“11–17 Jenuware. Doktrin mo Ol Kavenan 2; Josef Smit—Histri 1:27–65: ‘Hat blong Ol Pikinini Bae I Tanem I Go long Ol Papa blong Olgeta,’” Kam Folem Mi—Blong Wanwan Man, Woman mo Famli: Doktrin mo Ol Kavenan 2021 (2020)
“11–17 Jenuware. Doktrin mo Ol Kavenan 2, Josef Smit—Histri 1:27–65,” Kam Folem Mi—Blong Wanwan Man, Woman mo Famli: 2021
Hem i Bin Singaotem Mi long Nem blong Mi, i kam long Michael Malm
11–17 Jenuware
Doktrin mo Ol Kavenan 2; Josef Smit—Histri 1:27–65
“Hat blong Ol Pikinini Bae I Tanem I Go long Ol Papa blong Olgeta”
Tabu Spirit i save tijim yu evri taem we yu stap ridim ol skripja—iven ol skripja we yu bin ridim fulap taem bifo. So, mekem maen blong yu i open long ol niu tingting mo insperesen we oli kam long Spirit.
Raetemdaon Ol Filing mo Tingting blong Yu
I bin tri yia finis we God Papa, mo Pikinini blong Hem, Jisas Kraes, Tufala i kamkamaot long Profet Josef Smit insaed long bus blong ol tri, be Josef i no bin kasem sam moa revelesen stat long tetaem ia i kam. Nao hem i stat blong askem hemwan se hem i gat rong long fes blong Lod. Olsem yumi evriwan, hem i bin mekem ol mistek, mo hem i filim se ol mistek ia oli wan panismen long hem. Be yet, God i bin gat wan wok blong hem i mekem. Mo wok ia we God i singaotem Josef blong mekem, i joen wetem wanem God i stap askem long yumi. Josef bae i tekem Buk blong Momon i kam; ?wanem nao God i bin askem yumi blong mekem wetem buk ia? Josef bae i kasem ol ki blong prishud blong tanem hat blong ol pikinini i go long ol papa blong olgeta; ?olsem wanem nao yumi stap tanem hat blong yumi i go long ol bubu blong yumi? Josef i tokbaot ol profesi we bae oli hapen i no longtaem; ?wanem nao pat blong yumi blong mekem olgeta profesi ia oli kamtru? Taem yumi tekpat long wok ia blong God, yumi save se bae yumi fesem agens, mo iven, man bae i mekem nogud long yumi, semmak nomo olsem we Profet i bin talem. Be yumi save gat fet tu se Lod bae i mekem yumi kam ol tul blong wok long han blong Hem, semmak olsem we Hem i bin mekem wetem Josef.
Luk tu long Saints, 1:20–48.
Sam Aedia blong Skripja Stadi blong Yuwan
God i gat wan wok blong mi mekem.
Taem yu stap ridim Josef Smit—Histri 1:27–33, tingting se God i gat wan wok blong yu mekem, semmak olsem we Hem i bin mekem wetem Josef Smit. Tingting long invitesen ia we i kam long Presiden Russell M. Nelson: “Askem Papa blong yu long Heven, long nem blong Jisas Kraes, se Hem i filim olsem wanem abaot yu mo misin blong yu long wol ia. Sapos yu askem wetem tru tingting, wetem taem, bae Spirit i wispa trutok blong jenisim laef blong yu, long yu. … Mi promesem yu se taem yu stat blong kasem wan smol pis ia long hao nao Papa long Heven i luk yu, mo wanem Hem i stap dipen long yu blong mekem blong Hem, !laef blong yu bae i neva semmak bakegen!” (“Becoming True Millennials” [wol divosen blong ol yang adalt, 10 Jen 2016], broadcasts.ChurchofJesusChrist.org).
Maet samtaem yu save filim olsem we Josef Smit i bin filim long ol ves 28–29. ?Wanem samting yu save lanem aot long eksampol blong Josef abaot wanem blong mekem taem we ol aksen blong yu oli no go wetem wok we God i bin singaotem yu blong mekem?
Insaed long Buk blong Momon, i gat “gospel we i fulwan we i no gat en.”
Taem yu stap ridim Josef Smit—Histri 1:34–65, tingting se wanem ditel long ol ves ia bae oli kamaot klia long yu sapos yu neva bin harem abaot Buk blong Momon bifo. Olsem wan we i stap biliv, ?from wanem nao stori ia i impoten long testemoni blong yu abaot Buk blong Momon?
Tingting long olsem wanem nao Buk blong Momon i stap mekem ol profesi ia oli kamtru; hemia ol profesi we oli stap long Aesea 29:4, 11–18.
Restoresen blong gospel i mekem ol profesi blong bifo oli kamtru.
Moronae i bin kwotem Josef long plante profesi blong OlTesteman mo Niu Testeman, olsem Aesea 11; Ol Wok 3:22–23; mo Joel 2:28–32. ?From wanem olgeta profesi ia oli bin impoten blong Josef i mas save olgeta? ?From wanem oli impoten blong yu yu save olgeta?
?Elaeja i bin putumbak wanem?
Presiden Henry B. Eyring i talem se: “Hem i impoten blong save from wanem Lod i bin promesem blong sendem Elaeja i kam. Elaeja i bin wan hae profet wetem bigfala paoa we God i givim long hem. Hem i bin holem paoa ia we i moa hae evriwan we God i stap givim long ol pikinini blong ol man: hem i bin holem siling paoa, paoa blong joenem man long wol ia, mo mekem i joen tu long heven” (“Hearts Bound Together,” Ensign o Liahona, May 2005, 78).
Luk tu long Doktrin mo Ol Kavenan 110:13–16; David A. Bednar, “Yufala I Mas Bildim Haos Ia long Nem blong Mi,” Liahona, Mei 2020, 84–87.
Palmaera Niu Yok Tempol. Ol famli oli sil insaed long tempol tru long paoa we Elaeja i bin putumbak.
Elaeja i kam blong tanem hat blong mi i go long ol bubu blong mi.
?Wanem toktok olsem “planem,” “hat,” mo “tanem” long seksen ia oli stap tijim abaot misin blong Elaeja mo olgeta blesing blong ol prishud ki we hem i bin putumbak? ?Olsem wanem nao yu bin filim hat blong yu i tanem i go long ol bubu blong yu? Tingting long sam wei we yu save filim olgeta samting ia plante taem moa. Maet yu save askem wan famli blong i serem wan stori wetem yu abaot wan long ol bubu blong yu—mo iven moa gud, yu save raetemdaon stori ia. Mebi yu save faenem nem blong wan bubu we i ded we i neva kasem ol odinens blong gospel, mo afta, mekem wok ia insaed long tempol.
Sam Aedia blong Famli Skripja Stadi mo Famli Haos Naet
-
Josef Smit—Histri 1:28–29.?Olsem wanem nao Josef Smit i bin filim abaot ol mistek blong hem? ?Wanem hem i bin mekem blong fesem olgeta filing ia blong hem? ?Wanem nao yumi lanem aot long hem abaot wanem blong mekem taem yumi mekem ol mistek?
-
Josef Smit—Histri 1:33–54.Yu save askem wan memba blong famli blong ridim laod wan pat, o evri mesej blong Moronae we i kamaot long Josef Smit—Histri 1:33–42 fo taem (from se Moronae i bin ripitim mesej ia fo taem). Bitwin wanwan riding, askem ol nara memba blong famli blong serem wanem oli tingbaot aot long mesej ia, mo no lukluk long ol skripja blong talem hemia. ?From wanem Lod i bin ripitim ol impoten mesej plante taem? ?Wanem nao ol nara wei we Lod i stap tijim yumi tru long fasin blong ripripitim ol samting?
-
Doktrin mo Ol Kavenan 2:2Blong helpem ol pikinini blong andastanem “ol promes we God i mekem long ol papa,” yufala i save ridim Ebraham 2:9–11 tugeta, o wajem vidio ia: “Special Witnesses of Christ—President Russell M. Nelson” (ChurchofJesusChrist.org). Faenemaot ol promes we God i bin mekem olsem pat blong kavenan blong Hem wetem Ebraham. ?Olsem wanem yumi stap “planem” olgeta promes ia insaed long hat blong yumi?
-
Doktrin mo Ol Kavenan 2:2–3.Blong helpem ol memba blong famli blong tanem hat blong olgeta i go long papa blong olgeta (o ol bubu blong olgeta), yu save invaetem olgeta blong oli lan abaot wan bubu mo blong oli serem wanem we oli lanem wetem haf blong famli we i stap. ?From wanem Lod i wantem yumi blong lanem abaot ol memba blong famli blong yumi mo mekem ol tempol odinens blong olgeta? ?Olsem wanem nao yumi kasem blesing taem yumi tekpat long famli histri mo tempol wok? (Luk long Dale G. Renlund, “Famli Histri mo Tempol Wok: Siling mo Hiling,” Ensign o Liahona, Mei 2018, 46–49).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Family History—I Am Doing It,” Children’s Songbook, 94.
Stap Kam Antap long Stadi blong Yuwan
Yusum ol skripja stadi help tul. Ol tul olsem ol futnot, Topical Guide, Bible Dictionary, Gaed long Ol Skripja, mo ChurchofJesusChrist.org oli save helpem yu blong andastanem gud moa ol pipol, ol taem, mo ol sentens insaed long ol skripja.
Josef I Kasem Ol Buk, i kam long Gary E. Smith