Nativiti long Kopa mo Amba, i kam long J. Kirk Richards

20–26 Disemba

Krismes

Presen Ia blong Tabu Pikinini blong God we I No Gat Samting I Bitim

Wan wei blong putum tingting nomo i stap long Sevya long Krismes taem ia, hem i blong stadi long “Kraes we I Laef: Testemoni blong Olgeta Twelef Aposol.” Aotlaen ia i givim sam wei we yu save mekem testemoni blong ol profet ia oli pat blong gospel stadi blong yuwan mo hemia blong famli.

Raetemdaon Ol Filing mo Tingting blong Yu

Long 1838, Profet Josef Smit i bin talem: “Ol stamba prinsipol blong relijin blong yumi oli ol testemoni blong ol Aposol mo ol Profet, long saed blong Jisas Kraes, se Hem i bin ded, oli bin berem Hem, mo Hem i bin girap long nambatri dei, mo i bin go long heven; mo evri narafala samting abaot relijin blong yumi, oli go wetem hemia.” (Teachings of Presidents of the Church: Joseph Smith, 49). Sam yia afta, Presiden Russel M. Nelson i bin talem olsem se “i stret toktok blong Profet ia we i pusum ol 12 profet, sia mo reveleta blong putumaot mo saenem testemoni blong olgeta blong makem 2,000 yia aniveseri blong taem ia we Lod i bin bon i kam long wol ia. Histri testemoni ia, taetol blong hem i : ‘Kraes we I Laef.’ Plante memba oli bin lanem ol trutok blong hem baehat. Ol narawan, oli no save nating we hemia i stap. Taem yu stap lukaotem blong lanem moa abaot Jisas Kraes, mi askem strong long yufala blong stadi long ‘Kraes we I Laef’” (“Drawing the Power of Jesus Christ into Our Lives,” Ensign o Liahona, May 2017, 40).

Olsem ol Lata-dei Sent, yumi stap glad long blesing ia blong gat revelesen we i gogohed tru long ol profet mo ol aposol blong tedei. Yumi talem tangkyu from ol insperesen toktok blong kaonsel, woning, mo blong leftemap tingting. Be antap long evriwan, yumi gat blesing tru long ol strong testemoni ia abaot Jisas Kraes—long Krismes taem mo truaot long yia. Hemia i moa bitim sam toktok we oli stiarem tingting blong man we sam man blong raet i raetem, pablik spika i talem, o sam niu tingting blong sam top man blong stadi long skripja. Oli ol toktok blong olgeta ia we God i bin jusum olgeta, i bin singaotem olgeta, mo i bin givim raet long olgeta blong stap “ol spesel witnes blong nem blong Kraes long ful wol ia” (Doktrin mo Ol Kavenan 107:23).

Sam Aedia blong Skripja Stadi blong Yuwan

“I no gat nara man we i save gat bigfala paoa olsem blong lidim tingting blong man.”

?Wanem tingting i bin kam long yu taem yu bin stap ridim Luk 2:10–11 wetem fasfala paragraf blongKraes we I Laef”? ?Wanem nao bae yu talem blong sapotem toktok ia, se, “i nomo gat wan nara man we i gat strong paoa olsem [hemia blong Jisas Kraes] ova evri samting we i bin laef mo hemia we bae i laef yet long wol ia”? Lukaotem ol trutok we oli stap long “Kraes we I Laef” we i tokbaot klia tru paoa ia blong Sevya. ?Olsem wanem nao Hem i bin gat paoa ia long yu mo i bin tekem i kam long yu “bigfala glad ia”? (Luk 2:10).

“Hem i girap i kamaot long gref.”

Insaed long “Kraes we I Laef,” Ol Aposol oli testifae abaot Laef Bakegen long Ded blong Sevya, mo oli tokbaot trifala taem we Lod we i girap i bin kamkamaot (luk long paragraf faef). Tingting blong stap ridim abaot ol visit ia insaed long Jon 20–21; 3 Nifae 11–26; mo Josef Smit—Histri 1:14–20. ?Wanem nao yu lanem abaot Sevya aot long ol toktok mo aksen blong Hem long ol taem ia we Hem i bin kamkamaot?

“Prishud blong Hem mo Jos blong Hem, oli bin putumbak.”

Long taem we yumi bin stadi long Ol Doktrin mo Ol Kavenan long yia ia, yufala i bin gat janis blong lanem moa abaot wei we “prishud mo Jos blong [Sevya] i bin kambak.” ?Wijwan trutok o prinsipol nao oli bin gat mining long yu speseli? Tingting blong luklukbak long sam long olgeta skripja ia we oli stap tij abaot Restoresen: Doktrin mo Ol Kavenan 1:17–23; 13; 20:1–12; 65; 110; 112:30–32; 124:39–42; 128:19–21. Tingting hevi long wei we ol trutok ia blong gospel we i kambak oli helpem yu blong save, mo blong stap wosipim Jisas Kraes (luk long Doktrin mo Ol Kavenan 93:19).

“Bae Hem i kambak long wol ia wan dei.”

Krismes i wan taem blong mekem tugeta samting ia: luklukbak long dei ia we Jisas Kraes i bin bon i kam long wol ia, mo blong luk fored long dei ia we bae Hem i kambak bakegen. ?Wanem nao yu lanem abaot kambak blong Hem aot long seken i go kasem las paragraf blong “Kraes we I Laef”? Maet bae i intresting tu blong ridim, singsing, o lisin long ol hym blong Krismes we oli stap tij abaot Seken Kaming, olsem “Joy to the World” o “It Came upon the Midnight Clear” (Hymns, nos. 201, 207).

“Hem i laet, mo laef, mo hop blong wol.”

Long las paragraf blong “Kraes we I Laef,” luk ol fasin mo ol taetol we oli givim long Sevya. Ol skripja ia oli save help blong tingting hevi long wei we Jisas Kraes i “laet, laef, mo hop blong wol ia”: Luk 2:25–32; 1 Korin 15:19–23; Moronae 7:41; Doktrin mo Ol Kavenan 50:24; 84:44–46; 93:7–10. ?Olsem wanem nao Hem i laet, laef mo hop? ?Wanem nara fasin, o taetol nao blong Sevya we oli minim moa samting long yu?

?Long wanem wei nao, we, taem yu bin stadi long “Kraes we I Laef” i bin tajem fet mo lav we yu gat long Sevya?

Laet blong Wol, long Howard Lyon

Sam Aedia blong Famli Skripja Stadi mo Famli Haos Naet

“Kraes we I Laef.”Blong helpem famli blong yu i andastanem ol trutok we oli tijim abaot Sevya insaed long “Kraes we I Laef,” yu save jusum sam ki sentens mo wok tugeta blong faenem o droem ol pikja we oli soemaot wanem i stap long ol sentens ia. Afta, yu save putum tugeta ol pikja ia mo ol sentens ia i kam olsem wan buk.

“Yumi givim testemoni blong yumi.”?Wanem nao yumi lanem aot long “Kraes we I Laef” abaot wanem i minim blong serem testemoni? Yu save raetemdaon ol testemoni blong yu abaot Kraes blong makem taem ia we Sevya i bon i kam long wol.

“Hem i go mo mekem ol gudfala wok.”?Olsem wanem nao famli blong yu i save folem eksampol blong Sevya long saed blong fasin blong givim seves, long Krismes taem ia? ?Olsem wanem nao bae yu paspasem “pis mo gud wok” insaed long famli mo komuniti blong yu? ?Olsem wanem yu save help blong tekem “hiling i go long olgeta we oli sik”? Bae yu save faenem sam aedia insaed long ol Christmas videos long Gospel Media ap o Gospel Media Laebri(medialibrary.ChurchofJesusChrist.org).

“Yumi talem tangkyu long God from presen ia we i no gat samting i bitim, we i tabu Pikinini blong Hem.”?Wanem presen nao yumi bin kasem from Jisas Kraes? Maet ol memba blong famli oli save faenem ol ansa ia insaed long “Kraes we I Laef” mo afta, kavremap sam samting wetem presen pepa; ol samting ia oli ripresentem ol presen we oli kam long Sevya. Famli blong yu i save openem ol presen ia long Krismes dei o truaot long wik, mo ridim ol skripja we oli go wetem wanwan long ol presen ia. Hemia samfala skripja, be famli blong yu tu i save faenem sam moa: Luk 2:10–14; 1 Pita 2:21; Mosaea 3:8; Alma 11:42–43; Doktrin mo Ol Kavenan 18:10–12. Mo tu, yufala i save singsing wan singsing abaot Sevya olsem: “He Sent His Son” (Children’s Songbook, 34–35), blong save faenem ol nara presen we oli kam from Hem.

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing:“Hark! The Herald Angels Sing,” Hymns, no. 209.

Stap Kam Antap long Stadi blong Yuwan

Lukluk nomo long Sevya. “Wetem prea, ridim ‘Kraes we I Laef.”’ i olsem we yu stap ridim ol testemoni blong Matiu, Mak, Luk, Jon, mo ol profet insaed long Buk blong Momon. Bae hem i mekem fet blong yu long Sevya i kam bigwan moa, mo bae i helpem yu blong stap lukluk long Hem nomo” (M. Russell Ballard, “Return and Receive,” Ensign o Liahona, May 2017, 65).