“4–10 Jenuware. Josef Smit—Histri 1:1–26: ‘Mi Bin Luk Wan Laet, I Saen Antap I Kamdaon,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“4–10 Jenuware. Josef Smit—Histri 1:1–26,” Kam Folem Mi—Blong Wanwan Man, Woman mo Famli: 2021
Tabu Bus, i kam long Greg K. Olsen
4–10 Jenuware
Josef Smit—Histri 1:1–26
“Mi Bin Luk Wan Laet, I Saen Antap I Kamdaon”
Taem yu ridim Josef Smit—Histri 1:1–26, ?wanem mesej nao yu faenem blong yusum long laef blong yu? ?Wanem i moa impoten long yu mo famli blong yu?
Raetemdaon Ol Filing mo Tingting blong Yu
Doktrin mo Ol Kavenan i wan buk blong ol ansa long ol prea: plante long ol tabu revelesen insaed long buk ia, oli kam olsem ol ansa long ol kwestin. So hem i stret blong stat stadi long Doktrin mo Ol Kavenan taem yu tingting long kwestin ia we i stat blong mekem se revelesen blong lata-dei ia i gohed blong kam—hemia we Josef Smit i bin askem long wan tabu bus blong ol tri long 1820. Wan “wo ia blong ol toktok mo raorao blong ol tingting” (Josef Smit—Histri 1:10) i bin mekem se Josef i konfius abaot relijin mo sol blong hem long taem ia; ating bae yu save folem long ples ia. I gat plante tingting blong raorao mo ol voes blong giaman long dei blong yumi, mo taem yumi wantem stretem gud ol mesej ia mo faenem trutok, yumi save mekem wanem Josef i bin mekem. Yumi save askem ol kwestin, stadi ol skripja, tingting hevi, mo askem stret God. Long ansa blong prea blong Josef, wan laet i kam antap long heven; God Papa mo Jisas Kraes i bin kamaot mo ansarem ol kwestin blong hem. Testemoni blong Josef abaot merikel eksperiens ia i talemaot klia se sipos wan man “we i [no gat] waes, hem i mas askem long God, mo kasem” (Josef Smit—Histri 1:26). Yumi evriwan i save kasem, sapos i no wan visen we i kam long heven, be wan visen we i klia, we laet blong heven i kavremap.
Sam Aedia blong Skripja Stadi blong Yuwan
Josef Smit i Profet blong Restoresen.
Stamba tingting blong Josef Smit Histri hem i blong putum yumi “long wan ples we ol trutok i stap long hem” from evri trutok abaot Josef, plante taem man i sakemaot (Josef Smit—Histri 1:1). Taem yu ridim Josef Smit—Histri 1:1–26, ?wanem i mekem testemoni blong yu abaot tabu koling blong hem i kam strong moa? Tekem not long ol pruf we yu faenem se Lod i bin rere long Josef Smit from misin blong hem olsem wan profet. Taem yu rid, ating yu rekodem tu ol tingting mo filing blong yu abaot Josef Smit.
Luk tu long Saints, 1:3–19
Sapos mi askem wetem fet, God bae i ansa.
?I bin gat wan taem we yu “nogat waes” o filim konfius long wan desisen we yu nidim blong mekem? (Josef Smit—Histri 1:13). ?Wanem nao yu lanem aot long eksperiens ia blong Josef Smit long ol ves 5–20? Tingbaot nid blong yuwan blong gat waes mo bigfala save, mo tingting long olsem wanem nao bae yu save faenem trutok.
Luk tu long Fas Nifae 10:17–19; 15:6–11; Russell M. Nelson, “Revelesen blong Jos, Revelesen blong Laef blong Yumi,” Liahona, Mei 2018, 93–96.
Yumi save askem ol kwestin blong yumi long God tru long prea.
?From wanem i gat defdefren stori blong Fas Visen?
Long laef blong hem, Josef Smit i bin rekodem eksperiens blong hem long Tabu Bus kolosap fo taem, plante taem hem i yusum wan i raet blong hem. Antap long hemia, sam sekenhan stori hem i olgeta we oli bin harem Josef i tokbaot visen blong hem mo oli bin raetem. Nomata ol stori ia oli defdefren long sam pat, dipen nomo huia olgeta we oli stap lisin, be oli semmak evriwan. Mo wanwan stori i go moa dip we i helpem yumi blong andastanem gud moa eksperiens blong Josef Smit, jes olsem we ol fo Gospel oli helpem yumi andastanem gud moa ministri blong Sevya.
Blong ridim ol nara stori blong Josef, luk “First Vision Accounts” (Gospel Topics, topics.ChurchofJesusChrist.org). ?Wanem nao yu lanem taem yu stap ridim evri stori ia?
Fas Visen i statem Restoresen blong Gospel blong Jisas Kraes.
Josef Smit i trastem se God bae i ansarem laef blong hem, be hem i no save olsem wanem ansa ia bae i jenisim laef blong hem—mo blong wol. Taem yu rid abaot eksperiens blong Josef, tingting hevi long olsem wanem Fas Visen i bin jenisim laef blong yu. Eksampol, ating yu komplitim sentens ia long defren wei: “From we Fas Visen i bin hapen, mi save se …” ?Olsem wanem yu bin kasem blesing from Fas Visen?
Mo tu, luk long vidio ia: “Ask of God: Joseph Smith’s First Vision,” ChurchofJesusChrist.org; Saints, 1:14–19; Russell M. Nelson, “Lisin Gud long Hem,” Liahona, Mei 2020, 88–92.
Mi save gohed blong stap tru long wanem we mi save, iven sapos ol narawan oli no wantem lisin o akseptem mi.
Wan long olgeta blesing blong gat ol skripja, i we oli gat ol eksampol we i save givim insperesen, blong ol strong man mo woman we oli bin fesem ol jalenj wetem fet long Jisas Kraes. Taem we Josef Smit i bin fesem fasin blong agens from visen blong hem, hem i tekem hem se hem i olsem Aposol Pol, we oli bin agensem hem tu from hem i stap talem se hem i bin luk wan visen. Taem yu stap ridim stori blong Josef, ?wanem nao i givim insperesen long yu blong yu gohed blong stap tru long testemoni blong yu? ?Wanem nara eksampol nao—aot long ol skripja o ol pipol we yu save olgeta—i givim yu strong paoa long tingting blong stap tru long ol eksperiens long saed blong spirit we yu bin gat?
Sam Aedia blong Famli Skripja Stadi mo Famli Haos Naet
-
Josef Smit—Histri 1:6.?Olsem wanem yumi save handelem ol samting we yumi no agri tugeta long olgeta, be long semtaem, yumi no raorao wetem narawan from, semmak olsem ol pipol we oli tokbaot long ves ia?
-
Josef Smit—Histri 1:11–13.Sapos ol memba blong famli oli ridim olgeta ves ia, i save givim insperesen long olgeta blong oli serem ol eksperiens blong olgeta abaot taem ia we wan skripja i bin tajem hat blong olgeta mo i bin givim insperesen long olgeta blong oli tekem aksen.
-
Josef Smit—Histri 1:16–20.Taem we famli blong yu i stap ridim olgeta ves ia, tingting blong soem peinting we i kam wetem aotlaen ia, o wan nara pikja blong Fas Visen (maet bae famli blong yu i laekem blong droem peinting blong olgetawan abaot taem ia). Mo tu, yufala i save wajem vidio ia, “Ask of God: Joseph Smith’s First Vision” (ChurchofJesusChrist.org). Wanwan long yufala i save mekem wan lis blong ol trutok we yumi stap lanem aot long visen ia, mo afta, serem ol lis ia wetem wanwan long yufala bakegen. Hemia bae i wan gud taem blong invaetem ol memba blong famli blong oli serem olsem wanem oli bin kasem ol testemoni blong olgeta abaot Fas Visen blong Josef Smit.
-
Josef Smit—Histri 1:17.Taem we God i bin kamaot long Josef Smit, Hem i bin singaotem Josef long nem blong hem. ?Wetaem nao ol memba blong famli blong yu oli bin filim se Papa long Heven i save huia olgeta stret?
-
Josef Smit—Histri 1:21–26.?Olsem wanem nao yumi save ansa taem we ol pipol oli stap kwestinim testemoni blong yumi?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Prea blong Josef Smit,” STSP pej 14.
Ol Voes blong Restoresen
Famli blong Josef Smit
Yumi evriwan, famli laef blong yumi i tajem yumi bigwan, mo i bin semmak nomo wetem Josef Smit. Ol strong bilif mo praktis blong papa mo mama blong Josef i bin planem ol sid blong fet we i bin mekem se Restoresen i save hapen. Ol rekod blong jenol blong Josef i rekodem hemia: “Ol toktok mo lanwis oli no naf blong talemaot tangkyu blong hat blong mi we i gat kaon from long God from Hem i bin givim mi wan papa mo mama we tufala i gud tumas mo gat ona.”1
Ol toktok ia we hem i kwotem, we oli kam long mama blong hem, Lusi Mak Smit; brata blong hem, Wiliam Smit; mo Profet hemwan, i givim yumi wan smol lukluk long paoa blong relijin insaed long hom blong famli Smit.
Famli blong Josef Smit, i kam long Dan Baxter
Lusi Mak Smit
“Samples raon long 1802, mi mi kasem wan bigfala sik. … Mi talem long miwan se mi no rere blong ded from se mi no save ol wei blong Kraes, mo long mi, i luk se i gat wan hol we i tudak mo mi stap filim miwan insaed long hem, we i stap bitwin mi mo Kraes, we mi no traem nomo blong krosem. …
“Mi lukluk long Lod mo askem plante taem, mo plis long Lod se bae Hem i lego mi mi laef blong mi save lukaot ol pikinini blong mi oli kam bigwan, mo blong mi save givim kamfot long hasban blong mi; from hemia, mi ledaon ful naet. … Mi bin mekem kavenan wetem God se bae Hem i letem mi mi laef blong mi save traem strong blong kasem relijin ia we bae i save mekem mi wok blong Hem long raet wei, sapos hem i long Baebol, o weaples bae mi faenem, iven sapos mi mas kasem aot long heven tru long prea mo fet. Long en, wan voes i toktok long mi i talem se: ‘Yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala. No mekem hat blong yufala i trabol. Huia i stap biliv long God, i stap biliv tu long mi.’ …
“Stat long tetaem ia i go, mi gogohed blong kasem paoa. Mi no tokbaot tumas abaot topik ia blong relijin, i nomata we i stap fulwan long maen blong mi, mo mi bin ting se bae mi tingting strong long hem stret afta we bae mi save toktok long sam man blong God we oli save long ol wei blong God, blong oli save givim instraksen long mi long saed blong ol samting we oli blong heven.”2
Wiliam Smit
“Mama blong mi, we i wan woman we i biliv strong long God, mo i intres moa long gudlaef blong ol pikinini blong hem, we oli laef long wol ia mo long nekis laef, i bin yusum evri rod we lav blong hem olsem wan mama i save poenem hem long hem, blong mekem se bae mifala i mas lukaot, blong sol blong mifalawan bakegen, fasin ia blong sevem mifala, o (olsem toktok blong bifo i talem,) ‘blong go insaed long relijin.’ Hem i putum se i faswan long laef blong mifala, blong mifala i mas go long ol miting, mo kolosap ful famli i kam intres long hemia, mo kam ol man blong stap lukaotem trutok.”3
“Folem hamas we mi save tingbaot, oltaem mifala i stap gat famli prea. Mi tingbaot gud se papa bae i putum ol aeglas blong hem insaed long poket blong sothan jaket blong hem, … mo taem mifala, ol boe, i stap luk se han blong hem i stap lukaot ol aeglas blong hem, mifala i bin save se i bin saen ia se bae mifala i rere blong mekem prea, mo sapos mifala i no luk, bae mama i talem: ‘Wiliam,’ o huia i no bin luk, ‘go rere from prea.’ Afta long prea, i gat wan singsing we bae mifala i singsing long hem.”4
Josef Senia mo Lusi Smit i bin tijim famli blong tufala blong stadi long ol skripja.
Josef Smit
“Naoia mi talem se, long laef blong hem, mo long save blong mi, papa blong mi, i neva mekem wan nogud aksen we bae oli talem se i wan aksen we i no naes. Mi lavem papa blong mi, mo ol memori blong hem; memori ia blong ol gudfala wok blong hem, i stap hevi tumas long maen blong mi; mo plante long ol kaen toktok blong hem olsem wan papa, mi raetem olgeta long ol buk blong hat blong mi. Long mi, wanem i tabu i stap, oli ol tingting we mi holemtaet gud abaot histri blong laef blong hem, we mi pasem tru long maen blong mi mo mi planem i stap ia, hemia folem wanem mi bin luk stat long taem we mi bon i kam. … Mama blong mi tu, i wan long ol hae woman, mo i beswan long evri woman.”5
Fas Visen blong taem blong Restoresen, i kam long Michael Bedard