol pikinini blong lisin long ol toktok olsem: “tempol” mo “famli.”

• Askem ol pikinini wanem we yumi save mekem blong mekem ol defren samting oli kam strong—olsem tut blong yumi, bodi blong yumi, o wan bilding. ?Wanem nao yumi save mekem blong famli blong yumi i stap strong? Helpem ol pikinini blong andastanem ol prinsipol we oli stap lidim yumi long hapines insaed long famli laef, we yumi oli save faenem insaed blong paragraf seven blong famli ofisol toktok (luk tu long aktiviti pej blong wik ia). Helpem ol pikinini blong mekem plan blong sam rod we bae i mekem ol famli blong olgeta i strong moa.

  

  Ol papa mo mama oli sapos blong lukaotem ol pikinini blong olgeta wetem lav mo stret mo gud fasin.

Mi mi wan “spirit boe o wan spirit gel blong papa mo mama long heven.”

Famli Ofisol Toktok i stap tijim se yumi evriwan i ol pikinini blong Papa mo Mama long Heven, mo yumi stap long wol ia blong kam moa olsem Tufala.

Samfala Aktiviti we Yu Save Mekem

• Singsing tugeta “Mi Pikinini blong God” (STSP, pej 58.) Afta, sakem wan balong, o wan sofsof samting long wan pikinini mo semtaem talem: “Mi save wan pikinini blong God, we nem blong hem i [nem blong pikinini].” Askem pikinini ia blong sakem balong o samting ia long wan nara pikinini, mo i talem ol semfala toktok mo i putum nem blong wan pikinini. Ripitim aktiviti ia kasem taem we evriwan i gat janis blong talem toktok ia. Testifae se wanwan pikinini, i wan “spirit pikinini boe o gel blong Papa mo Mama long Heven, we Tufala i lavem tumas olgeta.”

• Tingting long sam wei we yu save soem se, from se yumi ol pikinini blong Papa mo Mama long Heven, bae yumi save kam olsem Tufala. Eksampol: Soem ol pikja blong ol animol mo ol bebi blong olgeta, o pikja blong yu wetem papa mo mama mo ol pikinini blong yu, mo helpem ol pikinini blong luk ol samting we oli semsemmak. Testifae se, semmak olsem we ol bebi oli stap groap oli kam olsem papa mo mama blong olgeta, yumi tu, wan dei, bae yumi kam olsem Papa mo Mama blong yumi long Heven.

Stap Tijim Doktrin: Ol Bigfala Pikinini

Ol Famli oli stamba long plan blong Papa long Heven.

Famli Ofisol Toktok i bin kamaot blong talem strong bakegen ol trutok ia abaot famli. Tingting long wei we bae yu helpem ol pikinini oli kasem wan moa dip testemoni abaot olgeta trutok ia.

Samfala Aktiviti we Yu Save Mekem

• Askem ol pikinini sapos oli save huia i raetem famli ofisol toktok. (Insaed long mesej blong hem“The Plan and the Proclamation” [Ensign o Liahona, Nov. 2017, 28–31], Presiden Dallin H. Oaks i tokbaot olsem wanem nao oli raetem ofisol toktok ia.) Helpem ol pikinini blong andastanem wanem nao ol toktok ia: “talemaot tabu tok ia” long fasfala paragraf i minim. Askem olgeta blong serem tingting blong olgeta abaot from wanem ol profet mo ol aposol oli wantem blong “talemaot tabu tok ia” abaot famli, long taem blong yumi tedei.

• Serem samfala toktok we oli kamaot long famli ofisol toktok we oli gat mining, speseli long yu. Invaetem ol pikinini blong serem ol filing blong olgeta abaot ol trutok ia. ?Long wanem wei nao, ol laef blong yumi bae oli defren, sapos yumi no bin save olgeta samting ia? Tugeta, singsing long wan singsing we i go wetem ol trutok we oli faenem insaed long ofisol toktok ia, olsem “I Will Follow God’s Plan” o “Famli I Stap Tugeta Foreva,” Liahona, Epril 2013, 65,” o (Children’s Songbook, 164–65, 188).

• Soem long ol pikinini ol pikja (o invaetem olgeta blong droem sam we oli soemaot ol trutok we oli stap long famli ofisol toktok. Hemia i save ol pikja blong wan tempol, wan famli we i stap prea o pleiplei tugeta, o wan kapol we bae i mared. Invaetem ol pikinini blong faenem ol sentens, insaed long famli ofisol toktok we i go wetem ol pikja ia. ?Ol sentens ia oli stap tijim wanem long yumi?

• Rere long sam kwestin we oli save ansarem insaed long famli ofisol toktok, olsem “?Yu ting se God i filim olsem wanem long saed blong mared?” mo “?Wanem i mekem wan famli i hapi?” Letem wanwan pikinini i jusum wan kwestin, mo helpem olgeta blong faenem ol ansa we oli stap insaed blong ofisol toktok.

• Invaetem wan mama mo papa blong wan long ol pikinini ia blong serem long klas olsem oli stap “helpem wanwan long tufala blong stap ol ikwol patna insaed long ol tabu responsabiliti blong tufala insaed long famli blong tufala. Invaetem ol pikinini blong toktok raon long wanem we oli save mekem naoia blong rere blong kam ol stret mo gud waef mo hasban, mama mo papa.

Ol famli oli moa hapi taem oli folem Jisas Kraes.

Papa long Heven i lavem wanwan long ol pikinini blong Hem, mo Hem i wantem olgeta blong oli stap hapi. ?Olsem wanem yu save helpem ol pikinini we yu stap tijim blong oli andastanem se tru hapines i kam taem oli stap folem ol tijing mo eksampol blong Sevya blong yumi, Jisas Kraes?

Samfala Aktiviti we Yu Save Mekem

• Droem wan bigfala hat long bod, mo invaetem ol pikinini blong ridim paragraf seven blong ofisol toktok. Askem olgeta blong lukaotem ol samting we oli save mekem blong helpem ol famli blong olgeta blong oli stap hapi, mo raetem ansa blong olgeta insaed long hat ia. Invaetem ol pikinini blong jusum wan samting we oli save wok long hem blong mekem hom blong olgeta i moa hapi.

• Invaetem ol pikinini blong oli serem ol eksperiens blong olgeta taem oli filim se wan memba blong famli i lavem olgeta. Helpem ol pikinini blong oli faenem ol prinsipol aot long paragraf seven blong ofisol toktok ia, we i save helpem ol memba blong famli blong oli filim lav. ?Olsem wanem nao save blong yumi long saed blong gospel blong Jisas Kraes i jenisim wei we yumi stap tritim ol famli blong yumi?

• Askem ol pikinini wanem nao bae oli talem sapos wan fren i askem olgeta from wanem blong mared, o blong gat ol pikinini i impoten. ?Olsem wanem nao yumi save helpem fren ia blong andastanem olsem wanem ol famli oli impoten long Papa long Heven? Helpem ol pikinini blong faenem ol toktok we oli stap long famli ofisol toktok we i save help; luk tu long vidio ia: “What Is the Purpose of Family?” (ChurchofJesusChrist.org).

Stap Leftemap Tingting blong Lanem Samting long Hom

Invaetem ol pikinini blong mekem wan plan blong mekem wan samting blong mekem famli blong olgeta i kam strong moa. Leftemap tingting blong olgeta blong serem plan blong olgeta wetem ol memba blong famli blong olgeta long hom.

Stap Kam Antap long Fasin blong Yumi blong Stap Tij

Gat tingting mo filing long narawan. Taem yu stap tijim ol trutok insaed long famli ofisol toktok, plis, yu mas save se plante pikinini oli stap groap long ol famli we oli no stret wetem ol gud samting we oli tokbaot insaed long ofisol toktok ia. Lukaotgud blong no talem eni samting we i save mekem olgeta oli filim se oli wantem givap, o bae oli filim se olgeta oli daon long narawan.