13–19 Disemba

Famli: Wan Ofisol Toktok I Go long Wol

“Famli Hem I Stamba blong Plan blong Krieta”

Presiden Dallin H. Oaks i bin talem: “… Mi biliv se fasin blong yumi long ofisol toktok ia, mo hao yumi yusum, i [wan tes] blong jeneresen ia. Mi prea se evri Lata-dei Sent bae oli stanap strong long tes ia” (“The Plan and the Proclamation,” Ensign o Liahona, Nov. 2017, 31). Tingting hevi long ol toktok taem yu stap stadi long famli ofisol toktok long wik ia.

Raetemdaon Ol Filing mo Tingting blong Yu

Bifo yumi bon i kam long wol ia, yumi bin pat blong wan famli—famli ia blong Papa mo Mama blong yumi long Heven. Taem we i bin kam long taem blong lego ples blong Tufala, maet yumi bin gat kamfot ia blong save se, long wol ia, ol famli tu bae i pat blong plan ia blong God. Paten long wol ia, i blong i semmak stret long paten long heven.

I no minim se i tru evriwan se ol famli ia long wol, bae oli stret evriwan, o oli save wok. Be, olsem we Presiden Henry B. Eyring i bin tijim: ol famli oli “givim, long ol pikinini blong God, bes janis blong oli welkamem olgeta long wol ia wetem wan lav ia nomo long wol we i kolosap long hemia we yumi bin filim taem we yumi bin stap long heven—we i lav blong wan papa mo mama” (“Karem i Kam Tugeta Famli blong God,”   https://www.churchofjesuschrist.org/general-conference/2017/04?lang=bis Epril 2017). From se Hem i save se ol famli oli no stret evriwan mo bae oli fesem ol atak blong enemi, God i bin sendem Pikinini blong Hem we Hem i lavem tumas, blong i pemaot yumi mo i hilim ol famli blong yumi. Mo Hem i bin sendem ol lata-dei profet wetem wan ofisol toktok blong difendem mo mekem ol famli oli kam strong moa. Sapos yumi folem ol profet mo putum fet blong yumi long Sevya, iven we ol famli long wol ia oli no kasem nating stamba tingting blong heven, i gat hop i stap blong ol famli—long wol ia mo long heven.

Sam Aedia blong Skripja Stadi blong Yuwan

“Famli hem i stamba blong plan blong Krieta.”

“Famli: Wan Ofisol Toktok I Go Long Wol,” i klia se hem i abaot ol famli. Be tu, hem i abaot plan ia blong God blong fasin blong sevem man. Wan wei blong stadi long ofisol toktok, hem i blong luk long wanem hem i stap tijim abaot laef blong yumi bifo laef long wol ia, insaed long wol ia, mo afta long laef long wol ia. ?Wanem nao yu lanem taem yu stadi long ofisol toktok ia long wei ia? ?Olsem wanem nao hemia i helpem yu blong andastanem from wanem mared mo famli, oli impoten long plan ia blong God?

Luk tu long Dallin H. Oaks, “The Plan and the Proclamation,” Ensign o Liahona, Nov. 2017, 28–31.

“Hapines insaed long famli laef i gat gudfala janis blong kamtru sapos laef insaed long famli i stanap long ol tijing blong Lod Jisas Kraes.”

Tingting long ol paragraf sikis mo seven blong famli ofisol toktok olsem wanem paten blong “hapines insaed long famli laef.” Taem yu stap ridim tufala paragraf ia, faenemaot olgeta prinsipol blong “ol mared mo famli we oli gat sakses.” Afta, tingting abaot wan famli rilesensip we yu wantem mekem i kam strong moa. ?Wanem nao yumi filim insperesen blong go mekem? ?Olsem wanem nao bae yu yusum Sevya insaed long ol hadwok blong yu?

Luk tu long Richard J. Maynes, “Establishing a Christ-Centered Home,” Ensign o Liahona, May 2011, 37–39; vidio: “What Matters Most,” ChurchofJesusChrist.org.

“Bambae [mi] mas ansa long fes blong God” from fasin we mi stap tritim famli blong mi.

Famli Ofisol Toktok insaed long hem i gat ol gudfala blesing we Papa long Heven i bin promesem long olgeta we oli stap folem kaonsel blong Hem. Mo tu, insaed long hem i gat ol strongfala woning long olgeta we oli no stap mekem folem ol kaonsel ia. Tingting blong mekem wan lis blong ol blesing mo ol woning we yu faenem.

?Olsem wanem nao, yu yu stap tekem aksen folem kaonsel blong God insaed long ofisol toktok ia? Sapos bae yu stanap long fored blong God tedei, ?wanem nao yu filim se bae yu strong inaf blong toktok raon wetem Hem abaot ol famli rilesensip blong yu? ?Wanem nao yu nid blong kam antap long hem?

Luk tu long Alma 5:15–22; Doktrin mo Ol Kavenan 42:22–25; 93:39–44.

Ol papa mo mama oli sapos blong lukaotem ol pikinini blong olgeta wetem lav mo stret mo gud fasin.

?Bae mi save kasem ol blesing we Lod i promesem sapos famli situesen blong mi i no stret tumas?

Elda D. Todd Christofferson i bin tijim: “Blong talemaot long wol ol stamba trutok long saed blong mared mo famli, hem i no minim se yumi no lukluk o yumi daonem ol sakrifaes mo ol sakses blong olgeta we, gud famli, i wan ril samting long taem naoia. … Evriwan i gat ol presen; evriwan i gat ol talen; evriwan i save tekpat long wok blong mekem tabu plan i hapen, insaed long wanwan jeneresen. Plante long ol samting ia oli gud, plante long ol samting ia, i nid—iven, samtaem evri samting ia we yu nidim blong naoia—yufala i save kasem long ol situesen we i jes nogud nomo. Wetem tras, mifala i testifae se Atonmen ia blong Jisas Kraes, olsem we plan i stap, mo long en, bambae i kam fulumap spes blong eni hadtaem o lus we i stap blong olgeta we oli tanem olgeta i go long Hem. I no gat wan i stap we, fiuja blong hem, oli putum finis se bae hem i no save kasem evri samting we Papa i gat long ol pikinini blong Hem” (“Why Marriage, Why Family,” Ensign o Liahona, May 2015, 52).

Sam Aedia blong Famli Skripja Stadi mo Famli Haos Naet

“Blong stap olsem man o woman, hem i wan stamba samting we i save talem stret huia nao yumi olsem man mo woman long ol tri defren laef we i stap, hemia laef bifo yumi kam long wol ia, laef long wol ia, mo laef we bae i kam afta mo from wanem hem i olsem.”Sapos bae i helpem famli blong yu, yufala i save toktok raon long doktrin we i go wetem fasin blong stap olsem wan man o wan woman, mo fasin blong laekem wan we i sem seks olsem yu; olgeta risos ia oli save helpem yufala: Dallin H. Oaks, “Trutok mo Plan,”   Liahona, Nov 2018, 25–28; Gospel Topics, “Same-Sex Attraction,” topics.ChurchofJesusChrist.org.

“Tabu plan blong hapines.”Blong helpem famli blong yu i luk hamas ol famli oli impoten long plan blong Papa long Heven, yu save raetem laef bifo laef long wol ia, laef long wol ia, laef afta long ded long trifala seksen blong wan pis pepa. Tugeta, lukluk tru long ofisol toktok, mo raetem long wan pis pepa wanem yufala i stap lanem abaot wanwan pat ia blong plan blong God. ?From wanem ol famli oli impoten tumas long God?

“Ol famli oli save stap wan blong taem we i no save finis.”Yufala i save wajem vidio ia: “Plan of Salvation—We’re Still a Family” (ChurchofJesusChrist.org). Luklukgud insaed long famli ofisol toktok blong faenem ol trutok we yang man ia, insaed long video, i bin andastanem mo hemia i bin helpem hem blong gat fet.

“Hapines long famli laef blong mi.”Blong toktok raon long wei blong kasem moa “hapines insaed long famli laef” blong yu, yufala i save singsing tugeta wan singsing olsem “Home Can Be a Heaven on Earth” (Hymns, no. 298). ?Wanem nao yumi lanem aot long singsing ia mo long famli ofisol toktok we bae i tekem moa hapines i kam insaed long famli blong yumi? ?Olsem wanem nao bae yumi mekemsua se famli blong yumi “i stanap long ol tijing blong Lod Jisas Kraes”? Tingting blong jusum wan tijing we yu wantem wok long hem long wik ia.

“Mekem famli i kam strong moa olsem stamba yunit blong sosaeti.”?Olsem wanem Setan i stap traem blong mekem ol famli oli nomo strong insaed long wol ia? ?Olsem wanem yumi save mekem pat blong yumi blong mekem ol famli oli kam strong moa? Blong gat sam aedia, luk long mesej blong Sista Bonnie L. Oscarson “Defenders of the Family Proclamation” (Ensign o Liahona, May 2015, 14–17).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Home Can Be a Heaven on Earth,” Hymns, namba 298.

Stap Kam Antap long Stadi blong Yuwan

Faenem lav blong God. Presiden M. Russell Ballard i tijim: “Gospel i wan gospel blong lav—lav long God mo lav long wanwan long yumi” (“God’s Love for His Children,” Ensign, May 1988, 59). Taem yu stap ridim Famli Ofisol Toktok, tingting blong raetemdaon o makem ol pruf blong lav we God i gat long yu.